رواية قلاع الضر

عنوان الحلقة (اللعيبة)
ردني ردني
يالبگتني
بليلة أجيتك
دورت روحي اعلئ روحي

 

لا شفتها ولا لگيتك
للشاعر الكبير (كاظم اسماعيل گاطع)
اذكر ذاك اليوم

 

بوسط بيت الطين .. كاعدين بالوسيعة
وامي لامتنا ثلث بنات تحت المسكف اتلاشينا وتغني : هيلا يا رمانة .. هيلا يمة .. من هي الزعلانة ؟ هيلا يمة .. ريحان الزعلانة هيلا يمة منهو اليواضيها ؟

 

واحنا نرد فرحانات : هيلا يمة
تغني واهي تحوك لعيبة الصوف .. عيونها تلاشينا لجن اذكر ملامحها وهي تعصر وجع بس ما تحب تبين تعبها وتكدرنا ..

 

نحن ثلث بنات مالنا ثالث
وامي حبلا بطنها جبيرة ما نعرف رابعنا ولد لو هم هيلة تكمل عكد الهيل من عدنا .
لكل وحدة بينا تحيكلها لعيبة

 

انا ( يازي) جبيرة امي عمري يطلع ثمن سنين
واول وحدة بخواتي حاكتلها لعيبة الصوف وخواتي تغورن مني ورادن من امي لعيبة ..
خفت حسها واهي تغني وهدت من ايدها اللعيبة

 

حاجيتها: يمة جرالج شي
كام تكضب بطارف جدمها وتعصر وجهه

كضبنا بيها ثلاثتنا واحنا ننده ( يمه يمه) وتردنا : ما بيه شي ، يازي اندهي على خالتج نظيمة كليلها امي جاي تولد
فزيت من مچاني ورحت اركض حفي لصوب اجدادي خاطر اكل لخالتي امي تولد .. ندهت لها ورديت على بيتنا لاكاني ابوي بذيج الملامح المغيمة وهو ينده ( اكفي انت هيي وين موليه )

 

– يابه امي جاي تولد وندهت لخالتي نظيمة
حجيتها وما نطرت منه حجوة رديت اركض للبيت دش وراي وهو يكللها ( اسمعي ينبعة هنوبة لو حطيتي بزريتج بنت والله ثم والله لا اكضبج انت وبناتج وادفنكم )

 

– رزق الله يمحمود انا شبيدي
– العدي كلته انا زلمة ورايد ولد يشيل اسمي اتفاخر بيه جدام اهلي وعموتي وعشيرتي ويندهولي ابو فلان .. اني يصيحولي باسم بنت ابو يازي .. والله لو جبتي العار هالنوبة لا ادفنج انت وهالحواوين الثلاث ذول

 

خياتي كل وحدة بيهن كاضبة لعيبة الصوف وجاعدات بالزوية
وامي ما ردت على صياح ابوي خلتو يصدح بالبيت وحدو وهي تعصر وجع
دخلت خالتي نظيمة ووياها مرة

 

وابوي يتكاون ويا امي جدامهن تصايحت وياه خالتي نظيمة واهو شتمها وطردها .. والمرة تصيح ( اطلعو غاد تكاونم خلوني اجيب المرة واولي )
باب انسد بكوة
وخلف هالباب صياح امي تطلك وحسها يصدح بكل نواحي البيت .. بيت طين .. بيه حجرة .. وووسيعة مسكفة على

 

زاويتها شعلة طبخ ودلة ماي .. االشمس يدش ضواها من بين المسكف
ملتفات ثلاثتنا ننطر جيابة امي واجسادنا مكشعرها من حس وجعها وابوي كعد عد الباب يدخن تتن وينطر احد يكلو ( مرتك بزرتلك ولد )

 

عكب هالصياح المد ساعات هود حس المرة وارتفع حس الجاهل ، زت التتن من ايده ودش للبيت دحك البناته واندار عنهن وهو ينده ( ابشري بالخير جابت ولد ؟)
طلعت المرة وكالتلو ( بالمبارك عليك بت رابعة )

 

عد ما سمع ببنت رابعة انتفض من غيضه وارعد بنص الوسيعة وهو يصرخ ( لا بارك الله بهالبزرة شحت بزريتي بكطعة هالبنااااات )
دفع الباب على امي وهي بفراش نفاسها جر جياده وكضبها وهو يكللها ( انا وش كلتلج بزرة البت ما رايدها

 

تبزريييين بنت ان ما نهيتج عن بزر البنات لو ما تسمعين الكاااااالة رايدة تدثرين اسمييي ما رايدتلي اسم بين العشيييييرة )
فزت امي بصوت جاتله التعب واهي تكله ( ما ادري عنها والله وعباده ماهو بيدي ) تلزمت بديه تحبحب بيهن نفرها

 

عنه وجر جياده (حزامه ) وكضبها جتلها ليما تعبت يمنته من الطك
اندار اميمسحونة بالكاع وتنحب بتعب وثغيب والمرة اللي جيبتها ذبت البت وشردت من البيت ونحن نتباجى بزاوية البيت .. شال الجاهلة البالنفاس واعزم على جتلتها .. تلزمت بجدامه وتتوسله يهد الجاهلة وهو دفرها ويحاول

 

يبعدها عنه
تكاوت وياه وكضبت بالبت وتكله ( علي عيشتهن والله ارعى واعيشهن بس هد بناتي ابخت الله احلفك ابخت الله ) واهو يجر بالجاهلة .. صرعته بصريخها وبواجيها زت الجاهلة عليه ورد جر جياده وكضبها وطبكنا وياها وتولانا طك

 

بجياده
فزعت الناس على صريخنا جروه من عدنا واهو يتوعد النا ساعة بدفن ساعة بحرك .. جرتنا مرة حاجة من الجوارين وخذتنا عدنا ليما اجو خوالي وخذونا منهم

 

اختارت امي نصل بعيدات عنه جم يوم خاطر يهدى ويرضى بگسمته، لجن مرات الايام والنار مستعرة بلشته من خلف هالبنات
خوالي ما انصفوا امي

 

عد ما كعدت عدهم فوك الثلث تيام ملوها وكاموا يكلولها : شنهي كعدتج هي ردي البيتج واحملي رجلج هادته وشايلة هالاربع بنات وزاته حملهن علينا
ردت امي مكسورة خاطر لبيت ابوي لجن ما رادها

 

من الباب طردها وما رضى ندخل وهو يكللها : شوفيلج ديرة تلفين بناتج ذن انا رايد اعرس بهالبيت رايدلي ولد يشيل اسمي ما اكسر ظهري على بزريتج
وهي تنحب وكاضبة بالباب تتوسلة ندش

 

ظل صاك الباب كعدت امي بالباب وبسطت بينا وحطت الجاهلة بحضنها تلايلها .. انا كاضبة لعيبة الصوف وادحك بيها : يمه ابوي ما راح يخلينا ندش ؟
– لا يمه يرضى لجنه بعده خلكه ضايك

 

– يمه اللعيبة بنية لو ولد
ضلت ادحك علينا وتتحسر جرت اللعيبة من ايدي ادحك بيها .. حجت بحسرة : اي يلعيبة الصبري احد صبر صبري ؟

 

واهي كاعدة مر زلمة واغتاض عد ما شافنا مطرودات على باب البيت .. دك الباب وعاتب ابونا وكالو : تنام ولحمك بالدرب شنهي غيرتك وين عنك كصتك ما عركت وانت نايم
دخلنا ليجوا وابوي طلع مدري وين

 

بهالليلة سمعنا صياح ونياح وناس تصيح ( الحك يمحمود محصولك وجر )
فزع ابو والناس يطفون النار
ونحن ملتفات بذيال امي واهي ادحك من الباب وتصيح : ابخت الله ربي استرنا وعافينا .

 

بساعة وحين محصول السنة مالت ابوي صبح ارماد
هين كبت النار براسه وكال: ما فكرني وزاد فكري الا هالمرة وبزرة البنات التذرها عليّ
كضب بامي جتلها وطردها من البيت هي و بت النفاس وحبس علينا بالحجرة .. هرجنا ببچانا وعويلنا ونحن نريد

 

امنا صبح الصبح كضبنا من كصايبنا يجرجرنا ولازم جيادة التفج ثمها من عدنا يطكها .
نحن سكتنا كل بالنا راح يودينا لامنا
لجن ما خذانا لبيت اجدادنا ركبنا بعربانة مطي وطلع بينا للسوك

 

كعدنا ثلاثتنا وهو يهددنا ( التفج ثمها اكطم راسها )
ما جنه نعرف شنهو اليريده ولا شنهو الراح يصير كعدنا من الخوف محد بيتنا تفج ثمها .. كاضبة لعيبة الصوف وخايفة لا ياخذها ويطكها هي النوبة

 

نحن ثلث بنات
انا يازي وخواتي نبعة ونورية
جانت عيوني ادحك بخوف شنهو الراحي جرى وكل الاريد اروح لامي ..

 

العرفتو من حجي الناس ويا ابوي رايد يبيعنا
وكتها ما فهمت شنهو يريد يبيعنا .. شمس الصبح صكعت بروسنا وابوي عازم امره ورايد بيعتنا
بيدي صوفة امي الحايكتها الي حاطة بيها خرزتين مثل العيون وخط بالخيط جارتو وشادة الصوفة وعاملتها لعيبة

 

صوف .. فد هاي اللعيبة الضلت بيدي تحملت وياي الطك مال ابوي كله .. ما خفت على روحي بكثر ما خفت ابوي ياخذ اللعيبة مني ويبيعها لو يبيعني وياخذها مني .
وكف زلمة جبير يحاجي ابوي ويكلو ( ما يصير بناتك ذن اذكر الله ) وهو يحجي فجت عينه علي وسعله ( البت هاي

 

بيش تبيعها ) دحكت بيه وهو يسعل ابوي !
ابوي اطاه السعر والناس ضجت تحاجي شلون يشتري البت بس الزلمة ما رد لحجيهم اطى فلوس جثيرة لابوي وكاله ( اصحى بزمانك ورد البنوات لامهن وهالبنت من اليوم ملك يميني )

 

دفعني ابوي وكلو : اخذها وابعد بيها ماني رايد شوفتها
دفعني وانا ادحك بخوفة جاهل بايعينه اهله
رديت ادحك بالولد الواكف ويا الزلمة .. يطلع بكبري

 

كضبت بلعيبتي حيل خفت ياخذوها مني .. جر ايدي الزلمة وكال : امشي .
مشيت وانا كاضبة اللعيبة وادير براسي ليورا ادحك خواتي ودمعتي تلالي بعيني واريد ارد بصوب خواتي ما اريد ابعد عنهن وعن امي

 

طلعنا السوك مشي وتيهت عيني ابوي وخواتي ما عدت اشوفهن .. دميعاتي كثرن على الوجنات وانا اسعل الزلمة ( عمي ردني لامي اريد امي )
ما رد علي اخذنا بالربل وصلنا عد بيت كلش جبير اكبر من بيت الطين مالنا .. فتت ورا الزلمة وهو ينده : سميعة يا

 

سميعة
– ابشر يماي عيني
– بشرج الله بخير البنت هذي وسعيلها مجان بهالكلعة

 

– منهي البنت ؟
دحك ليها وكاللها : امرها يمي .. وسعيلها ولا تسعلين عن الما يخصج
– تم على امرك

 

حطت ايدها على ظهرالبنت وكالتلها : امشي
ودخلت يازي كلعة خشان
خشان ازلمة اصله ابدوي .. ابوه من البدو واستقر بالكلعة بعد الزواج من ام خشان وعد موتت ام خشان الكلعة

 

اصبحت له .. هو ازلمة يطلع عمره نهاية العشرين ع الثلاثين .. اسمر طوخ وطويل.
عده ثلث نسوان
سميعة وعدها بس ولد واحد اسمه خالد

 

والثانية زهرة وخلفتله اثنين بنات غالية ومرجانة
والثالثة مليحة وهذه من خذاها ولهالساع ما بزرت ..
يندهلها (العاجر)

 

لجن خشان ادرك شحة خلفته ماهي علة بنسوانه انما لعنة صابته وصابة بزرته
وعد وصف وحدة من الصحرا نصحته يلاكي بت ما بالغة والها اوصاف غريبة بنت شعر احمر وعيون صفرة ياخذها ويخليها عده ليما تبلغ ويعرس عليها ..

 

خشان شاف هالمواصفات بيازي
يوصفونها ليازي جانت بنت بيضة وشعر راسها مايل للحمار وعيونها صفر بلون الشمس والنمش مطشر على وجناتها.

 

خذت سميعة الجاهلة وخلتها بحجرة العمة (ملكة )
ردتها العمة ملكة وهي تكلها : منهي الجاهلة ؟
– بنت جابها خشان مدري عن امرها ما رضى يحجي فد كال ( وسعيلها مجان) خلها عدج

 

اندارت ليازي تسعلها : منين انت يبعدي ؟
تغشعهم يازي بلا حجي بس الدموع متجمعات بنص عيونها بهضم تريد ، رد ملكة سعلتها : اهلج وين

 

– انا اريد ارد لامي
– عجل امج وين
– ابونا تكاون وياها

 

– خشان منين جابج
– مدري رايدة امي
ضلت وحدة تناظر بوجه اللخ ما مفتهمات السالفة شنهي كامت ملكة .. مرة يطلع عمرها بنهاية الاربعينات ما

 

معرسة عبن مو حلوة يندهولها ( المعنسة)
مشتله وهي تسلم عليه : الله بالخير
– الله بالخير والعافية

 

-شنهي سالفة هالجاهلة
– لها سالفة واجدة براسي خليها يمج ليما تكبر واخذها
– جايبها مرة الك

 

– ليما تكبر وتبلغ وتلحك اخذها
-منين جبتها
– ابوها اطاها الي بجم فلس محتاجهن بحرجت محاصيله

 

– انحرجت محاصيله وباع بنتو خاطر يعوضهن !!؟
– هذا الصار
طلعت وهي تفر بديها لاكتها سميعة وزهرة ( ها يملكة ؟)

 

– البنت زوجة رابعة
– يا زوجة والبنت ازغر من بزره
– يكول تلحك واخذها

 

– وعليش رايد زوجة رابعة وهو يدري خلفته شحيحة وما يخلف ما نحن ثلث نسوان ما عدنخلف تخلف هالجاهلة
صاح من وراهن : رايج العلة بيا يا سميعة انا العايب ما اخلف هاذ رايج
– الحشمه يراعي الدار لجن … صاح بيها
– فارجي ولا تخليني اكبل وجهج والاسمعها تحجي بعيب لا احطها وارجعها لبيوت اهلهن وتحرم الكلعة اعلى طبتها

 

بسرعة طشن عد ما شافنه اغضب
مشى لملكة وكاللها : البت تضل يمج هين ما اريدها تنصاب بسوء .. هالبنت هي الراح تذر بزرتي وبيها وبخلفتها ينشال اسمي باذن الله

 

نسوانه اغتاضن عد ما حجه بتوكيد ان هالجاهلة هي الراح تجيب خلفته وتحيي بزرته وتموت اللعن الصابته وصابت خلفته
كرهنها من ساعتها

 

سميعة : يولن تنطرن تذر بزريته والتصبح الكلعة بسور جلمتها
زهرة: وشنهو البدينا يسميعة كهر تالي ضيمنا وشكانا تجي جاهلة تبزرله وتركب فوكنا ونحن النصير شحيحات الخلفة ماهو العيب

 

– لاون نشوف دربانة لهالمعضلة ونبعد هالجاهلة من هين كبل لحاكها ( دورتها)
– وشلون ؟
– مدري فد لازم نفكر زين وكلش زين يولن لا ضلت هالجاهلة هين نصبح عبدات عدها ومالنا ذچر عده تصير هي

 

الاول والتالي ونحن الكاع الصبخة .
من اول يوم شدن حيلهن على جاهلة دمعتها ما جفت تريد امها
كعدنها رادن يعرفن منين هي ومنهو اهلها ما عرفن عبن هي مو من الديرة مالت خشان .. بغير ديرة

 

جانت الدير كل ديرة تضم اهلها وكرابتها
وكل منطقة مختصة بعشيرة معينة .. مو بكيف الواحد وين ما يجي يحط .. مثل هالديرة ما يصير ع الغريب يحط بيها الا لازم من كرابة خشان وعمومته وكرابتهم .. الغريب يهدون عليه ويشيلونه ..

 

يسمون الديرة الكاعد بيها خشان (ديرة عكاب) على اسم ابوه عبن هو الجابهم من البدو وكعدهم بالريف وحط اهله وعمومته وساعدهم يبنون بيوت طين ويستقرون هنا .. صارت الديرة باسمه.
نرجع لسالفتنا

 

ملكة اخت خشان فتنت على نسوانه وكالتله : نسوانك حطن رايهن على بعدت هالجاهلة خاطر لا تبزر وينحط العيب بيهن وانا اشوف بيوم يبعدن هالجاهلة وما تلاكيلها اثر
خشان ادرك نسوانه ما يريدن هالجاهلة بهالبيت فامن ملكة ع الجاهلة وكاللها ( هالجاهلة السبيل لوحيد لعلتي لو

 

فكدتها ينطكع ذجري بين العرب حطيها بين عيونج ولا تخليها تفارك عيونج )
كالتله ( ابشر )
وصدك كامت ما تخلي يازي تبعد من عيونها من تريد تلعب براحة الكلعة تحط السكملي وتجابلها وهي تلعب ويا

 

بنات خشان ومن تريد تطلع للكاع تاخذها وياها خاطر هم تعاونها وهم تبعدها من نسوان خشان
نسوان خشان كرهن ملكة كره الاسود
عبن كاعدة تحمي يازي من مكايدهن …

 

مر الشهر والشهرين ويازي بهالبيت محد سعل عنها من اهلها
امها عجزت وين تلاكي بتها بس محمود ابوها ما رضى يكللها المن بعت يازي
دورتها وجابت السوك كله واحد واحد تكضبو وتنشده : ما تعرف محمود المن باع بتي

 

وهم يكلولها ( لا والله ما نعرف )
من بعد ٩ اشهر طاحت بواحد يذكر هالحادثة وكاللها ؛ الاذكر اشتراها زلمة من ديرة عكاب ويمكنه صاحب الكلعة
مشت تنشد على ديرة عكاب وينه هي

 

لحد ما خذاها الوصف ووصلتها .. نشدتهم على صاحب الكلعة ودلوها .. من مشت ودكت الباب طلعت الها اخت خشان ( ملكة)
– اصباح الخير يهال الكلعة

 

– هلا وجثير الهله .. تفضلي
– ماني جاية اتفضل زاد الله بفضلج انا جاية وايدة اسعلج
– خير يا رب خير اسعلي ؟

 

– رايدة اسعلج اعلى بت يطلع عمرها تسع سنين اسمها يازي انا امها وانكطع كلبي اعلى فراكها وكالولي بهالديرة عد هالكلعة بحب الله وسولة بردي افادي وكليلي بنتي وين ذچرها
دحكت بيها وكالتلها : انا ضيفة بهالكلعة وما عرف شي عن الامر لو ردتي تعرفين لاون تسعلين صاحب الكلعة

 

– اعلي اهل الدار يمكنهم يعرفون شي عنها
– ما لحد جلمة فوك جلمة صاحب الكلعة يجي ويخبرج بامرها

 

– ووين الاكي
– روحي وارجعي باجر من صباحات الله كبل لا يطلع لدربه
– الدرب بعيد واهلنا ماهم جريبين احلفج بحب الله ورسوله تشوفيلي دربه هالساعة .

 

– الحين ماهو موجود .. وما يرد الا بغيبة الشمس انت اجبلي اعلى باجر وبحيل الله تلاكينه
سلمت امرها ام يازري وردت لديرتها متأملة تطلع الفجر وتجي تسعل على بتها .. اما ملكة فشكت الدرب وراحت لخشان وهي تنده : خشاااان يا خشااان

 

– اذكر الله واطي نفس راح تموتين شنهييي
– ام يازي
– ام يازي منهي وشتريد

 

– تريد بتها وجاية وكل حيلها تاخذ البت
– البت ملك يميني وانا اطيت حكها
– انا اشوف المرة هذي جاية وناوية على فضيحتك … كلي شلون لو فضحت بالديرة خشان مشتري بنت من

 

السوك ومانع امها منها وما يطيها .
– هذا حكي ما بكتها من احد انا خذتها من ابوها
– انا اكول تنكر يازي عدك واتعدى الفضيحك وكللها البت زوجتها لواحد من البدو وطلع للحجاز يرعى لو اجبل وبتج

 

وياه راح اطيج ذجر عنها وابلغج
– هي ما شافت البت
– لا خليتها تشوف البت ولا رضيت وحدة من نسوانك تدري عن الامر

 

– عجل امشي ونمشي بهالدرب ان شاءالله
يحجون بوسط مزرعة والحلال جدام خشان
وهو كاعد ليغاد عن الحلال .. زهرة جانت جاية وجايبة سطلة ماي خاطر تورد الحلال .. من شافت ملكة وخشان

 

يحجون بينهم وكفت ليغاد تتسمعلهم .. من عرفت السالفة .. حطت سطلة الماي .. وردت اعلى عجل تخبر مليحة وسميعة بالسالفة بالخبر.
سولفتلهن السالفة بما جرت حجت سميعة : هذا دورنا نلاكي المرة ونبلغها تاخذ بتها

 

مليحة : ولو عرف خشان احنا الخبرنا امها
زهرة :- ومنين يعرف لو حذرينا الام ما تكول عبن لا كالت خشان باخذ بتها
مليحة:- ونفتك من يازي لو خذتها امها؟ يا خوفي خشان يندل مجانهم ويردها ولا بينا ولا بسرايرنا

 

زهرة: عجل لزوم نكل للام تخفي البت لحين ما خشان يايس من لكوتها
مليحة :ولو عرف بينا نحن ورا السالفة ؟
سمعية : اكلج يولي شنهي سالفتج طلعتيلنا بالف معضلة انت ويانا لو علينا ؟

 

– انا وياجن لجن ما عايزنا مصايب تعرفن خشان من يوم جايب هالبنت هذه وهو ما مجابلنا ومتضايك من عدنا وحاسبنا خطر على هالبت ذي

 

– كلتيها هاجرنا والبنت بعدها جاهلة عجل لو واكعها وحبلت منه وسطرت البزرية له شنهو دورنا ذاك الوكت خداماتها لو لو وصيفاتها ؟
زهرة : لا كل ولا بد لازم نخلص من هالبت هذي ونبعدها من البيت

 

مليحة : ما ادري والله يم الله خبرنا بعد
زهرة وسميعة سكتن عنها ما رداارنها فد حجت زهرة : انا تعبت رحت واجيت بعد ما اكدر ارد روحي انت مليحة وواردي الحلال سطلة الماي تلاكينها يم شجرة الزيتون

 

مشت مليحة خاطر تورد الحلال
واندارت زهرة لسميعة : اسمعي اكلج لا تامنين لمليحة
– انا هم كلت هيجي وردت اكلج وسبكتيني عبن عاجر تخاف لا خشان يطردها عبن كعدتها عده مثل مشيتها لا بيها

 

فايدة ولا زايدة رايدة تظل تحت طوره خاطر لا ترد زايدة اعلى اهلها وتصير عايبة .
ثاني يوم كبل لا تطلع الشمس
كعدت سميعة .. دحكت ملكة نايمة ويازي عد راسها

 

دحكت لباب حجرة زهرة الصندل مالت خشان ماهو ابابها واليوم ليلتها .. اتفكدت البيبان وشفات الصندل اباب مليحة
مشت على حجرة زهرة .. فتحتها وندتها : يولي اكعدي كعدت على صدرج بلوكة يعمية العين

 

– شجالج من صباحات الله
– عجل مكسورة اعلى حالج الليلة ليلتج واهو نايم عد مليحة
– صدك اعلى بختج

 

– عجل ما شفتي الصندل مالتو ابابها
فزت من وسادها وطلعت الباب شافت صندله .. اغتاضت حيل واندارت عن سميعة : امشي الحين ونحج عكبها
– مليحة مو بصوبنا يزهرة ان ما تلايمنا انا وياج وبعدناها هي وهاليازي اللفت علينا من تالي وكت .. نروح انا وياج

 

بشربة ماي
– يح مليحة العاجر تروحنا شجاله امرج يولي نحن ولاة بزرة عده منج ولد وعده مني ثنتين بنوات يعدنا لجل المالهن بزر

 

– خوفج من الما عده يولي كل البكلبه ياري امره ولو ما دارينا امرنا تاليتها تصير حسرة علينا شوفت بزرنا ويصفون للمالهم بزرية .. حطي ايدج بيدي يولي وخلنا نفتك منهن اثنينهن
– وشلون

 

– لاون نخلي مليحة هي التسر ام يازي وتكللها على بزرتها ونحن نعاونها خاطر تخلي يازي تمش مع امها ولو مشت وتفكدها خشان محد له اثم غير مليحة وحينها لعبنا اعلى مليحة.
– اعلى السانج خير ما تكولين امشينا

 

كامن يحضرن الريوك وينطرن مليحة تكعد
وعد ما كعدت اتفكن وياها تتربص لام يازي عد ما تجي تبشرها … بس خشان جان متربص وكاعد ينطر ام يازي .. وامها ما اخرت خبر من صباحات الله دكت بابهم تسعل على خبر بنتها

 

تلكاها خشان بعد ما ملكة خذت يازي وطلعت للمزرعة
بجت وناحت عده على بتها وكاللها : ابوها وكت الاطاها انا زوجتها لواحد ابدوي من الاهل واهو الحين بالحجاز عد ما يرجع لو اسمع عنو خبر اوديلج خبر تشوفين خبر بتج

 

زاد همها همين ومشت مكسورة الظهر
غاد وتربصت لها مليحة وزهرة وسميعة يدفعن بيها .. كالتلها : بنتج موجودة عد خشان وماهي بالحجاز وهو رايدها مرة لو ردتي بتج اكربي نص الليل ونحن نخلي بنتج برحالج تاخذيها معاج
فرحت امها وكامت تبجي وتتوسل بيها وتسعلها شلونها وكونها تعبانة كونها مهضومة كالتلها ( كل يوم تنام بطكة

 

وتكعد بطكة وساكمها سكم لو رايدتها اخذيها ولا تجبلين لهين ولا تردين لبيتج عبن هو يعرف علومكم ويندلكم )
اتفقت وياها الام على ثاني يوم تجي هي واخوها ياخذوها نص ليل ويمشون .
لثاني يوم بالليل ..

 

جانت ليلة خشان يم زهرة ..
سميعة : ما ضل غيري انا وانت نخلص الباكي ونفتك
– يولي انا خايفة بخشان يحس علينا

 

– مالج غرض انا راح احجي ويا يازي ما تنام الليلة وتكعد عد ما تسمع حس الغلك يتبربد .. وكتها تطلع من البيت وتنطر امها بالشارع
– وياهو اليفتحلها باب الكلعة

 

– افتحيها انت انا لو اكدر اعملها لاجن خالد يكعد لو كمت منه واخاف ينده وراي ويكعدون انت خالية مختلية ماكو احد ينده وراج
– عجل خوش

 

صبن العشا سويا وعشا خشان جان بحجرة زهرة
سميعة صخرت يازي على دولكة الماي .. يازي ماهي جليلة شر جاهلة ملسونة ما تنام على حكها وشايفة روحها على الضراير عبن ملكة ما تخلي وحدة منهن تكربها .. وهن يكرهن على الصغيرة والجبيرة يصيحن بيها ويغلطن

 

وهي تردهن وتتكاون وتبجي ردوني لامي ومحد يسمعلها
بهالليلة صاحت على يازي وكالتلها : امشي اترسي الدولكة ماي
-ما تندهين ابنج انا شني خدامتج ؟

 

– يولي تكومين لا الخج بهالدست امشي
– ابنج وندهي انا لا هي بتج ولا خدامتج اتصخرلج
ملكة : وهي صاجة عليش تندهيها هاذ ابنج واندهي

 

ندهت ابنها وهي تزفر شر من ورا هالعجية الملسونة
راح خالد جاب ماي واجا عد ما كامو .. ندست يازي صرخت يازي : ااااي لا تضربيني
– اسمعي يولي تسكتين لا اطركج بجف اذا رايدة تشوفين امج تعاي الحجرتي اليوم

 

– امي
– هصصصص لا يسمعج احد ولو سمعوج يكصون اركبتي واركبتج

 

نصت صوتها : وامي وينها ؟
– تعاي وتعرفين
خذت الفانوس سميعة ومشت لحجرتها

 

ويازي كالت لملكة : راح اروح العب ويا خالد شوية واجي انام
– لا تطولين رايدة اطفي الفانوس خاطر اهود
– ما اطول

 

مشت حفيانة لحجرة سميعة دخلت وكالتلها : صدك تعرفين امي وين
– اي اعرف بس اخاف لا خشان يعرف تالي كلنا انتكصب
– لا والله ما اكلو

 

– بس ملكة تكلو
– انا رايدة اشوف امي حبي الله وخليني اشوفها كربانو
– عجل اسمعي مليحة راح تتربص لامج وخالج يجون بالليل انت خليج صاحية عد ما تسمعين حس غلك يتبربد بنص البيت انت اركدي شوي واطلعي عكبها راح تلكين باب الكلعة مفتوح وامج ليغاد من العجد فهمتي

 

– اي فهمت
– تروحين ما ترجعين وحسج بالج ملكة تعرف تراج انت التكعين بيها لو وكعتي بيها لا تحجين لاحد احنا ساعدنا خاطر نساعدج نوبة الاخرى وهم نخليج تشوفين امج وتروحين وياها خوش ؟

 

– خوش
راحت يازي بوسادها تنطر طيحت الغلك
وعد ما طاح بالليل يازي فزت من فراشها وطلعت ليبرا ..
ملكة جانت بين النايمة والكاعدة من كامت يازي .. حسبالها مشت تشرب ماي وترد .. اندارت تكمل نومتها

 

يازي طلعت للعجد باللظلمة تهمس ( يمما وينج يمممه انا يازييي)
طلعت الها امها من كفا الكلعة واهي كاضبة الفانوس ..
شافت امها راح تركضلها بهمة واشتياك حضنت امها وهالكثر بجت … حجه خالها : يلا يولو نمش كبل لا يحس علينا

 

واحد من الديرة خل نمش بليل خاطر محد يشوفنا
صعدت يازي وامها ع العربانة مالت المطي وضل المطي يجر بيهم خار الديرة ..
توه ابعد من الديرة وما يحس الا صهيل خيول وراه تنده اندار ولنهم ازلام ملثمة … كال الها … ( يولو كشفون ذبي

 

روحج انت وبنتج كبل لا يصلون )
وصدك امها لفت على بتها وذبت روحها من عربانة المطي
ووكعت بنص الرملة .. الدنيا ظلمة والخيول بعدها ماهي جريبة بس صوت اصهيل الخيل ينسمع

 

زحفت ابتها بين التربان وعد ما كربت الخيول حطت راس بتها بالكاع ونامت خاطر ما يشوفوها .. تعدتها الخيل وما لمحتها
ندهت بنتها برهبة : كومي يمه اسرعي
اخذت بتها وجاي تركض ما تحس الا واحد كاضب حصانه ويتمشى وهو يكللهم : عدج يدخيلة الدار

 

كضبت بيد بتها واندارت
ظلمة وما يبين شي بس ظل زلمة وخيل ، صاحت امها : منهو ؟
يازي عرفته من الصوت وكالت : خشان اكبل يممممه ضميني …

 

 

يتبع….

( سم في طعام احدهم )
هو ذنبي

 

لاا سكنت و يا الاجوني
ولاا تبعت الراحلين
(كاظم اسماعيل الگاطع)

 

يازي: لبذت بكتر امي واحتميت وراها
وامي تخبي بيه وراها وتكضبني بيده اتحاميلي وتحاجي : اكبلت لبيتك وانت سيد كومك وطلبت بنتي منك جذبت علي وكلت انطيتها وانت اللي حاط عينك على جاهلة بكبر بزرك .. ضميتها عني واني اللي حطيت روحي تحت جدمك وتسلتك ابنتي

 

– ومن ما اطيتها تتسللين مثل الحرامية للكلعة تبوكين وحدة من حريمي
– حب الله البنت عجية ( طفلة) ومالها بالعشرة والمزاوج اي حريمك ..عندك ثلث حرية خاف الله مافيكم واحد تشيلو الحمية على هالعجية ويردها لامها

 

– العجية ذي انا اشتريتها بفلوسي وصارت ملك يميني مالج ولا لاحد حك ياخذها من بيتي بدون امري وجزات فعلتج الشينة ذي غالي تدفعون اثمانه باهض يا دايسة العتبة
ردتني ورها ضهرها كوي وتتحامى وتصيح : والله لو خذيتها مني والله لا اشيع عليك بنص ديرتك جذاب زلمة سيد

 

كومه جذب على حرمة فاكده ضناها لا اخلي سيرتك بكل ثم حجوة
ما رد عليها بس صار صوت من ورانا اندارينا ندحك ونسوف ازلامو كضبو خالي وجروه من اركبتوه
امي عد ما شافت حال خالي همت عليه تركض وتصيح : مالو ذنب انا استأجرتو يجي ياخذني انا والبنت .. حب الله

 

واتركوا وحاسبني الي حسابك وياي ما ويا غيري
اندار ويكللها : مالي حساب ويا مرا
حجاها وواحد من ازلامة حط كونية براسي وشالني على جتفو كمت اصيح : هدنييييي نزلني يماااااا

 

امي هدت خالي وصلت تركض ورا الزلمة الشالني اطك بيه وتجره وما يهتملها .. حطني على ظهر المهرة مالت خشان وركب خشان المهرة ..
لزمت امي برجليه تتوسله : حب الله وهد بنتي احلفك بالله عيفها لا تاخذ بنتي مني شتريد حملنا واعمل بينا بس لا

 

تاخذ مني بنتي حلفتك
اني اصرخ واريد افك روحي من الكونية الكيدوني بيها وحاطيني على ظهر الحصان بس ما عداكدر احرر روحي بس اصرخ وابجي .. جر بسرج خيله وصرخ بصوت عالي ( ديييييخ ) وداس بحصانه يركض

 

وامي تركض وراه فاكده وتصرخ وتبجي بليلة ما بيها كمر
جبت الدرب كلو اصرخ وابجي وخيفانة اكع من ظهر الحصان بس ما وكعت .. دخل باب الكلعة .. وشالني من ظهر الحصان زتني للكاع وجر الكونية من راسي وطكني جف كوي كبل لا انطق لو اشوف احد وكضبني من ركبتي :

 

اسمعي انت باب الكلعة لو تعديتي لا اصلبج واعلكج اباب الكلعة واخليج عبرة لكل من اعتبر ..
زتني بكوة من ايده للكاع صرخت اعلى طيحتي كمت ابجي وهو يصيح : تنحبس وينمنع عنها الزاد والماي وحسابي ويا الدربها وفتحلها باب الكلعة اعسر من حساب هالبنت الطالعة.

 

طلع من الكلعة .. ويازي تبجي تريد امها ولعيبتها الوكعت غاد بالظلمة ، شالتها ملكة وزتتها بوحدة من حجر الكلعة وكفلت عليها الباب ومنعت احد يكربها على امر خشان .
خشان اول الامر اندار للزلمة الداس ديرتة بليلة ظلمة وباگ وحدة من اهل بيته .. خص ان يازي باعها ابوها واخذ

 

ثمنها ما من حك احد بالعرف العشائري ياخذها من خشان عكب ما صارت ملك يمينه
حبس الزلمة عده وعفى عن ام يازي ما عابها ولا كاوم رجلها بس ودى خبر لرجلها واطاه خبر بفعلة مرته .. جا محمود ابو يازي ونزل عد خشان … كالو : انا اتعذر منك على الفعلة الشينة العملتها ام البنات لجن والله بجلالة كدره

 

شاهد انّي هاجرها عد اهلها وماخذ عليها وماهي ابيتي .. عبن هي مرة عايبة وبزرتها عايبة لا تحسبها عليّ وبنتي لو عادت الفعلة ادفعها لي اربيها واعلمها الطاعة واردها لك .
رده خشان : ما هو نحن النعيب مرة بفعلها المرة لا تتعاتب ولا ينطلع بكفاها البنت ملك يميني وحسابها علي

 

ومحسوم من الفعلة .
تعذره ودفع عنه فعل ام يازي
وعاب اهلها وكاومهم وهو حابس ابنهم عده

 

ايام وكوامتهم ما تفض عبن خال يازي داس ديرة عكاب ليلية وخذه وحده من حريمة بلا علم ..
عد ما فضت وياهم بفصل وخذا منهم حفنة فلوس جمعوها اله دفع الهم ابنهم وعفى عنه وطيح الديا بعد ما جانت نية خشان يكتل الدايس ديرته .. اشتروا دمه وانطوه فلوس دم ابنهم وخذوه .. وشالو ام يازي وذبوها على رجلها

 

وكالوله ( مرتك لا انت المطلكها وذابها ولا انت المخليها ابيت نحن ما نتحمل اثمها خذها عدك احبسها كيدها افعل بيها امرك )
بس محمود ما طلك ام يازي عبن عده منها ثلث بنات غير يازي مجبور يتحملهن ولو طلكها اهل امهن يذبون البنات

 

عليه يحتار بيهن وياخذون بس بتهم )
حطلها خيمة شعر بكاعه وكعد بناته وياها بالخيمة
وبيت الطين اصبح اله ولمرته الجديدة .

 

حال يازي وان جان حال عسر بالكلعة
لجنه يظل اهون من حال امها وخواتها .. عبن خشان حبس يازي ومنع عنها تختلط ويا احد من اهل الكلعة بس خاف يصيبها شي تبزر اذا كطع عنها الاكل والشرب .. فضلت محبوسة بالحجرة كل الوكت تاكل وتشرب وتنام .

عد ما فضت سالفة الفصل
اندار لاهل بيته واجمعهم وكاللهم : حولو عدي
كلم التمو عده .. كضب عصاته وحجه : ملكة شنهو الراي

 

– الراي خوية نسوانك ولا وحدة منهن رضت تحجي … كلهن نكرن وانا متوكده مثل ما انا شايفتك جدامي هن الفتحن باب الكلعة ليازي وهن العلمن امها بخبرها ودربنها ليجاي .
– ما يحجن ؟

 

– ذن هن جدامك واسعلهن محد منهن رصت تحجي انا كلت الهن اعترفن اهون من غصب خشان لجنهن ضلن معاندات وكاضبات اعلى ثمهن ( لازمات السانهن)
– عجل اسحبي خالد والبنات منهن وكل وحدة منهن على بيت اهلها … غاد يتعلمن ويعرفن گيمة كلعة خشان .

 

عد ما حجاها وهن فزن من مكانهن يتصايحن ويوكعن عد رجليه ويتوسلن بيه .. نفرهن عنه وكام وصاح : ملكة رايد الفاعل والو ما طلع الفاعل ارد ما الاكي وحدة منهن .
انطى ظهرة وطلع

 

وهن وحدة كامت تفتن على الثانية
من شافن الحال ما يخدمهن وملكة ما مصدكتهن اتفقن سميعة وزهرة على مليحة وكاللها نحجي الحك ( مليحة هي الاتفكت ويا امها وهي الفتحت باب الكلعة وراس بزرنا مليحة هي الفاعلة )

 

انتفضت مليحة وهي تكللهن ( انا الفتحت لو انتن هن الاتفكن وياي وكاللي احنا نخبر يازي وانت افتحيلها باب الكلعة )
سميعة : احنا لا اتفكنا ولا حجينا .. يومها انت السمعتي ملكة وخشان يحجون بسالفة ام يازي واجيتي خبرتينا
شهكت وهي تكللهن : يظالمات البخت حبن الله واحجن الحك زهرة هي الفتنت عليهم واجت خبرتنا وحك هو اللله وبخت الله زهرة الفتنت .

