قاسم فتح الباب بهدوء.. ودخل الغرفه، اتفاجئ لما شاف أوليان وهي قاعده الكرسي وسانده راسها على الطاوله اللي مجهزه عليها الأكل.. وهي نايمه مكانها ولابسه قميص لونه احمر طويل وعليه الروب بتاعه..
قاسم عرف انها استنته كتير .. ابتسم بتعب وقرب منها..
قاسم بحنان وهو بيحط ايده على شعرها : أوليان.. قومي يا حبيبتي!
أوليان فتحت عيونها ببطئ وبصتله بنعاس وهي بتتكلم بصوت ضعيف وراسها لسه على الطاوله : قاسم.. انت جيت؟ انا مستنياك من بدري !
وغمضت عيونها تاني.. قاسم ابتسم ابتسامه واسعه ومال شالها من على الكرسي..
اتعلقت في رقبته وحطت راسها على كتفه..
قاسم حطها على السرير.. وغطاها كويس وباس راسها ، وراح أخد هدوم ودخل الحمام عشان ياخد شاور دافي..
خرج بعد نص ساعه من الحمام وهو بينشف شعره.. قعد على السرير قريب من أوليان..
سند ظهره على السرير من ورا وقعد يلعب في شعرها بخفه وهو سرحان فيها..بص قدامه بشرود ومستني الآذان يأذن..
قعد فتره لغاية ما سمع صوت الآذان بتاع الفجر..
أوليان اتحركت اول ما سمعت صوت الآذان ، وقامت اتعدلت وهي بتمسح على وشها بكسل عشان تمشي آثار النوم..
شافت قاسم قاعد جنبها وهو متابعها ببرود..
أوليان بصتله وهي بتقول بهمس ناعس : جيت امتى؟
قاسم قام من على السرير بضيق : من ساعتين..
أوليان الدموع اتجمعت في عيونها وسكتت وهي باصه على ضهره وهو ماشي..
اتكلمت بصوت ضعيف : طيب اسخنلك الأكل.. ؟اكيد جعان!
قاسم اتكلم بهدوء : لا.. اتعشيت.!
و دخل الحمام يتوضى..