أوليان وهي بنفي وبتقول بعد ما سحبت ايدها وبتديله لقمه تانيه : الكلام ده قبل ما نتجوز.. مش احنا اتفقنا امبارح اننا هنتشارك كل تفاصيلنا؟ ليه بقى مش بتشاركني همومك؟ انا بس اللي بعمل بالاتفاق ده وانت لا!
قاسم وهو بياكل من ايدها : اوعدك.. حلو كده!
هزت راسها بنعم وهي بتمد ايدها تاني!
قاسم بضيق مصتنع وهو بياكل من ايدها : على فكره بعرف آكل لوحدي..
أوليان هزت كتفها وبصتله ببراءه.. وكملوا فطار وأوليان صلت عشان تبدأ يومها بالبركه..
في الليل..
أوليان بإستعجال وهي بتلف حوالين نفسها : باقي ايه يا أوليان؟ باقي ايه…
قاسم وهو بيهمسلها جنب ودنها من وراها بخبث : أهم حاجه..
أوليان لفتله وهي بتلف وبتبصله بلهفه : ايه هي؟
قاسم قرب من ودنها بخبث اكبر :………..
أوليان شهقت بصدمه وهي بتزقه بقوه بعيد عنها.. ووشها احمر من الخجل وبتقول بتوتر وحده : بس يا قاسم..
قاسم ضحك بقوه وهو بيحط ايده على كتفها : يا حبيبتي ما انتي اللي متوتره وموتراني معاكي.. هو اسبوع وهنرجع وانتي اخدتي حاجات كتير اوي!
أوليان وهي بتهز راسها وبتقضم ضوافرها : لا لا لا.. انا حاسه اني ناسيه حاجه!
قاسم وهو بيرفع وشها بصوباعه : اهدي خالص.. احنا أخذنا كل حاجه مهمه.. يلا بقى هاتي شنطتك ويلا عشان طريق المطار طويل..
أوليان هزت راسها واخدت شنطتها والورق وخرجت مع قاسم من الغرفه..
نزلوا تحت اتلاقوا الخدم نزل الشنط وخرجوا من الفيلا.. ودخلوا السياره..
قاسم وهو بيمسك ايدها وبيقول للشوفير : اتفضل يا عم محمد..
اتحركوا ووصلوا المطار بعد وقت طويل..