 

زهرة : واي واي واي اعلى شرج انا لا واصلة ولا كرابة انت الدخلتي من هالباب وصحتي التمن وحجيتي خبرهم وكنالج لا تلاعبين خشان ما ينلعب وياهم خفتي على روحج عبن عاجر وما تخلفين خفتي يردج عايبة لاهلج
حجت ملكة : ذاك اليوم اذكر مليحة هي الوردت الحلال ماهي زهرة
مليحة : وبخت الله زهرة حطت سطلة الماي وردت تخبرنا عكبها انا رحت عنها

 

نكرت زهرة وسميعة سندتها وملكة صدكت شوفها عد ما شافت مليحة ذاك اليوم .. وراحت بلغت خشان بمليحة .
رد خشان للبيت ومليحة ركعت عد اجدامه تتوسله وتعترف هي الحجت لام يازي وهي الفتحت باب الكلعة ليازي .. وتتنخاه بحس مذبوح يسامحها ….

 

الكل انكهر لحسها ونحيبها الا خشان
كاللهم : لو عفيت وكتها اكون فتحت باب الاثم لغيرها يخطي وينطر العفو مني .. الله وحده اليعفي ومحد له يمي عفو واليخطي ياخذ جزاه … وانت يا مليحة امطلكة مني بالثلاث.

 

كامت تصيح وتذري على راسها التراب وتبجي من هول المصيبة الوكعت روحها بنصها عد ما مشت ورا ضرايرها زهرة وسميعة.
ما هزله جفن ولا اثر بيها صياحها
بنظر الديرة واهل الديرة هي هساه عايبة مطلكة واكثر ما جان يكسر المرة ويعيبها طلاك الزلمة الها .. الكل ما

 

تعود تريدها ولا تحترمها .. بكل عمل تفعله ينكال الها ( لو بيج خير ما طلكاج رجلج وعاباج )
من بعد هالهوسة …
سميعة جانت خايفة من يازي لا تفضح سالفتها عد ما كالتلها على خبر امها واتفكت وياها على طلعتها من الكلعة .
احتارت شلون تخلص روحها

 

تحاجي زهرة وزهرة المدومنة .. تكللها بغير بال : انا مالي غرض بيج انت الاتفكت وانت التتحملين اثمج
– تتبرين مني عجل مو انت الفتنتي على ملكة وخشان عد ما حجو عن ام يازي
– روحي احجي لياهو الجان ان جان سمعوج التهمة وكعت بيها مليحة ومحد اله اثم علي وكل لشة تتعلك من كراعها حيري بكراعج ابعيد عني وعن بناتي انا مرة رايدة اداري على خبزة بناتي مالي بكيدج ودسايسج .
بعدن وحدة عن الاخرى

 

بس كل وحدة شايلة بكلبها سم للثانية وحايرة بيا كيد تبليها وتبعدها .. زهرة تخاف لا صدك تفتن وخشان يصدكها .. وسميعة تخاف لا تكف زهرة وي يازي وتفتن عليها وتكل لخشان هي الكالت ليازي على امها .
مشى هالحال .. ايام
ويازي على حالها محبوسة ..

 

ومحد يصلها .. تبجي تصرخ تريد تطلع من المكان .. محد يرضى يطلعها وخشان ما عفي عنها .
لحد ما فرد يوم
يازي: جنت نايمة وما احس الا شي عبر على جدمي

 

فزيتمن مكاني ادحك زين خاطر اشوف .. الا واصد بحية وراي ملتفة .. تجننت من شفت الحية
كمت اصيح اريد احد يجيلي ماكو احد يفزعلي
والحية كامت تفتر داير مداير الحجرة وانا اصرخ ، ادك بالباب حيل ومحد منهم يكبل
كمت اطمش بالحية واتبعها وين تروح ووين تجي ..
اتكربت مني ركضت منها .. انزويت بزاوية الحجرة اصيح ومحد الي .. وارد اصيح يمه الحكيلي العربيد اجاااااني

 

انا صحت والحية جت صوبي من حلاة روحي دست على راس الحية حيل وظليت مثبتة رجلي ما اشيلها اخاف اشيلها والحية تفلت مني وتلدغني
ضليت جثير واكفة وماكو منهم احد اجبل

 

وانا مستمرة ما وكفت صياح .. دنجت للحية وانا دايستها اريد اكضبها من راسها .. توني مديت ايدي وانفتح السركي مالت الباب
انا من خوفتي صوت السركي ما ميزته حسبالي الحية طفرت مني ركضت منها بساع .. فتح الباب خشان كمت اصيح : حية حية هاااي عربيد اجاااني

 

صرخت وطلعت من الحجرة ابجي
تلكتني ملكه : هاااا يولي
تحضنت بيها وكمت ابجي .. خشان كاضب الحية وكاطم راسها وجابها واجا يكول : كضى شرها جتلتها
ملكة : منين اجت ؟

 

– تلاكيها جت من الزرع
ملكة : لا والله ما جت من زرع تلاكي وحدة دربتها على هالعجية ما تعرف الخانسات هين رايدات كلعة هاليازي هاي
انا كعدت الخوفة بعدها بجسمي ارجف واكلهم اريد امي ودوني ما اريد اضل هين
صرخ خشان : بلايا عوووووويل يلا .. والدرب الحية انا اكشفه واطلعه ولو جان حجي ملكه صحيح الدربها يلحك ملحة وبحيل الله اعرفه .

 

بس حكك ودور وحجه ما عرف منهو الدربت الحية لحجرة يازي .. اعتقدوا الحية داخلة البيت من المزرعة وسدو السالفة .
بس يازي كلش ضاكت عدها
من هالوكعة كطعت الاكل والشرب زعم خشان ردها لحجرة ملكة بس هي كطعت ويا الكل لا تحاجي احد ولا تريد

 

احد وشما يجيبولها ما تاكل .. بس تبجي وتريد امها
ملكة شكت حال يازي لخشان وكالتله : صالها يومين لا زاد ولا شربة فد بجي ونياح .. تكدم خشان واجاها ، كعد عدها هي فد نايمها حاجاها : اكعدي يا بنت احاجيج
– ما اريد

 

– افا احاجيج انا كومي
ما ردت عليه ، كعد عد راسها وكشفها : وش بك ؟
– اريد امي
بجت .. تنهد : بلايا بجاي انت كبرتي وما عدتي زغيرة والمرة لو كبرت مجانها ابيت زلمها .. يولي الوياج يحببن

 

بالجدام خاطر ما اردهن لاهلهن وانت تبجين تريدين اهلج عجل هي بالمكلوب ول يزغيرا ؟
– انا ما اريدك ولا اريد اضل بالكلعة اريد اشوف اضل يم امي
جابها حاجاها راد وياها ما عدها غير جلمة ( اريد امي) كاللها خوش : خل نتفك على اثر ، بس كون هالاثر لا انا اخالفه ولا انت

 

– شنهو هو ؟
– اخذج كل شهر لاهلج تشوفينهم جم ساعة وتردين وياي شرايج ؟
– لا اريد اضل يمهم هواي
– ول جلمت الهواي ماهي النا نحن مكول جثير

 

– اريد اضل جثير
– جثير شكثر ؟
-كل الايام
– عجل وانا ؟

 

– ما اريدك
– افا انا بيش ضريتج ابوج الباع وانا اشتريت احسن لو بايعج لواحد كاتلج لو حاطج مثل البعير يحرث عليج جبتج وخليتج بهالكلعة مزيونة ومترهاية .. وشحده اليكرب صوبج
– رايدة امي

 

– عجل خوش كل ما تشتاكيلهم انا اخذج شرايج
– كل يومية
– يولي لو اشتاكيتيلهم يومي اخذج يومية بعد بس تضلين هين دارج
كامت من فراشها متبسمه : خوش خوش كوم يلا نروح

 

ضحك وكاللها : عد امرج يزغيرا امشي
نده على خالد يصيح على ابو راشد … الخادم او المساعد ماله ، امره يسرج الخيل .
كالتله : انا اخاف اركب على الحصان
– وانت وياي لا تخافين

 

سرجله الخيل وركبها على ظهر مهرته وصعد ورها ومشى بالمهرة على كيف … حاجاها : خايفة ؟
ضحكت وهي فرحانة راكبة ظهر الحصان ويمشي بيها : لا ما خايفها
– عجل اتمسكي عدل
حجاها وجر الجام خيله وصاح : ديييييخ

 

داس بيها وطلع من ديرته لديرة ابوها وهو يطربك بحصانه وهي جدامه فرحانة … وصل للديرة غاد نشد عن دار اهلها .. دلوه اليت محمود .. عد ما نزله ودك الباب
طلعتله مرة كالتلو : محمود ماهو هين

– عجل وين الاكي ؟

– بالكاع
يازي كامت تدفع بالب وتصيح عليها : بيتنا اطلعي من بيتنا امي وينها … يما

 

جرها خشان من الباب وشالها على ظهر الحصان : اسمعي يولي وهاي انا احذرج .. انا زلمة غريب بهالديرة وانت محسوبة علي عالتصرفات لو عاوديتها ارد بيج للديرة واغير رايي وبحياتج ما تشوفين اهلج
– بس امي هين هاي ماخذة البيت

 

– ندورها بس ما تعمليهن هالعمايل التسود الوجه فعايلج الزغار يسوونها انت ما تسويهن افتهمتي
سكتت .. جر بحبل السرج وكام يمشي وهي على ظهر الحصان وهو يجر بخيله ومترجل يمش للكاع .. وصل ليغاد سعل عن ابوها دلوه … وصل عده ، سلم عليه هي عد ما شافت ابوها ذبت روحها عليه من شافت وجه من وجوه اهلها .

 

بس استقباله الها جان بارد : هله هله
ونزلها من عنده وكال : حياك الله خير ما زارنا تفضل
يازي حبستها بنفسها وتضايكت ومشت ورا خشان …
كالو : ما اجيت اكعد البنت ذي عسرتنا وهي تبجي تريد شوفة امها كطعت الزاد وانا مغصوب على الجية رايد تكلي

 

امها وهياتها وينهن خاطر اخذنها
– موجودات موجودات خل نصيفك بالاول واخليها تشوفهم
– بالاول خليها تروح تسوف امها اذا جريب خاطر اكضي ضيافتي راجع كبل لا تغرب سما الله وينزل الليل ويصعب

 

الدرب
اندار واسار ابوها على خيمة بعيدة بالكاع وكالو : ذيج خيمة امها
– ودارك

– انا خذتلي زوجة والمرة حامل وما رايد ام البنات لجن مغصوب بالبنات لو طلكتهن يطيحن بفادي واحتار بيهن

حطيتهن ويا امهن بخيمة بالكاع
يازي عد ما عرفت الخيمة ذيج لامها راحت تركض وهي تطر البستان حفيانة وتصيح : يمممممممممممممه
اختها على الصوت طلعت عد ما شافت ندهت باسمها وركضتلها طلعت وراها امها وهي شايلة اختها الزغيرة ..

 

طارت من الفرح عد ما شافت بتها جايتها ركضت لها وخذتها بحضنها يازي تبجي وامها تبجي …
خذتها للخيمة .. ومشطت الها شعرها وكعدها بحضنها تسولف وياها وتسعلها على اخبارها بالكلعة .. سولفت الها سالفة الحية، كالتلها : ديري بالج زين وما طوله الزلمة الانت عده زين وياج ويلبي امرج صيري خوش بنية وطيعي خاطر ما يضرج ، عو ازلمه حال ومال وجاه ونحن هالتشوفين حالنا صعب .. الليل اليمر احير بيش اغطي خياتج من

 

البرد .. اصبري يا بنتي وتحملي .. باجر اذا كبرتي واتزوجج راح تصيرين صاحبة الكلعة وحالج يتغير .. اصبري عده
كامت تقنعها تصبر على العيشة عد خشان عبن دلالها البلكلعة ما تلاكي هين ويا ظلم ابوهن وجوره لهن بهالخيمة .. ليلهن برد ونعارهن شغل وزادهن ما يشبع بطن وغطوتهن ما تدفي بردان .
اجا خشان وهو ينده ليازي كبل لا تغرب الغروب

 

تعذرت منه امها وكالتله : اوصيك بيها امانة الله ورسولة لا تاذيها ولا تظلمها
-يصير خير ان شاءالله
عرفت بعده مجافي وضل اباله دوست كاعه ما عفى من كلبه
سكتت عنه وضلت تحب بوجه بتها .. خذها خشان وشالها وحطها على ظهر الخيل وركب .. توه يريد يتحرك

 

صاحت امها : اكف اكف اكف
اندار لها .. بيدها لعيبة يازي ( سويتلج وحدة جديدة عن الضاعت منج بالهندس ) خذتها يازي وهي تصيح ( لعيبتييييي)
ودعت امها وهي حاطة اللعيبة على كلبها

 

داس بالخيل وطربك بيه
حس بيازي هودت لا حجت ولا طلعت حس .. خفف بحصانه وكام يمشي خفيف وهو يكللها : اشوف حسج خفت ؟
– اشتاكيت لامي
– مااااااصايرة هاي تونا اجينا منها

 

– ما اريد اروح بس انا يعني
– تريدين تضلين وياهن .. خاطر ابوج هم يمل منج ويروح يبيعج مرة ثانية بالسوك ويعرس بفلوس بيعتج !
سكتت … حجه : انا وعدت ووعد الحر دين يمتى ما جنت لاشي وما عدي شي وتريدين اهلج اوديج بس عيشة هين

 

ممنوع .. اشرلها ع الكلعة : ذيج دارج وذاك مكانج وانا اهلج سمعتي
ما رضاها الحجي بس سكتت عبن ما عدهن التحاجج بيه وتحجي ردت للكلعة ورضت بعيشتها بالكلعة .
بس حرب هي وضرايرها

 

لا هن يطكنها ولا هي تودهن عبن يشدن وياها كل دكة يدكنها بيها وهي ترد الدكة بعشرة وخشان شايل ايده منهن عبن يعرفها كوية مو عجية مسكينة وتخاف .. نجرة اطب بعين اكبر واحد وتاخذ حكها ومرتاح لهالحال .
مشت سنة وسنتين وثلاث
ويازي تكبر وتتغير ملامحها ومعالم جسمها وتصير مرة مو ذيج الجاهلة المعصجلة .. شابة لاهي سمينة ولا هي

 

ضعيفة .. وجهه يضوي والحجاب تلفه بس شعرها وزلوفها تطلعن من الحجاب وتلف الشيلة .. وعيونها الصفر جنهن عيون بزونه يلمعن بعين كلمن صد بيهن .. كل عين هاكبرها .
كبرت تحت عيون خشان وهو ينطر يوم يوم تلحك خاطر يحسبها زوجه اله … بس هي ما مخلية احد بحاله ضرايرها

 

يصيحن منها الويل محد منهن تكدرلها .. لا بلسان ولا بحيلة
جانت محضرة سطلة الماي فوك الباب الحديد ومتنطرة سميعة بس تجي ينكلب عليها الماي .. بس ما جت سميعة اجت زهرة هي فتحت الباب ويازي من ورا الباب ضربت السطل عليها

 

فزت زهرة وهي تصيح : ويييييو وييييي ول الحكوووووووو
وطكتها ركضة يازي ولبدت بحجرة ملكة
طلعت زهرة تعربد بنص الكلعة واجت لحجرة مليكة كاضبة العصا وتركض وراها وتصيح : اليوم محد يخلصج من ادية

 

زهرة تريد تكضبها و يازي تتلبد
فلتت منها وطلعت من ورا ظهر ملكة تركض بنص الكلعة وزهرة وراها طلع خشان جدامهن ، تحامت وراه وهي تصيح : الحك راح تجتلني

 

فك اديه اثنينهن وكالها : زتي العصا من ايدج
زتتها وصرخت : وييييييي يابو خالد ويييييي حكي عندك مليت من فواين هالعجية ادحك اش عملت بيا …
اندار وراه وهو يحاجي يازي : منهو العمل هاكذ ؟

 

– السطل
– يازي
– اش عملت انا السطل وحدو زت نفسو عليها ما انا

 

– ياااازي
– عجل ليش حطت بالجاي مالي ملح وخلتني اشحط انا كن عملتو بيها مثل ما هي عملت
زهرة – ما انا العملت هاكذ سميعة اهي اللي عملت

 

يازي : صح صح سميعة .. وانت امس طفيتي الضو عد ما جنت اسبح
خشان : الحين انا رايد اعرف منهو اللي زت السطل على راس زهرة .
– هم عملوا بيا ازود من الـ انا عملتو

 

– زهرة اكبر منج وبكبر امج من تكللين احترامج وياها احز اركبتج فااااهمة
سكتت .. حجه : انت التغسلين ثيابها وتجففيهم بعد ما تعتذرين لها جدامي
– خليها تعتذر على طفية الضو وانا اعتذر
– ياااااازي

 

عافتو وراها وركضت ضمت نفسها بالحجرة ..
دك الباب كام يصيح ما ردت عليه ولا اعتذرت ولا فتحت الباب ، تحلف الها بس تطلع يعاقبها .
ضلت كاعدة لحد ما حست بشي غريب
تفكدت نفسها شافت اكو دم ينزل عليها .. حيل خافت ومحد كايللها هذا الدم شنهو … ظلت خايفة تضل ويزيد الدم

 

وحسبالها تموت .. وخافت تطلع ويكضبها خشان وهي تسمعه كاعد جريب من الحجرة بنص الكلعة
مكسرت خوفها وفتحت الباب .. نده خشان : كربي جاي
عافته وراها وراحت تركض تريد تمشي تغسل .. كضبتها سميعة من راسها وكامت تجر بيها لخشان وهي تصيح

 

وتفلت بنفسها .. زكح بيها خشان وكاللها : حسسسسج

– اريد اروح اغسل عييييف
كام يخزها حيل ويشد على ايدها
كامت تبجي .. كاللها : تعذري كدامي بسع

 

– بطني توجعني
– اتعذري منها يولي لا اطلعين اعصابي
ما طكت راس ضلت معاندة اجر بيدها وما تريد تعتذر
من ايده ودفعها على زهرة خاطر تعتذر .. ويا ما دفعها وهي لابسه ثوب اصفر دحك ثوبها ملوث دم من ورا … وكف

 

وكاللها : شنهو الدم هاذ
هدت زهرة ما تعذرت عافتها وركضت منهم وراحت لبدت بالحجرة .. ضرايرها عد ما انتبهن عيونهن صارت بكصصهن وهو اندار لملكه كاللها : روحي شوفيها

 

كامت ملكه فرحانة تدك الباب ويازي تصيح : ما اتعذر والله ما ادنج راسي الهن ما اتعذر
– يولي افتحي بشارة الله جتي

 

– ما افتح
– يولي خل اخبرج ما اخليج تعتذرين بس فهميني الدم هذا شنهو البثوبج ؟
– ما اعرف اني ما سويت شي هو وحدو عينزل
– اعرف وحدو يمصكوعة اعرف افتحي الباب
فتحت الباب كالتلها : شسوي

 

– انا اعلمج شسوين يعرووووس
وحضنتها استغربت يازي : عروس شني عروس
– يولي هاي معناها راح تصيرين عروس
– شلون ؟

 

– البنية اليكع الدم عليها تصير مرة ويصير تتزوج معناتها بعد ما يكضي هالدم وينكطع خشان يكدر يعرس عليج
– ما عد افتهم انا
– لا تفتهمين … انا افهمج
حجتلها ان بعد ما ينكطع الدم ويتزوجه خشان راح تكدر تحبل ويصير عدها جاهل … يازي من سمعت يصير عدها

 

جاهل ضاجت كالت : ما اريد اصير مثل امي
– عليش يولي
– امي كامت تصيح من جابت وعد ما جابت ابوي طردها
– ان جان ابوج جاسح نعمته خشان يتمنى هالنعمة من الله .. لو جبتي بزر لخشان يخليج ملكة فوك روسهن يولي

 

تصيرين انت الاولى والاخيرة عده
– اخاف ما اريد ابزر
– هسه دعرسي بالاول … وانوبة خافي اعلى كيفج
علمتها شلون تنظف نفسها وراحت لخشان تبشره يازي بلغت ..

 

خشان ما وسعته الدنيا من فرحته وكال الها : كليلها شتامر وشتطلب .
رجعت ملكه ليازي كالتلها : اريد اصير عروس وكن يشتريلي ذهب هواي وبعد … يلبسني ثوب حلو واركب على الحصان
رجعت ، هو فرح بطلبها وكاللها : خل تبشر الها مني عرس لا صار ولا ستوى بديرة ال عكاب وخل الكل يعرف عكب ٥

 

ايام عرس خشان على ملك يمينه يازي
توزع الخبر بالديرة والكل اتحضر للعرس وناطرينه
والبيت تزين … بورد الياسمين وبلغ اهلها بعرسه على بتهم وقرر ياخذها من ديرة اهلها لديرته عروس
خذتها ملكة وراحت للسوك واشترتلها احس انواع العبي والذهب والكلايد والحجول وجهزتها بجهاز حسدها علي كلمن سمع بيه .. جهاز ما صاير بديرة .. ينضرب المثل لجهاز خشان لعروسته يازي .

 

ابوها عد ما شاف جهازها والذهب الاشتراها الها خشان والخير الغركها بيه .. طمع بيها ورحب بيها بشكل مبالغ .. فتحلها باب البيت ورحب بامها تجي تكعد بالدار ..
بعد ما مرته الجديدة خلفت ولد وبنت اخوة ليازي
اجاها يحبحب براسها ويكللها : انت فخر ابوج انت هيبته وعزوته .. بس هي لا توده ولا تريده … عكب ما شافت منا

 

الجفا كل هالسنين .
خلصت ايامها وانكطع الدم بثلث تيام مو بخمسه
وملكة بلغت خشان كاللها: عجل بلغي الكل باجر العرس ماهو عكبه

 

طش الخبر بالديرة كلها
وحضروا يازي للعرس وجهزوها … لبسوها احمر وكحلوا عينها بكحل عرب وحطو نقاب ذهب على عينها وخشمها بيه شراشيب ولبسوها العباية السودة الثكيلة ..

 

اجا خشان هو واهله وعمامه ويدرته زفة لديرة آل موازي (ديرة اهلها) النسوان تلهله والزلم ادك دفوف وتنشد هالاهازيج
اهل الديرة كلها طلعت الهالعرس ..

 

خذاها من بيت اهلها وركبها على الحصان وكام يجر الحصان ويمشي بيه واللي يدك دف واللي ينشد اهازيج واللي يصفك والنسوان تهلهل واطش هيل بدبهم .
خذاها زفة من ديرة موازي لديرة عكاب …

 

وصلوا غاد النسوان جانن مسوياتلهن مجلس عرس ودف واهزيج نسائية .. والزلم برا عملو استعراض بالسيرف عبن اصلهم بدو وهذا ارث اهلهم ..
عد ما كرب المغرب .. نزلت صياني اللحم الوادم اكتضت اعلى الكلعة الكل تريد تاكل صار ما لحد محط رجل .. كلها كلت وشبعت من خير خشان .. بعد الاكل قدموا الهدايا والفلوس للعروس كلمن على كد حال .. الفقير اطه اللي

 

يطلع بيده والغني كدم درهم الذهب وحجل الذهب والفلوس
من بعدها الكل مشى وضل بس ال خشان
ملكة خذت يازي ودخلتها للحجرة .. وخشان تحضل خاطر يدش ليلة دخلته …
تجهزت صينية عشا بيها كل التشتهي النفس

 

حطو الصينية جدام يازي وكعدت صامة اديها محناية ومرسوم على اديها بالحنة .
دخل خشان للحجرة …
يازي مدنجة ، حجه : مساج الله بالخير
ما ردت عليه الخوف ماكلها اكل .. توه راد يكعد
كبت العيطة ركض لكى سميعة متخربطة وواكعة ذبوا عليها الماي وصحوها وطلب من خالد ينده الها مرت الحكيم

 

خاطر تجي تعاينها .. ملكة كالتلو : روح خياي تهنى بليلتك انا اضل عد سميعة
بس سميعة كضبت بيدة وكامت تنحب وتكله : احس الصبح ما يصبح عليه اذا ما تضل يمي اموت
بس هو عرف سوالف ضراير حب راسها وكاللها : عدج العافية ندهت ابنج راح يجيبلج مرت الحكيم وعكبها تصيرين زينة باذن الله

 

كام واترخص منهم
ودخل على يازي بعدها خايفة وجاتلها الخوف كضب اديها وكاللها : لا تخافين وانا موجود .. خلني انده لوحدة تجيب ماي خل اغسل ايدج خاطر تاكلين
نده عليهن .. اجت زهرة ووراها بتها شايلة السطل كالتلها : اطني ايدج

 

حجه خشان : هدي من ايدج الماي والمعجنة اخذي راحتج
حجت : خوش خوش تتنهى بليلتك يعريس عسنها ليلة مباركة والله يذر بزيتك ويجثر نسلك
– امين
عافته وطلعت وردت الباب

 

كام هو وكعد يمها شال عنها البركع ونزع منها النقاب الذهب وكضب اديها وغسل الها الحنة .. واطاها خركة تنشف اديها
حس بيها خايفة كاللها : تعشي لا تخافي كربي خل ناكل خاطر نشبع بطنا ونكعد نتسامر
كرب منها اللحم كاللها : الكل يعرف انا ما احب اللحم اكلي واشبعي يلا يولو اشو اشوفج تاكلين يلا

 

خذت المعلكة من ايده وهو كاضبها وكلها تمن ولحم
وكام ياكل وياها ويتسامر ويحاجيها .. لحد ما فكت ونست هي عروس وداست بالكل وكعدت تسطر سوالف وياه
.. لشوية وهي تحجي حست ابطنها تلويها

 

كالتلو : يصير اروح
– وين
– بس بطني عدتوجعني
– اي كومي
اول ما كامت والمغص كضبها بعد ما كدرت كضبت بطنها وتلوي بروحها .. كاملها بسرعة : شجالج يولي ؟ يااازي

 

احاجيييج
كامت تصيح من بطنها وتصرخ احتار بامره شيسوي
يريد يطلع وهي كاضبه بيده حيل وتصيح : بطنيييييييي

 

كام ينده عليهم وكاضبها … وكعت بيده وانسحنت روحها ووجها صار ازرررك ….

يتبع….

 

 

(البشارة)
جنه مرتاحين ماندري الخبز ياهو اليجيبه
وبطرگ لعب الشوارع
لا جكاير ، لا سياسه، ولا حبيبه .

 

(للشاعر كاظم اسماعيل الكاطع)
عد ما شافها وكعت بين اديه مسحونة روحها ووجهه ازرك ادرك هي تسممت من شي .. اخذها بين اديه وشالها وطلع بيها ينده : وينكم .. البنت ماتتتتتتتت وينكمممممممممم
هبوا كل اللي بالبيت من اهل وخطار تفزعلا والحس ارتفع واضطج البيت بالهوسة .. جابو المايزتوا على وجهه

 

يصفكوما تكعد وهو يكللهم : البنت ماهي مسحونة مسموومة .. اندهوا حكيم الديرة بالعجل يلااااا
مرت الحكيم جانت موجودة
اسعفتها بالتكدر عليه .. ودارتها صفح

 

جا حكيم الديرة داواها وسربها كعدت ، وكالو اخذها وامش لمركز المدينة غاد يداوونا احسن يمكنه السم ما طلع ويمكنه ياثر بيها اخذها غاد واتفحصها .
انطاها دوا ونوموها بحجرتها .. وطلع الكل بس خشان وملكة ضلوا : شجاها البت منين تسممت اسم الله الرحمن

 

من كل اثم وثم نجس ما صلى على سيدنا محمد
– الاكل ياهو الجابه
– اانا والبنوات

 

– ياهن البنوات
– زهرة وعزيزة مرت مزهر ال عكاب ونجية مرت سلمان ال عكاب
– ووينها وينها اتمنالي البزرة الزينة يلو اخوتي يدعون الله كل يوم الله يكطع بزرتي وادري حاسديني على هالكلعة الورثتها من امي حتى ما هي من ابوي وان جان على زهرة امرها امر من غيرها
– خوية تظن احد مسممها

 

– عجل منين جاها السم لو ما جان الاكل مسمم
-يا ادخيلك ربي خوية انا صبيت الاكل بيدي وبخت الله ان كون وحدة جاسته
– يولي البت مسممة وانت تتحلفين محد جاسه عجل منين جاها السم طاير وصد بيها
– يمكنها كلتلها اكلة غاد يم اهلها واثر السم طلع من جت لهين

 

– وياهو اليسممها من اهلها
– ونحن مدرينا بيهم
– ول يملكه الفعلة هذه ما خرجت الا من اثر هالكلعة ماهي من ابعيد جتالنا ويانا لاجن مالي وكت الاكعد واربي ياهو

 

الفعلها لصفالهم واكطم روس الفعلها
حجاها وكعد يم راس يازي
ملكة : وي يكلبي البنت وجهه كام ما يتفسر ذيج البنية الحمرة وجهه غدا كركم وبس تون وما صاحية دخيلك ربنا

 

استرنا
حجتها وطلعت وخشان ظل مجابلها الليل كله
من الغبشة حطها بالربل وطلع بيها لمركز المدينة

 

اكو مشفى بمركز المدينة دخلوها تفحصوها وانطوها دوا وكالوله على هالدوا تستمر تصير زينة .. وما عليها شي
اندار لها : تكدرين تكفين لحيلج ؟
هزت راسها : اي
كامت وهو اخذ ايدها وكوماها .. نزل النقاب على عينها

 

وشال العباية السودة الثخينة المشرشبة بخيط احمر .. وحطها على راسها.. مشت والنقاب مطلع بس عيونها
خذاها برا ..
الربل موكف ليغاد من شاف ابو راشد جا يركض : ابشر يبو خالد
– والله يابو راشد نطانا هالدوا والله كريم بحالها
– الله اكرم الله اكرم تكوم وتتعافى باذن الله كول امين
– امين امين

 

حجاها وخذاها وهو كاضبها ويمشي بيها على كيفه لحد ما وصلوا الربل ( عربة حصان ) فتحله الباب ابو راشد وخشان كضب ايدها وكاللها : حيلج وحيل الله
استندت عليه وصعدت للربل وصعد وراها

 

ضلت عينها شايهه على اركان المدينة تختلف عن السهل العايشين بيه كالتله ( نحن وين ؟)
– بمركز نينوى
– هذه المدينة

 

– ايه هذه هي المدينة
– عجل نحن عليش ما نعيش هينا ؟
تبسم : كومي لحيلج وفكري وين تعيشين يولي

 

اندارت ادحك عليه : عرفت السممني ؟
– نعرفو ان شاءالله
– انا رايدة منك طلب

 

– امري ؟
– انا بعد الصار اخاف اضل .. رح تكول لتخافين بس انا عدخاف مرة دربوا حية ع الحجرة اللي جنت انا نايمه بيا ومرة يسمموني .. ذيج المرة وما عرفت منهو السممني وما راح تعرف الحين وراح اضل بخوف تحت هالكلعة
– الامر ما بهالخطورة يا بنت .. بس…..قاطعته

 

– لكن اش تنطر اموت !
– انت شاكة بأحد في احد ابالج عسى يساعدنا نعرف منهو صاحب هالفعل
– ما عرف
– عجل وش ونعمل ؟

 

– الكلعة بيها هواي حجرات وامي وخواتي تعبن بعيشتهن بخيمة الشعر والشتا جاي ووانا تعبت وتعذبت كثيغ وانا بعيدة عن امي .. اكو مشكلة لو جت هي وخواتي يعيشون بحجرة من حجر الكلعة ؟
– ماهو اعلى كيفي !
– عليش

 

– امج غريبة من آل موازي وانا ازلمة من ال عكاب عد ما اجيب مرة غريبة واحطها بداري عيبتها علي واتعاتب بين العشاير
– بس انا ما امن اذا ما امي جانت يمي

 

– انا عرف محبتج لامج ومكدرها بس لازم تكدرين هي مرا غريبة شلون احط مرا غريبة بداري ؟ رايد ارتاح افعل كلشي بلا حيا اخذ راحتي بداري .. ما اكدر احط غريبة بداري اخوي راد مني حجرة وحرمت ما اطي حجرة من حجر الكلعة من كون حريمي بداري يتمددن ياخذن راحتهن ما احط محرم بينم
– اي اخوك زلمة امي مرا ما تحرم عليهن

 

– بس تحرم عليا اذا مو امج خياتج يحرمن عليا وعلى خالد نحن غربة وياهن
جبنا الدرب اريد اقنعه يجيب امي للكلعة بس ما رصا يجيبهن … كتله عجل انا رايدة اروح يمها ارتاح لبين ما اكوم لحيلي كالي : وان جنتي عروس وما يصير تباتين برا الدار لجن ما احب اكسر بخاطرج والتبغاه يجرى
اخذني ووصلني لدار ابوي
استقبلني ابوي ورحب بخشان جنه نازل من السما اعرفا مو لحاله كن لمالو وجاهو .. خشان وصلني وما رضا يصل

 

ووصاني ما احجي لاحد على الجرى امس بس كاللهم تعبت من العرس ورادت امها خاطر ترتاح
عد ما راح خشان ودخلت البيت
جنت احسب امي بعدهي بالبيت .. خشيت اطمش ما هي بالبيت اندرت لمرت ابوي واكف وراي بس ما مسلمة عليها : عجل امي وينها ؟ ما هي !
– وشنهي جيتها لهين عرسج وكضى شعدها انوبة مجابلتني

 

عدا تحجي وابوي دخل ، حجيت : امي ردت لخيمة الشعر ؟
– اي .. ارتاحي يابه ارتاحي محاسن جيبيلها فراش خل ترتع وتريح روحها
– لا خل امشي لامي
– توا خشان وصاني بيج شنهي تريدين اتطلعين ما صاحب جلمة جدامو ، اكعدي

 

– عجل انده لامي تجي هين
محاسن : تنهده عليش انت ما عروس مجانج ابيت رجلج شعدج لافية علينا بصباحية عرسج شني الوادم من تسمع شتكول شنهو عيبها وردوها
صاح بيها ابوي : اكول اجفينا شرج امشي .. البنت هذا هيبتي وعزوتي ما دنج راسي جدام احد معدلة على ابوها

 

بس تعبت من عرس امس حكها ناسهم جثيرة .. اكول جم راس عجل ذبح اخوي يكول عمل مجازر اعلى عرسه
– انده لامي كللها انا هين
– اي اي ان شاءالله بس ردت اسألج يكلون وادم ثجيله اجبلت على عرسه اطوج ذهب فلوس شنهي الحصلتي ولو من شراشيبج وبتوتج متلتلة ذهب .. هذا المعضد من نيشانج لو جديد

 

كضب ايدي يتفكد المعضد
جريت ايدي وكمت من مجاني وكتله : اروح لخيمة امي
– اكعدي اكعدي لا تفشلينا ويا خشان يروح يعصب لو عرف مريضة وطالعة للكاع
– ليش امي وين هي ؟

 

-بالكاع هي وخياتج عديشتغلن
– اروح اشتغل وياهن
– اكعدي اكلج لا تفشلينا ويا الزلممممة اكعدي
– يابه انت مالك جلمة على ولا انا جايتلك ولا جاية لبيتك ولو ادري امي ما هين ما دخلت الدار ولا شفت وجوه ما ارغب بشوفتها .. بالمبارك عليك محاسن انا اروح اشتغل ويا امي

 

عفته ومشيت طلعت من البيت
امي عد ما شافتني اجبلت من ابعيد ركضت كن طاير كلبها : ها يولي شصاير عليش رديتي
– سمموني بليلة عرسي
– يمممممه وشصار وياج
– كلشي ما بيه يمه طحت شوي وهاي انا جدامج ما بيه شي بس كتلو ما بيه حيل خاطر اجي يمه ما بيه اجابل

 

نسوانه
– ارتاحي ارتاحي يولي مسممة وواكفة
– هدج مني عليش رديتي لخيمة الشعر
– عجل يا بنتي اشنو اسوي ومرت ابوج ما ترضى بضلتي

 

– لو جان بيتها ؟
– ما اريد المشاكل ولا الي حيلها خليني انا وخواتج هين
– وفوك ما مكعدج بالخيمة تشتغلين بكاعو
– عجل شناكل وشنشرب يا بنتي

 

– ماهي حيرتج حيرتا هو اليحير بزادكم
– ييييه انا لو ضليت على زاد ابوج يا بنتي يصبح الزاد بالكطارة ويموتن خياتج جوع
– الحال ما يضل هيج والله لا اخلي ابوي ومرتا يتمنون يطولونكم
– لا تخليهم ابالج واحجيلي شنهو سالفة السم شنهو الجرى

 

– هالفعل ما يطلع من غير من نسوانه
– ضرايرج
– كولتج ضرايري
– وشنهو الراح يعمله ؟

 

– ما راح يعمل شي
– لا تظلمين بخت الزلمة خوش ازلمة خشان ويودج
– وانا ما كلت شي لجنه ما راح يعرف منهي السممتني انا عرف
– وشنهو الراح تسوينه

 

– لا احرهن واخليهن بحسرتا … وينطرن بس خل يصير عدي جاهل وابزر
– يولي ولو ما بزرتي ؟
– ملكة تكول التلحك معناتها تبزر
– كل نسوانه يلحكن وكا هن ما بزرن

 

دحكت بيها : يمه لا تخوفيني
– يبنتي حالج من حالهن لو ما بزرتي
– ما اريد يخطي على بالي الما اتمناه .. كل الاريدو الحين اعرف ياهي منهن السممتني خاطر اعرف عدوتي منهن
– لا تعاديهن يمه الف صديج ولا عدو واحد

 

– يمه من يوم حطيت رجلي بالكلعة وهن ما يودن طبتي ما بيدي انا ضرتهن ويشوفني خطر عليهن لو بزرت
– الله كريم يبنيتي الله يشهد اني ادعيلج يا صباح ويا مسا .. الله يهدي الج ويرزكج ذرية السلامة منه
– امين
ظليت ويا امي للظهر
رد خشان خاطر يطمن اخذت الدوا عد ما شافني بالكاع ويا امي اشتغل كال : زين انج كمتي لحيلج وتعافيتي عجل نرد لكلعتنا

 

– خليني عد امي يمها اصحى وصحتي تردلي
– ماهو الحين مصباح عرسنا وفشل من الوادم ودام انج بخير خلينا نرد وبغير وكت نمرهم
امي ساندته وكالت : حجاية زلمتج يمه عين العكل جيتج بهاليوم ماهي زينة ردي ويا رجلج وانا اجيج العصر لو كضيت شغلي

 

اخذني وردينا للكلعة كبل العصر
دخلت الكلعة امشي على طولي وهن الحسبالهن ارد مشيولة
شفت الغيض بين عيونهن .. رحت لحجرتي واجت ملكة تطمن علي وسعلتها : شسوا خشان
كالت : كلب البيت فوك تحت وهددهن ولعب بيهن جولة

 

– واكو وحدة اعترفت
– لا حرام مساجين حلفن مالهن ايد
– عجل ياهو
– خافنها عزيزة بس نروح نتم مرت اخونا هم فشل
– وشنهو فايدة تسممني شلها بيه؟

 

– مكاون كديم بين خشان واخوته
– عليش ؟
– انا وخشان من كريمة وباكي اخوتي من نسوان ابوي الثلاث
– كريمة امج وام خشان

 

– اي .. امنا جان ابوها بالجيش العثماني وحاله خير وعنده هالكلعة .. ومات وماله غير امنا كريمة امي ورثت الكلعة من ابوها وعد ما ماتت امنا خشان ورث الكلعة من امي .. بموتت ابوي اخوتنا الباكين يكولون الكلعة لابونا والنا حك بيها وتكاونوا ذيج الكونة على هالكلعة بس ما كدروا لخشان وخشان ما رضى هو واخوته يصيرون حجوة بين الطوايف بنا لكل واحد من اخوته بيت طين وكاللهم اليريد يكعد ببيوت الطين يكعد الكلعة الي ولحريمي ما يدش

 

بيها محرم
– وضلوا حاقدين عليه ؟
– الزلم تصافوا بس الكلوب بعدها مخشنة لجن النسوان كشرة نسوان اخوتي يغارن من نسوان خشان عجل هن ببيوت طين ونسوانو بكلعة يطورد بيها الهوى من كبرها .
كعدت استمع لقصة خشان ولهيت وياها

 

لليل اجبل خشان .. جنت حيل خايفة بس ملكة جانت تكلي هالليلة باب دربج للجنة يولي صيري مرته وبزريله واربحي ابزريته
((لو ادري بس )))
كضى الليلة وياي بخير
لليل وانا افكر بالسممتني من كون لازم اخذ حذري واعرف شلون اردلهن غيضهن يسممني واسكت؟

 

اجيبها منا واردها منا .. اتذكرت جلمة كالها خشان بليلة عرسنا حط ماعون اللحم جدامي وكال ( الكل يعرف انا ما احب اللحم )
اندرت له : خشان
هو نايم كوة نطك : هااا

 

اردفت : ليلة امس كتلي حجوة ضلت ابلي
– شنهية ؟
– كتلي الكل يعرف ما تحب اللحم منهو الكل

 

اندار يتحرك من فراشه يدحك عليها : اهل بيتي عليش
– عجل اللحم هو المسموم
كيض حواجبه : وش تريدين تكولين
– ما اكول تصبح على خير

 

نمت وعفته بحيرته .. كعد الصبح والجلمة ترن بمسامعة
الصبح على سفرة الريوك .. كاللهن : يومين وانا ساكت واكول اعرف الماثوم ياهو لاجن والله ثم والله اني ضال ادوره وراح اعرفه واعرف الفاعل ما يتعدى هالسفرة .. وان طاح بيدي الاسم الا سما الله ما تغطي غيضي منا .. لا افتح عليه سبع ابواب من ابواب جهنم

 

حجاها وكام ما ماكل شي من السفرة ندهت وراه ملكة : خياي زادك ما كليته .. عمت عيني الزلمة انشده ما يعرف امره غيضة يفور
يازي : انا اعرف الفاعل واعرف اسمها .. والليلة غيضه يبرد
اندارتلي ملكة : ومنين تعرفين

 

– فتنوا يمي وعرفت بس والله لو ما جت واعتذرت مني الليلة لا اطي اسمها واخليها تتبع مليحة من هالكلعة .
حجيتها وكمت واني ما ادري منهي منهن الحطتلي السم
.. بس حجيت وكت صدك اعرف الاسم خاطر وحدة منهن تفتن لو خوفها يكضيها وتفضح روحها .
يومها لا زهرة ولا سميعة طلعن للكاع

 

انا رحت للكاع افتر .. الكاع عينك وما تمد خضار والنسيم بارد كمت امشي وعبايتي على راسي .. اجت مرت ابو راشد : مصباح الافراح والسلامة ول داده
-مصباح السلامة
– اشوف الحجي ماهو اعلى طبايعه هاليوم ابو راشد كالي انت مريضة وخذوج لمركز المدينة

 

– صرت احسن ….
كدمتلي كاس وكالتلي : شراب الزبيب يفيدج ويكويج
– مشكورة
خذيت منها الشراب وشربت وكمت امشي وهي تمشي وياي

 

جا راشد … ابنها يلعب عمره يطلع ٥ سنين … عثر بيه وطحت وايدي صارت على خشبة جارحة انشكت ايدي وكام يذري منها الدم
كامت امه تولول وطكته وركضت الي تعالج ايدي

 

وانا ادحك بالجاهل يبجي ويتنوعلي … هذا جان اول جرح من راشد .. كل جروحه يدون بالفاد .
الجرح صار بكلبي ياكل ايدي جن نار ومشتعلة بيها
تداوت وملكة اجتني تركض : ها
– ماكو شي تصوبت بسيطة ما صار شي

 

ضليت ويا ام راشد …
العرفته هم من آل خلف .. ناس اكثر بيوتهم خيم ما هي بيوت طين معروفين بين الدير بحالهم عسر واكثرهم فكر جيوبهم يصوصي بيها الهوى ..

