كررتها بحماس ، لينظر لها مصدوما يهتف :
_ بت انتي متأكده انك جايه من أمريكا مش بتستعبطينا !! .. نكتة ايه دي اللي هتقوليها ! .. عرفتي النكت منين اصلا !!!
ابتسمت بمرح و جلست تربع قدميها علي الفراش هاتفه له :
_ ايوة أنا أمريكان .. بس النكتة دي نوسة و وليد هلمني (علمني) أقول نكتة
ابتسم ساخرا بينما يهتف لها بسخريه :
_ اهااااااااا قولتيلي نوسة و وليد .. طبعا هتبقي نكت بايخة زيهم !
ابتسمت بشده قبل ان تعيد سؤالها بحماس :
_ طيب قول نكتة بقي !!!
زفر بملل يهتف لها بضيق :
_ قولي نكتة ،و لو طلعت بايخة هلزق لك بقك علشان تتخمدي و اخلص بقي !
_ مش تهاف (تخاف)
_ طيب قولي يختي
ابتسمت باتساع تهتف له بفرحة :
_ مرة مذيعة وقهت (وقعت) من الدور الهامس (الخامس) قالت أحنا هلي الهوا !
نظر لها بصدمه قبل ان يسحب الوسادة من أمامه يضرب بها وجهها ، يلقيها فوق الفراش هاتفا بغضب :
_ طب اتخمدي علشان كده كتير علي مرارتي .. اتخمدي يا روسيل