#########################
_ ياااااا مصيييبتي !! .. علي البااشااا اتجوز عليا !!!!!
قالتها فاطمة بصراخ و هي تلطم صدرها بعنف حين استمعت من مريم ما حدث في مساء الامس .. بينما نظرت لها سناء ساخره ببسمة متفشية :
_ احسن و الله ده كان المفروض يعملها من زمان
نظرت لها فاطمة غاضبة تهتف لها :
_ و النبي نقطيني بسكاتك انتي يا سناء .. لازمن اعرف قصة البت دي ايه !!!
ثم نهضت لتغادر شقة حماتها التي تجلس فيها مع مريم و سناء و لكن دخل عماد و الحاجة وداد لتهتف لها :
_ اقعدي يا بطة جوزك متجوزش عليكي و لا حاجه !
نظرت لها بغضب تمصمص شفتيها بضيق هاتفه :
_ امال الحلوة اللي جوا دي تسميها ايه يا ماما الحاجة !!
نظرت لها وداد غاضبه تهتف بحزم :
_ اقعدي يا بت و اسمعي من عماد و هو هيقولك !
جلست علي مضض بينما قص لهم عماد ما حدث معهم امس ،، فشهقت مريم بفزع هاتفه :
_ يااااانهار ابيض ! .. يعني ابيه مدخل القتيلة بيتنا !
زجتها فاطمة بعنف تهتف بغيظ :
_ نقطيينا بسكاااتك يا مريم هو احنا ناقصين مصايب من تحت راس أخوكي !
_ قصدك ايه يا بطة .. هو علي الباشا عمره جاب مصايب ، و لا هتتبلي علي جوزك في غيابه !!
قالتها سناء تقصد اشعال الاجواء بين وداد و فاطمة ، لتنهض فاطمة من مكانها هاتفه بحزم لتنهي الحوار :
_ انا لا هبل و لا همسح ،،، الباشا مش صغير هو حر يعمل اللي هو عايزة ، و خليكي محضر خير يا سناء