خيري ابو راشد واهله جانو فلاليح بكاع عكاب

وابو راشد جان يود خشان حيل وصديجة .. من تالي صار اكرب الناس اله وايده اليمين وسايك الربل مالو .
واني جاي امشي ويا مرت ابو راشد
جت سميعة وصاحت : ياااازي

 

اندرت لها : شنهو
– كربي احاجيج
ترخصت من مرت خيري واجيتها حجت : انا صدك ما اودج واكولها بوجهج ما بكفاج اتمنى موتج ولونج بمجاني جان تمنيتي مثلي بس ما سويتها الفعل هالفعل زهرة

 

– ومنهو الكال زهرة
– انا اكلج هي ، وكت الزفة جانت ملكة والكل ملتهي بزفتكم للحجرة بس هي بالمطبخ وبتها اباب المطبخ انا جا كلبي محتام وافتر وشفتها بس ما جنت اعلم بفعلها .. اجيت اكلج خافنج شاكة بيه لو زهرة فاتنة عليه وحك هو الله ما انا الفعلتها وراس خالد

 

– انا اعرف من البداية زهرة وادري ما انت من كلت اعرف الصبح انا اعلى حك ما محتاجة فتنتج هاي
– انا اجيت ابري ذمتي مالي حيل انضام باثمها
حجتها ومشت رديت للبيت جانت زهرة وبناتها بالبيت
كتلها : رايد شراب عسل اعملي لي

 

نفرت : وشنهو خدامتج انا عبدتج
– اذا ما جنتي رايدة تضلين خدامة عدي فاشوف تخدمين اهلج غاد وتتحسرين لشوفة بناتج اخيرلج
– شتضنين

 

– جربي انطي اسم لخشان وسميعة ومليكة يشهدن .. وشوفي اذا راح يصدكنا لو يصدكج
– تتهميني بهالفعل يولي
– سميعة فتنت عليج واكثر من واحد فتن وكال شايفج بساعة زفتي بالمطبخ تحومين فوك صينية العرس وانت

 

التعرفين خشان ما يحب اللحم
عد نحجي فات خشان
اندرت ادحك له كال : ملكة كالت انصبتي خير وش جرالج
– راشد واهو صبي زغير عثر بعباتي ووكعنا ورديت ارتاح

 

حجه وياي ورحنا لحجرتنا وهو خايف علي
دخلت زهرة وهي عاملة شراب العسل .. دحكت بوجهي وعيونها حمر من البواجي والرهبة وجنهن يتوسلن ما احجي وانطك اسمها .. خذت من ايدها كاس وهي تكول : كلت الشراب يهني كلوبكم وانتم معاريس الله يهنيكم محتاجين شي

 

ما رد عليها حطت الصينية الكاس جدامه وطلعت ، حجه : في شي
– شنهو ؟
– مدي انا ما مرتاح للوضع
– واش تعمل ما هي الدنيا هاكذ ما بيها راحة .. استراحلك ساعة لبين ما يجهز غداك .. هد الكاع اليوم
تبسم وجابلني .. غدانا اجا لحجرتنا وضل للعصر يلا كعد راح تعلا ورد يلبس شماغه حجيت : خشان طالبتك

 

– امري
– اعرف صعب عليك تجيب امي وخواتي للكلعة بس رايدة ابنيلهم بيت طين البرد كضاهم بهالخيمة
– وياهو اليرضى ابنيلهم بكاعي انا اضلني زلمة غريب عنهم يا يازي والمرة لها اهل ولها زلمة
– وان جانوا الاهل وزلمتها ما بيهم عونه .. شفت عد ما خلص عرسي ردت للخيمة طارتها مرت ابوي

 

– انا ما اكدر ادخل روحي
تضايكت وتحسرت اردف : بس هم ما اكدر اردلج … انت بلغي امج واذا رضت ابنيلها بمجان الخيمة بيت .. انا مستعد وخل يكولون بنتها بنت لها ما انا خاطر لا يعاتبوني بخطيتج .. شرايج
– يبعد رايي وكل طوايف اهلي

 

تبسم لفرحتي
طلع وزهرة اجبلت وهي تتوسل : ابخت الله لا تحجين غلطت والله انا ادري غلطت بس والله ما بيدي غيرتي حركتني ليلة عرسج وردت اخلص احلفج بغلاة امج احلفج بعزيز كلبج
– ما راح اكول بس شيصير بالبيت تكليلي وشتفعل سميعة من ورا ظهري تكليلي الا والله اكلو تاليتج تلحكين

 

مليحة وانت تعرفين خشان ماهو كريم بالعفو اليخطي ينال جزاه
– بعيني والله مستعدة اعمل كلشي تريدينه لجن لا تكولين اسمي لخشان احلفج ابخت الله
– اييييه كتلج ما احجي لا ادوخيني روحي كملي شغلج
طلعت من الحجرة وانا ادحك وراها … احطها بيدي احسن ما ورا ظهري وتحير شتعمل بكفاي وانا اعرف خشان

 

حت لو درى بعملتهن يطردهن وهلة ويردهن عكب لجل بزرتهن مليحة من ما ردها عبن مالها بزر بس ذني كل وحدة عدها منه بزرية وهو يحب بزره وما يضرى يخليهم ابعاد عن امهاتهم مثل ما عمل ابوي وياي ..
فضميت سرها بعبي كل ما مالت عني ابزها بيه خاطر تضل تحت طوعي ما احسبلها .
ثاني يوم سرت عند امي

 

طلبت منها ابني الخيمة واعملها ولخواتي بيت …
كلش فرحت بس كالت : شوفي ابوج الكاع كاعو وكاع اهله يمكن ما يرضى
عد ما رحت لابوي .. طلبت منو ابني بدل الخيمة بيت لامي وخواتي .. ساومني : تبنين بيت شرط تنطيني كليو ذهب

 

من ذهبج اضن فلوسج وذهبج جثير ما تبخلينه على ابوج
– والله لو اعرف امي وخواتي ينامون بالدرب ما انطيك درهم واحد .. انت البعتني عد حركة هالكاع هاي واثمرتها واجر بيعتي جاي تريد اجر البنى بيها ذهب
– عجل ان جان خيرج بس لنفسج فارجي ولا تشوفيني وجهج وامج وخواتج ممنوع لا يطلعن برا الكاع ولا يبنن كاع اذا مو بكيلو ذهب.
رديت لخشان كتلو … كال : وانا ايش كلت ؟ ماني عارف ابوج وعارف طبعه … الزلمة عبد المال وماهو اصيل …
– والحل امي وخواتي عدا يعانون بكاعو يشتغلون بالنهار والبليل جاتلهم البرد لا يجثرلهم غطى ولا ينطيهم زاد الا يشتغلون بكاعه .
– وشنهو البيدي ؟ انا ما ولاة امرهم يا يازي ان جان الله باليهم ببابوج الله يرفع بلاه عنهم
ضليت الليل والنهار اتكلب اريدلي زاغورة اشوفلي درب ماكو ابوي ما يرضى يطلعن من كاعه ولا يرضى يبنيلهن ….
مرت الايام وانا اتحرمص على عيشة امي وخواتي غاد
عد نهاية الشهر الدم نزل عليّ … من شفت الدم تضايكت العرفته من ملكة اذا نزل علي دم معناتها انا ما حبلى
رحت بلغتها .. اتضايكت حيل
بالليل عد ما اجبل خشان وعرف وضعي … الدنيا طلعت من عينه وكال … كله تخاريف انا جنت عايش على وهم … صدكت مرة مخرفة وبنيت حلمي على غيمة تشتت باول ضربة شمس
اتضايكت حيا وعز ايامي انكلب سواد
ونسوانه اشوف نظرات التشفي بعيونهم …
وسميعة تغوسل بخالد شاب وتغوسله بالباحة قسط بيا وتسمع ( الله يحفظك وليدي انت وريث هالكلعة الله يحفظ ابوك ويخليه خيمة فوك روسنا مالو غيرك يبعد كلبي وطوايفه )
– لا تبسمرين يسميعة راح ابزر وراح اترس هالكلعة بزر من خشان
– هههههه هذا الميدان يحميدان
زهرة : كلنا جنه مثلج وجنا كلنا نضن بس الصوج ما بيج ولا بينا ونعرف الحك لجن ما نكدر نكوله
– خشان ماهو معيوب وجلمتجن هذه لو سمعتها لا اكلو بيها واخلي كل السان كالها ينكص .. خشان ماهو معيبو ولا هو ابنر نسل … وراح تذر بزريته
– لا تفشلين روحج وتمننينها عبن تالي المنية خيبة تطفيج
ما بينهم احسب روحي كوية بس ما بيني وبين نفسي خيبة روحي تحركني امري مثل امر مليحة ما اختلف عنها بشي …
خشان يودني لجن تالي هالمحبة شنهو لو ما كدرت ابزر ؟
لا كدرت اطلب منه عونة لامي ولا الي عين بهالكلعة عكب ما صرت حالي حال مليحة عاجر ما اخلف .. بس بعدني بعين كوية جدامهن اكلهن باجر عكبه اخلف .
مر الشهر وجا الشهر الثاني وهم نزل عليه الدم
وكل شهر احيض بيه الزلمة تضيج الوسيعة بيه ونسوانه يزيدن بالشتيمة ويتصرفن جنهن هن راعيات هالكلعة وانا باول اثم اجلي من هالكلعة .
كمت ابجي وادعي الله يكتبلي البزرية لجنة ماكو
ثالث شهر يمر والدم ينزل مثل كل شهر ..
الرابع …
الخامس …
تمر الشهور والحال نفسه
كمت احس بحالة ثكل .. وظهري ينحرني من الوجع
ما يهلي اشكي واكثر شكاوي عد خشان بس الوجع الجاي امر بيه عجيب .. واحس ببطني علت وكبرت واحس بروحي سمنانة بس ما اكدر امنع روحي من الاكل ولا اكدر احط حد للجوع مالي اجوع هواي ..
ذاك اليوم جانت مارة رحالة بدو حط ارحالهم جريب من ديرتنا .. فانا اترخصت من خشان وكتلو : بدو رحالة حطو اليوم جريب منا اذا ترخصني اوديلهم صينية زاد لوجه الله .
– مرخوصة ييازي بس اخذي ابو راشد وخالد وياكم خاطر لا تروحون بس حريم
– عد امرك
حجت سميعة : تحير بفعايلها خاطر تحسب روحها شيخة واهي عاجر حالها حال حصيرة خوص بهالدار
اندرت لها وكلت الها : صمي ثمج عني يسميعة اخير ما اصمه ..
– جلمة الحك تزعل ييازي
– الكاتب الله ما يزعلني وانا ادري باجر عكبه الله يرزكني من خيره جثير ….
– احلام العصر كله تنغر بيها وي الله يعينج على احلامج اروح اشوف ابني وينا
– بختج بهالولد الا حالج حال مليحة تترحلين من هالدار
سميعة : عليش انا العاجر لو غير خيرات الله هالولد هاذ ابني ونور عيوني وفتحت عيني
– عجل احفظي على ابنج اخير ما يروح من ايدج وتصفين عاجر عكبه
– تهدديني بولدي
– ما اهددج باحد بس الدنيا متدوم لاحد
حجيتها ومشيت جاي احضر بالاكل انا وملكه وانا ادحك خشان ينده لابنه .. اشوفه هالفترة جثير ما يداري ويصف ويا ادرك هذا وحيده وما يصير عده غيره
نده : خالد .. صاحب يازي لحطة البدو عد ما تكضي الزاد
– تامر يابه
حجيت لخشان : باجلة خضرة تريد اصبلك منها شله
– صبيلي كبل لا اطلع
صبيتله وانا اكلو : انا اعرف الله راح يرزكنا بزر جثير يترس البيت كلبي حاس لجن الله لو ما راد هاي گسمته والما يرضى بگسمة ربه كافر
– الحمدلله على كل حال
– انا اشوف تلاكي بت حلال لخالد دامو ولدك البكر والوحيد
– عمره ١٦ بعده ناعم وزغير ..
– ما تعرف الدنيا شضامتلك احفظ بزرك لو ما كتبلك الله بزر من ابنك
– شلون
– زوجه وخله يترس هالكلعة جهال ويذري نسلك منه
صفن بوجهي : تضنين يجرى
– يجرى ماهو زغير .. وانا اعرض عليك اختي مرجانة عمرها ١٢ سنة لجنها تحيض ما مثلي بطيت بحيضتي
– كلامج عين العكل انت وان جنتي بعمر زغير لجن عكلج يسواهن كلهن … من زمان وانا اشوفج غير عنهن ووجودج بحياتي يهمني حت لو ما جان بينا بزر
تبسمت له … اكل الباجله وراح وانا كضيت الزاد وحملت لخالد يشيلا عني .. جبت الدرب كله افكر شلون اجمع اختي مرجانة بخالد وازوجهم .. اقلها وحدة من عدنا تورث الكلعة ومنها اختي تفتك من ضيم ابوي … ولو اعرف سميعة راح تكعد عثرة ابلعومي وما راح ترضى باختي جنة الها .
وصلت غاد عد هالبدو … وسلمت : يا مرحبا بالحط جريب من كلعة ال عكاب
اندار زلمة جبير بالعمر صاح : يا حي الله من جانا
ونده لنسا البدو يرحبون بيه .. انطيتم الزاد اتشكروا مني جثير وهميت ردت اكوم ..
حجت وياي مرة كالتلي : تحطين بزرج بالسلامة
– انداريت لها وكلتلها : بس ما انا بحبلى
– امبلى حبلى وحبلة اببنت عينها خضرة مثل هالشذرة
طلعت من شيلتها شذرة خضرا وحطتها بيدي
– ازلمتي وكفت بزرته وما عاد يخلف وانا ماني حبلى
– ازلمتج مجبوس بعمل وحدة رادته وما رادها وكطعت بزرته .. انفكت جبسته لجنه بزرة نكسة
– نكسة
– بزرة حيض اتحبلين وما ينكطع حيضج .. نكولها بعربنا بزرة نكسه …
ضليت ادحك ابوجهه واندار ادحك بوجه مرت خيري : شلون تحجين هيج منين تعرفين
– نعرف بعربنا اسرار ما يعرفها الا الله .. اخذي هالشذرة وعلكيها بكماط بتج لو جت .
خذيت منها وانا افكر بحجيها ادحك بالشذرة خضرة لونها غريب … رديت وانا راسي ياخذ وينطي
لليل حجيت لخشان كتلو : الوحدة شلون تعرف نفسها حبلى لو لا
اندار يدحك علي : من جمن يوم كضيتي الحيض
– بس انا احس بروحي ثكلانا وبطني جاي تكبر
– مافي مرة تحبل وهي تحيض الا ينكطع
– امبلى يكلون يصير
اندار وهو يفتح ازار قميصه ترك من ايده : علاش ترمين
– ما ارمي بشي انا بس رايدة اعرف نفسي حبلى لو لا
انطيته لشذرة اخذها من ايدي : هذه حجر فيروز من وينلج ؟
– مرا من عرب البدو نطتنياه وكالتلي حطي بكماط بنتج لو حطيتيها بسلامة
– مخرفه
– يمكن .. ويمكن هي اعلى حك
اهي كالت زلمتج ما معيوب لجن معموله عمل من وحدة كانت تبغاه وهو ما بغاها … عملتله عمل كطعت بزرته لجن انفك عنه العمل وانت حبلى
– يازي لا تشوشرين تعبان وخليني انام
– انا بس ردت احجيلك البكلبي عبن مالي بهالدنيا احجيلا البين اضلاعي غيرك .. الجان حجيها صدك لو لا ما خسرانين شي لو رحنا الصبح للحكيم افحص انت تشرف على بطني وانا عودي رفيع ما ثخينة خاطر تجرالي هالبطن العالية
– الله كريم
اخذ الشذرة بيدة ما نطانياه ونام
كل ما اكعد بالليل والفانوس مفتوح الكي موجه هالشذرة بالفانوس ويدحج بيها
كعدني الصبح وكال : انهضي خاطر نروح نفحص
كعدت وانا متبسمة واكلو : يا حلاتك امس تكلي خرافة وتصبح انت مامن وتكلي انهضي
– على حجايتج خلنا نمش يمكنا الله كاتبلنا بزر اعلى حيض
لبست شيلتي ونكابي والذهب مالي وعبايتي وصعدت وياه بالربل رحنا لبيت قابلة ، دكيت الباب وكلتلها على فحص كالتلي اي اعرف خشي .. خشيت بيتها طين
دخلتني بحجرتها وكشفت علي وكالتلي : بيا شهر انت
– ماني حبلة جاي اريد افحص
– يولي شني المانج حبلى بطنج شعلواتها
– بس انا لهساه احيض
– بزرة حيض ماله غرض ..
– ابخت الله يعني صدك حبلى
– يولي اجذب عليج والله حبلى حسبالي جايتني اعرف انت بيا شهر
– تعرفين انا بيا شهر
اتفكدت بطني وكضبتها : يمكنج نهاية السادس ويمكن بالسابع هيج
كمت وشلعت كلادة من كلايدي الذهب وانطيتها الها وكلت الها : الله يبشرج بالخير
وحضنتها فرحاااانة
طلعت من البيت عيوني تذر دموع فزع خشان وهو يكول : ها يولي اش هالدموع
– البشارة يخشاااان البشاااارة ذولة دموع الفرح انا حبلى
خشان من فرحت صرخ بلا وعي وهو يكع للكاع : يااااا الله
يا ااااااالله يا رحمتك يا اااااالله …..

يتبع….

النـرجس احـلى ورّد وانـتِ احلـى مِـن عنـده
(كاظم أسماعيل الكاطع)
دنج اركبه للكاع يصيح : رحمتك يا االله
وهلن دموعه بلا شعور .. ضليت واكفة اطمش عليه وما كدرت اكضب دموعي هلن وياه
دحج علي وكام حب راسي وكال : الف الحمدلله والشكر الف الحمدلله .. رحمتك يا رب
– شفت من كتلك احساسي ما يخيب واني احس راح ابزرلك هواي واترس ديرتك اهل
– يا بختي … انا مصدك بعد كل هالسنين الله يشملني برحمته وذر بزريتي اليوم اخلي بشاير الله بكل مجان واذبحلا الذبايح
– احلفك لا .. ما اريد احد يعرف
– عليش ؟
– انا ما رايدة احرضك اعلى احد لاجن انت تشوف وتعرف ضرايري شلون متشمتات بيه عد ما علمن ما ابزر .. لو درن انا حبلى ما راح يخلن فعل ما يفعلنه هن ولا كل واحد يكره خاطر هالبزر ما يضل ابطني
– تخافين العين
– عجل باطل من يكولون ثلثين المكابر من العين .. ما طوله الله رزكنا وشملنا برحمته خلنا نضم فرحتنا بينا ليما نفرح بالجبيرة عد ما اجيب بسلامة
– هاهيه امري المهم عدي الله ما كصر وياي وزادني بفضله الف الحمدلله والشكر .. اطلبي مني اليتمناه كلبج على امره تم
– راح اطلب لجن ما الحين .. بوكته
تبسم وكال : انت تامرين .. الف الحمدلله والشكر ربي الف الحمدلله
صعدنا الربل ونده لابو راشد صعد وصلنا للكاع
ونزلنا اثنينا ضلينا ليما صار الغدا ونحن واحد مجابل اللاخ وخشان فرحته ما واسعته
جاب خالد الغدا .. وكعد يتغدا ويانا ..
وهو عدياكل حجيت : شرايك يخالد نزوجك ؟
دحك عليه وتبسم ، وابوه ردف : بودك ؟
– التشوفه يابه عد امرك
– بارك الله بيك وليدي .. ان شاءالله نشوفلك مرا تناسبك ونزوجك خاطر نفرح بيك ونشوف بزرك .
يازي: عروسته جاهزة ان شاءالله بس ينوي احطها تحت ايديه
خالد : ياهي ؟
ضحك خشان : يازي حاطتلك عينها على فرد مرا تريدها الك
– ياهي يابه اعرفها
– ما ادري عنك يمكنك شايفها اخت يازي الزغيرة
– وانت تذكرها اشتااكيت لها ولامي والباكيات بعد اذنك اروحلهم عكب الظهر ازورهم
– على راحتج ييازي فرحة اليوم البشرتيني بيها على اثرها اطيج عيني .. انت تامرين ما بس اطلبين
– يا بختي بودي اترحم على ابوي عد ما باعني بذاك اليوم لو ما بايعني ما جان صرت عدك .. يمكنه القدر
– هلا بقدر كاتب الله يا محلاه
حجه وكام
كمنا وراه نمشي للكلعة وخالد يندستي : اختج حلوة
تبسمت : لو جنت رايد تشوفها امش وياي اليوم زتني الهم وتشوفها
تبسم وكال : اي اروح
الولد بعده زغير … حيل كيف واعش جو عد ما سمع نوينا نزوجه … الظهرية كلها منكع روحه بالماي ويجلف خاطر يصير نظيف وحلو
خشان من الفرحة لا هود ولا نام كام يتكلب الظهرية كلها
عد ما نزل الظهر كال : كومي اخذج لاهلج دام ما نمت
كمت لبست النقاب الذهب والعباية المطرزة وطلع هو ينده : خاااااالد
– امر يابه
-انده لابو راشد گلو يجهز الربل خاطر نمر على آل موازي
سميعة : ليش ما كبل ثلاث تيام جنتوا بال موازي شنهو الجرى شو مسوين الدرب خريط
دحج عليها واندار ما مهتم بكلامها وراح ينده على وحدة من بناته تحطلو الطشت يغسل وجهه
اندرت لها وكتلها : اهلي ورايدة ازورهم شنهي اعتراضج
– عشتو اهلها وهم خيمة شعر فوك منها لابسه نكابها الذهب اليشوفها يكول رايحة لكصر الوالي ما لال موازي وهو زينهم بيته طين
– يكفي بزينهم انا منهم
حجيت ومشيت ضحكت وراي وهي تحجي : هالعاجر شايفة بروحها زين
اندار الها خشان وهو يكللها : كفي غيضج وكصري السانج يا سميعة
– انا ما بقيد اغيضها لجن هي التجبر الواحد اعلى الحجوة المرة الما تخلف حصيرة دوس اباب البيت اخير منها
– شكثر تركركين لخاطر بختج
حجاها وهو يتعداها وهو مكشر منها ومن سوالفها
عرضلي خالد : ابو راشد جا بالباب
– بس خل يكمل ابوك خاطر نمشي
طلع خشان كالو : انت شعندك تمش
– وياكم غير
-اكعد هين بين ما نرد ما نطول
– بس انت ما كتلي الظهر
– انا شكلتلك يولو اثكل واركد هين
وكف خيبان من حجاية ابوه، دحج عليه واشر لابوه امه شافته يأشر كالتله : وانت شعدك رايح ليغاد اكعد هين وانجعم
حجيت : وانتم كلكم افتريتم عليه ايش كال المسيجين راد يمشي ويانا خاطر يفتره شجالكم ؟
خشان : خليه بالدار ما نطول
– والدار شبلاها عكبنا راح تنهجم لو تهد جيوش .. خله يمشي الولد دام بخاطرة المشية
سميعة : مالو طلعة انجعم هي احاجيك
ضاج خالد حيل وطلع من الدار
نطرت خشان ليما طلع وخالد كاعد اباب الكلعة ووجهو مكشر كلتلو : عليش تخليها بكلب الولد كوم خالد اصعد يم ابو راشد
كبل لا يحجي خشان انا ندست خالد ودفعتوا : دكوم ول دادة كوم
صعد بسرعة وكعد يم ابو راشد ….
تحرك الربل وطرينا الدرب لال موازي على ديرة اهلي
وصلنا غاد خشان راح عد ابوي هو وخالد وابو راشد وانا مشيت ع الكاع امي وخواتي كاعدات يحوشن شجر الرمان
تلكني وفرحن بجيتي وبشرتهن ووصيتهن محد يدري بخبر حمالي .. وامي ظلت تندعيلي .. حجيت وياها اعلى نيتي وكتلها : بنيتي ازوج مرجانة لخالد ابن خشان
– ماهو زغير
– لا ماهو زغير هو يكبرني بسنة مدري سنتين وهالانا معرسة ودايرة امري ماني زغيرة ..
– والله ييمه شفتيتلي على ال خشان ، بس حاجيتي خشان بالحجي
– حاجيته واشوفه راضي بالنية .. انا ما اريدها لواحد من ولد عمي وتاليها ييمه حالها اردى من حالج خلها تعيش بخير خشان وتفتك من ضيم ابوي
اجت مرجانة شايله الرمان بشليلها حطته وكعدت وامي تفشكلي الرمان وتحطة جدامي احمر يزهي لونه .. دحجت من بعيد خالد واكف .. اشرت وندهت عليه : خاااااااالد اكرب اكل رمان طيب
خالد بكلبه النار بس يريد يكرب ويشوف ياهي النريد نزوجها اله .. شلتله رمانة مفشكه اطيته وكتله : سلم على امي واختي مرجانة
سلم على امي واستحى يدحج بمرجان ضل مدنج .. ضلت تحاجي امي وهو يلصلص بعينه عليها … حجيت ويا مرجانة وكتلها : كومي نكمل حوش كبل لا ينزل المغرب
كمت منها وكتلها : خالد رايدج مرا
هي ما ردت ضلت مدنجة ومستحية ، ندستها وكتلها : تراني اختج اذا ما رايدته كولي محد يغصبج عليه
– لا ما بغصب
– رايدة لو لا ؟
تحجي بحيا : بكيفكم
فهمت هي رضت بيه …
ليغاد صاح خشان وركبنا نرد بس خالد يضحك للهوى كن فرحان بنيتنا اله
رد يسر امه ويبشرها ويكللها: ابوي رايد يزوجني
فرحت من سمعت ابوه رايد يزوجه وكالتله : من باجر اشوفلك بنات الديرة وتخير ياهي التريدها
كال الها : لا ما من الديرة .. رايد اخت يازي الزغيرة مرجانة
هي سمعت هيج وتجننت .. اسمع بس كوانها ويا ابنها وهو مغتاض ويكللها ما اريد بنات كرابتي انا اخذ التعجبني
وهي ترده : انحرك هين وما اخليك تاخذ وحدة من حياي ال موازي وبخت الله انحرك
انا كاعدة بحجرتي واسمع كوانها ما احس الا وهي هادة عليه للحجرة وتكلي : لو حطيتي براس ابني اختج اهجم الدنيا فوك راسج ، الغريبة ما نريدها تضل حية بين اكتارنا انا لو ردت مرة لابني بنات عمومته وخواله وحدتهن جمارة ما عايزين فضالة ال موازي
لا حاجيتها ولا كثرت حجي وياها كتلها : اخطبيله الترضينها ابنج وحكج عليه ياخذ اليطيب لها كلبج .. انت امه وادرى بحاله
من شافت حجيي هاكذ خمدت وكالت : اي ما ارضى الغريبة انا ما اريدها شنهي كحط بنوات ونروح نخطب من ال موازي .
– يا اختي روحي اخطبي اللي تهواها كلبج انا شكو
– انت الحطيتي الفكرة براس ابني وهالمعارض ويزاكح بوجهي
-بطلنا ما تريدو اختي روحي شوفي لها التهوينها بس سدي الباب وخليني اريح جدامي تون وظهري ياذيني
– من زين حمالج وظالة تشكين اليسمعج يكول داشة العشر ما عاجر وموغفة على كلوبنا
– سميعة فاركي
ردت الباب بكوا وربدته
انطري يصير عدي جاهل .. اشوف عيونج وخيبتهن عد ما تعرفين العاجر الكل ما كمتي وعايرتيها شلون تحبل وتجيب … يا كثر شوكي لهاللحظة اليعرفن بيها انا جنت حامل كل هالفترة المضت
تمددت وبالي وكلبي مريحين عكب ما عرفت بروحي حبلى
انتهيت من وساويسي ها خاف ما احبل ها خاف اكضي العمر هيج بلا حبال.
كتمت على خبر حمالي ما خليت احد يعرف بيه حتى ملكه علن ما تعرف اتزاورلها سالفة اذا ما تذرها لحبايبها المنا ومنا ومن حبيبة لحبيبة سر حمالي الاكي على كل السان.
سميعة اعترضت يم خشان على فكرة يخطبلا وهو كاللها : هي نية لا سعينا ولا خطبنا شادة حيلج وش بك .. فاركي مالي بغيضج خاطر
ضلت على بالها هالسالفة كامت تكوم تكعد تكول حرام ما اخلي ابني ياخذ اختها لو اموت .. رايدة تكوش على الكلعة هالحيايا
تكوم تكعد وتحجي وتذري وانا مخليتها على مايها
وكوانها هي وابنها للضالين هي تصيح عليه وهو مغتاض منها كن وكفت حجر عثرة بزواجه ومنعت يتزوج والولد الباين ما معول من كلناله نزوجك مكيف بهالخبر .. وطالعة روحه من امه عد ما امتنعت
من كالتله ازوجك بس كرابه
ما راضي كايللها انا رايد مرجانة اخت يازي .. انا شفتها وعجبتني ..
عد ما درت شافها انجنت شلون شايف عروسته كبل العرس تكلو هذه لو ما هي ساقطة ما تشوفها كبل العرس نحن عدنا الزلمة ما يشوف عروسته الا ليلة دخلتها .. ما تاخذ بت محمود لو على كص ركبتي
معارض وضاين كل يوم مكاونهم ما يفض
وخشان لغى نية زواجه .. الشي الزاد بحقد خالد على امه .
مرت الايام …
وخشان حيل فرحان بحمالي .. ما واسعته الكاع من فرحته
وهو عده الي طلب كال ( جزاة بشارتج شطلبين وبيا وكت امرج منفذ) وانا كل الاريدة اخلص امي وخواتي من الخيمة وضيم الخيم
حازة بكلبي مرت ابوي كاعدة ابيت ومرتاحة وامي وخواتي متيهات بالكاع عيشتهن شغل اذا ما اشتغلن مالهن زاد .. ابوي سايك عليهن جنهن حواوين ماهن بشر
تذكرت المرة الحجت وياي كالتلي البطنج بنت
وخاف تطلع صدك بنت ويخبت خشان من ما اجيبلا الولد
فكلت اكله بطلبي كبلا اجيب ..
عملت الغدا وطلعت للكاع اتغدا وياه
عد ما وصلت غاد فرشت وهو اجا يكعد خاطر يتغده .. حجه : عليش كلفتي روحج وانت حبلى لو ضاله بالكلعة انا ارد واكل
– لا كلت نكعد هين بالكاع ونتغدا اعلى ريحة الشجر والكاع مالي بهوسة الكلعة
سم بسم الله واكل
حجيت : خشان انت كتلي جزاة بشارتج طلب اطلبه يمتى ما ردت ما
– كولي شنهو البالج
– انا رايدة تخصصلي وصلة من هالكاع باسمي
كشر على حاجبه : وصلة من الكاع .. عليش انا مكصر عليج بشي
– يشهد الله انا لا معتازة ولا بحال الوصلة لجن اخر حيلة ضلتلي ويا ابوي
– شلون ؟
– عد ما تنطيني وصلت كاع باسمي .. ابني بهالكاع بيت لامي وخواتي يكعدن بيها ويفتكن من ضيم الخيمة .. بهالحال الكاع كاعي بالاسم طبعا الحلال حلالك حاشى الي نية ثانية يشهد الله نيتي بس امي وخواتي … يكعدن وعد ما يكعدن ابوي وعمامي ما يكدرون يلوونك بيها .. تتبرى وتكول الكاع كاع يازي هديتها الها .. ما تضل لاحد حجه .. لو ابوي يبنيلهن بيت ويدن يعيشن غاد ابيت .. لو يخليهن عايشات هين بالكاع والبيت النبنيه الهن .
– مدري والله السالفة احسها مخربطة
– انا رتبتها ابالي واعرف تمضى ناطرة موافكتك
– اذا على موافكتي .. انا واعدج وحجاية الزلمة ما تنرد وكتلج التطلبي على السانج لو شما كان .. وما طولج رايدة وصلة كاع انا حلالي ومالي فداج ما بس هالوصلة .. ويجرالج انا اروح واخصصلج وصلة من الكاع واكتبها الج .
تشكرت منه هواي وصدك جانت هاي الفرحة الجبيرة ما فرحة حبالتي .. فرحت من كل كلبي .. وهو فرح على فرحتي
ثاني يوم كتبها الي .. وبلغ بيها الكاع ليازي
لو هم تخافتوا من تحت الكاع .. اخوته اعترضوا .. نسوانه اعترضن ..
اخوته يكلون تطي حلالك لمرا وما تطي لواحد منا واحنا الصيم حالنا .. ونسوانه يطالبنا مثل ما اطيتها تطينا شنهي هي وحدة شو عاجر وما تخلف واحنا المبزراتلك
حتى ملكة اغتاضت تكلو : خوية وانا اخيتك لا كتبتلي وصلة كاع ولا اطيتني شي .
عزم اخوته واهله وكلهم وسوا وليمة وبشرهم بلا ما يعلمني وكاللهم : وصلت الكاع اطيتها بشارة .. يازي حبلى وانتم والكل يعلم انا شكثر ناطر وحدة من حريمي تحبل وهي الوحيدة الحبلت منهن وكتلها اطلب شتتمنين ويجرالج طلبت كاع تبني بيها بيت لامها وخياتها وانا زلمة ما ارد بحجايتي واعلى اثر طلبتها اطيتها وصلة من الكاع هذا الصار وهذا الجرى.
نظرات الغيض والحقد الشفته بوجوه الوادم ما شفت مثلها .. جلمة بالمبارك محد مكالها ابجي .. باركوله اله محد اندار وكالي بالعافية
بس ان جان الحايط حس واهتم انا اهتميت
العدها الكمر شلها بالنجوم ؟ .. ما طول ولي نعمتي خشان رضاته اوجب من الكل اطيع واسكت واتحمل واشيل لجله ولجل عيونه .
ما جنت مهتمة بغيض خواته بكثر ما مهتمة ابني بيت لامي وخواتي واخلصهم من عيشة الهم العايشاتها .. خشان طلب من بعض ازلام يبنون البيت
وباشروا بالبيت وانا وياهم اجي من الصبح ارد ويا غروب الشمس، وخالد صاحبي وايدي اليمنى اليرافكني وياي بكل مچان ..
كضينا البيت بشهر
ورحت جبتهن واجيت … لا بلغت ابوي ولا اطيت علم لاحد ولا احترمت احد منهم .. جبتهن جبت غطوتهن وتعاونت وياهن نظفنا البيت
خالد ويانا ويانا ما هدنا
حسيت بيه كام يهوى اختي واختي هم من ادحج غاد عنها احس بيها تلصلص بعيونها عليه وتهواه …
الفرحة لامي عد ما صار عدهم بيت وسكنت بيه يا فرحتها
كعدت ورتبت امورها وسكنت عكب يومين وما نحس الا ابوي يهد على كاعنا
اجا يتكاون ويا امي دفعته عنها وكتلو : شعدك عليها وجاي بحيلك تريد تتكاون ..
– تطلع بلايا علمي تهد كاعي وانا يا غافلين الكم الله
– غيضك هذا عليها لو على خسارتك خسرت اربع خدامات يخدمنك ليل نهارخاطرتنطيهن الزاد .. ذني امي وخواتي وحكي ولو تكربت منهن والله لا اسويها وياك دماية
– تكفين بوجهي يولي .. كبرتي وطلعلج صوت وكمتي تهاددين
– ليش ابالك اكعد ابالك واطيك ذهبي واترجى بلكت ترضى تخليني ابني البيت لامي وخواتي وانت ضاميهن .. اذا انت محمود وتضن محد بحيلتك انت بنتك واتعداك .. وشما بخيلك اركبا امي وخواتي ماهن برادات وياك .. ولو حاولت تهد على كاعي مرت اللخ الي زلمه اخلي يطلع ويكسر شرك ويردك لعفريت الشر المجابلها .. فارج
هدني ومشى على خشان يهادد : تطر وتاخذ مرتي وبناتي بلايا علمي وتحطلهن بيت بكاعك … انا وياك كوام يخشااان
ردوا خشان : انا لا جبتهم ولا هي كاعي الكاع كاع يازي انا كتبتها الها وهي البنت بيت وهي الجابت امها واخياتها وكعدتهن
– يازي محسوبه عليك ومالي جلمة وياها جلمتي وياك انت
– هي وان جانت مرتي تضل بتك وكوانك وياها وخلافكم اسرار بيت تصافى انت ومرتك وبناتك وخليني ابعيد .. اتدخل لو حصل شي ليازي من كونها تضل مرتي واليمسها يمسني .
احتار ابوي بامرا وراح على عمامي يكللهم خشان باك مرتي
اجو عمامي وفهموا السالفة من خشان واتبرى خشان من السالفة وكاللهم الامر يم بتكم الكاع كاعها .. اجو عمامي ساومتهم كتلهم : الجايني بخير هلا بيه انا ما شفت امي وخواتي عايشات بخير غاد وجبتهن قسط .. بس ترضون مكعد مرتا وعياله ببيت وامي وخواتي بخيمة ويكرب عليهن كراب المطي .. شنهي ذيج العفريت بيش احسن من امي تبزر ولد ؟ ..
امي عدي واليكربها والله ما يطلعها الا على جثتي واليمس شعره مني عدي ازلمه بكبر الجبل يهد بيوتكم فوككم لو مسني شي
تريدون الخير وتريدون امي تعاونوا بينكم وابنوا بيت لامي وخواتي ويتعهد ابوي ما يشغلهن ليل نهار بالكاع بشغل فلاليح ما تحمله ..
اليتعهدلي بيكم بهالعود من عين باجر امي وخواتي يردن تكولون لا ويردن خدامات تحت ايد ابوي ومرته .. تكولون لا .. يضلن هين ومالهن طلعة من هين وانا لكل واحد يتعدى اليرشني بماي ارشا بدممممم
مشوا ومحد اجبل منهم بعد .. ظنيتها لهين وتكضي ما جنت ادري غيضهم علي راح يربى بحجورهم ويردون بغيض اكبر.
كعدن خواتي واستراحن بهالدار
وخشان جر داير ما داير الكاع حبل وجراجف غطاهن عن العين خاطر لحد يمر بدربهن وهن بس نسوان كاعدات بديرته
جان وسيطهم خالد
ما هن الكربنه .. هو الروحه علكت عد هالكاع ليل نهار كاعد غاد وبس تطلع امي يركض الها شمعتازة وشرايدة .. صارلها كن ابن ما ابن نسيب
بهالايام ثكلت بطني حيل واوجاعي وان جانت جثيرة لجن ما اذعن الهن .. اكوم لحيلي واروح يم امي وخياتي نزرع الكاع الكتبها الي خشان خيرات الله طماطة وخيار وعنب وخضرة رشاد وريحان .. ونزرع بهالكاع ونسكي بيها وامي مرتاحة هي كن سكنت ولاكت مجانها .. وهالشعور عدي ما تساوي فرحة
بهالايام زادت ولادتي جنت جايبة تعلولة ورايدة اتعلل ويا خشان العصرية بالكاع خذيت التعلولة وكتلي الجاي ورحت للكاع .. عملت الجمرية وحطيت الجاي المهيل بس احس الوجع نزل على رجلية
اجا خشان وسولفنا وتعللنا والوجع جاتلني
ما حس اعلى شي عبن انا ما مبينة عدي وجع اضم بروحي
ليما الوجع وصل حده حسيت الجاهل راح يطلع من بين رجلية .. فزيت من مجاني وما احس الا الماي والدمايا يجرن اعلى رجلية
ركض خشان للبيت ينده ملكه وامي ركضتلي من بيتها
وامي تركص حسيت الجاهل طلع .. خواتي تراكضن ولفن عبيهن داير ما دايري خاطر لا اظل فرجة بالكاع لعين اليمر
بين ما ملكة جابت وحدة تجيبني انا والدة ومخلصة وناطرة تجي خاطر تكص السر مال الجاهلة
وكتها ما جنت بحال الجاهلة ليما كصن السر ولمنها وشالنها بحضني .. ادحك الجاهلة سمرة طوووووووخ بسمار خشان
لفنها عني وانا ادحج بيها ..
ليما جا خشان وشفت فرحته بيها كضبها يحبحب بيها ويحب براسي ويحمد الله ويشكره .. وعيونه تتلامع وهو يدحج بوجه الجاهلة
الجاهلة سمرة طوخ بس عيونها جن شذرتين خضر بوجهه لون عيونها شي غريب .. ما شايفة هيج خضار جادح بعين احد
خشان اسمر طوخ وعينه جوزية ما هي سودة طوخ
وانا شهبة .. شعري احمر ووجهي ابيض منمش وعيني صفرا
البنت اختلطت ما بيني وبين خشان .. خذت لون ابوها والعين الملونة مني بس ماهي صفرا خضرا …
خشان كال نسميها ( شذرة ) عبن هي شذرة نادرة جت بعد قحط طويل ابزرة ابوها وجانت هي فاتحة الخير لبزره .. من عدها فكت جبسته
شلت هالبنت وحبيتها بكصتها وخذيتها بحضني ارضعها
عد ما رجعت للكلعة وبيدي هالبنت .. اسمع جلمات الشماتة
كربت مني سميعة ونظرات الحقد باينة بعينها : بالمبارك يولي ولو جانت بنت بس يلا احسن من ما تضلين عاجر
– التجيب الولد تجيب البنت
– دجيبي البنت عدل يولي دحكي بنت وسودة فرحانة بعمرج امبزرة
– سودة بيضة شلون ما جانت انا ما خالكة منها شي ما اعيب شي الله سواه حاشى
– احنا ما نعيب بس باجر عكبة تكبر تعنس حالها حال .. واشرت على حجرة (ملكة) محد يهواها
– الله كريم لمينا تكبر
– اي بالمبارك بس يكلون اذا تحطيلها عسل ويا الحليب يمكنها تكشف جربي حطيلها عسل وانت ترضعيها يمكن تكشف ما تظل سودة هيج ولو جنها مالها جارة يولي
– المن تطلع قابل ابوها وعمامها سمران وكل بزر يطلع على اهلها
– فرحانة مبزرة يولي شهالبزة هاي
هزت ايدها وطلعت وانا اعلى فراش انفاسي
اجت زهرة نفس حجايتها .. حتى ملكة تكلي : يشين بختج يولي البنت سودة شحال حظها
– ملكة لا تفاولين الجاهلة بحظ شين حبي الله
– والنعم بالله بس اخافنها تصل ضلتي يولي محد كلبني وبرت على كلب اخوي
– الله كريم
اجا خشان فرحان يسمي بسم الله ياخذها ويحبحب بيها كتلو على حجيهم اغتاض وكال : انا اردهم مالج غرض
ثاني يوم ذبح عجل لوجه الله تعالى وعزم الوادم على جيبة البنت، اجبلوا الوادم اللي وصل بليرة ذهب اللي وصل بكطعة كماش الي .. لو لفة حرير لفراش الجاهلة .. وفلوس
بس الكل اليجي يتعجب على خشان ذابح عجل لجل بزرة بنت ..لو ولد بيها مجال .. بس بنت وسودة وفرحان بيها خشان الا صايبة شي
هالبنت اخذت حيز بكلب خشان محد ماخذو كبلها لا ولد ولا بنت .. تربعت بكلبو اميرة … اول ايامها اعتزل الشارع ما يطلع كثر ما مجابلني ومجابلها ويحبحب
عدت ايام جيابتي وكضت ..
وكمت لحيلي ورديت احوش ويا امي وخواتي واشتغل وياهن
بس من رديت عرفت صاير برغوث مودة بين مرجانة وخالد
بس تنده امي يركض الها وبس يتكرب هي تجي وتوكف جريب من كفا الجرجف ادحك عليه
كضبتها وحذرتها كتلها : خشان لو علم بينج وبين خالد شي يلومني وما تضل الجن كعدة هين ويردجن لكاع ابوي … خالد رايدج واعرف هاويج بس لا تذبين بروحج وادحجين وتثبتين على نفسج تاليتها يكلون شوف بزرية ام يتزي شلونها
يمرجانة شماتي هواي والكرهون هواي لا تخليني حجوة بحلك واحد محد منهم يودني .. بالج اسمع مكربه لخالد لو طالعتله
كالت : لا وما عدي شي وانا ما ادحج وهو يكرب يسعل نعتاز شي وانا اطلع اطي جواب
– لو جا وسعل امي تطلع تجاوبه انت لا تطلعين ولا تخلين احد من ديرة ال عكاب يشوف طولج يولي نصير حجوة بحلوك الولدم تلوك بينا.
عد ما كفت اختي من خالد وما كامت تطلعله ولا تشوفه وجهه
خالد اغتاض حيل … راح عد ابوه يطلب يزوجه مرجانة
خشان كاله : بالاول ارضي امك
انا ما اكدر اجيب الغريبة واغصبها على امك
دامها جابتك لها حك عليك ترضيها
راح يطلبن من امه
امه تجننت شلون رجع يفتح موضوع مرجانة جدامها
تكاونت بالبيت واجت علي تكاوني وتكلي : انت الجاي ادربي ابني لكاع اهلج .. كله منج
كتلها : انا لا ارضى بعيب ولا اكبل خالد يكربهم امنعي ابنج عنهن ولا يجبلهن الحجي تراهن بس نساوين وما رايدة احد يعيبهن بجلمة ..
تجننت شلون كلت الها هيج
ما خلت فشار وغلط ما فشرت وغلطت ليما جا خشان تكاون وياها وكتلها وكعدت بحجرتها تدعي وتتشكى لله علي.
ثاني يوم بالضبط من كوانها
جنت انا كاعدة مجابلة بنتي ارضعها
ما نحس الا ال موازي هادين بفشكهم على ديرة ال عكاب .. ومحاوطين كلعة خشان داير مداير مسلحين ويهددون من بعيد
خشان ما جان بالبيت
عد ما سمع .. ودى خالد وابو راشد على اخوته وعمامه يخبرم
واجاهم يطبربك بحصانه ومتلثم بلثامه، اول ما وصل عدهم صاح : يااااااااااا عرب … الكلعة بس حريم الزلمة البيكم ينازلني بلا سلاح لا اعلموا الزلم التهد اعلى كلهة ال خشان منم
اول ما تلكاهم ونزل من على حصانه ….
والا واحد من ولد عمومتي يحط الجيلة بجتف خشان …
اعلى حس الجيلة وما تحس الا ازلام من تحت الكاع هدت اعلى طكت الفشك …
تكاونوا بينم …
صاروا دمايا … ثلاث من ال موازي واثنين من ال عكاب
ووجرحى ومصابين بكل مجان انولينا بهالمسية …
ال موازي جروا ولدم وشردوا
وال عكاب شالوا ضحاياهم .. وحملوا خشان وركضوا بيه للحكيم .. عدوا وانداروا لبيوتهم … خذوا تفكهم وشالو غيارم وهدوا على ال موازي .. حركوا كياعينم … وكتلوا ثلاث منم
ما تسمع بس حس الفشك بالديار
هذا كله … ونحن ما ندري ال موازي ليش هدوا وعليش فزعوا وعلى يا مال تكتلت كل هالوادم …..

يتبع….

( ما بعد الجريمة)
طحت بجفاك وافراگك غميج
لا جرف وانساك بي
ولا على عينك يوديني الطريج ..
(كاظم أسماعيل الگاطع)
ناس جثيرة فزعت على حس الفشك
وناس تهدي وناس تهجج .. وناس تجثر الكال والكلت ..
ناس تكول .. خشان بايك بنات ال موازي
وناس تكلهم .. لا ما بايكهن لجن مزوج وحدة منهن لابنه
وناس تكلهم مرت خشان الزغيرة تكاونت ويا ابوها وخشان فزع .. وناس تكول لا هم مكاونهم كديم .. وال موازي فزعوا بلا علم وخشان عد ما تصوب جان بليا سلاح طلب منهم يترجلون ويتناحرو وياهم بس هم الغدروه وحطو الجيلة بصدره مدري بجتفه ..
وبين الكال والكلت
ونحن اهل الآنه ما مفتهمين عليش هدوا ال موازي .. وعليش جتلوا خشان وعليش تجتلت كل هالوادم
بس انا تحسبا لكلشي .. خذيت امي وخياتي
ورحت خبيتهم يم البدو وترجيتهم يحفظونهن بين ما نعرف الصار ونفرزن الامور
حس النياح بالدير اعتلى ..
والنسوان تكبعت بالثوب الأسود …
وانا لبست ثياب سود اعلى صواب خشان .. وتحزمت
وحطيت تحت حزامي خنجر .. وتفكة بكفاي وحطيت النكاب اعلى وجهي والعباية اعلى راسي .. وفزعت لبيت الحكيم خاطر اكف ويا زلمتي بمحنته .. والجاهلة بلفة عباتي شايلتها وياي ..
وكفت عد الباب ودمعاتي يهملن .. وامسحن بشيلتي
وادحج خاطر لحد يشوفها .. كمت اطمش على ناس كرابة خشان واكفين عد الباب ..
كربت لهم وسعلت : وش حال ابونا ؟
انداروا ازلام ادحج علي .. حجه واحد : ياهي انت
– انا حرمته وام بته حرم علي الهنا بالدار وهو ماهو بالدار
– ردي لدارج يا مرة الزلمة لهاساع حاله ما يسر والمجان كلو ازلام وكفتج هين ماهي زينة
– انا المجان البيه خشان ما اشوف احد غيره .. رايدة اتطمن عليه خاطر امضي
– الزلم ما واعي ردي يا مرة
– ان جان هو ما واعيلي انا واعيتله .. رايدة شوفته
حجو رادو يردوني عن جيتي لاجن ضليت واكفة عد الباب ما تزحزحت ليما سوو درب وفتت شفته .. الجيلة جاية بجتفة ووجهه غادي نومية من الصفار ..
كعدت عده بجيت واتنخيته يكوملي وما يخليني لوحيدي
لجنه ما جان يوعى ولا كن يسمعني .. حبيته بكصته وكمت ردت اطلع .. وكفني زلمة كال : عدج يم شذرة
– شنهو اتريدة مني
– ابو ناظم رايدج بجم حجابة يستفسر بيهن
خذت بتي ومشيت لبيت ابو ناظم
جانت حرمته كاعدة بالبيت ضلت تستستفسر مني على الجرى ما اطيت لا حك ولا باطل يما اجا زلمتها كال : حياج الله
– الله يحييك خوية
– انت من ال موازي وامس تجتلت وادم جثيرة .. ونحن لا نعرف الصار ولا نعرف الجرى
– انا وحدة منكم لا اعرف شنهو الصار ولا شنهو الحصل
-بس انت منم !؟
– منم لجن لا كاعدة وياهم ولا اعرف شالفتهم شنهي وعليش هدو
– ادخلت ناس واليوم يجينا الخبر لجن الكل يكول السالفة تخص اهلج .. الكاعدين بكاع خشان
– محد من اهلي كاعد بكاع احد … الكاع كتبها لي خشان عد ما تبشر بجية هالعجية
– بنت ويبشرج بيها بكاع عجل لو حطيتيله الولد شتطلبين منه … الكلعة
– محد يطلب من ماله والكلعة مال زلمتي وحلاله وكلشي اله الي .. ما الي بيها عين خاطر اريدها .. واذا جايبني خاطر تحاسبني على وصلة الكاع .. اترخص منك انا صوابي منكعات ليحد اذاني ما فاضيه لبراغيث حجي مالة فايدة
– احجاياتج ثكيلج يولو ..تحاجين الوادم من كفا خشمج وانت الوادم تجتلت من ورا راسج
– جايبني تحط اثم كل هالناس براسي .. وانا الهالحين ما عرفت فزعتهم عليش
– عجل واجبج تروحين وتستفسرين وتكفين بوجم وتكلين عليش جتلتوا رجلي واهله
– ماتت زلم الديرة خاطر تودي مرة تدور اسباب الفشك
– هم اهلج ونحن انولينا اعلى يا مال
– ماني خايفة من احد واروح وواجه الكل لجن تحط بظهري فارس خاطر لا يگلون مشت من كيفها
– رايدة يكلون عنا ودو ومرا
– انت اعرف بامرك .. دانش امرك وردلي خبر خاطر اطلع
كمت من مكاني حجه : اهلج وين .. امج والبنوات
– ماهو شغلك تعرف وينهن
– زلم تجتلت لجلهن خلنا ننطيهن ونفاصل عكبهن
– وشنهي انت ولاة امرهن خاطر تطي وتودي اعلى كيفك
– تراني لهاساع محترمج لجل خشان وحاطلج كدر
– ا كدر هذا الحطيته وانت من كعدت ولحد ما كمت وحجيك بسامير وشوك
– يا فكر خشان بهالبلية .. لون ضال بلا بزر ولا هالخذوة هاي
– يكفيني من خشان ما حاطة عيني اعلى ماله وحلاله وانطر منيته خاطر اكوش اعلى العده
– تتهميني بطمع لعن الله ابو شوارب الخلفج يا بنت …..
شتمني وراد يسب وكطع … هديته وانداريت وكلت : فشل اعلى الزلم التشم حرمة زلمتها طريح فراش ماهو كايم بكفاها ياخذ حكها من ثم اليشتمها
هديته ومشيت طلعلي خالد كتلو : انده على ابو راشد
– وين نروح
– لا موازي
– خاف يجتلون ونرد روس مكطعة
– امش ولا تحط الموت اعلى اثرك
انداريتله بهمس … بس حط خنجرك بكترك يبن خشان
مشيت وهو يلحكني ردينا للكلعة .. وكفت امه بوجهه ما خلته يطلع كتلو : امك حكها تخاف عليك ضل
خالد : مالج غرض بامي امشي
– اخذ ابو راشد ونمش ضل انت
– خاطر يكلون خالد ابن خشان ال عكاب هد مرت ابوه بروحها اطر درب الموت .
حجاها وتنحى ومشى جدامي
جلبت بيه امه .. تتكاون وياي اعلى طلعت ابنها كتلها : لا تخافين يرد سالم
اريد امشي واجر بيه … شلت بنتي ودفعتها عني ومشيت
صعدنا الربل ومشينا لديرة ال موازي .. حطيت رحلي بكاع ابوي وكتلو : شنهو الرايدة وشنهو اسباب الفشك الهد اعلى ديرة عكاب
كام يزامخ ويهادد بجتلتي ويشيل بسجينته ويكضبني يريد يجرلني دفعته عني وكتلو : لو رايد تجتلني وتكدر جان عملتها من كبل لجن اعرف ما تكدر ومو كد هالعملة .. تخاف ازلام خشان من وراي يكصبون راسك انجعم وكلي الرايدة شنهو
بعد هوبزة ومزامط وهوسة
كالي وحدة اجت وحجت لعمامج اعلى حال امج وخواتج .. ضالت ملعب لخشان وابنه والرايح والراد يتملعب بيهن
– وفزعت الوادم اعلى جذبة
– الفزعو انا واخوتي وما جان ابالنا نجتل احد ردنا نهدد خشان خاطر ناخذ الحريم ونرد بس نصير عد ما طك خشان جرى الفشك وما تلاحكنا ارواحنا .. ولو ما ردن هالفشك ما راح يكطع
– اثمكم ويا ال خشان جبير وكل واحد منهم متوعدلكم بنار وثارهم ما يبرد .. اما عن امي وخواتي .. ما تحلم تشوفهن حتى باحلامك .
طلعت وهو على تهديده ووعيده
رديت للكلعة وانا الامور تترادم بفكري
خشان من صوب وامي وخواتي المن صوب
ضلت ابالي المرة الراحت فتنت وتهمت امي وخواتي ياهي
وضعي مو مثل اول كلشي جاي يتعبني .. صواب خشان والعجية هاي اعلى افادي ترضع وامي وخواتي غاد ما ادري ليا وكت راح اكدر اضمهن وما يتأذن
الزلم من العشيرتين تكاوموا وتفاصلوا .. وجان واحد من شروطهم بالفصل يردن بنات محمود للديرة
اجرا علي كتلهم .. ما هن بالديرة خاطر تفاصلون وتحطوهن بشروطكم .. وما محسوبات على احد امرهن بيني وبين ابوي
كالو : ولد الديرة تجالو بسببهن وانت تكولين ماهو شانكم تطلعينم لا نندار عليج ناخذ العجية منج ونذبج لهلج
ما اطيت مجان امي وخواتي .. تكاوموا عليّ .. ابو ناظم ونسوانه ونسوان اخوته .. وضرايري علي .. خذن بنتي من ايدي وجرجرني من الكلعة .. خاطر يطلعوني
وكل واحد يذب جلمته جنه هو صاحب الكلعة عكب خشان .. اليكلي مالج مجان بهالكلعة واليكلي .. دشة شر اعلى الديرة ..
اعتلت اصواتهم بفكد خشان
خالد وكفلي لجنه زغير ما يكدرلهم
كتلهم اليريدني اطلع من الكلعة ينطيني بنتي وانا اخليها الكم الكلعة الما بيها خشان كبر اعتبرها ما هي مسكن
اطوني بنتي وابالهم اهد اديرة واروح انذل تحت رحمة ابوي
لجن طلعتي جانت لوصلة الكاع الكتبها الي خشان .. كعدت بالبيت البنيته لامي وخواتي .. حطيت صرة هدومي وهدوم بنتي وكعدت
تجننوا عد ما سمعوا ما رحت لال موازي .. كعدت بكاع خشان .. هدوا عليّ للكاع يكلولي : نحن ما نرضى مرا تكعد ابيت لحالها بكاع راعيها غايب
– عجل ترضون تهجولون حريمة من كلعته … الكاع كاعي هو الكتبها الي ما كاعدة عد احد ولا كاعدة بكاع احد .. واليكرب ويجي صوب هالكاع .. ما اتردد لو حطيت الجيله براسه
– تهاددين يبنت موازي الكاع كاع ال عكاب ردي لفكر ابوج غاد تمتعي بكاعه
– اهدد بترس ثمي لا انت ولا سلاحك ولا شواربك ترهبني .. ولو كعد خشان اله وياك حساب .. وما تفج من غيضي
حاولوا رادوا يطلعوني … لجن ما كدروا
عندت وضليت بكاعي .. وخالد خاطر لا انصاب بجلمة جا وكعد وياي بالكاع
تكاونت وياه امه .. خاطر يرد بس ما رضى يرد وياها
.. بس يلح يريد يعرف امي ومرجانة والبنات وينم .. بس ما حجيت
عكب عشرة ايام ..
وانا بالكاع .. بكثر ما مثل اعلى الوادم انا كوية وما اهابهم بكثر ما اخذ هالامر صحتي وحيلي .. احس بروحي بايدة وما بيدي بعد شي اسوي .. احترت بامري وما ادري عن التالي
… شلون لو مات خشان ؟
شلون لو ما كعد ؟ شنهو تاليتي وشنهو تالية امي وخواتي
اهلي وديرتي غاد حادين سنونهم .. وال عكاب غيضهم يغلي وواحدهم يتمنى يشرب من دمي .
وانا بهالفكر وما احس الا واحد وراي ..
تحنطت بمجاني .. كلت واحد منهم جاي ورايد جتلي .. حطيت ايدي على حزامي خاطر اجر الخنجر .. اول ما اندرت وانا شاهرة خنجري .. كضب ايدي خشان …
: وش جرالج يحرمة اناااااا خشان
صرخت عد ما شفته وكع الخنجر من ايدي وذبيت روحي بين اديه .. اناشغ بجى … حضني وهو يكلي : شنهو الجرى دشيت الكلعة وانتي ماهو بيها كالولي اعتزلت الكلعة وما رضت تكعد بيها
– الكلعة الما بيها طولك ما تصيرلي مسكن
ادحج بيه حيلو مهدود وملامحه ماخذها التعب وايدو مصبرة ومشدودة لركبتو ..
كمت اتفكده بلهفة وانا اكله ( توه رد الصوا لعيني عكبك جلاب البين نهشت لحمي يخشان )
نفر : ياهو الجاسج ؟
– الا كول ياهو الهدني اهلك ذياب يخشان ونسوانك حيايا واهلي اجلاب وحالي بينهم مثل حال اليتيم بفكدك .. جرجروني وطردوني من الكلعة وخذو بتي بالموت رديتها الي وكعدت هين .. اسعل خالد اعلى عمايلم
– ياهو الطرداج منم ؟
حجيتله الصار والجرى بيه كله .. انتفض مغتاض وراح على بيت اخوه يتكاوم وياه ويكلو : بس غمضت عيني تهجول مرتي وبنتي عكبي ما حسبتني بحسابك لو كعدت عرفت بعملتك شنهو الراح اسوي
يبررله يكله الصار كلو من راسها : المرة مرة ما تنعاب ولا تشيل اثم احد ولونك زلمة تخليها ابيت لو طرداها احد ما تطردها من بيتك …
تكاون هو واخوه ورد على نسوانه وحريمة تكاون وياهن .. وطردهن اثنينهن لبيوت اهلهن ..
فزعلي .. لجن كسرني عد ما كال ( لهين وبس تخبريني بمجان امج وخواتج يطلعن من ديارنا ما يضلن اثمهن اعلى اهلهن كافي الجرالنا من تحت هالامر )
حاولت ارده اكنعه بس جانت اعصابه تفور ما رضى الا ادلي بمجان امي وخواتي … دليته وراح خذاهن من خيام البدو وحطهن على اطراف الديرة وكاللهن : انا وعشيرتي ما نكدر اعلى اثمجن ردن .. وبخت الله يتوكلجن )
رد للديرة انا وخالد وملكة ناطرينه .. اول ما دش كمنا اله .. نتراكض وابجي واكله : وينهن
– انت من ال عكاب اهلج غاد انسيهم
– اطيتهن بيدم وهم الرايدين جتلتهن
– انا مالي بأثمهن حدج هين يازي كفانا الجرالنا دحجي ايدي وحالي وحال عشيرتي بسبتهن
– ماهو بسبتهن بسبت نسوانك سميعة هي الراحت لال موازي وتاهمة اهلي بحجي ما ينكال ولا ينسمع واعلى عالثار هدوا
– عدج اثبات اعلى حجيج لو ارماية بكاع هندس
– ما عدي اليسهد لجن انا اكلك هي .. عكب ما تكاونت وياي وهي ما تريد اختي لخالد .. وصل هالصيت لديرة موازي
– لا اتهمين ام اولدي باطل ان ما جان عدج اثبات .. خيطي ثمج بخيط صوف
– دامك طردت خواتي اطردني انا عكبهن لا تخليني هين
– يازي بسسسس ول ما كفاج الجرالنا من هالبلية ..
– عدكلك اهلي رايدين جتلتهن ومالهن احد غاد
– وانت ماهو احد انت بذمتي … هين مالهن جريب انسيهن
– الظفر ما يطلع من اللحم .. امي وخواتي ذني ما اهدهن
– تتعاندين وياي
– حشى ما اكف بعينك وحط جيلتك بكصتي لو فرد يوم عملتها .. لجنهن مالهن غيري .. ارمي يمين طلاكك علي واتبرى مني وخلا يصيبني اليصيبهن
– تتخلين عني لجلهن
– يشهد رب السما علي لو جان كلبي رايد يهدك وهلة بس الاعلى شفا النار امي … امي هاي خشان
هدى واندار عني : لو رحتي وصابج شي ما اكدر اسكت
– ارمي يمين طلاكك علي وشيل ايدك من اثمي
– يولي انت الحيا جاري عن كصتج تعرفين التطلب الطلاك شيسموووووونها .. لو عدتي هالحلمة اعلى السانج اكص
سكتت …
بس دموعي كامت تهل
اندار وحجه : لو رحتي شنهو البيدج تعملي
– اكل ما يطلع بيدي امنع اذيتهن
– الاذى يصيبج وياهن ما تمنعين شي .. وحدج ما تكدرين تعملين خير
– الكعدة ما اطيكها وامي تحت سياط الاذى .. يا تهدني اروح لامي احاميلها … يا
– وبنتج
– لها ابو يهابه كلمن يسمع باسمه يحاميلها ما مثل خياتي وحيدات
– ان جنتي عازمة امرج .. امضي
عد ما كال كلمته شديت وزاري وحطيت التفكة مالت خشان بكفاي وخنجر بطرف حزامي … ولبست نكابي .. وشلت بنتي على جتفي ..
كضبني : لو صابج شي علميني
– هيبتي وحايطي العالي يحفظك الرحمن وما يصيبك مكروه .. لو صابني شي اذكرني بخير
– لا تذبين نفسج اعلى البلايا ان جانت الامور تنحل بعكل حليها
– بحيل الله وكوته
طلعت وهو يكل لخالد : رافكها لديرة ال موازي ورد
طلعنا انا وخالد
صعدنا على عربانة جحش وصلتنا لي عد ديرة اهلي
عد ما وصلتها كتلو : رد يمه لا تنضام وينضام ابوك
– ارافكج ما اهدج
– يذبون بلاي بجيد ابوك لو رافكتني لهين ويسلم راسك يمه .. رد
نزلت من عربانة الجحش وانا اجر ذيالي
وصلت جريب من كاع ابوي .. ودحجت امي تركض بلهفة وكلبها طاير .. عد ما شافتني تكضبت بيها وهي تتلفط انفاسها وتكلي : لحكي اخيتج راح يكتلها ابوج. .. الحكيها ييمه اخيتج راحت
– وينو عليش اخذها وييييين راح
– اركض خذها لبيت عمج اركضي
حجتها وركضت عني تبعتها اركض دفعت بنتي عليها وكملت جريان على بيت عمي .. دخلت البيت بلا دكة باب طريته ودخلت مفزوعة اعلى صياحها
لكيت ابوي وعمي كاضبينها وحاطيها بين رجليهم اليرفس والطك بيدو .. بلا وعي ذبيت روحي عليها .. كضبني عمي وتولاني جتل اعلى وجهي
وابوي جر اخيتي ويصيح على ابن عمي ويكلو : جيب سلاحك نطهر عارنا من هالعار
اريد افك روحي من ايد عمي
ما يهدني وهو يصارخ ويهادد وانا اصيح ورا ابوي هدها لا بارك الله بعمرك هدهاااااا
ركض ابن عمي وهو جايب خنجره ورايد يحطه على ركبة اختي امي ذبت بنتي وركضت شةطرت روحها بينم .. كام ابوي يكتل بيها ويبعدها عن اختي .. واختي تتفلت من ايد ذباحها وهو شاهر خنجره
ابوي دفر امي بصفحتها طاحت من ايده للكاع مكطوعة نفس ورد اخذ الخنجر من ايد ابن عمي ويجر بيها .. فلتت روحي من ايد عمي
نسيت بنتي وتلاهيت عن بواجيها ورحت مفزوعة ورا ابوي اريد الحكها واكلو : بيا ذنب تذبحها عيفها من ايدك
جرها لكاع وانا اركض وراه
اجا ابن عمي كضبني عد ما كضبني جريت خنجري وحزيت ايده بالخنجر نفر مني يصارخ من ايده
هديته ولحكت ابوي ..
ادوره ما هو .. اندرت من هين .. رديت هينا ما هو
وصلني اصريخ مرجانة وهي تتوسله
حطيت ايدي على تفكة خشان
دحكت بيها ما اعرفلها .. كلش بس من حلاة روحي جريتها ورحت اركض ورا ابوي .. بس كفا صد ابوجهي وهو مدنج اعلى اختي يريد يكيدها خاطر يذبحها
سحبت ودست زناد .. ثارت الجيلة الاولى ما ادري وين طاحت
اعلى حس الجيلة ابوي فزع واندار ويا دورته ثارت الجيلة الثانية .. اجت بصدره .. لاحتها الجيلة الثالثة ابطنه
طاح من طوله واختي فزت مرعوبة .. وتصرخ : شعملتي يولي راح يذبحونا كلنا
الخوف سرى بدمي عد ما شفت ابوي وكع ميت
رديت التفكة بظهري وكتلها .. اخذي نكابي هاذ واشردي
– وين اشرد يولي راح يجتلونا ويجتلون امنا يازي جتلتي ابوي
– اخذي انكابي واشردددددي
– وييييين
– لكاعي بديرة ال عكاب وبلغي خشان بالصار .. ولا تخلين احد يدريج بسررررررعة
خذت النكاب والعباية وركضت
وانا ركضت صوب بيت عمي .. جثة ابوي جانت بزوية اختارها خاطر ينحر اختي وجرت منيته بيها .. شعرري مات وانا بهالحال .. امشي واسعل روحي ( عملتها وجتلت ابوي ؟! اش اللي راح يصير عكبها .. يجتلوني لو يجتلون اهلي .)
كل الجرى ابالي اخذ امي وبنتي اطلعهم من هالديرة
لاكيت عمي بالدرب ركض عليه وانا صرخت : اختي لو جرالها شي والله وعلاة سما محد يفكم مني .. دليني وين خذيتوا لا احرك الديرة على رووووسكم .. وينها
على حسي ركضت امي وهي تكلي : اختج ويييين
– انا الاكيها ما اهدها اخذي شذرة ووديها لخشان كليلو منية امها اليوم
– اختج وييين
– يمممممه اسمعيني وروحي انطي بنتي لخشااااااان روووحي
كضبت ايدها ندستها ودفعتها وخزرتها .. ضلت ادحك بعيوني
وعمي يهادد ويغلط انا انداريت عنها اتكاون وياها امي هدت الديرة وراحت على بيت خشان
ادري خشان راح يوصله علم بالسويته ..
السويته طلعت امي واختي من الديرة ..امنتهم واستمريت بمكاوني ويا عمي خاطر لا يشك لاجن ما طولت عبن ابالي اخذ خواتي الباكيات من بيت ابوي واشرد بيهن .. خاطر من يعصرون جثة ابوي نكون انا وامي وخواتي خارج الديرة
عفت عمي واوهمته انا راجعة ادور بالكاع
بس حدرت اعلى بيت ابوي دشيت .. لكيت مرة ابوي حابستهن بالكن مالت الدجاج .. تكاونت وياها وكضبتها جتلتها .. جريت اخياتي الزغار من الكن وطلعت اركض بيهن من الديرة
بس طلعت صوب ال عكاب خالد وابو راشد لكيتهم واكفين ليغاد يتنطرون .. ومرجانة صاعدة بالربل .. تجننت : انت ما كلتي لخشان اعلى الحصل
خالد : انا لبدتها هين خاطر لحد يشوفها اصعدي
– امي راحت لخشان بلا علم … خالد رد علم ابوك بالجرى .. وهد الربل يردنا
رجع خالد يركض لكلعة ابوه
وانا غيرت مسار الربل وكتله لابو راشد : حطنا ابيتك لا تردنا لكاع ديرة عكاب
خذانا انا واختي لجن ايدي ولشتي كلها ترجف رهبة وخوف من الراح يحصل ويجرى اعلى روسنا عكب الفعلة السويتها
ابو راشد يسعلني : من كتلتي محد سمع حس الفشك
– ما ادري جتلته وما انداريت لجن ابن عمي طاح مصيوب وهالساع اكيد علموا بالجرى .. يكون وصللهم
– الحصل ماهو هين وراح تتهدم بيوت عكبها
– اليحصل يحصل ستر الله دايم فوكنا
نزلنا عد بيت ابو راشد وكلبي كن جمرة شايلتو بيدي
وافتر ما هنالي بال احط روحي بالكاع واكعد .. يجي اعلى خاطري اطلع ادور علومهم بس اخاف خشان دار امره واخرب الجو عليه .. ما طوله ما اجا ولا كرب معناتها اباله امر
ابو راشد ما رد خاطر اسمع منه
وصلنا ورد لخشان .. راح كلبي وانا افتر والف بلية تجي براسي واهشها .
ليما نزل الليل وهودت الوادم
انفتح باب بيت ابو راشد ودشت امي وبنتي بيدها وخشان وراها دش .. بس شفت خشان ذبيت روحي عليه من خوفتي
ابعدني منه وطكني جف دار وجهي كله وكضبني من اركبتي : يولي اكو بنت تجتل ابوها مجرمة انت وفعلتج حتى المجرم ما يفعلها
كمت ابجي واكلو : تلومني وهو الجان ناوي اعلى جتلك اختي
تلومني اعلى الباعني .. تلومني وتسعل بنت جتلت ابوها عجل سمعت بابو يبيع بنتو سمعت باب يقايض ببناتو اطوني ذهب واكعدكم ابيتي .. سمعت بابو يتهم بنتو لو سمعت باب يكتب بنتو .. الفعله ابوي بينا تعدى فعايل البشر
-ول هذا ابوووو تعرفين شنهو الابووو
– ما كل زلمة كارب حرمة وحبلها صبح اب .. جلمة اب ثكيله اعلى الما يعرف معنى الابو .. الابو ست. الاب الابو تجو الابو سكف الابو سلاح بكتر بناته يتحامن بيه وابوي عمره ما جان هيج وانت بفعايلة وجاي تلومني.
– يولي بليتيني ابلوة انا ما صاحيلها صوابي لهساه ما طاب وايدي ماهي بطوعي ييازي ..
– ما اريد منك شي غير بس تخفينا
– اخفيكم من من ؟ من عشيرتي من عشيرتج من الناس الرايدة تشرب دمج منين يولي
– منم كلم .. انت اخفينا سنة وعكبها انا اتولى امري
– يولي لو ما جانت بنتي رضيعتج لا طلكتج بالثلاث وافتكيت من اثمج .
– طلبت منك طلب واعتبره اخر طلبت تسمعه مني .. اخفيني عن عين الناس سنة وعكبها هدني ما احملك اثمي وابره منه
– وعكب هالسنة اعلى بالج يخلوج لحالج يولي اثمج جبير وما يسده غير اركبتج
– الجرح اليطيب ما ينحس لو دسته .. خلني ابعد اعن عيون الناس وخلي جروح اديرة اطيب عكبها طلعتي هينة
ظل يدحج بوجهي بخيبة امل
حجه : رايد اتبرى منج عبن تعبتيني جثير لجن ما ادري وش بها روحي ما تكدر تفلج …. ابو راااااشد
-امر يبو خالد
– امن طلعتها هي والبنات بالليل لديرة ال سعدون واحدر عد بيت ال مونس كلو هذه امانة خشان ال عكاب عدك
عد ما حجاها نزلت بفوري احب ايده
جر ايده مني كتلو : تعبت جثير باثمي ادري .. بس فضلك هاذ ما انساه
– اخذهم ابو راشد ..
عافني وراد يطلع .. حجه كبل لا يطلع : كلشي يصيب العجية اثمج ويا ويلج من نار غيضي لو صاب البنت شي .. حطيها ابالج
-على امرك
خذانا ابو راشد وطلع بينا بظلام الليل لديرة ال سعدون
نزلنا عد بيت مونس … الزلمة عد ما درى احنا حريم ال خشان رحب بينا وشالنا على راسه .
انكطعت الاخبار عنا بهالبيت ..
ما سمعت شصار ما صار عكبي
الزلمة اطانا حجرة بكاعة كعدنا بيها انا وامي واخياتي ..
كوتي وحيلي جاي ينهد .. جاي اتعب جثير .. وفكد خشان اتعبني اكثر
لجن اهون اعلى روحي واكول الصار اهون جنت اضن هاي المنية لجن بستر الله طلعنا منها …
السمعته عكبها …
ال موازي تاهميني بالسالفة وذابيها اعلى خشان واهو كايل الهم .. المرة طلبت طلاكها ورادت ترد لاهلها وانا حررتها بلا طلاك عبن ابوها باعها الي ورد المبيوع لاهله .. لا ادري بيها ولا الي باثمها … البنت من ال موازي وانتم اهل البلية .. انا اعليه ثاري فصاله من الداس جتفي ونومني بالوساد عشر .
عكبها ما عرفت اهل الديرة وين درونا وشعملوا عكبنا
مر الشهر والشهرين .. وخشان ما يمر فد توصله اخبارنا .. واحس بحاله كطع الضنة مني .. بلاويي تعبنه هواي وجل افاده
جان حيلي ينهد شوي شوي ليما تمرضت ووكعت طريح وساد
ثلث تيام ما طاحو اعلى علتي يداروني بطب عرب محد خذاني لحكيم
ليما جا خشان .. دش وهو داير وجهه وبعده كلبه شايل مني
شالوني للربل وطلع بيه لمركز المدينة .. عد ما وصل غاد واتفحصوني … كالولي : اتبشري انت حبلى
فرحت بهالخبر ..
وطلعت وانا مبتشره .. اول ما شافني وكف لحيله : شنهو الصايبج
– صوابي هالحين منك
– مني !
– اي منك .. لجنه خيره من صواب
تبسمت وكلتله : انا حبلى
ملاامح الغيض والزعل كلها انزاحت بلمحة وتحولت ضحكة : حبلى ييازي ؟ …

يتبع….

( صاحبة الكلعة )
كل ساعه اريد انكسر
مثل الاگلاص البيد سكران
(كاظم الگاطع)
تبسم وهو يكلي : حبلى صدك
-هزيت راسي وتبسمتله
ضحك وكام يتحمد الله ويشكره ويكلي : يولي خاف غلطانين
-عليش غلطانين ؟
-شلون حبلى يولو .. وانت صرلج جم شهر هين مبعدة عني
عد ما بشرتني باحمال فرحت لچن جلمته هاي كطعت شعوري : لهينه وصل الحال يخشان .. تتهمني !؟
– حشى ما هاذ الكصد بس كصدي يعني والله ما ادري الف الحمدلله والشكر اللهي الف الحمدلله والشكر
درت وجهي عنه وثكلت عليه
صعدت وياه الربل وهو حيل فرحان ومستبشر : يول لا تضلين مكشره انا من فرحتي تيهت حجايتي .. لا تكفين على الجلمة
– لا اكف شنهي لا هذا طبعي ولا هي طبايعي تعودت اجرع حجاية المرة واسكت .. شنهو البدي بعد لا الي اهل ولا عزوة اشد ظهري بيهم .. شتحجي وشيجرى منك مغصوبة اتجرعه
– تحسبين روحج وياي بلا اهل
– حجايتك ثكيلة يخشان
– يولي حبي الله اش كلت انا ؟ حسبت كعدتج صارلج جم شهر .. وسعلت بلا تفكير تحسبينها علي
– احسبها والما حسبت شيفرك .. راح ارد لال مونس انحبس غاد اجرع المر يومية واتحمل وبالعافية اعلى ضرايري الغربلني هالغربلة هاي مجابلهن وانا منفية
– كل الصار من ايدج لا تلومين احد ييازي
– لا ماهو من ايدي لو ما وحدة من نسوان رايحة فاتنة على اهلى كل هاذ ما يصير تجتلت وادم يابو وادم من جلمة فتنة فتنتها سميعة
– لا اتهمين احد بلايا اشهود
-اذا جان اكو احسن من الله شاهد بكيفك بعد
-والنعم بالله بس يوم التجيبيلي شاهد اعلى سميعة هي سبب هالفتنة ساعة ما احطها بالكلعة بس …
– ام ابنك .. انا ياهي ؟
– ام شذرة العزيزة
– الله كريم الله يطلع الحك
– يولي انت الطلعتي من الكلعة برجلج وانت الجتلتي ابوج انا شنهو الكصريته وياج وهيج دايرة عني عجل هي بالمكلوب انا الاندار عنج لو انت ؟ لو من سمعتي بروحج حبلى تعززتي اعلى افاد خشان
– اعرف بروحي ماني بعزيزة اعلى افاد احد ردني لمجان وبالعافية عليك نسوانك
– انا بيدي هالساع اردج بس عمامج يطلبونج ثار بجتلت ابوج
– اذا جانت الزلم تاخذ ثارها من مرة خلهم ياخذون ثارهم ما انا خايفة من احد
– ولو هدو يطلبونج
– يطلبوني منين من دارك وانا شايلة ابنك ابطني ؟
سكت عد ما سمع هالحجي : انت تبريت مني وذبيتني بدار مونس
– هذا طلبج جان عد ما جلت المصيبة بجتلت ابوج لو نسيتي
– ما نسيت بس جان عشمي بيك جبير وكلت ما يخليني لجنك اهجرتني وذبيتني ذبة الجلب بكاع مونس لا سالت عني ولا عن العجية البينا
– انا ذابكم؟!! انا جاي ادفع اجر المجان الكاعدة بيه انت وامج وبين الحين والاخر اجي وانشد عنكم وادور اخباركم لجن الصار ماهو هين ييازي لا تهونين المصيبة .. المرة التجتل ابوها بيا عين تطلع جدام الخلك
– ما مستحية من احد .. اليريد يذمني خله ينطيني اب يبيع بنت بعمر ثمن سنين خاطر يصلح كاعه اذا جان اب مسويها ساعتها ارضى الملامه محمود ماهو ابوي ولا اسمي ابوي وتحرم اعلى الساني جلمة الـ الله يرحمه
سكت شواي واندار لابو راشد : اطلع بينا لال مونس ناخذ البنت ونرد للكلعة
– واهلي ؟
– تراني احترت وياج ، اردج ما ترضين اخليج ما ترضين .. شنهي سالفتج ؟
– ما بكصدي اصدك لجن عد اسعلك اعلى امي يظلن بمجانهن منا ليما ادبرلهن مجان اخر
– يولي تحجين من راسج انت منين ادبرين
– بعد الله موجود ويدبر وياي شنهو بيدي واعمله الحين
-خليهم بمجانهم ليما الله يفكها
رد بيه لديار مونس نزلت غاد كتلهن : اطني خلاجيني خلني اولي بسع
امي فزت : وين عترحين يولي
– ارد للكلعة ما بشرتج يمه انا حبلى
– يا يمة بنيتي الف ع الخير يمة .. صدك
– اي والله الحمد والشكر لله
– شنهي شكثر صارلج حبلى
– يمكن اعلى اربعين شذرة انا حسيت ابطني مرتفعة بس ما حسبت حبلى لجنه الله من يمه اكرم بعد عيني عين الله تحت رحمته
– وشنهي روحتج للكلعة يولي عمج طالبج دم
– ياهو اليطلبني بدم وبزرة خشان ابطني ؟
– لا ترتجين علي يبنيتي يظل الزلمة ماهو تجوة
– انا ما ارتجيت اعلى لجن ليا وكت يضل حالنا هاذ .. لا ما استغليت بزرة بطني بهالساع ما نطلع من هالنكرة اسنييين .. خلني ارد وبزي بيدي وخشان بظهري ومحد يكربني غاد .. ولا اخلي الكلعة لضرايري يغيرنه علي يمه .. من بعد عين الله عين خشان النا .. شنهو البيدي غير نداري اعلى شمعتى لا تطفي .
– الله وياج وبعونج ييمه اليسهل دربج ويفتح كلوب الوادم الج واولهم كلب خشان
– قبان ثمك يما على هالدعوة .
حبيتهن ووصيتهن على ارواحهن ورديت صعدت ويا خشان
اخذنا وطر الدرب بينا لال عكاب .. عد ما طبيت الديرة غاد
الف حسبة وحسبة براسي
واولهم ضرايري الهلني هذا حالي
لاون انبش واعرف الذبت تهايمها علي وعلى اهلي وحركتنا ياهي . لا انبشها واكطعها من عرجها .. عكبها اندار لال موازي اخذ حكي منهم
صف حصان الربل جدام باب الكلعة وخشان نزل واطاني ايده ويكلي : على كيف بختج
نزلت من الربل وانا اتجى اعلى ايده
فتحلي باب الكلعة ودشيت .. جنت لابسة نكابي
حجت زهرة : ياهي هاي
رفعت النكاب عن وجهي وكتلهن : صاحبة الكلعة شنهي نسيتن طولي ؟
فزت سميعة من مجانها تهذري : حشى ما انت صاحبتها ولا جنتي .. صاحب هالكلعة واحد .. خشان ال عكاب
دش هشان اعلى جلمتها : حياهم الله
رديته : الله محييك ..
واندرت لها : الله وحده الماله صاحبة .. والنعم من صاحب الكلعة
– بالمهلي .. زهيتي الكلعة ييازي
– زاهية بصاحبها يبعدي
تبسم واندار لملكة : باركي لام شذرة يملكة .. صاحبتج حبلى
فزت ملكة : يااا صدك .. بالخير وبالعافية
كامت حبحبتني
وضرايري يخوزرني وانا اكللهن : الله يسلمج دادة الله يسلمج
اندرت لهن : شني ما ناويات تباركلي .. يلا ما بعازة مباركتجن
خشان من شافنا انترادم .. هدنا ومشى لحجرتي
دحجت عليه راح وكتلهن : رديت ولا تحسبن ردتي هينة .. التهمت اهلي وحركتهم يم ديرة موازي اطلعها اطلعها ووكت الاطلعها ووكت الاعرفها ما ارضى بغير طلاكها جزاة الصابنا
هديتهن ومشيت لحجرتي اجابل خشان
رديت لمجاني وردت بنتي لكلعة ابوها .. وهذا اكثر الجنت رايدته .. كربي من خشان بكويني عبن هو الاتحامى بيه لو طحت .
بس هذا ماهو رماي
رمايتي اعلى بيت ابوي .. لاون افكر وسعى اصل بيت ابوي واخلي امي وخواتي يكعدن بيه بدل ما هن مهجرات ومرت ابوي ساكنته وماخذته حيف.
بس اعرف لو ردن .. خوالي وعمامي ما راح يخلونهن بحالهن
هساع انطر ليما احط البطني ساعتها ارد لحيلي واكوم بامري
دورت اعلى شاهد يشهد اعلى فتنة سميعة ما طحت بيه
زهرة اجت وتحلفت يمي ما هي الفتنت واديها مالها ايد بالصار لجن ما انسالها عد ما وكفت ويا ابو ناظم ساعة الطردني من الكلعة من غمضت عين خشان سبني ومحد منهن رحمت بحالي ولا بحال شذرتي.
مرت الايام وبطني ترتفع ..
وانا حبيسة البيت .. الديرة عرفت انا رديت لديار عكاب لجن محد اكرب وخشان متصديلي وهو يكللهم : حبلى وما لحد اعليها اثم وهي شايلة بزري اليكربها يكربني يحمل غيضي
وصل الخبر لال موازي .. وجايين لخشان يطالبونه بدم ابوي كاللهم : اتطلبون دمه من بته ؟ محمود جرم بحال بناته وجتلنه ماهو الجاتله غريب .
كالوله : اطنا بناتنا نحن النردهن ونخفض روسهن اعلى عملتهن
كال : يشهد الله وكبر عكاب البنات وامهن ماهن بكاعي ولا انا حمال اثمهن بس ام بزري ما لحد اعليها اثم اليكربها احز نحره من الجيد للجيد
تكاون وياهم مرة
ما عاودوا دورة اللخ ولا اجو
من بعد شهر مدري شهرين كمت اطلع من الكلعة افتر بكاع خشان .. لجن ما اروح لال مونس خاف احد متبعني ويندل درب اهلي ..
كل وكتي افكر شلون اردهن لديرتهن ومحد يتعرضلهن
مضى اعلى جتلة ابوي يمكن ٦ اشهر .. وانا باخر ايام حمالي ويجي اعلى بالي اخاف اموت ويظلن امي وخواتي بلا راعي .. ما مالت انطر ليما اجيب لا ما ادبر امري الحين
فكرت شلون اردهن
ما لكيت حل الهن غير الفلوس ..
عد الفلوس تهون كل نفس وبالفلوس تشتري ذمم الوادم وضمايرها .. لجني ما املك غير ذهبي .. وذهبي ما يرضى خشان لوحدة منا تطي ذهبها لو تبيعه .
دحجت بالبستان هيج .. اطمشت اعلى الكاع
وانا اطمش اكرب خشان : حيا الله
– بالمهلي
– شنهي اشوفج اليوم هين
– جتلتني حبسة الكلعة وهاي ايام كلتي امشي روحي بالبستان بلكت الله وتسهل جيابتي
– تكومين بسلامة بحيل الله
-الله يسلمك
حجيتها ورديت اطمش بالكاع وهو موكف بكتري ، حجه : بيش شاغلة فكرج
– اكول ان جنت بياعة الاكي بروحك مشتري
– تبيعين شنهو
– رايدة ابيع عليك الكاع الكتبتها الي
حجيتها وتبسمت
ضحك هو : تبيعين كاعي علي ييازي .. سالفتج لا صايرة ولا دايرة
– وانت اعلى حك سالفتي لا صايرة ولا دايرة …. خشان تشوفني ما خوش ؟
عكد حاجبه : عليش
– انا رايدة اشوف رايك بيه … جتلت ابوي بلا شعور تشوفني امجرمة ؟
– احجي حك ؟
– رايتك بيضة
– اشوفج بهذا حلج تعادلين الف زلمة اعلى هالكاع .. زغيرة لجنج لفيتي عكل ودوختي شيوخ واولهم انا ما عرف شلون كل هالمصايبة مدايرتج وانت واكفة تتبسمين وتعرضين اعليه كاعي اشتريها
– تذكر لعيبتي ؟
– وش بها ؟
– من فجيت عيني اعلى لعابتي وانا من ذاك الوكت عكلي بجري ويفكر .. جنت افكر شلون احمي لعيبتي من ابوي خاطر لا يحرجها .. مرة دفنتها ومرة ضميتها بكن الدجاج ومرة حطيتها تحت الصرة .. من ذاك وكتي افكر احمي لعيبتي .. من ذاك وكاي افكر شلون نفتك من كوان ابوي وظلمه من ذاك وكتي .. افكر شلون ارد لامي عد ما باعني افكر شلون احمي روحي من ضرايري وهن يدربلي الموت بكل درب وانا طفلة عجية لا حول ولا كوة … افكر شلون اخليك ترضى تاخذني اشوف امي افكر شلون اعيش امي وخواتي مثلي بكلعة ما بخيمة جاتلهن البرد
التفكير جتلني اعلى زغر
وكت جان العجايا ( الاطفال) يلعبون حفاي انا احط راسي اعلى وسادتي وافكر .. ما عشت حلي مثل الوادم من التفكير .. وتفكير ما جا من رغد عيش .. جا من مرارة عيشة ضاكتها روحي .. وما اريد بنتي تعيشها .
-بنتي ما يصيبها شي وانا موجود
– ادعي الله يديمك لجن الضاك المرار يخاف يخشان عد ما تصاربت جرجرونا من كلعتك بلايا ستر خاطر يطردوني ، هاي وانت خشمك يشتم الهوى وسبونا عجل لو صابك شي الله لا يكولها شيجرى لحالي ولحال بنتي ؟
وادمنا ذيابة ما تعيش لا ما تصير بعينهم ذيب ما تتعدى اعلى حك احد لجن ما تخلي احد ياخذ حكك .. الينداس اعلى حكه ويسكت يكضي العمر مديوس .
عد ما حسيته داخ بفكري … ردفته ( وهساه شتكولي تشتري كاعك لو ادور مشتري غيرك )
دحج بوجهي وضحك وكال : شنهو البالج والمن معتازة فلوسها
– رايدة اشتري ذمة عمي .. واكايضه اطي الفلوس اذا يتكفل امي وخواتي يردن للديرة بخير وما يرضى لاحد يكربهن .
– تضنينه يرضى
– لا تكول سمسم ليما تلهمه .. ما ابشر بخير بس اجس نبضه بفلوس واشوفه
– بيش تبيعين الكاع
تبسم ، ضحكت وردينا للبيت نضحك .
اخذ خشان الفلوس واطاهن لزلمة من ال عكاب يكرب ال موازي كرابة نسب .. كاله تروح اعلى عمها وتعرض الامر عليه ..
راح الزلمة وعرضله الفلوس وكاله : حرمة ال خشان تعرض اعليك حك دم ابوها وتكول اطيهن .. شرط يكفل امي وخواتي بديرة ال موازي محد يكربهن لو يتعرضلهن
اول الامر راد ياخذهن دية دم ابوي .. الزلمة كاله انا وصوني بكفالة تكفلهن اطي ما تكفلهن ما اكدر اتصرف وال عكاب من وراي ينطرون
جاب الفلوس ورد
ثاني يوم عمي مراي للكاع ، اجاني من بعيد يصارخ واباله افزع لو سمعته يصارخ .. كضبت بطني وانا مكعدة بنتي فوك جتفي .. نزلتها وشلت اله راسي : تهدد بكاع رجلي .. بديوان الزلم يحسبونها دوسة كاع يعمي
– تكايضيني بدية محمود … احمدي ربج لهالساه انت تشتمين الهوى والفضل لبزرة خشان لونج ما جنتي حبلى لجان دمج اسبح بيه
– لا تهادد بدمي وانت مانك كده .. اعلى يا مال جاي تطالبني بدية .. ارجى الناس بدية المكتول اهله وانا اهله .. ومحمود ماله دية دم عدي .
العدي جم فلس ترضاهن .. ترضاهن
ما ترضاهن محد عايش بقيدك عايشات عيشة كريمة والله مدحج بحالهن
– وينهن هن
– واعدني واطيني جلمة زلم جدام شهود خاطر لا تنفض وعدك بعد الوعد وتخلف وياي
-اعفي عنهن لجن مالهن جية لديرة موازي ..
– محد بقيد عفوك يعمي .. انا الطالبته منك تكف بين ازلام وتتكفلهن محد يتعرضلهن … ترضى نسلم اعلى خير ما ترضى الدرب الجايك يردك
– انا موافك …
– كبل لا توافك كفالتك الهن تحكك تكف وياي وتردهن لبيت ابوي الهن حك بيه ما يضل لمرت ابوي
– مالي خص بورث ابوج .. انت جبيرته واطيج الاذن بدشة كاع ال موازي .. خاطر تاخذين ورث ابوج من مرته
– رايتك بيضة يعمي .. تجي الليلة عكب اوذان المغرب .. يشهدون ازلام اعلى حجيك تاخذ حكك وترد
-اعلى العهد لجن لا نحسبين رضاتي هاي مصالحة .. انت لا مني ولا اعرفج يوم ولا اتشرف بيج من ال موازي شيصيبج اثمج عليك ما افزع وراج ولا اطالب بحك
– ريتك سالم من اثمي ماني بعازة احد ، الله ويا الما احد .
هدني ومشى
ولليل جا وكعد ويا خشان وشهدوا عليه ٥ ازلام اخذ فلوس من خشان .. واتكفل امي وخواتي ما يصيبهن شي بكاع موازي .
عد ما عكدو الامر ..
طريت دربي ويا طر الصبح لال موازي
وصبحت اباب بيت ابوي .. فجيت الباب بلايا دكته ودشيت الدار
فزعت مرت ابوي وطلعت تصيح ياهو : اهل البيت
عد ما شافتني هدت علي : بيا عين جاية عكب ما جتلتي ابوج بيا عين كليلي
– امر يخصنا انا وابوي الغريب ماله خص بمشاكلنا
– الجتلتي رجلي رملتيني يتمتي جهالي الله لا ينطيج
– ظل الباطل ما يدوم وابوي باطل وانتهى ظله .. عدج مجال منا لعكب الظهر تفرغين البيت لامي وخواتي
– اعلى جثتي امج ادوس عتبة دارج
– عجل ادوس جثتج ماهو امر عصيب … انا اطيتج علم وانت بعد ادرى بامرج .
جاي تحجي .. طلع اخوها من الحجرة كوة يفرك بعينه نايم ويصيح : ياهي اعلى الباب
– والله جايبة الغربة للدار وتتنطر منا نظل سبايا بديرة الغربة .. كلمن يرد لاهلة .. لعبتنا كضت .
فزع اخوها عد ما شافني ..
وكال اليوم اليوم ابشر ال موازي بجيتج نطلبج ثار يحرمة ال عكاب
– روح اطلب دمي منين ما يحلالك من تلكى احد يفزعلك جيبه وياك انطره
طلع من البيت وانا نزعت عباتي اطمش بالبيت وهي تهذري وتهدد وتتحلف ومهوسة بروحها .. عديت الدار ورحت على بيت خوالي
عرضولي خوالي ..
كتلهم مرت ابوي ماخذ البيت هي واهله ما بيكم نفع تاخذون حك امي مثل ما اهل مرت ابوي ماخذين حكها وساكنين بدارها
استفسروا اعلى موقف عمامي من امي لو ردت
كتلهم اشتريت الذمم ومحد له عين يطالبكم بدم احد .. افزعوا وياي مرة وخلوني احسب لامي اهل بس بالعداد سبع خوان ما باحد بيكم نفع
فزعتهم وشيطت الشرار بكلوبهم ودليتهم اعلى مجان امي
ارحوا جابوها واجوا .. وتكاونوا ويا اهل مرت ابوي اعلى البيت الكاعدة بيه مرت ابوي وبزرها
… راحوا لعمي خاطر يكضون الامر
واهل مرت ابوي ابالهم عمي متحلفلي فاجئهم عد ما وكف ويا اهل امي وكاللهم : ام يازي الها حك بكاع محمود وبيته مثل الحك اللي لبتكم وازود هي صاحبة ٤ بنوات وبتكم بطرك البنت والولد.
جيب حك رد كوان .. كضت اعلى حل ..
يكسمون البيت بالنص ويعيشن بالكاع .. وصفى الامر اعلى هالحال .. وخوالي مدري شنجب بنوا لامي مسكف عشب وحجرة لامي عبن البيت ضيج ما يوسعهن .. وكعدن بيه
عد ما امنت حالهن وردن كعدن ابيت ابوي معززات مكرمات ما لحد اعليهن ذنب .. انا هين ارتحت .. وكل العملته لو ما وكفة خشان بظهري كلشي ما سويت .. بس احجي واهادد وافازع ادري دام بزر خشان ابطني يا ويله اليكربني جنه كارب شعره من راس خشان
عكب هالهوسة هاي ..
ومن بعد اسبوع مدري اسبوعين .. ظهرت عدي علامات الولادة .. لجن ما جنت اسلم روحي للتعب شما حيل بيه اكوم واطلع للكاع .. وازرع بيها
كاضبة المنجل وشادة اوزاري وانكابي اعلى وجهي واحش .. اجا خشان من ابعيد يصيح : ها الكاع وانباعت تحصدين ثمرها عليش
– كاع زلمتي ولو زاد خيري زاد خيره
تبسم واكرب : حياج الله
– الله محييك
– عليش تتعبين روحج وانت باخر ايامج
– واشنو كعدتي وانا حبيسة الدار .. نلحك انام بكبورنا نومة ما وراها كعدة، الما يلحك دنياه تحطه وراها وعمره ما يعلى
– خير ما كال ثمج
كاعي وخيري وكل العدي يفداج
-يبعدي وبعد اهلي
ضل موكف وياي يسولف حسيت بعلامات الولادة
طلبت منه ينده لابو راشد ياخذنا للداية خاطر لا اوازي روحي بنص الكاع ويحتارون بيه
نده لابو راشد وودى على ملكة
صعدت وياي بالربل .. وهو لحكنا اعلى ظهر حصانه
الربل يمشي مسرع .. يشيل بينا ويركعنا .. احس الجاهل نزل كمت انده ( يا نور محمد ) وتلزم بملكة وهي تكلو ( اسرع يبو راشد المرة راح تولد )
وصلنا باب بيت الداية .. ما كدرت انزل
كمت اتلوى من الوجع واكللهم : بس انزل يكع البزر مني
رادوا حاولوا ما رضيت بس اتلوى ليما وصل خشان وشالني شيلو من الربل بعباتي لفلفني وحطني للكاع .. رجلي عد ما جاست الكاع .. فضى حيلي .. وكمت اصارخ
طلعت الداية تركض
دخلني بساع ما طولت دكايك وسمعت حس البزر وابجاه تنهدت من التعب وملكة هلهلت ( كلللللللللللللللوش البشرة يخشاااااان مرتك جابت ولد … جاك ولد يخشااااان)
انا رديت راسي ارتاح لجن حيل افتره كلبي عد ما سمعت صارلي ولد .. ما احسبه ولد احسبه سند .. من كون حالي بهالدنيا بلايا والي عكب عين خشان لا ابو ولا اخو ولا عشيرة التكف لي … عزوتي بابني من ال عكاب .
خشان عد ما عرف صار عد ولد
راد يوكف كلبه من الفرحة .. ابتشر وكام يتحمد الله بصوت عالي بنص ديرته .. الوادم التمت عليه تباركله
لفوا الولد وحطوه بمهاد .. وترسو مهادة ليرات ذهب
وخشان ذبح فدى لجيته ثلث عجول ٧ وخمس طليان
الديرة والداير الديرة شبعوا بخيره … والكل ابتشر بجية هالولد
سماه ابوه جابر عكب ما جبر الله بخاطر بعد سنين الشح المر بيها بشحة بزره سمه ابنى مني ( جابر)
الله ما ياخذ من ابن ادم لا ما يطي ويزود عليه لو جان صابر محتسب .. والله بلاني بابو باعني وانا بصباي وما اطاني اخ يكفلي ويصيلي عزوة بين الديار .. لجنه عوضني ببزري
من بعد جابر .. حبلت
وحبالي بينت اعلى الاربعين اشيل بزر ابطني
وعكب جابر اجا مسعد .. وعكب مسعد اجا .. مجبل وعكب مجبل اجا عثمان .. وعكب عثمان اجا اجا وقاص وعكب وقاص .. ناصر وعكب ناصر حميد وعكب حميد ..
وهاي مرت ١٣ سنة
وبدل الولد الله رزقني بسبعة وحبلى ببطن تاسعة
ترست كلعة ال خشان بزرة ولد ..
ومليت عيونه ابزرة .. وصرت انا الكل بالكل ..
انا صاحبة الامر وانا صاحبة الراي وانا صاحبة الكلعة وكل ضرايري يهابني .. عبن خشان ينام اعلى شليلي
مرت الاسنين وذيج العجية الباعها ابوها بسوك صار الها شان بال عكاب
والكل يحسبلي حساب .. وحتى بديرة ال موازي انا عدهم بالف مرة .. ما كطعت وياهم ولا كلت عشيرتي خذلتني واتبريت منهم
افزعلهم بالجبيرة والزغيرة واحشم بخشان لو واحد منهم وكع بضيج .. صار جبيرهم وازغيرهم يندل دربي ويطيب بخاطري
.. واجبت نسوانهم وما بيهن التجيب لو تطرى عدهن مصيبة واسمع لا ما انا اول الناس افزع ..
محبيني هواي
واعداي ازود .. الناس تكره الكوي
وتحب الينكال الله يساعدك وماله احد .. تحب ابن ادم ضعيف لو كوى الف عين تريد تكسره .. والف درب يتصيدله .. وغلطة الشاطر بألف …

يتبع….

(هجمة خنزير)
ظفروا رموشي حبل وإتنطروا جية ظلام
وصلبوا إعلى عيوني حلمك
وانت يا المجروح خاف احجي والجمك
الگاطع
من بعد ما يازي حطت مرجانة بعكل خالد
تعشمت بيه مرجانة .. وكل املها ياخذها خالد ويعيشها بخيره وبخير ابوه تحت ظل الكلعة مثل ما يازي عايشة بظلها
بس الصار ..
اول الأمر سميعة الما رضت تاخذ اخت يازي لابنها
وعكب ما يازي امنت على حال امها وخواتها .. ما عادت تهتم لزواجة مرجانة من خالد .. خصوصا ابوه ما راضي خالد يتزوج بلايا رضاة امه .. كالو (اقنع امك واحجيلي بعرس غيرها اكطع الضنة )
حاول خالد راد .. وسميعة واكفة ببلعومة
ومرجانة منتظرة وكت اللي يوافكون ويجون يخطبوها ..
وضلت منتظرته سنين .. ليما ابن عمها اسمو (عمران ) رادها .. وطلبها من ابوه
جا ابوه يحاجي امها بالموضوع وكايللها ( رايدين مرجانة لعمران )
كالتلو : بس عمران معرس وماخذ اثنين
كاللها : وش به ؟ الزلمة ياخذ اثنين وثلاث واربع .. هاي هي يازي بنتج الجبيرة ماهي ماخذة زلمة اعلى ثلث ضراير شو عايشة بخير ونعمة
كالتلو : يازي انغصبت على هالزواجة وانت ادرى ابيعتها عد ما باعها محمود لخشان خاطر يهوض ضر الحريجة الصبحت بكاعه ..
كاللها : البنية ما تصير لغير ابن عمها لا حاطة ابالج تزوجينها لواحد غريب .. نحن عمامها ما نرضى .. وكل واحد يكربها نكسر ايده ورجله .. تريد تعرس ترضى بعمران .. ما تريد .. تضل هاي ظلتها معنسة مجابلتج طول عمرها .
حجه حجايته وكام
اجت ام يازي تحاجي بتها بموضوع عمران كالتلها : انا ما رايده عمران .. عمران نسوانه يشكن منه واجي اصير مرة ثالثة ما ارضى بيه .. هين عليّ اضل معنسة ولا ولا اخذ عمران واعيش معلعلة
– عمج نهى عليج ولو ضليتي ياهو الالج انا ما دايمة وخواتج كلهن عرسن ومشن انت المن تضلين ؟ تشبعين ملامة ارضي بقسمتج مثل ما رضت اختج شتسوين هذا
– ما ارضى يمه .. شناكصني حتى اخذ العايب عمران .. ازغر وحده بنسوانه بكبري مرتين .. اضل عانس ولا محروك كلبي من الضراير .. هاي شوفيها يازي شحصلت من ضاريرها يومية مصيبة يومية طلابة من وراهن .. ما اريد.
امها ما رضت بحجيها
لعكب الظهر لبست عبايتها ومشت على كلعة خشان
دكت باب الكلعة .. فتح الباب جابر : هلا جدة تفضلي
– عجل امك وين
– داخل .. تفضلي
دخلت ويازي تصيح : جابر لساعك ما رررررررحت
– رايح يما رايح
يازي وهي تصفط بصرايرهم .. دخلت امها : مسا الخير
اندارت : يا هلا يمه .. يمتى اجيتي
فزت لامها : هلا بيج هلا .. تفضلي
– زاد فضلج عجل ازلمتج ما هو ؟
– ويا العشرة مدري شعدهم من طلابة ، خير شنهو حصل شي ؟
– والله عمج امس جا وحجه وياي بسالفة مرجانة
– اي يا الله خير .. شرايد من مرجانة ؟
– رايدها لعمران
– لعمران ، بره شنهو عمران يمه
– يمه انا هم كلتله عمران معرس وماخذله اثنين يكلي الزلمة ما يتعيب .. وخشان رجل يازي ماخذ كبلها ٣ شنهو الحصل
– عجل يحط عمران ويا خشان .. شجاب السدر ع العاكرل
– الحجي هاذ يمه ما يفيد يكلي اذا ما رضت تاخذ عمران لا تفكر بعرس كل عمرها تضل هاي ضلتها ليما تموت
– شلون طلابة هاي .. نحن نا نعول تفج نفسها من خالد وتأيس منها يصكها عمي بوجهه
– شيوي كليلي
– يمه مرجانة هم ماهي زغيرة .. عمرها هساه ست وعشرين .. انا اكبر منها بسنة وازود .. وعيالي صاروا بطولي .. وهي بعدها ناطرة
– انا هم كلت ييمة خواطيبها كطعوا .. ومامش زلمة بعد يريدها وخالد ييمة امره ماهو بيده ولو صار بيده شنهي عمج يرضى .. ما يرضى نرد ذاك الطاس والحمام يا طيك يا طاك ومجاتيل وجيب ميت ورد جريح .. عليش يا بنتي .. خليها تعرس وتنشتر تحت ظل زلمته استرلها
– والله يا يمة ما ادري .. من باب حكها نحن نعرف بحالها نغشم ارواحنا لو كلنا ما ندري بيها مترايدة هي وخالد وكل هالسنين كطعت قسمتها لاجله .. وهو اعلى حالها شيب وبعده ناطر احد من اهله يحن عليه .
– عجل والتالي يمه شلون
– يمه خالد عده ابوه لو مشت مرجانة ما تكف عليها يحط عشرة بدالها .. لجن مرجانة يمه ياهو الالها ؟ لا انا ولا انت دايميلها تاليتها وين والمن تصفى ما طولها زغيرة لو خشت الثلاثين منهو البعد يريدها لو يودها
.. وخشان مالت يرضى لخالد يعرس بلا رضات امة .. كطنة واشلعيها من اذانج .. ما يرضى لو مو انام براسه لو اوذن هم ما يرضى شنهو البدينا ؟
خل ترضى بقسمتها
– انا عجزت يمه وياها باجر من الصبح تعاليلها .. واحجي وياها
– سهلة انا احاجيها لا تحطين ابالج .. بس خليها هي التجيني باجر للكاع .. انا عدي شغل
– ان شاءالله
سلمت عليها وكامت
ثاني يوم من الصبح .. كعدت يازي
كعدن ضرايرها كبل طلعت الصبح .. بس شذرة نايمة
كامت تصيح يازي : يولووووو شذرة الشمس راح تطلع وانت بعدج مكاعدة يولي اكعدي جتلتيني بنومج الثكيل هاااااااذ
خشان : اعلى كيفج وياها يازي
– ماحد مطلع عين هالبنية غيرك يخشان
– وشتبغي بكعدتها لو كعدت خليها اعلى راحتها .. هي فرد هالوحدة اعلى سبع خوان ونايمة بخوانيكها فكي وياها يا مرا
– البنية ما تدلل يخشان لو تدللت صعبت اعليها العيشة .. عبن الدنيا ما مثل بيت ابوها ولا بدلاله .. خلها اتعود اعلى كعدة البچر خاطر لا تصير مخدية
– ما طول خشمي يشتم الهوى اكص راسه الياذيها لو يسلبها دلالها
– الله يطول بعمرك بس هد البنية من حجيك هاذ لا تطلع عينها
زهرة: اليسمعك يخشان يكول فرد عالبنية عندك عجل وبناتي شنهي جايبتهن من الجول
– البركة بيهن كلهن ما افرك بينهن كلهن بناتي لا تظلين اتكعدين اعلى الزردوم يزهرة
– ما كاعدة اعلى زردوم احد لجن اليسمعك يكول بس شذرة بنية عدك ذنيج ما فد يوم رحت لبيت عيالهن وزرتهن
– يرلي كل اسبوع يمنا هن وعجاياهن .. عليش امشيلهن بعد .. بطت وحدة منهن ما اجت شهر وما تفكدتها ومشيتلها .. اطلعين اعصابنا من صباح الله شبلاج
سكتت ويازي تفرد العجين وادحج .. صاح : ولك مجبل روح اندها لهاي فكست كلبي متوثة نوم كعدها
راح مجبل كعدها
اجت كوة تفج بعيونها .. بلا صباح تمددت وحطت راسها على رجل ابوها ، حبها براسها وكاللها : منعسة يابة كملي نومتج بالحجرة مالج غرض باحد
صرخت يازي : يا نوم اريد اخبز الخبز اريدها تطرك وياي بالتنور ، باجر عكبة تعرس شنكل للوادم ما تعرف تخبز يشعلون صفحاتنا بالشتيمة اعلى هالخلفة .. كومي
شذرة : اي يمة كمت كمت
راحت ذبت اعلى وجهه ماي واجت تكف ويا امها .. امها تخبز وهي تطرك بالتنور …
– اسمي شذرة .. البنية الوحيدة اعلى سبع خوان من امي
يازي بالأسم امي ما خذت منها شي
لا حكمتها ولا نباهتها ولا السانها
يكولون التعيش ويا خوان ولد تصبح ولد وما تخاف احد
بس عالكول ما ينطبك علي …
اليكلي اموت اموت
واليكلي اعدلي اعدل .. ما اعرف هاي ذبتي
يكولون اشبه جدتي ام امي .. نفس طبعي مالها حس اعلى احد ولا تكوت اعلى احد يوم .. عكس امي الخلت الكل تحت ايدها ويهي زغيرة عمر
امي حيل تكره طبعي هاذ
وادريها ما كره منها عبن هي مدللتني اتجيبلي من الذهب ازينه .. وتجيبلي من القراض اجملهن بنات الديرة كلهن يتحسدني على لبسي وحطايط امي الي .. بس ساعة ووكت تصيح عليه تكلي ( ما اريد تضلين هاذ طبعج .. الفقير بهالدنيا ماكول حكه ) وتقسي حيل عليه من تعرف نسوان ابوي محملاتني شغلهن ومشتغلته كله وهن كاعدات .. ما اعرف اشكي ولا احجي لاحد اكول اي واشتغل
من ترد امي وتلاكيهن ذابات الشغل علي وهن مبسطات وكاعدات يتسامرن ويشربن جاي تهجم البيت عليه .. ما عليهن تكلي ( لو ما غبرة وما بيج خير ما ما علكن شغلهن براسج ولج يولي ليمتى تسكتين ليمتى ما تعرفين تكرلين لاحد جلمة الـ ما اكدر لا ما اعمل لا اريد .. يولي جننيتيني بطبعج هاذ يشذررررة )
ما ارد عليها ولا اراددها
اخش بحجرتي ابجي ليما يجي ابوي يطيب خاطري ويحاجي ما تقثني .. بس ما يفيد من تشوفني هذا حالي واحد امشيني تكصبني توصل بيها تكضبلها عودة سعفة بيدها وتجتلني ليما تزوركني تكلي اريد اطلعلج كلبج خاطر ما تظلين هكذ فاهية )
بس ما يفيد !
من صار عمري ١٤ …
كبرت وبينت ملامح جسمي ووجهي
صدك سمرة طوخ على سمار ابوي بس يكولون المعاني حلوات
خشمي زغير ثمي .. صاحبة خدود .. وابرز ما بجهي عيوني جنهن شذرات بوجهي ماهن عيون
كل اليشوفهن يصلي على النبي ويكلي ( عوزج بس بياض لو تكشفين شوين الا تصيرين تخبلين ) بس انا عادي ما ضايجة من سماري احبه عبن يشبه سمار ابوي ولونه .
بهذا اليوم خلصت الخبز ويا امي ودخلت ذبيت على روحي ماي .. لكيت نسوان ابوي مخلصات الريوك .. غطيت شعري وكعدت اكل وياهم
حجت امي : شعدك شغل يبو خالد
– سالفة بالعشيرة نروح بيها
– زين عجل انا اخذ شذرة واروح للكاع
– شعدج بالكاع
– احوش شجرة الرمان انا وشذرة ونرد
– عليش اتعبين البنية بالحصاد خليها وروحي انت وزهرة
كبل لا تحجي زهرة حجت امي : لا انا وشذرة من اعتاز وحدة منم اودي
– خير ان شاءالله
خلصنا الريوك … امي جابت المشط الخشب وصاحت : شذرة كربي جاي
– اي يمة
كعدتني وكعدت خلفي تمشطلي شعري وتدهنه بدهن .. سوته ظفيرة ها ثخنها .. واطتني المشط : مشطي الغرة .. اكوم البس انا
– تمام
مشطت الغرة ورحت لبست الشيل ذبيته على راسي والعباية فوكها .. النكاب نص وجه بس العيون طالعة ..
طلعت خلف امي حجت : انت ظلي عد شجرة الرمان لي ما اكمل واردلج
– وين راح تروحين
– بشغلة زغيرة داخل الديرة .. انت فرشي الجرجف وحوشي الرمان ليما اردلج
– تمام يمه
فرش الفراش حرالين شجرة الرمان
وكضبت السلة اكطف رمان واحط بيها واليكع على الجرجف اشيلو .. لميت ٥ سلالواحس ظهري وجعني
وكفت اطمش بالمزرعة
الجو خريف .. ووجثير من الشجر ذبت وركها
البرد جا .. ونسيم الشتا على الابواب .. وانا ادحج
شفت خنزير بالمزرعة من ابعيد .. خفت
اندرت ادحج لامي ما هي .. اندرتله جاي تكرب ويهرج بحسه
اخاف اركض وركض وراي ويتبعني .. واذا ظليت هي مو مكرب لصوبي
اش اعمل يا ربي
كمت اصيح ( يمممممممممممممة ) عسى امي جريبة وتسمعني
بس ما هي .. كرب زايد انا هين الخوف كضبني ..
كفيت عباتي وطريت الدرب اركض
عد ما ركضت .. دحكني الخنزير وكام يركض
انا من حلاة روحي كمت اركض بلا وعي واتخت بين الشجر والمسافات الضيكة لجنه يصل ويكربني ويهرج بحسه
كمت اصيح وشما صحت يزيد بهيجانة ويهيج عليه اكثر
رديت اركض بالبر .. لحكني للبر يركض وراي .. كلت راح ياكلني كمت امي واركض واجدامي من الخرف بطت
ما احس الا اتعثر بدربي واكع
جا نطحني براسه وعضني من ايدي كمت اتصايح واجر بروحي منه .. ما احس الا واحد اعلى حس الفرس يصهل .. ويا ما صهل طفر منه واحد طك الخنزير بسلاحة
الخنزير شرد يركض من عدي ..
ضل وراه يركض والفرس ضل يمي .. ما اندرت ورا الفارس بكثر ما التهيت بيدي العضها الخنزير .. وادحج بروحي ما مصدكة نجيت منه .. اعلى الهبطة الضكتها كلت ميتة
دموعي تجي وانا اتفحص بروحي
كرب واحد ملثم ، وكال : اطني ايدج
دحكت بيه ما طالع منه غير عيونة
ما رضيت احط ايدي بيد زلمة غريب حت لو جان يساعدني
بالديرة عدنا عيب .. كتله : جزاك الله خير
عنت روحي وكمت
بس جانت عباتي متوحلة ليذانها
ادحج بيها ودموعي تجري كال : اكفي اجيبلج ماي
– لا رايدة ارد لاهلي
– شلون راح اطرين الديرة وهذا حالج اكفي
جر من الفرس جربة ماي وصبلي غسلت ايدي الدم منها يصب اعلى اثر عضت الخنزير
جر اللثام عن وجهه .. وما احس الا شعره يطرى كبله
شعر اسود وناعم .. دحجت بية ودنجت حجه : لفي هاللثام عليها خاطر يكف النزف مالها
– بس عد توجعني
– لفيها وضكيها خاطر ينضك الوجع
كمت اجيبها منا واردها منا .. الوجع جالني ما عد اسيطر على حركة ايدي من الوجع لشتي كلها كامت ترجف ..
عد ما شافني ارجف .. تكرب وكضب ايدي ولفها وضكها حيل بلثامه .. وهو يلف انا ادحج بوجهو .. جان الزلمة شكلو مهيوب وابيض ولحيتو سودة .. وشعروا طويل يصل لجتافو
وهو يشد اللثام اعلى ايدي حس انا جاي اطمش بوجهه .. اعلى غفلة اندارت عيونة بعيوني .. دنجت وجريت ايدي .. بعد نفسه وكال : اهلج وين
– جزاك الله خير ما كصرت
جاي امشي وتعثرت كضبني ..
رجلي كلش ثكلانة مدري شصايبها .. كعدت من فوري
كال : وش بها ؟
– مدري شبلاها عصت عد تصل معد اكدر احركها …
كمبص رجلو ودنج علي كتلو : روح يخوية لا يشوفك احد
– واهدج بهالجول
– بستان ابوي جريب اردله
– وشلون ترديله وانت هاذ حالج
– تهون .. اذا جنت رايد تساعدني انده اعلى واحد من اخوتي يجيني
– يا خوية اهدج بهالجول وامش اذا ما يطلعلج خنزير تعرضلج جلاب سايبة .. كومي يخي اوديج واطلع بدربي
– وشلون اكوم وجدمي ما تكوى اعلى الكومة
– اعينج
– مشكور يخي لجن رايدة تنهده اهلي
– اهلج وين
– بالكلعة
– يا كلعة
– كلعة خشان
اندار يدحج بوجهي : انت ياهي
– شذرة
تبسم : يولو انا راشد ونحن نشتغل عد ابوج من كال وبلا .. طلعت خادمكم بلايا خبر .. خليني اخدمج
– لا الحشيمة الك يخي .. ابوي ما عده خدم ابو راشد صاحبه ماهو خادمه
– دام الفرس فرس ابوج .. اصعدي وخليني اوصلج
– لا لا لا شلون اصعد يولو انا ما اكوى اعلى الكومة
– دحجي هين .. دوسي على ظهري وجلبي بسرج الفرس واصعد
– لا يخي لا ..
– عجل شلون يولو اهدج بنص الخنازير والجلاب وامش
-مدري .. يمكن امي ترد
– امج منهي منهن
– يازي
– يولي مشت هي وامي اعلى وحدة من نسوان الديرة .. ما ترد هالساع كومي
ظليت اطمش ع الدرب وارد ادحج عليه
تبسم وكال : عاجبج ينت الكلعة نخيم هين اليوم
حجاها وكعد
كتله : لا على بختك الديرة لو شافتك كاعد جريب مني ما يسكت الكال والكيل
– عجل والتالي
– مدري
كام من مجانة وكعد ليغاد عني
يتنطر احد يجي خاطر يودي على اهلي ..
بس محد مر .. ابعد عيوني عنه .. وارد اطمش خفية
جماله وهيبته اطير عكول .. شعره تكول مي .. على كثر ما هو سرح .. وعيونه مكحلة بلا كحل .. من يدحكني بطارف عيونه اخش بثوبي من الخجل
سندت روحي ع التراب وكمت
كام : يخي خليني اوصلج اجلها للمزرعة وانت من هين تمشي على كيفج واوصلي
– وشلون اركب يخي ما اكدر
– يخي ما انا كلتلج ادنجلج واركبي على ظهري وجلبي بسرج الفرس
دحجت منا منا ما شفتلي درب ثاني
مشيت عند الفرس وهو دنج للكاع وتكعور .. حطيت رجلي على ظهره والثانية عصت توجعني ما اكدر احركها
كام من حيله رفع رجلي وساعدني اكعد ع الفرس : يخي راح اكع والله
: ما تكعي يخي حبي الله
كام يمشي بالفرس
ادحك لطوله .. وانا اعلى ظهر الفرس وهو ما بيني وبينه هواي
كام يمشي بالفرس وكال : غطي على وجهج خاطر لا يميزج احد من الديرة
اخذت من شيلتي وحطيتها فوك نكابي ونزلت الشيل اعلى كصتي وتلثمت بشيلتي وتغطيت بعباتي وانا اعلى ظهر الفرس
وهو يمشي همس : اذا ما جنت غلطان اسمج شذرة
-وشلون تعرفني
– من انت زغيرة اعرفج .. وعرفتج من عيونج جانت امج تجيبج النا
– ما اذكر شايفتك
– ولا انا شايفج لو ما كايلتلي انا من ال خشان ما افرزن .. بس كلت الج نحن نشتغل عد ابوج من اعوام جثيرة .. واعرف ما عده بنت ابيته غير شذرة بس ما جا ابالي كبرتي وصرتي ها كدج اعلى ما اذكر .. جنتي هاكدج ناعمة ازغيرة .. شكبراج ؟
ما رديت عليه سكتت
بس عيني ما بطلت ادحج بكفاه
وصلني جدام باب الكلعة ودك الباب .. طلعت سميعة كال الها : هذه بنتكم هاجمها الخنزير بالبر .. وعض ايدها
صرخت سميعة وهي تصيح : يول يمعثورة شمركبج اعلى الفرس ما تستحين نزلي
جرتني من الفرس وهو من يمه فز : اعلى كيفج اعلى كيفج تراها متصوبه بيدج وجدمها بشواي عليها
– مالك غرض انت ابعد من هين يلا فاررررج ما تستحي مركبها اعلى الفرس لو شافها احد من الديرة شيكول علينا نصير حجوة بثم هالعالم
نزلتني حيل من الفرس صرخت من رجلي ويا صرختي كفختني على راسي حيل وهي اطببني جوا .. ما وجعني الوجع البصوابي بكثر كفختها هاي جدامه .. حيل اتفشلت كامت ادمرعي اتجارى عشرة عشرة
دخلتني وهي تكللها : اسمعي يزهرة بت يازي جاية اعلى ظهر الفرس وابن خيري يجر بيها الدير
كامت يتصارخن ويرزلن بيا
انا حبست روحي بحجرتي وكمت ابجي من كل كلبي
لينا ادت امي من الشغل واتلكنها نسوان ابوي يعايرنها ويفتنن علي .. اجتني مشتعلة نار طكتني : يولي ليمتى تظلين هاذ حالج تصعدين الفرس ويا زلمة غريب ما استحيتي ما كلتي امي شنهو مركفها لو عايروها بيج .. يولي تظلين فاهية ما تفهمين يولي شعمل بحااااالج كليلييييي
كمت ابجي
رد خالد من الشغل دخل الكلعة وسمع صياح امي جا على حسها سعل امه شكو كالتله ( اختك الشريفة واكعة بالبستان وشايلها راشد ابن خيري يجر بيها الديرة اعلى ظهر الفرس)
اجا يرزل ويغلط ويصايح
امي كالتله : انا ما كصرت بيها هدها
بس ما جاز كام يغلط ويصيح ويريد يكضبني يجتلني وامي تصده عني .. دخل ابوي صاح : يولو شبلاكم شنهو الصياح هاذ بنص هالكلعة المهجومة
تصدتله سميعة اعلى نفس الحجي .. بسرعة فز واجا ينشدني : تأذيتي ول يابه .. اطني ادحج ايدج
انطيتو ايدي والدموع تجري والوجه مطعون دم من البجى
هو فجرايدي وشاف الجرح شلونه والدم متخثر وهو انجن .. كضب عصاته وراح يطارد ورا امي وخالد ويكللهن : ولد الجلاب البنية مكطومة ايدها وانتم جايين الومرنها بدل ما اشوفون شبيها ما بيها
صاح على جابر يروح ينده ابو راشد بسرعة خاطر ياخذوني للحكيم .. وكام يصيح عليهن خاطر يجيبلي ماي .. ومسح ادموعي ووجهي بشماغه ..
باسني بكصتي وكال : كومي يا بعد ابوج لعن ابو شواربهم الحثلك ذول .. يتصايحون فوك صوابج ما بيهم اليكشف جرحج ويدحج حالو .. خايفين من الناس ما خايفين اعليها ولد الجلاب .. اليحط شذرة اعلى طرف السانة اكصه شحده اليجيب طاريها بشين من الكلعة جان لو من الديرة .. اكص نحره وبخت الله
وهو يصيح ويرعد بالبيت
جا جابر كالو : راشد جا يابه
اخذني ابوي ومشاني كومة امشي رجلي وارمة
شالني من الكاع .. استحيت كلش من شالني حت نسيت البجى
كتلو : يابه نزلني استحي
ما ود اندار الراشد يسعلو على الموقف
كالو : لكيت الخنزير ينطح بيها بالكاع ويمرغل بيها التراب فزعتلها بالكسرية وطكيتو شرد .. ما رضت تصعد وياي بس جان حالها كلش صعب دنجت الها وصعد الفرس بلايما ادحج بيها الله شاهد
شكره ابوي واطاه حفنة دنانير
وكالو: اطلع للحكيم
اخذني لحكيم الديرة غاد .. حطلي عليها اعشاب ودوه ولفها واطه شراب لابو كالو : راح تصخن اليوم اطوها من هذا الشراب خاطر يسكن المها وتخف حرارتها
خشان : كونن ماذيها
– لا خير ان شاءالله بس جدمها مرضوضة لا تخليها تمش عليها خلها تسترتح جم يوم
-اي تستراح عليش ما تستراح جم شذرة عدي انا .. هي وجه الخير علي هاي عزيزتي هاي
كام يمدحني ويحب براسي جدام الحكيم
دوا الحكيم ما طيب صوابي بكثر حب ابوي وحجاياته الطيبة علي ..
انا كاعدة
وغاد عني مجبل اخوي .. وراشد
يدحجون علينا .. عد ما كملنا وابوي شالني وصعدني بالربل واندار فلوس للحكيم .. همس راشد : خفت عليج جثير عدج السلامة
جا ابوي ما رديت ولا حجيت بكلمة
بس احس جواتي صبح طبل ما بس كلبي يدك كل جوارحي ادك خوف وشعور ما عرف اوصفه
ضرب اعلى ظهر الحصان ومشى
رد بينا للكلعة وانا الدرب كله اسرك بشوفي اعلى كفاه.
وصلت غاد نزلت بس استحيت ادحك بوجهي كضيت روحي مدنجة شالني ابوي وخذاني لحجرته خاطر هو وامي يداروني.
من رديت جان كلب امي فارغ اعلى كثر ما كلت بروحها برزايلها الرزلتني بيهن وانا مجروحة وما حست بصوابي .. بس شافتني دموعها صبن وحضنتني ( شذرتي بنتي اعذريني ييما والله ما جنت ادري متأذاية اي غير تحجين تشكين تكليلي ايدي توجعني تعيفيني اهرج فوك راسج لا تهشيت ولا تنشين شبيج يا بنتي )
كمت ابجي وياها وابوي يكللها : صارت هسه صارت فرغيلها مجان الحكيم كال خلها تستراح … شنهو ييازي
– اي تستراح شعدنا
– تستراح ما اكعد الصبح واسمع نداهج عليها خاطر تخبز لو شتعمل بالبيت جم شغلة من اسمع واحد مشغل شذرة لو خادم اعليها والله وبالله لا اهججوا من هالكلعة هاي وحاضركم يبلغ غايبكم خاف تكلون خشان ما گال .
كالهم كالوله على امرك
وصدك كلها خافت منه ومحد كالي على شغل اكلي وشربي يجي ليمي .. بس مليت .. لا كومة لا كعدة بس اتصفن واكل واشرب
كمت اطلع يمهن بس هم ملل
مدري ليش ملل وانه كل عمري هاي حياتي اكل واشرب واشتغل وانام شنهو الجرى عليش كلبي يرفرف جنه بسجن ورايد يطلع ووين يطلع ؟
راشد لا راح من بالي ولا جت فكرة ابالي غيرة
كل وكتي صار راشد اذكر شعره عيونه مكفاه طوله واضل اهيم بيه .
مرت العشرة ايام انا انفتيت فت اريد اطلع وامي ما تخليني تكلي ( استري علينا ما النا حيل صياح ابوج ومكاونه انطري اطيبين واخذج لسوك المدينة )
احاول انطر بس كلبي طاير
حت لو بس ادحكو من ابعيد وارد ..ما اريد شي ثاني بس المحو
توسلت بامي ما رضت
شهر وهذا حالي طلعت روحي
لحد ما اعتزلتهم ما عادت روحي اطيب كعدتهم
من يتغدون ويتغشون ما احب اجتمع وياهم
ابوي يتفكدني ويصيحني اكعد بس ما اكل .. حجه : ول يابه وش بها شذرتي ؟
دحجت على امي حجت منها : بنتها محتصرة تكول اريد اطلع للبستان بس ما اخليها
– يا بنتي اش اطلعين ما اللي جرى وياج كلو من البستان
ما رديت عليه فد دنجت وخليت ايدي على وجهي بجيت حجه : افا افا عليش البجى لعن الله ابو خيرهم اطلعي يابه اخذي واحد من اخوانج واطلعي .
– يصير اليوم
– صار الليل ول بنتي خليها باجر الصبح واطلعي للبستان
كمت حبيت ابوي براسه وفتت للحجرة
طرت بخيالي وانا اتخايل روحي اشوفه .. بس ما اتخايل نفسي احجي وياه كلش اخجل من الحجي لا لا ما احجي .. فد اشوفه اي هاذ يكفي .. ما رايدة غير شوفتو
ثاني يوم
كعدت الصبح .. مفترهه وانشد والروح طيبة
كضيت الخبز ويا امي .. ورحت اكضي الريوك ويا نسوان ابوي .. كضيت الريوك ودخلت تغوسلت زين .. وطلعت مشطت شعري بس امي جانت ما هي .. ما عرفت اظفره .. لفيته كبة وشديته بوصله ..
جريت كمن صرارة امي وحطيتي كليل
وكرصت خدودي حيل خاطر اصير حلوة .. طلعت مامش احد من اخوتي .. ضجت واختنكت
وانا جنت محضرة روحي اطلع
فجيت باب الكلعة ادحك منها لكيت اخوي وقاص واكف ليغاد
صحتو وكتلو : تاخذني
كال : رايد العب دشي داخل مو هسه
كمت ابجي ..
بالساعة انا ابجي وواكفة بالباب اتوسل بيهم يطلعوني محد يرضى يمشي وياي .
وانا انحش بيهم واتنغص واريد اطلع
ما احس الا راشد واكف ليغاد عني .. يدحج بيه
عد ما شفته ركعت الباب حيل
صاحت سميعة : وكسر اي والله كسر يولي راح راح يكع الباب فكي عنه من يجي مجبل ياخذج
ادحج حيل واحس بكلبي واكف ليما راحت
رديت فكيت الباب على كيف .. دحكني واندار عني بسرعة
بس البسمة بانت بملامحو .. رديت الباب بسرعة بس احس النفس انكطع عني.
اندرت ادحج من زروف الباب
اغشعو وهو يدحج بالباب ينطر طلعتي
عد ما شافني اتأخرت .. مدري حس انا ورى الباب
تكرب ودك الباب : وي وي يكلبي راد يفز من مجانة من الخوف
صحت : ياهو
اندفع الباب انا صحت : وين يخي وين
كضبتو وما حس الا خالد الجدامي ماهو راشد الداش
عكد حاجبه : شعدج ورا الباب ؟ ….

يتبع….

( انه من كيدكن)
لاتضيعين العرف
انه جنسيتي سماري
(كاظم الكاطع)
خالد : شعدج ورا الباب ؟
انخطف كلبي عد ما شفت خالد تلعثم ثمي واندار راسي ما عرفت شرد كمت امتمت .. هديته ورحت للحجرة اركض
هو ضل يناظر خلفي ومستغرب حالي
دخلت الحجرة لشتي كلها تتراجف وكلبي يدك بكوة … مثل الراكضله عمر .. وادرم ويا روحي ( فد لا شك بيا ؟ شافني ؟ لا يمكنه ما شافني .. ما غشعتو وانا اطمش منين جا .. معكولة يكون شك .. لا ما اضن .. عليش سعلني شعدج واكفة .. يربي فد لا كشفني .. دخيلك يا الله )
اطكطك بصابيعي وافتر واوهوس ما بيتي وبين روحي
دخلت زهرة كالت : اذا ما عدج شي تعاي وياي نكش الكلعة صارلج شهر ممدودة اعلى عضة خنزير ما طلعت هاي
كمت وياها خاطر افتك من شكوكي
هو دخل لحجرته بس انا احسه يراگبني
مدري يمكن اتخيل بس ضل كلبي معلك خاف لا صدك يكون مراگبني
طلع من الحجرة دنجت اكش وانا احس اعلى وهلة يكضبني وجتلني .. لجنه تعداني ومشى .. من طلع تطمنت .. يمكنه صدك ما حس على شي .. لا ما حس بس تحسس عد ما شافني ورا الباب تضايك .. انا شعدي قابل كلشي ما مسوية .
اكش وكل شوية اروح لباب الكلعة ادحج ليبرا العجايا تلعب بالحصى .. خلصيت شغلي … جا جابر كال : تمشين ؟
– وين ؟
– ما انت الردتي اطلعين للكاع كضيت شغلي تمشين
– ها
– هو شنهو الها فضيها تمشين لو لا
– ااااا لا لا هدني ما اطلع ما اطلع
– عجل عليش نحشتي ابوي خاطر نطلعج
-خوش خوش راح اطلع
– هي شني تلعبين علي انت
– جابر وش بلاك انا خايفة لا الخنزير يتبعني مثل ذاك اليوم
– عجل ضلي
– لا لا اخذني اخذني اطلع افتره شواي بالبستان وارد ابخت الله
– امشي عجل فضيتي كلبي
لبست وكمت طلعت وياه بالنكاب
ادحج من هين وهين .. ما هو .. مدري ليش ادوره
هو ياهو ؟ وشعدي وياه
زلمة ساعدني وراح بدربه
انا ياهو مالتي ..
دشيت كاع ابوي ..
وانا كلبي مدري شجالو .. احس بضيكة وروحي بهتانة
وعيني ادور يمين وشمال .. ادحج منا وادر ليغاد اطمش
اثنين من اخوتي وياجر جابر ومجبل
يتصارعون ياهو اليغلب ويتمرغلون بالتربان وهذا حالهم
وانا كاعدة ليغاد عنهم اطمش عليهم و ع الكاع والاشجار .. الخريف ما خلى اعلى حال الكاع حال .. والجو بيه نسمة برد
اعلى هالحال جت امي : اشوفكم هين
مجبل : انا غلبته يمه
جابر : باطغاثك .. يولو دحج حالك جثيتك بالتراب جث
يازي : وي يما لا تتكاونون .. انتم خوان
– امبلى يمه بس جابر دثو ماهو بزلمة
– اكرب هين تا نعرف منهو الزلمة بينه
وتكاونوا
صاحت عليهم امي وكامت تفازعلهم وتبعد واحد عن الاخر: لا تجاتلون بعضكم عبن مالكم غير بعضكم الاخو ما يشد ظهره غير باخوه .. المفرد ينطك بلايا اخوه ..
مجبل : نتكشمر يمه ما متكاونين
– وان جان كشمرة المغالب بالمكاون تزرع بينكم الغيرة اعلى ياهو اليغلب .. كل واحد بيكم يدنج ظهره لخوه خاطر يغلبه ويعلمه شلون يتكوى اعلى غريب ما هو اعلى الاخو .. خوش ؟
– خوش يمه
– دامكم جاعدين هين خلنا انتغده هين اليوم .. واحد منكم ينده لابوكم خاطر يتغده ويانا
جابر : انا رايح اخبره يمه
مشى وانا اطمش عليهم حجت امي : ها يشذرة اشوفج ساكتة وكاعدة وانت الجتلتي روحج صالج ايام لا اكل ولا شرب بس خاطر اطلعين ويوم الطلعتي عزلتي روحج .. شبلاج
– ما بيا شي يمه
– اعليه هذا الحجي يشذرة
– فد تعبانة ما بيا
– ومنيش تعبانة
– هيج تعبانة
– كون وحدة منهن سخرتج
– وان جان ما اهتم
– يولي الما تهتمين شنهي خدامة الخلفوهن انت .. نحن مكسمين شغل الكلعة بيناتنا كل وحدة منهن تشيل الها حمل .. يذبن شغلهن وحملهن عليج شنهي اعلى يا مال ؟
– الشغل ما يتعب يمه
– ان جان الشغل ما يتعب عجل منيش تعبانة ؟
– مدري
– يولي سالفتج ماهي خالية
– عليش يمه شعملت
– ضلي هين ويا مجبل خليني اروح اجيب الغدا واجي
– اروح عنج يمه انت حبلى ما تكدرين
– ضلي هين
مشت تجيب الغدا وانا مشيت
تمنيته يمر واشوفه بس جت امي وابويه وتغدينا وهو ما كرب ولا شفته .
بدرب الردة
وانا شايلة اسلال الصحون وفوكها الجراجف وامشي خلف امي
طرى جدامنا وهو كاضب الحصان سلم على ابوي : السلام عليكم
عد ما سمعت السلام فز كلبي كبلي
ضليت ادحج مرة ورة ادنج .. رد السلام ابويه وكالو : سكيتو
– امبلى سكيت الفرس يعمي
– جزاك الله خير
طلع من جيبة فلوس واطاه وكالو : رده وتعال عكب الظهر عدي شغل
– تامر عمي
مشى ابوي وامي ما اندارت .. من تحت النكاب ادحج
باگ شوفه وغشعني باطراف عيونه .. كفيلة هالنظرات تاسر كلبي سنين .. ما جانن نظرات .. خطف كلبي وشوفي واحساسي كله .. احس كلبي راد يطلع من مكانه اعلى كثر ما دك .. توترت وتلعثمت واتعثرت بدربي
صاحت امي : الله الله
تبسم هو ومرني ومشى
كضبتني امي : شبلاها البنية ماهي اعلى عوايدها
كام يدحج بيا ابوي : صايبج شي بنيتي
– لا
حجيت ومشيت ..
حجت امي : خايفة اعلى هالبت لا تهش ولا تنش كلش خايفة اعليها من الدنيا ومصايبها
– ونحن وين رحنا يا يازي .. شحدو اليكربها
– مدري كلبي لاجمني وانا احساس كلبي مصيبة
– اهيييي لا تفاولين البنية
الدرب امي وابوي يتنكارون علي
وانا سكوت الجلمة ما تطلع مني شايلة الغراض وامش خلفم
وصلن البيت
جان الراحة طرت بالي وجان النوم شافت عيني
لثاني يوم .. رادت امي تمشي لكاع موازي خاطر تشوف خوالي كالتلي : كرمي امشي وياي لا تظلين هين كضيت شغلي ومن تضلين يذبن شغلهن عليج .. كومي
انا ما عولت الطلعة
عكب ما جنت ما اهوى طلعت الدار
لبست بساع وطلعت بلكي الله واغشع راشد بالدرب
بس ما شفتو !
وصلنا غاد .. امي تحاجي بمرجانة : يولي شناطرة ؟ برتي وكبرتي وبيضتج جفت يولي عرسي وارضي بگسمتج شتعملين
– وارضى بعمران ييازي عليش وشناكصني
– الناكصج زغر يولي ياهو الياخذ بنت بعمرج ؟ الزلم تدور الزغار … شذرة وحلها البكبرج ما يرغبها غير الباير
– خلف الله عليج ييازي
– انا اختج ما اعايرج بس هذا طبايعنا وهذه عادات ديرتنا ماهو بدينا .. ان جان بيدي اطيج لاحسن واحد بكاع السهل لجنج يمرجانة كبرتي وخالد ماهو نصيبج
– ان جان هو امتنع ما يعرس انا اهده واعرس
– يولي زلمة هو نا ينخاف عليه وخير ابوه جثير ما يطيح بركبة احد انت لو ماتت امي بيا ركبة تصيرين يولي عظم ابنادم ثكيل حت اعلى بزره لا تظنين احد يحملج
– وين ما تريد تصل خلها .. مانا ساعيتلها لجن عمران ما ارغبه ولا كلبي يوده
كاعدة واستمع لامي وخالتي يحجن
جدتي ردت امي : تتعبين تكع وذرة من السانج وهالراس اليابس ما يكنع
– اعلى روحها نحن ما خاش بجيوبنا شي لجن من خوفنا اعليها .. لو غمضت عينج تنهش لحمها الجلاب
-وانا شكاهرني غير هالامر يبنتي .. امشي اعلى بيت عمج هم يودونج ويحترمونج احجي ويا ابن عمج .. بلكت الله ويرد عن نهوته
خذتني امي ورحنا لبيت عمها
كعدت تحجي ويا عمها .. وانا كاعدة بسدها
حاولت رادت عمها يكللها : المن رايدتها خاطر تريدن ابني .. بنت وبايرة وابن عمها اولى بيها من الغريب
وامي ترادده وتحجي
هناك ودخل عمران ابن عم امي
انا شايلة النكاب وطالع بس قرص وجهي
وذهبي اللي لابسته واصل لحد نص بطني .. وسوارات الذهب
هي امي هيج من نطلع طلعة لناس تجبرني البس ذهبي كله .
دحكتو دخل
امي كامت انا كمت وراها .. صدت عيونه بذهبي
كاللها : بنتج اليبوكها يعيش ملك
ضحكت امي وكالتله : والبايك وين يفر من غيض ابوها يحفر الكاع بابره ويطلع البايكها ويشج عينه
ضحكوا وكعد ..
امي تحجي وياه وتكله : نسوانك عدك وخير من الله تنهي اعلى بنية شنهي حب الله يخي وهد البنية بحالها ، البنت ما ترضى تنزل اعلى شريجة
امي تحجي وانا احس عينه تلصلص
كل شواي يدحج بيه .. تضايكت نظراتو تخنك
وامي مستمرة تحجي وهو يكللها : يصير خير يصير خير
ردته امي وهي تكوم : يعني نكول صافية كلوبنا
– اذا ناسبناكم تتصافى كلوبنا
يازي : تناسبنا شنهي شطيك
– بس ما نريد بنات العم خلنا نناسب ال عكاب مثل ما ماخذين من عدنا بنت خلهم يطونا ويصير بيناتنا دم كرابة
فهمت الامر امي وكالتله : اشوف خشان ان جانت عدهم مرة بالديرة بلا عرس ما يعزها عليك ان شاءالله
– عليش يدور الديرة وبته كباله
– خشان ما يطي شذرة لعزيز كلبه تنوب للغريب .. تهيهييي آيس
– البيه خير الله يطرحه
كامت امي وطلعنا منهم وهي تتفل خلفها : جذر اعوج ما يعدل يا حيف الدنيا التجيب جدمي وتحطه ابابكم
انا ما حجيت بس امشي خلفها
طلعنا من بين بيوت ال موازي ما جنت متصورة الربل ناطرنا
ليما تكلي امي ( اركبي)
ادحج راشد الي كاعد جدام الفرس !
اثوليت ضيعت جدمي من راسي كمت اتجلب بالربل واصعد ما عرف شسوي .. رزلتني امي : اصعدي لشو اصعدي يولي ما دبرتيلج امر صعدت ربل تتعثرين بيها .. يمتى يصير براسج خير ما ادري
اضطكيت وامي ترزلني جدامه اختنكت
كعدنا وكالتله : على بيت الكلعة
ضرب الحصان وساك الربل
اندارتلي امي : ضل يطمش بيج ؟
ما رديت ، رزلت : عد ما شفتي عينه نكسه ويدحج اختشي وانزل نكابي اعلى وجهي
– يمه بيتم حار والعباية ثكيلة ونحن كاعدين اختنك
– عجل زين من يدحك بيج ويتخطبج .. عمران النكس يدور بتي .. اخيتي وزايد عمرها وما بالحيف اطي يريد بتي الاعثر
امي تحجي وهو يسوك بالربل
جابت الدرب كله مدري تغلط علي مدري على ابن عمها وعمها
وانا عيني تغرغر بدموعي عبن ترزلني جدامه.
ليما وصلنا ..
نزلت هي بلا ما تلتفت كضبت باب الكلعة تفتح بيه
همس هو : رايد اشوفج
نزلت بساع ما حجيت
اندار بطرف عينه يدحج
وانا اغشع وادير عيني .. ليما فكت الباب وفاتت
مشيت ادخل وراها .. اندرت ادحك بيه
همس : بالبستان بالليل
دخلت بسرعة اركض
كضبت حجرتي وصكيتها
ليما جا الليل وانا الكعدة ما شفتها افتر وادور وافكر اشنو بالبستان بالليل البستان ماهو زغير .. ولا اعرف بيا مكان ولا اكدر اطلع ولا طلعتي على كيفي .
ندهولي على عشا
طلعت كعدت بس ما اشتهيت الزاد فكري كلو بيه
اطلع بعد ما ينامون لا ما عاملتها كبل ولا راح اعملها
التطلع بالليل معيوبه وما اريد اعيب شيبات ابوي ..
ضل فكري ياهذني ويردني
لينا نزل نص الليل عزمت امري وكلت ما اطلع
عيب عد ما كالي اريد اشوفج وواعدتي امشيلو راكضة
شيكول عني بنت خشان خفيفة وماهي اصيلة .
وما رحت
لثاني يوم مضيت شغل البيت عن خالتي سميعة وامي ما هي
خاطر تطلعني للبستان .. كضينا وطلعنا للبستان .. حشينا الثمر الضال ونظفنا شواي بالبسات وكصينا الشجيرات ..
من ابعيد شفت راشد
كضبت كلبي .. لازمة المنجل احش وادحج عليه
وهو كاضب بكصب مال سكر وخنجر ويكشر بيه
شادة العباة على خصري والشيل لافة راسي وطالعات كذلتي وجايبة طرف من الشيل لافته على وجهي بس كصتي وعيوني وكذلتي طالعات واشتغل .. وابوك بشوفي وادحجله.
كعد ليغاد وانا اشتغل .. اندرت خالتي سميعة ما هي
ما ادري وين هي.. كمت ادورها ما هي .. رديت لشغلي اكمله .. وهو كاعد اعلى حطتو .. تبسملي
تبسمتلا
تنهد واصاح : ااااااه ااااااه الدرب ما بين وبين كلش طويل
انا مثل العاشك نجمة ويحلم يصلها .. الله يعين بس
انا اشتغل واسمعو ضليت اتبسم على السكيت ما رديتو وهو يحجي من مسافة ماهي كصيرة بيتي وبينه
كام ينشد
يردلي يردلي سمرة قتلتيني
يردلي يردلي سمرة قتلتيني
خافي من رب السما وحدي لا تخليني
هديت من ايدي وهو ينشد يا حلاة حسو وكفت ادحج بيه
شكلو سمارو هيبتو كلو حلو .. وصوته بعد احلى وهو يغني
شاد الغترة على راسو وشعر نازل لحد لحد اجتافو.
بعد ما كشر ثلثت ارباع العصى
كضبها وكطها صوبي .. وكام لحيلا
خذتو خطواتو باتجاهي اندرت منو وكضبت المنجل
ما احس الا وهو يغير مساره ويروح بعيد
استغربت
اندرت وراي شفت سميعة واكفة متبسمة كال : ها يولي شعدج
وتقمزلي
– ما عندي شي
– عليه وانا سميعة يولي
– ما شي يعني عد اشتغل
– امبلى بس ما عدتشتغلين بالكاع .. دا تشتغلين اعلى فاد غيرج
– معدفتهم
– انا بحسبة امج لا تخافين مني
– لا والله بس
– لا تحلفين بس .. راشد واضح يحبج ويريدج
– لا هو … سكتتني
– يولي شفايتلج اعلى راشد شاب طول عرض مهيوب ووجهو ودك بس تطمش بيه ما حكج تعشكي .. راشد خوش راشد خوش طايحتلج بواحد يولي
– لا ما هشكل
– لا تستحين مني انا افهم احساس المترايدين .. عبن انا
وسكتت
– انت شبيج
– كبل ابوج جان رايدني زلمة .. بس الحجي هاذ ما اريده يطلع لاي واحد سر بيناتنا وانا مثل امج
– لا وبخت الله ما احجي
– انا احجيلج اسراري خاطر تأمنين مثل ما انا امنت بيج واعتبرج بنيتي من كون الله ما اطاني بنية احجيلها اشكيلها .. انت بنيتي ان شالله .. جان زلمة جاتل روحه عليه لجن ابوج عد ما خطبني من ابوي غصبني وزفني لابوج بلا راي .. شكثر بجيت شكثر نحبت ما فاد
– وهسه الزلمة وينه
– مات مدري شلون مات بنرض مجتول عد ما خذت ابوج وفيت بس سمعت من الطروش هو مات
– حزنتي
– اي حزنت بس شفايدة الحزن وانا معرسة وعدي ولد
رضيت بكسمتي وكنعت بحالي وارتضيت بابني يكفي عدي الدنيا .. لهذا يا بنتي افهم شعور المترايدين
– بس ابوي ما راح يرضى ينطيني لابن خيري
– وياهو الكال ما يرضى ؟ ابوج زلمة اصيل لاهو متكبر اعلى بن ادم ولا شايف روحه اعلى احد بس اضن امج التعارض
– اي
– بس نصيحة يبتي لا تستسلمين مثل ما انا استسلمت لا ترضين بغير ولفج
– ولفي !
– الحبيب واليحبه كلبج يتسمى ولف
– انا ما اكدر حتى احجي ويا
– خليها علي انا اخليج تحاجي
– شلون
– هو طلب يشوفج ؟
– اي راد بالبستان بالليل بس ما طلعت ماهي زينة اجيب لعيب لابوي ما ارضى
– يولي العشك هذا ما بيه عيب
– بس لو دروا الناس ابوي ينعاب
-وعليش تخلين الناس اشوف
– شلون
– اهو مو طالبج بالبستان بالليل
– امبلى
– انا اخذج
– شلون
– كولي رايحة ويا خالتي سميعة نملي ماي ونمش للبستان انا اترس واتنطرج وانت امشي يمه .. اكعدي وتسامري شواي وردي
– واذا احد شافنا
– يولي عباتج ونكابج وظلام الليل ياهو اليشوف وياهو اليدحج دربه ؟
– ما ادري اخاف اخاف لا امي تدري ما ترضى
– اليخاف ما يعشك العشك ينرادله كلوب كوية ماهي رچيچة .. وانت باينة ما منج خير خلنا نرد
ردينا سويا
وانا افكر بكلامها احاول اقتنع بس اخاف من امي اذا سمعت انا تابعة سميعة تكسم راسي .. لليل ندهت ( شذرة كومي وياي نترس ماي ما بياش حيل اشيل ظهري يوجعني )
ردت اطلع ارد وامشي وياها
بس ما اجتريت اطلع خفت من امي وضليت بحجرتي كن ما سمعت
ثاني يوم امي جانت باللبيت ما تكربت مني
الا عد ما نامت امي وخشت كامت تلوم بيه ( يولي شفتو المسكين يلوب بالليل وهو ينطر وماخذ العجد روحة جية يتناطر جيتج يعروس
– بس اخاف
– انا وياج لا تخافين
– ما ادري
لليل رادتني اطلع ..
بس امي كالتلها ( شنهي بنتي شيالة حملج، ذاك ابنج غاد وصيحي يعاونج ويترس وياج ) ومنعتني اطلع وياها وانا من كاعي الخوف كاضبني من امي
لثاني يوم
عد ما مر يومين وانا كلبي يلهب عد كل فتحت باب ودي ادحكو ولو لحظة شوف ما رايدة اكثر .. جانت امي طالعة تواجب
جتني سميعة كالت ( اكضي شغلي وخليني احضر المنجل والسلال خاطر نطلع للكاع بساعج يلا )
– بس خاف
– يولي بس تشوفي لا تكربين ما مشتاكتله .. على كلبج العمى يولي الزلمة محترك امس عوزه بس يبجي يكول الليل ما انامه افكر بيها
– صدك
– صدكي وثقي يبجي دموم يولي عاشكج المهيوب يسميرة
تبسمت : عجل خوش اروح بس اشوفه من ابعيد
– اي من ابعيد لا تكربين عبن نهار واخاف عليج احد يشوفج انت مثل بنتي .. ياله اكضي الشغل اعلى ما اروح واردلج .
مشت شذرة وهي تكضي كل شغل سميعة حتى تروح وياها للبستان وتشوف راشد من بعيد
زهرة : وين تردين بالبنت
– ادحكي بنت يازي عاشكة ومحد مسمي عليها يولي ، وي عاملة نفسها شيخة الديرة وبنتها تتمعشك بلا حيا ولا مستحى
– عجل عليش مساندة البنية
– بخت ابني الهساه ما راضي يعرس من كونها حطت اختها براسه .. الشيب راح يغزيه وهو مو راضي يعرس الا ياخذ اخت البخت شيخة الديرة ست الديار مرجانة خانم
-يولي بنت خشان هذه ماهي بنت يازي بس وعيبها اعلى خشان
– ويطيح العيب عجل زين من مشيخها فوكنا ونحن مثل الجواري عدنا ساعة وكتنا نكرب بهالبيت وهي تطتطك شغلها وتحط عباتها وتهفي بالديرة لا تخلي مريض جايبة طايحة ارملة من ديرة ال عكاب والدير الداير مدايرنا لا ما واجبت ووصلت ونحن شحدنا التصل وتطلع بيت اهلها بلا علم خشان .. الا يحز نحرنا
خلاه يشوف شيخة الديرة المتيهة بنتها وما تدري عن هوى دارها بنتها شمفينا بكفاها
– ولو وجدلج اثر بهالسالفة
– اتبرى انا ياهو ماتي بيها وابتها
– مدري يولي لا تبلين روحج ويا يازي تحطج ابالها وادربج اعلى بيت اهلج
– يدرب بخته اليدربني يولي ابني اهو راعي الكلعة اهي منهي وتدربني من كلعة ابني ، وبعدين لزوم تصفين وياي خاطر نخلي خشان تكش روحه منها ويدحجلنا .. شنهي ظلتنا هاي وهو فاج ثمه على يازي
– بيش اعاونج
– راشد طالبها بالليل يشوفها
– اي ؟
– انا اخذ البنت وانت ودي خالد وراي كليله الحك امك شيل عنها السطل الماي
وانا هين اتصرف
– يا عزى وصخام براسج شرايدة
– يولي يكضب اختو ويا راشد ويبرد كلوبنا بيازي عد ما يذبون اللوم بيها ويطردها من الكلعة اعلى تيهت بتها
– ولو ذبوها براسج
– اتبرى واكول ما طلعت وياي ما ادري
– مدري شو جني خايفة
– يولي ان جان ضلينه خيفانات نكضي العمر كله ندحج ونلهم كهر .. العمر يمضى وانا وانت اعلى حالنا وهي الكل بالكل .. خلها تنكلع ذاك الحين تصبح الكلعة النا ولهلنا
عزمن اعلى فضيحة شذرة وطردة يازي
وكعدن يحوكن لشذرة مستغلات قلة وعيها وفطاريتها
كضت الشغل شذرة
وراحت تعدل بروحها وتكشخ وتلبس وتتعطر خاطر تطلع للكاع تتأمل شوفة راشد
وطلعت ويا مرت ابوه وذيج تكنع بيها
الزلمة مهيوب .. الولد عاشكج .. ميت عليج
جابت الدرب كله تحش براسها وتملي اوهام .. وشذرة مصدكتها وتايهة بغير عالم
ابالها تعيش قصة عشك ويا راشد
مثل الكصص التسمعها عن عنتر وعبلة وسوالف المترايدين
كضبت المنجل وكامت تشتغل وسميعة كالتلها : ضلي هين انا اندهو الج واجي
ضلت بمكانها تشتغل
وسميعة ودت واحد من الجهال على راشد وكالتلو ( كل الراشد شذرة ناطرتك يم شجرة الرمان )
راح العجي يركض حفيان وينده ( راشد راشد )
تلكاه راشد … ( ها يولو )
همسلو ( شذرة ناطرتك عد شجرة الرمان )
عند ما سمع راشد اكضب الدرب واركض
دش كاع ال خشان وصار يمشي اعلى كيف بخته
ليما كرب شاف شذرة وسميعة جاي يشتغلن .. وكف ليغاد عنهن
سميعة عد ما لمحتو ندست شذرة ( دحكي يولي منو جا )
اندارت وراها شافت راشد ..
حطت ايدها على صدرها ( امي لو حست تكسم راسي)
– امي ماهي موجودة ما ترد الى عكب الضحى انا راح اكفلج ليغاد وانت لا تكوبين حيل واعدي بالليل تتشاوفون عبن النهار عيون الناس تلاحك الوادم
– خوش
مشت عني خالتي سميعة وانا ادحج ورا
هو يتنطر تبتعد خاطر يكرب .. اتسحبت شوي شوي بينا مشت عن عيونا .. اكرب هو عني مسافة ، حجه : ياااااه يولي شوفة عيونج عافية
– خالتي كالتلي انت عشكان
– الا ميت عشك يولو ليلي ما جاي انام اخلصو اجر عتابك بذكر عيونج
– لا تكرب جثير .. عيون الوادم ما تنحزر
– لا لا انا ما رايد اكرب بس رايد اشوفج
حالي كلش اتعبني ما جاي اضوك طعم النوم بالليل
– وانا نفس الحال
– وشلون نظل اعلى هالحال ؟
– بالنهار ما اكدر
– عجل عليش وديتي علي
– انا وديت
– مرني عجي كلي شذرة طالبتك اعلى عمى عيوني اجيت جفي ما دريت الجدامي والبكفاي .. طاير عكلي اشوفج وادحك عيونج
– بس انا ما وديت عليك
– عجل ياهو الدرب الجاهل
– يمكنها خالتي سميعة
– خالتج تدري
– انت ما حاجياها
– ما حاجي لاحد يولي . اذا احد درى بامرنا ينكطع راسي وراس ابوي .. مستحيل اخبر احد
– لا تخاف من خالتي سميعة هي راح تسعى بسالفتنا
– يبخت السالفة التجمعني بيج يولي ..
تبسمت
اندار يدحك هين وهين ورد يحاجيني : شذرة
-هممم
– دحكي بعيني وكليلي
– ايش
– عاشكتك
تبسمت ، لجن ما حجيت
هديته ومشيت عن البستان
اندرت ما هو ! ضليت ادحك منا منا ما هو
ثاريه رايح لسطبل ابوي ماخذ الحصان وراكبه وسايكة
مر بحصانه وهو ينشد ( يردلي يردلي سمرة قتلتيني )
ساك بالفرس وصهل وابعد عني
ما. جان لاف غترتو .. شامرها على اكتافو وشعره ماي وجاي
يسوك بالحصان وشعري يطاير وياه .. يا هيبتو ويا سماره ويا حلاته السالبة عكلي .
رديت وانا مثل السكرانة
احس بغير عالم جنه العالم تلون بجثير الوان .. والدنيا زاد حلاها وكلبي ما يدك يركص
لليل وانا هايمة
جان ابالي اطلع ويا مرت ابوي نترس وادحكو
بس كعدت الظهر سميعة رايحة لاهلها
تضايكت حيل
اتنطرها مثل نطرة العجل لامو .. خاطر تجي ونطلع
لا اكدر اطلع وحدي ولا اكدر اشوفو
كام يوديلي اخوه الزغير يلعب ويا اخوتي الزغار ..
خاطر يخبرني يريد يشوفني .. بس ما بيدي ما اكدر اطلع
اسبوع وخالتي سميعة ما هي رادة
وعد ما ردت جانت ردتها العصر كعدت وشربت الجاي هي واني وزهرة وسولفن وضحكن .. ليما رادت تكوم تعمل العشا اجتني ( ها يولي شسويتي ما سويتي )
وتقمزلي )
– ما سويت شي ما اكدر اطلع ناطرتج
– العمى صاب كلبي اثنين مترايدين جاتلهم الشوك وناطرين جيتي .. وديله خبر اليوم يشوفج
– يمتى اليوم بالليل
– بالليل اخاف ما يصير
– يولي حلاة العشك ليلية
وندستلي وغمزتلي وهي تحجي : دمشي يولي امشي
تبسمت ورحت كضبت اخوه وخبرتو يبلغ راشد نتشاوف بالليل بالبستان عد مجرى الماي
شوي وردلي اخوه يكلي ( راشد يكول ناطرج اعلى نار )
جلمتو هاي سلبت عكلي
تاه فكري ونسيت حالي وشده بالي
مدري شعمل بروحي .. عايشة بشعور مطيرني فوك الغيم
وصتني خالتي اكضي الشغل عنها هاطر نطلع بساع
كضيتوا كلو بساع هاطر نتعشى والكل يعود ونطلع نترس ماي ونشوفو
وصدك كضينا وشلت سطلة الماي عنها
كالتلي اطلعي جدامي انا البس عباتي واحي وراح
لبست عباتها وخذت السطل شذرة وطلعت
سميعة جرت عباتها وصاحت : خاااااالد الحكني سما تشيل الماي عني
– روحي يمه جايج
– لا تبطي ابني مالي حيل اشيل
– لاحكج لاحكج
طلعت وهي تعفي بعباتها وشذرة شايلة السطل وطالعة ليغاد
كالتلها : يلا امشينا
مشن جريب من البستان حطن الماي عد مجرى الماي خاطر يترسن .. شذرة شافت رلشد تابعم ويمشي خلفهم
طار ملبها عد نا شافتو ..
حجتلها سميعة : دزوي يولي وانا ناطرتج هين على ما يملى السطل .. روخي تسامروا شواي وردي
– بس اخاف احد يشوفنا
– يولي نا عدنغشع دربنا ياهو اليشوف امشي يولي يمعثورة
– بس
– بلا بس امشييي الولد ناطرج
دفعتها .. نزلت شذرة للبستان
وراشد تبعها وسميعة ادحك عليهم
جا وراها خالد ها يمة .. ترستي الماي
– ترستو يولدي بس اختك ما هي
– اختي ؟ ياهي اختي
– ياهي بعد .. شذرة جت وياي دنجت اترس شلت راسي ما هي
فدوة ابني انا راسي ذبحني يما .. دور اختك شوفها خاف نزلت للبستان تلكط ثمر جيبها وجيب الماي وردو انا سابكتك للكلعة
– اعلى امرج يمه ….

يتبع….

(كصة بكصة)
وانه بلياك حالي يخاف من حالي
(كاظم الكاطع)
شذرة: حدرت عن خالتي سميعة للبستان
اتمشى بحيا وادير يعيوني ليها وهي تهمسلي ( امشي يولي )
دخلت البستان وانا كلبي يخفگ خوف لا احد يغشعنا
توني عد اصل للشجرة
دحكت راشد جا من ابعيد .. حالي تخربط
لا عرفت الوكفة ولا عرفت الجلمة ضيعت الصوبين
هو اكرب انا خفت وردت امشي .. كضبني : وين عني اكفي احاجيج
– انا خايفة احد يشوفنا
– محد راح يشوفنا
– لا امي لا درت تكسم راسي
– ما راح تدري .. شذرة بداعة الله اكفي .. بداعتي
وكفت بس جسمي كلو يرتعش من الخوف
كال : وشلون نضل هيج
– انا ما اكدر روح فدوة
– بس اوعديني تردين
– امري ماهو بيدي خاطر اطيك وعد
– انا ولهان لشوفتج يولي من الحين للحين اشوفج اواسي ايامي بهالشوفة التطبع بذاكرتي
سكتت ، حجه : رايد نحجي اعرفج تعرفين رايدج شذرة
– بس انا ما اكدر اطلع وتعرف بديرتنا وطبايعها عيبة المرة لا وكفت ويا زلمة
– انا ادري بس الكلب وما يهوى شبيدي
جاي يحجي صاح صوت وهو يكرب : شذرة
اتصركعت ما عرفت منين اشرد
كمت ادفع بيه واكلو : امشي اركض
دفعتوا ورحت اركض باتجاه الصوت طلع خالد جدامي انطكيت بيه كضبني ( وين جنتي يولي ) حجاها واندار شاف واحد يركض من ابعيد .. هدني وراح يركض وراه
انا شفتو ركض خلفه وانا الله صب على ماي الدنيا فوكي
العرك كام ينضح باخر ايام الخريف والبرد يصل ليلية .. احترت بكاعي اشرد للكلعة لو انطره ..
ولو شردت وتبعتي لاهلي شكللهم ؟
ولو كضبني بهالهيمة يدفني .. شعمل بحالي هساه
فان حظي شعملت بحالي .. وي يما يمكنو يذبحني
كمت ابجي وادور بمخي اعلى جلمة ادفع بيها عن روحي
خفت اشرد ما برحت مكاني ضليت واكفة افرك ايد بأيد من الحيرة والخوفة ذابحة كلبي
ردلي خالد والشرار يتطافر من عيونه
كضبني من راسي يجر بيه : ياهو هاذ الجنتي ويااااه ولج
– ما جنت ويا احد هدني ابخت الله خوية حب الله خالد
– ول اليوم ادفنج اليوم يولي تتواعدين بنصاص اليالي شذرررررة محد منهن سوتهن كبل بس انت بس اذا امج يازي وبزرتكم نكسة المن اتطلعيييييين
جاب الدرب يجر براسي ويشتمني
ليما وصل الكلعة اعلى حس بجاي فزع ابوي وطلع يركض
لكاه كاضب راسي ويجر بيه وهو نهره وكالو ( لعن الله خيرك يول اتجر براس اختك هدددد )
– بتك مواعدة بهالليل يابه ، هادة امي وشاردة منها
اجت امي تركض اعلى حسهم وتصرخ : وي وي وي شجرى يولو
وابوي يصرخ عليه : يول تتهم اختك اعلى مسامع الناس
دفعني على امي وجر غترتو من راسو وكضبو يضرب بيه
فزعت سميعة تصيح : يبووووووه تنحاروا الاب وابنو يماااا وين اليفزع النا وي يهالناس الحكولنا
كضب خالد ودفعوا على امه ويكلو : العن الله خيركم شهرتونا يولو رايدين فضيحتي صكع الله روسكم دخلووووا
فزع خالد يكلو : تدافع عنها بدل ما تكضبها تتنحرها بتك مراعدة طالعة اتفرفر ليلية
صرخت امي : لعن الله ثمك يا ولد تتهم اختك زور شذرة ما يطلع منها الفعل هاذ امك سسممت سمعك وطيحت بينك وبين اختك
سميعة : انا السمنت سمعه لو بنتج اللي تك**** بالليل وانت لاهية عنها
كبل لا تخلص حجيها
ابوي جابها بجف وهو يكللها : ياهي هاي التكو*** يول العن ابو اصلج لابو الجابج علي بنت الكلب فشارج اعلى بنتي يولووو
تكاونوا هو وخالد وامه
وامي سكتت عد ما شافت ابوي اتصدالهم
جرتني للحجرة وصكت الباب وكضبتلي لخيزرانة وحصرتني بزاوية الحجرة : شمطلعج بهالليل يولو
– خالتي سميعة الكالتلي تعاي وياي والله هي الكالتلي
– وانت شتكلك طركاعتج سميعة تمشين عمياوي يولي .. كالتلج زتي روحج بنهر اتزتيها ول يصكعة الله ؟
– يمه ابخت الله انا … انا
– انت شنهوووووو
وطكتني … صرخت : يولي اليوم اطلع ضيم الدنيا بيج
انا ما كايلتلج نسوان ابوج لا تكربيلهن ولا تسمعيلهن
انا كايلة لو ما كايلة
الورطتج هاي لو ما ورطتج
فوك ما عافتج وحشمت ابنها عليج جاية اشهر بيج خاطر اتبورين اعلى كلبي يولي .. انا كايلة ما طاوعيهن لو ما كايلة احجييييي
وطكتني بالخيزرانة
– والله يمة كايلة بسج ابخت الله
– ومن كايلة عليييش ما تسمعيييين
وطكتني
-اسمع يمه اسمع والله بعد اسمع … يمماااااا
ذبت الخيزران من ايدها وجاتلي كضبت راسي طكته بالحايط وجرت ايدي عضتها حيييييل صرخت وكمت ابجي زتتها من ايدها وكالتلي ( هالجتلة الزينة كرصة اذن الج يولي خاطر باجر عكبة من تريدين تخطين جدمج ويا احد تتذكريني وما تعملين شي الا بعلمي وتحطيني اعلى بالج ما تمشين بشور احد )
خنكتني بشيلتي وهي تكلي ( فهمتي لو اعيدلج الدررررررس يشذرة )
كمت كوة احجي واجر بيدها ( فهمت يمممممممه )
زتتني من ايدها .. رايدة تندار طب ابوي
لكاها توها فاكة مني
حجه : اكربي كعدي هين ول بنتي
اناشغ وامسح بوجهي
واندار راسي ما اندل دربي من الطك الكليته من امي
حجتله امي : ما حاج تنشدها يخشان سميعة هي الكايلتلها تعاي وياي وعد ما رايحة وياها موصيتها اعلى حاجة من البستان .. شوصتج احجي ….
تصيح علي واتكمل من يمها … عد ما حدرت هالكديشة البستان ندهت لابنها وكايلتله اختك ما هي دورها
– بس خالد يكول شايف زلمة بالبستان عد ما جانت شذرة واكفة
– شافها وياها لو شافه بالبستان
– لا ما شافو
– تتهم بتي بواحد وانتم ما كاضبينها بجرم شنهو مجرمين انتو وحدة ادربلها الدرب والاخر يتهما بتهيمة شرف خافوا الله البنت عرضكم وسمعتكم .. انزاح الحيا كلش من سميعة وابنها .. صاروا تهايهم ما بس تطولني لا اوتعداني اعلى بزري .. هاي وبعدهم ازغار الله اكبر لو كبروا شلون شيخلص بزري من اثم نسوانك .
حجتها وهدت الحجرة وصفكت الباب خلفها
تنهد ابوي ودحج على كاعدة بالزوية مهدلة ربطتي وشعري طايح ودموعي هماله .. حجه ( لا تطلعين بعد بالليل لو ياهو الجان يكلج طلعي لا اطلعين )
عافني وكام
كمت ابجي لوحيدي بخنيك
واحجي ويا روحي معقولة خالتي كل هالوكت جانت رايدة توكعني خاطر تعيب امي ؟ حملتني شغلها كل هالايام كاعدة وانا اشتغل بلا علم امي خاطر تاخذني .. انا شكثر هبلة وما اعرف دربي
كمت ابجي عكب ما حسيت بروحي غبية
لو ما سامعة حس خالد صايح من ابعيد ومبعده عن راشد .. جان غشعنا سوية ساعتها انا وامي النكع بيها
ضليت بالحجرة مجابلة الفانوس وكاعدة
ابجي وحالتي ماعي زينة ليما جيم الليل وكرب طلعت الفجر الا نمت
الصبح .. ندهوا كعدوا اخوتي ما كعدت .. دش ابوي وهم يندهون .. دنج حط ايده على كصتي .. صاح ( يازي .. يا يازي البنت هاذي محرحرة عينج لا تفارجها )
دخلت امي وهي تكلو ( عيارة بنات لا تحطها ابالك انا هسة اندهه تفك ريجها تصير زينة )
طلع ابوي وهدني وهي جرتني بالزور كعدتني
كمت ابجي كالتلي ( ابجي ابجي كومي اعلى السفرة وابجي ليما يخوى راسج درس خاطر ما تمشين ويا الذيابه يوصلونج للشط وما يرجعونج يولي يزتونج وانت شاة بر لا فكر ولا كلب تمشين بالدنيا عمياوي )
كمت وياها فد ابجي
من كعدت على السفرة ابجي ابوي صرخ كاللها : انت ما تخافين ربج البنت مصخنة تغصبينها على الكعدة من صباح الله عليش )
– البنت التاخذ راسها نوم الوسادة ما يعود بيها خير الدنيا تريدلها اليصحالها ما ليحط راسو وينام .. الما يلحك نهاره تدفنه وهو حي .
شربت من بيالة الشاي رشفة وما عدت اكدر
اندرت وانزويت ليغادي حطيت راسي ونمت رادت تندهني ابوي كاللها : فجي عنها لا واسم الله اشيل هالسفرة واهججكم يولو ناوين تجتلونها لهالبنت فكوا عنها
عاد محد كربني وخلوني بمكاني حتى الحصير ما شالوا من وسط الكلعة .. امي من شايفة بالجو كرصة برد ندهت لمجبل اسمعها اصيح : يول مجبببببل ادخل هينا يما جيب لاختك غطوة البرد كلاها هالبلية عسنه المرض بكلب الرادلها الاذية بعزيز كلبه وابزره كون ياذي مثل ما راد ياذيني بيها .. وي ابني بالعجل وينك
– اي يمه جبتو
غطاني وضلت تخلص شغلها وعينها تفتر حرالي وسممت نسوان ابوي بحجيها كل بسمار تحطو بالعظم وهن ما يعرفن يردن بس تحس جو البيت منتول
للضحى اندكت باب الكلعة
طلعت زهرة تفك الباب .. ما احس الا حس ام راشد ع الباب
بسرعة فزيت من مكاني .. لكيت امي جدامي ( اشوفج رد حيلج وكمتي تراكضين شجرالج )
– جا خطار
– ويا خطار هذا الخلاج تصحين وتراكضين جنج احصان ابوج
عفتها وكمت اركاض لحجرتي
دخلت ام راشد واستكبلنها بالباحة مالت الكلعة
عد ما راحت .. زهرة تضحك وامي مغندبة ، كربت منها : شني يمه
– اريدج كربي هينا
جرتني للحجرة وكالتلي : سوالف العيارة ما تمر اعلى ذهني وانا يازي ويلي .. حالج ماهو متطمنتله .. شوراج
– يما ما وراي شي
– وشعجب عكب الهوشة الصارت امس ام راشد اجت من الصبح وجنها مثل المستحي ويتعذر ورايدة تخطبج لراشد
انا من جابت اسم راشد ضيعت علومي كتلها : تخطبني له
– اي شرايج توافكين لا
– اي .. اي يعني الكم راي انا ما ادري غير انتم اهلي
– وشبلاج توهكتي هيج ؟
– لا ما بلاني شي فد يعني ما ادري انا بعدني زغيرة ما مال زواج ما اريد
– رايدتو لو لا
– كيفج يما انا ….
كضبت ايدي : انت مفينة من خلفي يولي شعدج ويا ابن خيري
– ما عدي شي يمه
– يولي الحجي علي وانا امج افهمج من نظرة ييازي كفكة كلبج اي سمعتها اخفيها اعلى غيري ما عليه
– يمة
– شنهو اليمة ول يشذرة اذا عدج شي حاجيني امج انا ما اضرج
– لا انا … سكتت
– عدج شي ويا راشد
– لا بس شفتو جم مرة وبس
– رايدته لو ما رايدته
– لا انا التشوفينو يمه انا يعني ما اكول انت شتكولين
– انا اكول اردهم ومالنا بخيرهم
– عليش
– عبن انا امج وافهم منج وامور جثيرة انت ما توعيلها انا واعيتلها
– بس يمه
– البس هاي يشذرة وراها شير سوالف مترايدة وياه يولي
سكتت : من يمتى حجيج هاذ
– ما ادري
– هدي عنج هالسوالف راشد ما يناسبج
تاني يجيلج نصيب احسن منه
– ولو ما جا
– جاتلة روحج اعلى العرس يولي اختشي جان استحيتي تحجين هالحجاية جدامي وانا الاكرل عنج افكيرة طلعتي مانج هينة يولي
هدتني ومشت
بس من رفضت امي .. كلش انقهرت
يعني راشد صادك بحبه وياي عد ما حسب انا طحت بضيج امه الصبح جت تخطبني من اهلي خاطر لا احد يضرني .. بس شلون بحالي وامي رافضتو ما تريده ؟
سكتت بس جانت غصة بكلبي اتمنى اطلعها
اتمنيت امي تفهمني اتمنيت تصاحبني وتمشيني اعلى مايي
تمنيت تحويني وتراعي امري مثل ما مراعية وضع اختها وتتنطر رضا ابوي خاطر يخطبها لخالد.
مرت ايام
حبست روحي بحجرتي اطلع اكضي شغل امي البالبيت
وامي تطلع للبستان .. للديرة تواجب تشتغل .. بس ما تضل بالبيت .. وانا كل ما جالي مثل الزهرة الكطعو عنها الماي يوم ورى يوم تذبل.
انحبست بالبيت
لا امي ترضى اتطلعني ولا ابوي يرضى اطلع ويا واحد من اخوتي .. مر الشهرين وانا هاذ حالي
الا ما ليلة شتوية الثلج بيها غطى الديرة
والبرد كضى على كل المحاصيل .. والشجر ما عاد يثمر
والناس تبتلي كل شتوية بهالحال بس الحالو غني يشلم من برد العجوز
طلكت امي وطك عدها مي الراس
فزع ابوي وهو ينده خالد خاطر يصيح لخيري يجي يشل امي بالربل يزتوها للداية تولدها .. راح خالد وابوي واكف عد راس امي ..
راح خالد يركض والدنيا تصل ثلج
نده لاو راشد جا هو وراشد وابوه .. شالو امي وطلعوا بيها بالليل .. اخواني كلهم كطع عنهم النوم وكضبنا الباب ننطر جية امنا وهي بيدها الجاهل
زهرة وسمعية راحن لحجرهن ينامن بس انا واخوتي
واحدنا ملتف بالثاني ولافين ارواحنا بغطواتنا وواكفين عد الباب .. ما احس الا حس راشد وهو يلاشي اخوي حميد ويشيلا من الكاع : يول عليش بالبرد لا يدك بعظمك ويصيبك
حجاها وهو يدحكلي
انا التفيت بالباب وسكتت ..
اندار عد ما امن محد من اهلي واكف واخوتي الزغار ماهم واعين لهالسوالف .. تنهد وكال : هيج يشذرة تردين وانا الوديت امي خطابة
– محد نطر شوري خاطر انطي راي لو ارد
– وعليش امج ردتني
– ما سمعت مني تكول بعدج زغيرا
– وكلبي الولهان عجل شلون ويا حالا ؟
– الله اليبرد الكلوب شبيدي وامري ماهو بشوري
– وتالي هالحال
– مدري عنه الحال بيد الله
– والنعم بالله بس انا جل صبري يشذرة ورايدج
تعب كلبي وانا اتنطر شوفتج كل مسية ع هالباب وما الاكيج
– وشنهو البيدي
– البيدج تحجين ويا امج
– ما اطيك
– عجل كليلي شلون
– الله كريم
– كليلي موت اعلى هالحال الله يعين كلبي
ما رديت عليه
حستوا اختنك .. وابعد من المجان
وضل مجابلنا واحنا واكفين ويحاجي اخوتي الزغار ويسمعني وهو يحاجي وقاص ويكلو ( يول شليت حالي عليش ما تجي عدي ويبرد كلبي وكلبك .. ول تعب كلبي منك تدلل علي جثير )
انا اسمع واتبسم بس الحرة بكلبي جاتلتني
شنهو البيدي اذا امي منها ردت امه واطتها رفض
ضلينا مجابلين الباب لحد كبل الفجر ردت امي
بعجل الربل وابوي وابو راشد ومرة من الديرة وياهم
تلكيت امي .. وركضت اهيرلها فراشها خاطر تنام
جت وهم مدثرينها بالف غطوة والجاهل بين اديها
وابوي عيونه تضحك ويلاشي اخوتي ويكللهم : جاكم اخ تاسع
وهم فروحوا ويتراكضون ورا امي ويريدون يشوفوها
تلكيتها حبيتها براسها : الحمدلله على سلامتج يما
-الله يسلمج يمه عينيني
كضبت ايدها ومرت عمي خذت الجاهل من ايدها دثرته وامي ادثرت بمجانها وابوي جاب الحطب خاطر يجيم ويدفي الحجرة لامي .. جابلها حطب وحطو بالموقد وجيمو وكعد واخوتي كلم التم عندو وفرحان يدكلهم ويغني وياهم
وامي متبسمة كتلو بويه : شنو سميته
كال : نصر سميته
حجت امي : يعجلوا عزوة وسند لكبرتك ويشيل اسمك واسم ديرتك ويتنومس بيك اعلى حله
– الله يحفظه وتعيشين بجال هالولد ييازي يطيج العافية
جر ابوي غطوة وهو كاعد كرب الموكد واحنا حواليه لمنا تحت جنه وغطانا كلنا وكعد يسولف النا اعلى اثر ابو وكصصم عد ما جان بالبدو رحالة من ديرة لديرة ومن دولة لدولة وشلون الحياة كبل جانت صعبة على اجدادنا .
غفينا اعلى حس ابوي وهو يسولف
ما كعدنا الا الظهرعلى حس الجاهل الجديد وهو يصرخ بجى كلنا نايمين بهالحجرة واحد محشوك بالاخر حتى ابوي ويانا
كعد هو يحاجي : رضعي عليش تخلي يبجي
– ما يرضع جتلني لا ينام ولا يخليني اهود
– هسه انده وحدة من النسا تجي تعاونج
– ابن انفاس ما اعمتد اعلى وحدة منهن ما اريد
– يولي شرايح يعملن يشيلنو عنج ساعة خاطر تريحين
– اليكره كلشي يعمل يخشان ونسوانك وصل بيهن الكره يمرن من الحجرة وما يكللي بالمبارك من غيضهن اروح اودعه بديهن
شلت راسي : يما انا اشيلو عنج
– خل يرضع ويشبع واكعدي عد راسه
رضعته وسكته الماي واندارت تنام .. انا حطيتو بمهادو وكعدت عد راسو اغفي .. ليما انتبهت امي نفسه وما ماكلة
كمت حمست الها الخبز ويا دهن الحر ورشيتو شكر
وجبتو الها خاطر تتغدا .. ليما وصل الخبر لجدتي
جابت خالتي مرجانة وجت ضلت عد امي
جانت سميعة ما طايكة كعدتهن
عبن خالد من غشع مرجانة جت .. جابل البيت وجابل حجرة امي شتريد وشتهوى .
واشد جابل الكلعة عد ما شاف الرجل واطتها خاطر يضل عد كل صايحة يفزع ويصيح ( لبيه )
وانا كلبي بعلك اباب الكلعة
افوت وارد ادحكو واكف ليغاد ويتحسر اعلى مرتي
واني العلة جتلتني لا هو بيدي وانهر كلبي عنا ولا بامري اوافك بيه وارضى بگسمتي .. انا كلي ما بطوعي .
عد ما جاي تطلع امي تكضي حاجة وهي مدثرة لمحتني وانا واكفة ليغاد واشد بالباب .. اندارت وندهت : شذررررة
– امبلى يماااا
– صكي باب الكلعة لا تخلين الكلعة مكشوفة للرايح وللراد ، كووومي
– اي يمه
ردت امشي وهي تخزرني كضبتني : احسابج بعدين يشذرة
– يمه
– امششششي
ضكت على ايدي وهدتني رحت اركض اصك باب الكلعة
كضت وردت صاحتلي : ما تستحين لو مر ابوج لو واحد من اخوتج ودحكج تطمشين اعليه يولي ؟
– يما ما عد اطمش
– اشششش جذبج ماهو علي يالجذابة من نظرة اميزج وانت بزر بطني
– يمه
– وغما نوبة الاخ من اشوفج بهالحال الا احطة ظهرج واكسمه
طلعت خالتي مرجانة وهي تكللها : شجالج ويا البنت شبيها ؟
– انت الاخرى فوتي داخل
– شعدج وياي
– اذا جاية تعينيني عيني بالجاهل واكعدي داخل واذا جاية طمشين اعلى درب الهوى الدرب الجابج يردج دادة .. كلعة خشان ماهي مكو*** ولا هي دار ملكى المحبين ما كاتبله الله گسمه ماله موعد ويا الشيطان بدارنا .
رزلتنا نشتما من جدامها وفوتتنا داخل
يومها اجو عمام امي ومن بينهم عمران وابوه جايبين هدايا هم ونسوانم خاطر يواجبون امي
عد ما استكبلهم ابوي وفتح بابه
عم امي ما تهاون وفاتح ابوي بحجايته وكايله : انت زلمة اصيل وهنيال اليناسبك وياخذ عدك وانا راية الله ورايتك رايد الكربى
كالو : ابشر الكربى .. اعلى يا نية ؟
كالو : رايد شذرة بنتك لابني عمران
ابوي ساكت وكايلو : انا الي الشرف اناسبكم ولا خير احد اعليكم بس تعرف الشور ماهو شوري وحدي اشوف راي امها واشوف راي البنت وان جنت واليها لجني ماني غاصب بنيتي اعلى گسمة ان ما جانت من طيب خاطرها ماني غاصبها اعلى شي ولاهو جلة من كدرك حشى لجن دينا السمح ما يرضى بالغصب
كالو : اعلى عينك نور اخذ شور العايلة وننطر الجواب منكم.
عد جا ابوي وفاتحح امي بحجي عمها
انا كشر وجهي وكمت منهم مغندبة امي صاحية لحالي
وكفت ورا الباب اتنطر كالتلو : لا شنهي عمران واطي شذرة انا اختي ومضى عليها الزمن وراح ييبس رحمها وما رضيت بيها لعمران اطي بنتي وريدتي اعلى ضرتين شجاني شحصلت من ضرايري خاطر بنتي تحصل
– البنت كبرت وكثرو خطاطيببها اليوم زغيرا باجر تبور مثل بورة عمتها ملكة
– تبور ولا تطيح بگسمة كشرة يخشان بتنا هاي فكت عيونا ما لاكينها بشارع خاطر اطيها لعمران
– بعد التشوفينا انت امها وادرى بحالها وحال ابن عمج .
كام ابوي منها دخلت ، كالتلي : شذرة
– ها يمة
– من ساعة المنعتج والهساع مكشرة يمة .. حاجيني بحالج
– ما بيا شي
– وعليش الوجه ما يتلايم
– يمه انا ما اريد عمران
– ولا انا رايدته
ضليت مكشرة ومدنجة ، حجت : كلبج هاوي ابن خيري ؟
بس كالت هيج عيوني هملن
حجت : دموعي ترخص اعليه يشذرة
– ما بيدي
– اليتبع كلبه يتعب يبنيتي
ضليت ساكتة وادموعي همالة حجت : عد ما رديته انا ما ظالمة لجن يظله خادم ابوج وماهو علاوة ولاهو شوفة حال لجن لو خذاج تكضين عمرج تنصين بروحج خاطر يرضى وما يرضى ويضل محتام من يشوفج انت وابوج اعلى من وخيركم ازود ..
المرة الجليلة حال وتاخذ غني .. يغنيها وتعيش بخيره
لجن يبنتي المرة التاخذ فكر ما تعيش .. لا تكدر تنسى دلال اهلها وتعيش وياه اعلى فكره ولا هي المطيته عبن المرة التطي الزلمة فلوس تذله وما تحترمه وشكثر ما تطي ما يرضى .
– انا راضية
سكتت عد ما تجريت وطلعت الجلمة من كلبي صراع طويل ويا روحي احجي لو لا .. حجت : تحملين الهم لجل يا عين ؟ وياهو اليسوى تحملين الهم لجله
– انا لو خذت غيره ما راح انسعد ولا يضل عكلي وياه وكتها لا انا الراية كلبي ولا انا الراضية ربي واعيش بغير راحة بال.
– بعدج زغيرة تكبرين وتميزين امرج
ما سمعتني ولا فهمتي ومنعتني منه ..
ضاكت الدنيا بيه وما ادري بيا درب ترضى الحجيت وفصحتلها البكلبي ردتني والسكتت رادتني امي ما ترضى براشد لو ينصب ذهب تشوفه هو واهله خدام عد ابوي.
ورى يوم …
ابو راشد يعرف بابنه عاشك بنت خشان ويدري بام شذرة ردة مرته عد ما خطبة بنت خشان .. بس عد ما سمع راشد عمران متكدم لخطبة شذرة منجن
كاطع الاكل واشرب ويكللهم : اذا ما خذتها يصير بعكلي شي .. اذا ما اخذ شذرة اموت لو تصيرلي لو اجتل روحي واجتلها خاطر لا تصير لاحد عكبي
كامي يهوس ابيت اهله وعامل مصايب وداير البيت عليهم
خيري ابوه هاد البيت وجا الخشان كالو : انا ما اعرف شلون افاتحك بالحجي وشلون اكلك
– شنهو يخيري
– سمعت ال موازي رايدين منك مرة
– اي لابنهم عمران عليش تسعل ؟
– انا رايد اعرف شنهو ردك
– كبل لا تعرف ردي انا الرايد اعرف شنهو ورا سعالك هاذ
– انا رايد شذرة لابني راشد وبودي اناسبك واضل خوتنا ممتدة بدم ونسب
ضال يدحك بيه وكالو : اليوم اودي طارش لا موازي يرد جوابي الهم
– وشنهو جوابك
– تسمعه يخيري تاليتك تسمعه
كام خشان من خيوي وهو ماهو اعلى رايه
نده لابنو خالد وكالو : تروح طارش لاب موازي كللهم انتم اعلى راس بس الام وبنتها ماهن راضيات بعرس والبنت بعدها زغيرا وكدركم محفوظ ان شاءالله
– وعليش ما تنطي البنت يابه
– الراي ماهو رايي لا شذرة ولا امها راضيات بال موازي
– وتالي عمرنا ننطر راي مرتى ترضى لو لا
– اليتمرجل اعلى مرا ماهو زلمة يخالد البيه كوى يتكوى اعلى زلام ديرته ويحفظ روحه .. احفظ هالجلمتين مني وانا ابوك امك مرتك بنتك واختك ذن امانة الله بركبتك وبحمايتك لو كصرت بيهن لا تحسب روحك اعلى الزلم ولا تكعد بديوان شيوخ .. عبن جليل الاصل اليطي بمرا لا حول ولا كوة متحامي بيه وهو بايعها خاطر يرضى غرورا ..
رد ال موازي وكلهم بجوابي بعد ابوك
واخذ الفرس من راشد واصهل بيه وطر درب الديره لديرة النسابة
اخذ الفرس خالد وراح لديرة ال موازي
عد ما نزل عدهم .. عرضله عمران كالو: حي الله النسابة
– محي اصلك يخي
– تفضل ابوي شوي بعد يجي تفضل حياك الله
– ماني كاعد جيت اطي جواب وارد لديرتي
– وشنهو جوابكم
– البنت زغيرا وماهي بعمر عرس
– شوركم وله شور النسا ؟
– اعرف حجايتك يولو
– عاب الله الديرة الشورها بيد نسوانها ماهي بيد ازلمها
– ديارنا محفوظة ونسوانا محشومات
– انا اعرف بسالفتك يبن عكاب واعرف رايتك بهالديرة ان جنت وياي رايد انا وياك نتفك بحجاية زلم
– وعليش نتفك
– مرجانة بنت عمي وامرها بيدي .. افك نهوتها واطيها للي ابغاه ويحلالي .. تعال نتفك انا وياك بزواجة كصة بكصة .. ونحط اهالينا تحت الامر الواكع .. يرضون يعني يرضون
– كصدك يبن العم
– تنطيني شذرة وانطيك مرجانة كصة بكصة
وما اعلى الاهل غير جلمة المبارك عد ما يكع الفاس بالراس ….
*************

يتبع….

( ابن أبوي )
وابتعدنه بعيد لاجن طيفهم ظل يعتنينه
ظلت حجاياتهم عالبال ما جلمه نسينه
(الگاطع)
رد خالد من درب عمران واهو مندار راسه
جلمة ( نخلي الكل تحت الامر الواقع ) ضلت ترن بمخه
بس شلون ؟
يطي اخته ؟ وشلون يطيها ؟
ابوه وامها ما يرضون .. ولا اخته راح ترضى !
بس هاي جانت احسن فرصة ياخذ النطرها ١٣ سنة خاطر ياخذها لو ضاعت عليه هالفرصة .. عمره لا يفكر ياخذها بعد
لا امه راح ارضى ولا عمام البنية .. ولا احد راح يوافك ياخذها غصب عن الكل
نام ليلته وهو تايه بافكاره ..
صبح الصبح خذه الفرس من سطبل ابوه وتلثم وطر بيه الدرب لال موازي .. نزل عد دار اهل يازي .. وكعد يتنطر شوفة مرجانة .. عد ما طلعت حط ايده بثمه وصوفر
اندارت هي انتبهتله
اشرلها يريدها .. مشت وهو لحكها لحد ما وصلن مجان بعيد عن العين اندارت له ( ها يالولف اشوفك مبجر جاي تصبح اعلينا )
– جاي اخذ رايج وراسي مندار
– علاش ؟
– عمران
– وش به ؟
– كلمته امس وكلتله اجواب ابوي
– اعلى ؟
-اعلى خطبتو لشذرة ابوي رده وما راد النسابة لجنه ناوي ما ادري عليش صار يمكنه عاشكها
– عمران ما يعشك احد .. وحيد نسيواني كل التعجبه وتصير براسه ينوي عليها ويريدها بلا هواة
– بس حجالي جلمة خلاني ارد بافكاري
– وش كالك ؟
-كالي تعال نتفك اعلى امر ما يدري غيرنا انا وانت تنطيني اختك واطيك بنت عمي زواج كصة بكصة .. بلا ما يدري احد من الكوم وعكب ما نعكد الحلة ونعرس اعليهن نخبر الاهل ونحطهم بالامر الواكع .. واعلى الكل غصب يرضى
-ولد ابليس فكرة ما تخطر اعلى بال ابنادم
– انا تايه من امس ولليوم ما عرف شنهو اسوي
ادري اختي ما توده ولا ابوي يرضى .. بس بنفس الحين هذا اخر حل لعشكنا بس
-بس شنهو وانت تكول هذا اخر الحل
– وانت مكتنعه بحله ؟
– اعلى عينه حك هذا حل النا عجل يرضيك حالنا الشيب واطى راسك ورحمي يبس ومحد يرضى بعشكنا
– وشلون نكنع شذرة بزواجة عمران
– عد ما خطبني يازي جت تكنعني خاطر اكر واكنع بعمران .. الرضته علي خل ترضاه على بتها
– وابوي ؟
– انت ما عدا اتكول زواج بخافي الامر عد ما نعكد عكدة النكاح ونعرس ذاك الوكت نبشرهم
– وشلون وشذرة ما ترضى
– شذرة حل ربط كللها موتي تموت كللها اعدلي تعدل ما راح تحجي شي
– ولو ما رضت
– خلي امرها علي انا اكنعها بالأمر
– ولو ما اكتنعت
– خالد هذا اخر حل النا ان ما استغلينا هالحيلة عمر واحدنا ما يصبح للأخر
– انا هذا الجاتلني عبن هذا الحل الوحيد بس شلون وشذرة انا ادري ما راح ترضى
– ما انت اخوها ؟
– اي
– اغصبها توها زغيرة تتعود عليه مثل ما تعودت يازي اعلى ابوك ما ينرادلها شورة راس
– لو غصبتها واطيتها بلا رضاها محد راح يخلصنا لا انا ولا انت من غيض ابوي وكتها وين ما يطيح بينا يكص روسنا.
-عد ما تكعد علي اصير حرمتك .. وانت الحل والربط بيدك ماهو بيد احد يطلكنا لو يغصبنا اعلى راي .. اذا ما جنت كدها لا تصول بهالامر
– لا شنهو ماهو كدها يولي لا تحجين هكذ
– اعجل ابني امرك وتوكل
– وشلون نكنع شذرة بهالامر
– خلي امر شذرة علي .. بجلمتين تجي وياك للموت ماهي عسرة راي
– عجل انت تعالي لينا بحجة ام جابر نفسه وتريدين اتداريها منها جرجري شذره .. وانا راح اطي الراي لعمران خاطر نعكد الامر ونتفك اعلى يوم .
– بأذن الله
رد خالد وطر دربه لعمران وكاله : عكب يومين نجي وننفذ امرنا بس ينراد النا بيت
كالو : بيت عمي نفسه بس مرت عمي ام يازي ندربها لكلعة ابوك خاطر محد يدري .. انت وبنت عمي بحلال الله ان شاءالله تضلون ابيت عمي وانا اخذ الحرمة لبيتي
– هاهية متفكين
رد لمرجانة خبرها الامر بعد يومين ولازم نتعجل
كالتله لا تهتم .. انا ادبر الامر انت بس انوي واعزم امرك خاطر نعكد بخير الله
راح خالد وهي مشت لامها : يمه خلنا نروح لكلعة خشان
– امس ردينا شعدنا غاد
– يمه ضراير يازي ما يتامنن وهي نفسه لاون نضل هالفترة نجابلها وما نفاركها ليما تكوم لحيلها
– ييمه الوجوه ما تجابلنا شفتي شميعة شلون تبسمر كل جلمة هاكبراتها وانا مالي روح اسمع سمومها
– عجل يمه ولو خلالها الجو يمكن تكتل الجاهل يمكن تسممه
– لا يمه شلون تعملها والله ما تعملها
– يمه سون الامضى من هالحيل ما خلت العشيرتين تتجاتل وراحو زلم يابو زلم ما رادن يسممن يازي ما دربلها الحية يمه عمايلهن هواي ما ينعدن علاش نامن واختنا نفسه لاون نكف وياها ليما تكوم لحيلها
رضت امها وكنعت
صعدن عربانة جحش وصلن لباب كلعة خشان
نزلن عدها ويازي فرحت بيهن كالتلهن : زين ما سويتن ما اكدر انام واغفل .. شذرة ازغيرة مو مالت اعتمد عليها .. اطتهن الجاهل ونامت .
خذت مرجانة الجاهل
وراحت بحجرة شذرة .. كالتلها : شجاي تسوين
– اشعل الموكد الحجرة باردة
– اي زين ما تعملين الجاهل يبرد وغاد امج نامت
شغلن المرقد وكعدن والجاهل نايم
حجت مرجانة : شذرة هم ابالج تعرسين
اندارت لمرجانة : ما ادري
– عليش ما تدرين انت بنية وحكج تاخذين زلمة يدللج ويصونج
– وياهو اليرضى
– احد ابالج مترادية وياه ؟
– لا ما احد
– جلمتج هاي وراها سوالف احجيلي انا خالتج
– لا ماهو سر بس راشد ابن خيري
– اي ؟
– خطبني وامي ما رضت بيه
– عليش
– تكلي خادم ابوج ما يناسبج
– عشتو شتريدلج امج ملك لو امبراطور خاطر ترضى يولي لا تزعلين لجنج سودة مو زين وتخطبوج .. انا امس عمران حجه وياي عليج كايل رايدها
– سمعت بس انا ما اريده
– يولي وين تلكين مثل عمران يدلل المرة دلال
_ عجل ليش ما خذتي
– انا لو ما عاشكه خالد يهيييي جان من زمان خذيته ولا اخلي نسوانه يشبعن بخيرا
– وانا هم اريده
– وشعاجبج ابن الخادم
– ابوه يشتغل عد ابوي والشغل عيب
-صلوات ربي وي دادة عاشكة انت .. اسمعي عمران وصاني يريد يحجي وياج حتى لو جلمتين
-ما اريد
– احجي وياه وكليله ما اريدك
– عليش انا اكله امي وابوي يكلوله
-يولي ولهان لا تكسرين بخاطره
– ما اريد اشوفو
– راسج يابس
كامت تحاول وياها تريد شذرة ما تجي
ما حطت اعلى بالها شذرة تصدها فكرت بس تكللها عمران رايد يشوفج راح تجي بس شذرة جان بالها وكلبها ويا راشد .. فرفضت تشوف او تنجمع ويا احد
لثاني يوم تكنع بيهم ما ترضى
اخر شي كالتلها : اريدج تجين وياي بس رايده احجي ويا خالد واكعد وياه خاطر لو خلصت اخليج تشوفين راشد وانا اسدسدلج
– بس شلون نطلع وامي ما ترضى
– خلي هالامر عليّ
خدعتها وحجت ويا يازي تروح للكاع تسكيها عنها هي وشذرة
راحت شذرة هي ومرجانة للكاع ..
شذرة : طلعنا انا وخالتي للكاع
حيل فرحت عد ما طلعت وياها صالي زمان ما طالعة
ومشتاكة لشوفة راشد كلبي ولهان اعلى شوفه .. اتمنى لو بس يمر وادحج طولا .. ما اريد غير الشوف
ليغاد وادحجو من بعيد
فز كلبي فزت طفل تايه ولكى امه ..
شدهت عيني اعلى شوفه وهو يمر ..
هو يدحج وينزل عينه .. لا اني الحجيت ولا هو الحجه
كضت سوالفنا شوف ..
بنظرة تحجو وتحجيله شكثر ولهانتله وشكثر هو كاضيه السهر والليل والعشك والسواد التحت عينه نازل .. جنه العشك ثكلان اعلى افاده عكب ما ردوه اهلي .. ويمكن فهمها ما يطون جيف ابوه خادم عد ابوي
نظرة ذل وحرمان وخوف ووله ما شفت مثلها
يدحج وجنه يكول ( شلون احصلج ؟)
بس بالشرف حجينا ومشى كل واحد بينا رد الدربه
صعدت بالربل جان تعجبت سايك الربل لا هو خيري ولا هو واحد نعرفه بس خالد جان كاعد ليجدام
حجيت لخالتي ونحن اثنينا منكبات : وين رايحين
– شوي جريب بشغلة ونرد
– وعليش خذتيني وياج امي ما كايلتلها ولو درت طالعة باا علمها تكصبني
– يولي طالعة وحدج لو ويا غريب هذا اخوج وانا خالتج
ما جنت ادري الحمى تجي من الرجلين
ومحد ياذيك غير المنك وبيك
امنت بيهم وتبعت بلا ما احجي
كلت اخوي وخالتي ما يجي اعلى بالي ضر منم !
وصلنا وكت الغروب
لبيت جدتي .. اندرت لخالتي : عليش جبتينا لبيتكم
– نزلي شواي ونرد
– خاف امي تضل تحجي
– ما تحجي دنزلي
نزلت وياها علكنا الفانوس وكعدنا شواي وطب خالد ووياه عمران وزلمة اخر .. ادحج لخالتي فرحانة وتتحضر وتتزوك وتعدل بروحها ..
ما فهمت الامر شنهو
ظليت كابعة بالحجرة انطر يروحون الزلم خاطر خالد يردنا للبيت .. مدري شحجو غاد وصاح خالد على مرجانة .. مشت
شوي وردت تضحك وتحمد الله وتضحك وتحضن بيه
كتلها : شكو
كالت : امشي للحجرة بسرعة ياله
– ازلام كاعدة شلون ادخل
– اخوج موجود علاش تخافين
– لا ما اكدر خل نرد لكلعة ابوي
– نلحك نرد دروحي
كلبي خمشني وخفت مدري منيش بس احس الوضع جان يخوف وجنهم عاملين عملة محد يدري عنهم
دفعتني اعلى الحجرة الكاعدين بيها الزلم
نزلت انكابي ودخلت .. حجه خالد : اكربي شذرة
كربت واحتميت يمه عد ما خفت
حسبالي اخو والبد بفيه .. كالي : من اليوم انت حرمة عمران آل موازي بأذن الله .. كرري ورا الشيخ وددي اليكولا
انا شلت راسي : فد ابوي ما يرضى
خزرني وكال : اسكتي مالج غرض انت بس كولي موافكة
– خالد
خزني وتكرب من كضب ايدي وضك عليها
ادموعي كامت اتجارى .. لا امي لا ابوي
واخوي عدو ما يسوي سوايته ..
كمت ابجي بلا حس
وهو يكلي ردي رددي
صميت حلكي بس حس النشاغ كام يطلع من صدري
كالو عمران : هدها الي انا اخليها توافك .. دامك عكدت انت وبنت العم تتهنون بزواجكم .. انا احير بالباكي
كضبو وكالو : اعكد عليها يلا تاخذها
حجت خالتي اخت امي اللي حاسبتها بمحنة امي وهي تكلو : دام الزواج كصة بكصة العكد وكع وهساه حلاله حت لو ما وافكت
ظليت ادحك على خالد واترجاه بعيون همالة
لجنه لان بحجاية خالتي .. كضبت بيه اتوسلو
: خالد ابخت الله لا تهدني
– تتهنين خوية طيعي رجلج ولا تخالفين امره الما تطاوع رجلها مالها غير النار ماوى
– ردني لكلعة ابوي خالد
– هساه انت بذمة رجال والكلعة اصبحت ماهي بيتج امشي واتبعي زلمتج
– ابخت الله خالد لا تهدني خوية احب ايدك لا تخليني
بس رجعني لامي ما اريدو
– امشي وياه
– خالد حب الله ولا تعمل بيا هاكذ
– اخذها بالعافية وبالخير زواجكم
صرخت : لا خاااااالد ردني لامي
اريد اهلي خاااااااالد .. يابه وييييينك بوووووووووويه وين رحت عني تعال شوف حالي يابه .
كمت اصيح
صدلي عمران ووكف جدامي ..
ردت ادفعوا كضب ادية اثنينم وجرني من البيت
كمت ابجي واجر بروحي واكلو : حب الله وردني لبيت ابوي لا ترضى تعمل بيا هاكذ حرام عليك
– بنت هاكبرج ما اكدرج بالحيف امشي بلا صراخ
– عليك الله ردني لامي لا تاخذني
– هششش انسي اهلج منا وجاي انا اهلج
كمت اجرجر بروحي منا وما اكدرلا
والحاسبته اخو يدحج وينطر نطلع خاطر يسد الباب ويختلي بمحبوبته
اشترى اللي يريدها وباعني
بنى سعادته اعلى تعاستي
فكر بروحه ما فكر بيا ولا بحالي
ذاك اليوم ما شفت اخو .. وصدكت امي عد ما جانت تكلي ( اخوك من ابوك مثل ربع الرافكوك ) لا تأمنين باحد وغير ابن بطن امج ما يحن عليج .. احذري الماهو من بطني ييمه احذري اخو جان لو اخو .. امهاتهم ربتهم اعلى الضر يمه لا تظنين كلبه يلين وياج لو يحسبج اخته .
صم حلكي عمران بيدو حيل وانا اجرجر بروحي وابجي
وخزني وهو يهمس : ادحجي اخوج هدج ومالج احد هين بهالديرة جلمة اخرى لو حس عالي اخذ بغاي واحط جيلة براسج وباكرب بزل فهمتي الكلته لو اعيد
يحجي وخازني
كمت ابجي بخنيس وادحج بسما الله واكول
ابوي ما سعل عني امي ما تفكدتني للصبح ما يطول ويجون يخلصون ادري بابوي ما راح اهون عليه وما يطي بيه وراح يجي
كمت اواسي الروح بظنة ابوي
واكول الصبح يطر ويطر ابوي وياه
تبعت هالمجرم بدموع هماله
اخذني لبيت طين جنه كبر فتح الباب
وعلك الفانوس .. وانا اعلى عتبة الدار انطر يضوي البيت
عد ما شفت لهى بالفانوس
كضبت عباتي واندرت اركض بالفرع
هو بسع انتبه .. ولحكني .. من حسيته لحكني سرعت بروحي شما عدي روح كمت اركض بكل حيلي واصيح ( ياااااااااااابه احد يفزعلي يا نااااااااااااااس )
كضبني بسرعة وطرني بجف على وجهي ودفرني برجله وهو يكلي : بنت الجلب رايدة فضيحتي
جلب براسي وكام يجر وهو يكلي : رايدة تشردين مني ؟
شيخلصج مني اليوم اليوم اطلع كهر الله كلو بيج
جر يجر براسي ليما دخل بيه الدار ودفعني للكاع
واندار يسد الباب كمت ابجي واكلو ؛ ابخت الله بعرضك هدني والله ما افضحك بس ردني لاهلي
– الحجي هاذ ما ينفع وياااااااي فعلتج هاي السويتيها اعلمج شلون تعيديها
وانهد عليه يجر براسي ويركعو
جتلني جتل عمري ما مجتوله مثله
دلال ابوي كلو طلع من خشمي ذيج الليل
كضب عباتي شمرها وفك نكابي وشيلتي
وشك ثوبي وصلخني بعز البرد خلاني ربي ما خلكني اكلك من البرد وابجي وارعش واتوسله
كضب خيزراني وجلدني وانا بلا هدم
حسيت روحي طلعت بذاك اليوم ما ادري عليش هيج كارهني
سواتو هاي ما جانت محبة جان اكو كره كلش جبير بنص عينه يجتلني وجنه يفرغ غيضه بجتلي
وما كفى بجتلي
لف لفة تنن ودخنها وسحبني بغيض يكاربني وحركني بشعلته بجسمي .. مرة واثنين وثلاث وحط علامات غيضه بجسمي
كل صرخة مني بذاك اليوم
جانت ثمن لامر انا ما ادريه .. ثمن انا ماهو طرف بيه
يوم اسود ما ضنيت الصبح يطلع وانا حية …..
_______

يتبع….

( جزاء المعروف)
لا تحترگ وياي
خليني احترگ خليني
ريشه و تهت بالريح هاي سنين آني ألوي الهوة و يلويني
(الگاطع)
يازي : يمه ما جن البنوات تاخرن
– مرجانة كالت نكضي شغل الكاع ونرد
– يا شغل هذا يمه .. الغروب كرب ينزل
– مدري والله يبنتي شغليش هاذ ما ادري
صاحت على مجبل : مجبل ولك مجببببل
– ها يمه
– ول يمه امش للكاع شوف اخيتك وخالتك وينهن نزل الغروب وما هن بالدار
– امرج يمه
مشى مجبل راح للكاع دورهن ما لكاهن
رد خشان توه جاي يدش للكلعة : ها يول وين جنت
– امي ودتني ادور شذرة وخالتي مرجانة بالكاع بس ما هن ما لكيتهن
– ما لكيتهن شني !؟ وين راحن
– ما ادري
حجه ابنه وركض خاطر يخبر امه
مشى خشان وراه وكف اباب الحجرة : يولو بنتج واختج وينم ؟
– ادري عنم ؟ كالت اكضي الشغل عنج شوي ونرد بس ما ردن
طلعوا يدورونهن يفترون وما هن ..
نده خشان على خيري كالو جيب الفرس واجبل دورهن نزل الليل والبنوات ما هن
فزع خيري وراشد جا يركض
كالو : انا عكب الظهر مريت من الكاع للسطبل وشفت خالد واكف صوبهن جانن يشتغلن
خشان : حنكة صدك يولو خالد ما هو … هو الثاني غايب عن العين
جابر : ثلاثتهم مختفين معناهم ثلاثتهم سوية طالعين بس وين ؟
انداروا ولفوا ودوروا الديرة كلها كن الارض غصت وبلعتم ذولة الثلاث .. عجزوا وين يكلونم ..
بهاي الاثناء عد ما جان خالد ابيت اهل يازي
باول ليلة بزواجه وعروسته بحضنه بعد ١٣ سنة نطرة ووله وشوك صارتله .. بس ما جان يحس ولا بذرة فرح
كل باله مشغول شلون لو درى ابوه اطى شذرة ؟
لو عرس بلايا علمه .. يعرف ابوه عسر وما هو ذاك الزلمة المسامح الينحط جدام الامر ويخنع ويرضى اليغلط عده لو ياهو الجان ينال جزاة غلطه ويتعاقب ..
الليل المر ما غمضت عينه
ولا عين اهله
ولا عين شذرة
عين خايفة
وعين قلقة
وعين مكسورة
وما بين عين وعين معاني جثيرة
الاولى عين صلفة وانانية حط اخته ضحية خاطر يحصل احلامه، وعين جالها القلق والحيرة اعلى بزرتهم وينها .. وعين متعوبة جفن ضاعت كل احلامها الوردية وعشمها ذاك بليلة كمرية تاخذ التوده وتسكن بفيه … تبدت بليلة ظلمة مثل طاسة ماي ما تكدر تلمه .
للصبح ما كدر يصبر كاللها : مرجانة كومي
– وين
– نروح لابوي
– هساه تخبلت الفجر بعده ما طر
– ليما نصل طالع الصبح
– يول ولو جتلونا ؟
– ما راح يجتلونا نكع علد ادين ابوي ونكله ندمانين غلطنا ونريد المسامح منك
– تظن يرضى
– ما راح يرضى وراح يعاكبنا بس ما راح يطلكنا غصب
– انت زلمتي بعد والشور شورة الله وشورتك
بس اسمع كبل لا نرد خلنا نعكد اتفاق
– شنهو ؟
– امش وانت تعرفه نسولف بالدرب
كاموا من مجانم طلعوا يمشون لديرة عكاب
وخشان وولده ما خلوا مكان يعتب عليهم .. ليا وصلوا
خالد ومرجانة .. الكلوب خلصانة
دخل خالد ومرجانة منكبة بكفاه
تلكتهم يازي لهفانة تركض : وين عنكم انتم بنتي وينها .. شذرة ما هي وياكم وين رحتوا احجوا البنية وينها
خالد : رايد ابوي
– يول احجي بنتي ويييين مرجانة وين بنتي شذررررة وينها
ضلت تبجي مرجانة وكعدت بالكاع كامت تصفك على وجهه يازي : وي يما بنتي .. اش صار بيها يولو .. احجو علييييش ساكتين بنتي ويناااااااا
جابر عد ما شاف خالد اجبل
ركض يخبر ابوه ..رد خشان وجابر يتراكضون للكلعة خاطر يعرفون وين جانوا من امس ليجاي
دش للكلعة شاف خالد جدامه
دحج مرجانة كاعدة والكل هوسة ويسعله عن الصار
خالد عد ما شاف ابوه فز من مجانه ودنج يم رجلينه وهو يتوسله ويترجاه : يابه اترجاك سامحني انا غلطت استاهل تجتلني
وينحب بصوت عالي
وخشان يدحج بالوجوه وينشد : شنهو الصاير شجرى يولو ؟
يازي : بنتي وين خشان اسعلو ما عد يجاوب شذرة وينهاااااا
خشان دفع خالد من جدمه وزكح : اختك وينها يخاااالد
– انا غلطت يابه
– احجييييي
مرجانة : ابيت عمي ابو عمران
اندارتلها يازي : شتعمل غاد
– خالد نطاها كصة بكصة .. نطى شذرة لعمران وخذاني منو وعكد علينا
صرخت سميعة : احووووووه خالد يمه شفعلت يبنيييييي
لطمت وجهه يازي : يا جليلة الحيا يولي ترضين تكسرين بتي خاطر تعرسين مرجانة ترضين اعلى بنتي هييييج
ويا ما يازي صرخت خشان كضب خالد وهو ينده على جابر ويكلو : عطني الورور امش بساع جيبووو
صرخت سميعة طاحت عد ارجوله تترجاه
وخالد يبجي ومرجان كضبنها امها ويازي جتلنها وتصرخ
وهوسة وهرجة بالكلعة احد ما يسمع حسد احد من الهرجة
جابر ما جذب خبر عد ما شاف خالد نطى باخته لجل مصلحته
اركض جيب الورور وهو يكلو : ميل عنه انا اجتله ياااابه
وخشان يصرخ عنه : اطني
وجابر يكلو : لا تتلوث بدم هالخسيس انا اجتلو وافتك منو
تكاومو سميعة وخشان
خشان يريد الورور و سميعة تجر بابنها وتحاميله
ويازي تصرخ وتعاتب بمرجان : يل ما بكصتج حيا تطين بتي لجل مصلحتج يالباااااايرة ولج انا التنطين بيه مرجاااانة
جتلتها نكعتها بدمها
وسميعة تمددت على خالد بكل طولها
جر روحك خالد واشرد من البيت .. ولحكه جابر بالورور يريد يجتلا .. وسميعة تراكض وراه
خشان هدهم كلهم وتوجه للاسطبل ويازي تصيح وراه ، ما سمعها ولا اندار لها جر الحصان وفز فزة كعد اعلى ظهر الفرس شد الثامه اعلى وجه وصاح ( دييييخ ) وداس الكاع وطر دربه لال موازي يطربك اعلى ظهر الخيل بكل سرعته.
ويازي ضلت اعلى باب الكلعة تملخ بشعرها وتصرخ : لعن الله فعلكم ظلمتوها يولو غصبتوا واستغليتو خنيسها وحياها وبعتوهااااا
اندارت للكلعة وهي تكللها : هاي جزات المعروف يمرجااانة امي ما تعبت عليج كثري تالي تبيعين بزري لجلج ما وكفت بعينج ما كلتي اختي شكللها
– مالج علي كل فضل كل المريت بيه انا من وراج تكدرين تخلين خالد ياخذني تكدرين تكنعين خشان وتمشين امرج بس انت الما ردتيني بالكلعة خوف لا ازاحمج اعليه
انت الانانية ما انا
انت البعتيني ووكفتي گسمتي كل هالسنين خاطر لا احد يزاحمج وتظلين انت راعية هدار وانت صاحبة الكلعة ومحد فوكج والحلال والخير كلو الج ولبزرج
يازي : يمه تسمعين بزر بطنج يمة تسمعين الحالت ابوي ولوثت ايده لجلها شتكلي يماااا يما هاي جزاتي انا الطلعت ما اريدلها الخير وانا الهديت الخير كله بجتلة ابوي ورضيت انفى ولا اهدها .. هاي جزات المعررررروف ينت اميييي
يولي محمود ما مات حي بدمج وبنكاااااسنج
انهدت عليها تجتل بيها وتكللها ؛ انت وابوي نفس الطينة انت وريثة ابوي بحكارتج ونحاستجججج مثل ما جتلت ابوي اليوم اسبح بدمجججج
طاحت امها بيناتهن ويازي تهد عليها وامها تكلها : حبي الله يمه هديها تولي بنت محمود هاي ماهي بنتي هديهاااااا
دفعتها مرجانة وهي تصيح ؛ عليش تجتليني مو رضيتي بعمران الي مو انت الحيني للبيت تريدين تكنعيني بيه وهاي اطيت بتج اله علاش ما ترضين ..
دلالة انت انانية
تريديلي الشين وتريدين الخير بس الج ولبزرج ما تريدين احد يشاركم .. ترفضين تطين بنتج لابن خيري لان ماهو بمكام بتج والله بنتي بنت خشان ال عكاب وراشد ابن الخادم
تشوفين الناس كلها تحتج وبس انت وبزرج فووووك
بالانانية كرهيني انا من زمان كارهتج وما اودج
الله يطي امي التغصبني اجي اعاونج واشيل الخيس من تحتج
مرجانة تصرخ وتعايرها
ويازي بدموعها مجفلة وصافنة باختها
وما مصدكة كل اليطلع منها كل الوكت ضامة حقدها بدمها وما تبثه … نطرتها لخالد ماهي عشك كثر ما هو حسد وتمني تزاحم اختها اعلى خير خشان وكلعته .
اعلى الخبر والليل كله ما نايمته تبجي
لا اكل ولا شرب وصدرها جف وهي نفسه وترضع ابنها
خرت وطاحت من طولها .
تراكضوا ولدها عليها
وزهرة ركضت تجيب الماي وامها تصحي بيها
شربوها الماي ..
وهم ملتهين بيازي وطيحتها والدنيا مخبوصة
مرجانة كومي ودخلي حجرة يازي افتحي صرايرها واخذي صرة الذهب مالتها .. وهدي الكلعة واشردي.
ما انتبهولها .. ولا دروا عنها
حسبالهم خفت روحها عد ما يازي وكعت
ما دوروها ولا حطو بالم يمها .. ضلوا ملتهين بمصيبتهم وناطرين ردك خشان خاطر يفهمون منه شعمل جرى هالفعل هاذ .
خشان نزل بكاع ال موازي
وحط عد دار ابو عمران صاح : اهل الدااااااااار .. يا اهل الداااااار
طلع ابو عمران وهو يكلو : حيا الله من جان يا هلا
– لا حيا الله من رضى بشين .. بنتي وينها يا صابرررررر
– بنتك وانا ايش عرفني بمجان بنتك
– اسعل ابنك امس ماخذها بلا شور اهلها
– ابني ياهو عمران
– مالك علم بفعلتو
– لا والدين الشريعة مالي كل خبر عن فعايلة اش عامل هالولد ؟
– متعاكد ويا النذل ابني وماخذين نسوان بلا ما احد يدري عمران ماخذ بنتي ومنطي بنت محمود لابني
– ايا الشين والله من متى هالحجي
– من امس والناس نيام وحك الله ودينه لو ما ردت بنتي للدار اليوم لا اشعل كاعكم نار واطفيها بدممممم
– يواش يوااااااش يبن عكاب انا ما ادري عن فعلك ابني لجن لو جان غلطان ماهو غلطان وحدو خاطر تهادد ابنك غلطان وياه وانا وانت نتحمل فعايل اولادنا فلا تهادد
– وكت الينهبون بنتك من هكر دار ابرد دم واحجي بعكل يصااابر شذرة ترد اليوم والا وحكا رب السما ما يصل لديارك دار
– بنتك ترد والما يرد لاهله بس انت اهدي يبن عكاب اهدي وانزل من اعلى جوادك ماهي من طبايع العرب الحجو من على ظهر الفرس
نزل خشان وابو عمران ودا احد من ولد يبحث عن اثر عمران
كالوا لخشان رد واحنا نخبرك باثرهم
كالم .. ما ابرح هالمجان لا ما اخذ بنتي بيدي
دروا عمران ما هو
لعكب الظهر بين عمران ..
اول ما شافو خشان نهد عليه وهو يشتمه : يبن النطيحة البنت ويييين
هدت الزلم تفاكك
عمران كالو : المرة مرتي مالك علي يمين مثل ما اطيتكم مره خذيت
– بنتي هاي ماهي بنت احد تاخذها مني ما تاخذها نص ليل يالررردي
-انا خطبتها منك بوضح النهار واخوها اطاعا الي
– ما رديت حواب وكلت ما نريد النسبة وياكم ترضاعا اعلى شاربك تاخذ بنت بلا شور ابوها
– خالد ما كالي ابوه ردنا .. جا لهين وكال نحن مرافكين نطي البنت شرط تنطونا بنتكم
كتلو انا مرافك وجا وجايب اختوا وكل واحد بينا خذا خرمتوا وذلف
تكاون وياه خشان ونكر كل هالكلام
وصابر كلو : ما اختلفنا امش جيب بتنا وجيب ابنك يطلكها ويرمي عليها يمين الطلاك جدامنا وكلمن ياخذ بنيته ويا دار ما دخلج شر
خشان اول الامر ما رضى يهد الديرة بلا ما ياخذ بنته
بس ما جان له مفر لازم يرد بنتهم ويطلكها من ذمة ابنه خاطر يرد بنته .
كضب احصانه ورد مسرع للديرة
وصل للديرة الغروب نازل ويازي حالها ما يسر لا صديج وبا عدو اول ما سمعت صهيل الخيل فزت لباب الكلعة
فتحه خشان كبل لا هي تفتحه تلكته وتلزمت بهدومه : بنتي وينها خشان ردلي بنتي .. بنتي لها يومين وهي ما بالدار ردلي بنتي
زكح خشان وهو يكلم : خااااالد وين
جابر : ماهو اذلف وما دريتا عنه
اندار ليازي وهو يكللها : اختج وينها … جيبيها
اندارت وهي تصيح : صيحولها امشو اندهولها
شكالولك خشان بنتي شلونها ما عرفت عنها شي حاجيني
– ما شفتها النذل معرس كصة بكصة لاون نرد اختج ليهم خاطر نكدر نرد بتنا
جا وقاص وهو يكلها : يمه خالتي ما هي
اندارت له : شنهو ولك الما هي وين تروح ؟
– يمه ما هييي
فزت ادورها وامها ادور والكل يدور ومرجانة ما هي
وخشان يصرخ ( اختج وينهاااااا)
– ادخيلك ربي البنت اختفت وينها .. وي بنتي يما
كلبوا الديرة على مرجانة وخالد ومالهم اثر
لثاني يوم رد خشان لال عكاب وهو يكللهم : انا اتبرى من خالد .. ودمه مهدور اهو وحرمته وين ما تلاكونا تجتلونا .. بس تردون بنتي
كالوله : لا تفكر ترد بنت ولا تحط رحلك بكاعنا اذا ما رديتلنا بتنا .
تكاون وياهم راد .. ما له عليهم حجه وابنه هو المسلم اخته وماخذ بنتم .. لاون يرد البنت خاطر ياخذ بنتو .. ولا يندل مجان بنتو خاطر ينهابها وهو بكاع ماهي كاعه ولا يكدر يتجول اعلى كيفه .
رد مكسور خاطر منحي الظهر
بنتو شذرة ما يندل كاعها .. ضيع شذرته بكاع الغرب
رد للكلعة وكت غروب
كعد وحنى ظهره وكام ينحب اعلى جلة حيلته
وين يلاكي خالد خاطر يرد بنتو كام يصيح : الذنب ذنبي انا العديت خالد ما جتلته وشرد .. لو جاتله وراد البنت ما يصير الصار
يبجي ويازي وسميعة والاكل كلهم داير ما دايره
حجت يازي : بديوان الزلم شنهو الراي
– الراي الهم لاون ارد بنتم خاطر اخذ بنتي
– وانا لا يحكمني ديوانك ولا انا زلمة خاطر امشي برايكم
شال راسه : وين صايبة ييازي
– بنتي ما تبات ليلة اخرى بغير كلعة ابوها .. ان ما كدرت تردها .. تردها نسوانها … اطني الرخصة يبو جابر
دحج بيها اول مرة تنهده ابو جابر ما ابو خالد
وتتاني الرخصة منه خاطر تتصرف
يعرفها ويعرف حكمتها وكوتها
اطاها الامان وكاللها : مرخوصة يم شذرة
دخلت جرت عباتها وانكابها
تنكبت ولفت شيل اعلى وسطها وحطت بيه الخنجر ..
ودارت الباب وطلعت التفكة ولبستها وحطت العبا فوكها.
ركض جابر وهو ينده لامه : يمممه وين .. يمه
صاح خشان : جاااااابر خل امك لا تسعلها وين .. صم سمعك وخلها تتصرف بلا شورنا .
طلعت من الكلعة وهي متنكبة والثامها اعلى وجها وشادة عباتها عليها ، كضبت سرج الخيل وتعلت اعلى ظهره وطرت الدرب بنص ليل اعلى كاع موازي
حطت عد دار عمها
نزلت من الخيل ونحبت
كلها فزعت اعلى نحيبها ..
كالتم ام مفجوعة وما رايدة منكم غير تشوفوني بنتي انا رايدة اشوف بنتي بخير لو لا ومهنين بعرسكم
كامت تبجي وتنوح تريد تشوف بتها
الكل فزع الها ويدور عمران خاطر يخليها تشوف بنتها
لكوا عمران وخذوها لبيته المسكن بيها شذرة
دخلت وشافت بنتها من الكهر ذبلان عودها وكوات تتجى خاطر تكف ..
نحبت وصرخت وطاحت اعلى بتها بحس عالي تنهب وهي حاضنة بتها .. وعمران واكف
همست بأذن بتها وكالتلها ( حطيني اعلى بالج ولا تنامين )
وبعدت راسها من بتها وكالتلها : الصار صار يمه والزلمه هاذ زلمتج طاوعي وامشي بأمره لا هبر بالمرة الما تطاوع زلمتها .. اصيلة يبتي صبري وصابري الفرج جريب يمه وما يضل حمل مطروح .
وادعت بتها وسلمت عليهم وامنتهم ووصت
وطلعت .. نطرت الناس تهود والعيون تنام …
وهي هدت اعلى البيت اللي بتها .. دفعت الباب ودخلت والتفكة بيدها كالتله : الجتلة ابوها ما تتردد اتجتلك ميل عنها ودير وجهك للحايط
كام يصيح ويريد يهد عليها
رمت وحطت الجيلة عد رجله
كام يتراجف منها واندار للحايط
صرخت ابتها : شكي ثوبج وشدي
شذرة تبجي وما تعرف شاسوي
صرخت بيها : شكي ثوبج اكلج وكيدي
شكت شذرة من ذيالها ويازي موجهه التفكة عليه وتكله : ودين الله وبخته بس تميل احط الجيلة براسك
شدت اديه شذرة وهي تكللها : حيل كيدي حيييل
رجليه .. عيونه
كيدت اديه واجدامه واعيونه
وضربتها برجلها وتفلت عليه وهي تكلو : تفو اعلى اليرضى ياخذ بنت بلا شور اهلها .. فعايلك ردية يجلب الماي
جرت بتها واطتها عباتها وكالتلها : اركبي الفرس
ركبت بتها الفرس وركب بظهرها وداست الكاع ردود لآل عكاب ….

يتبع….

( امر على غير حسبان )
مدري دمعة حزن
لو دمعة فرح
دمعه نزلت حاره وخدي نجرح
لـ الكاطع
حطيت الفرس اباب الكلعة …
وجريت السرج .. صهل الخيل
فز خشان واولاده اعلى اصهيل الفرس ، عد ما طلعوا ملهفين
شافوني جاي اريد انزل من الفرس .. سندوني ونزلت وكتلو : هذي بنتك جبتها لي عندك ..
كضب ايد بنتو ينزلها ويستفسر :شعملتي
– العملته الله اعلم بيه الباكي يخشان وصايتك
الرضوا يعقدون اعلى بنية مال حاضر ولي امرها مالهم جلمة وياك ولا الهم دوسة بكاع اعكاب حت لو جان الامر يتطلب ادموم ..
طاحت شذرة بين اديه تشهك وتصرخ ببجاها
هو حضنها وباس راسها وهي تكلو ( اغشعت خالد اش عمل بيا هضمني وظلمني .. باعني يابه باعني )
دخلاها جوا
وسميعة وزهرة وبناتها كلهن موجودات
حجيت انا وكتلو ( اهدر دم خالد اعلى سوايته اليبيع اخته لا ينطر من اهله يصونونه )
نكزت سميعة من مجانها تصيح ( لعن الله كل من طالب فتنة ويحرض الابوه اعلى ابنه يولي خافي ربج تخلين الابو يهدر دم ابنه )
– كل جلمة مالج اعلى هاذ البيت بعد العملة العملها ابنج ابتي
– اخته وما عمل عملة تسود الوجه زوجها وصانها بزلمه ما ذبها بشارع
– الا كولي باعها
– باعها خاطر ياخذ اختج الفاينة منين ما اتجيبين المصيبة ادير عليج واعلى ساس البلا الجانا منكم عسنى لا شفناج ولا كبلناج ولا كبلنا بزرج من يوم الظهرتي اعلينا واحنا المصايب تحدر اعلينا من كل صوب
اختج البايرة اللعبت بعكل ابني وخلنه يطي باخته لاجله
ولا فركها عنج من خليتي زلمة ال عكاب يندار عن نسوانه ويفييلج
صاح خشان : هسسسس نحن بيا مصيبة وانت تردمين حسج ما اسمعه يا سميعة والا ووالله وبخت الله ما تضلج باكية بهالدار
– عجل ترضى اعلى فتنتها وهي تحرضك اعلى بچرك
تجاهلها واخذ شذرة للحجرة
والهوسة بالكلعة كايمة .. كعدوا شذرة وهي تون وتبجي
حط الفانوس وكاللها : احجيلنا من الاول شصار وياج وشلون اطاج
حجتله كلشي
حد ما وصلت خذوة عمران غصت ببجاها
كالتلها امها : خذاج بزور
– ما بس بزور ييمة طفى كطوفه بلشتي .. حركني يمة
كام خشان عد ما سمع المسوي بيها
وشذرة ظلت تنوح بحجر امها
والكل همد بحجرته ما يدرون باجر شضاملهم وشوراهم .
للفجر عمران كادر يفج كيوده
رايح اعلى اهله مفزع اخوته خاطر يطرون لال عكاب
ومن صفحة بذاك الصوب .. راشد
السمع من الطروش شذرة اطاها ابوها لال موازي وما عادت اله ورد بلاها … كاضي الليل يشرب ويبجي ويجر عتابة اعلى فراكها .. لي ما طافي من الشرب وفاكد وعيه وراح هاد اعلى الكلعة
1
دك الباب الفجر وهو يصيح : يا اعل الكلعة يا ظلااااااام
تطون بتكم بلايا ما تسعلون افادها شهاووووووووي
يا اعل الكلعةةةةةةةةةة
فز خشان اعلى حس الباب النربد
لبس اهدومه وجر اسلاحه وطلع يركض لباله ال مرازي هدوا
عد ما فتح الباب شافو راشد يصيح ويبجي اعلى بابهم ويكلو : بعتوها ليييييش اسعلوها وكلوللها كلبج شررررايد
رايدني انا انا
ردولي محبوبتي
– ياهو ولك
– ما عرفتني انا ابن خيرييييي
يحجي وهو سكران
– امش منا ول
– انا ما راح افارج انا راح اضل هين
ما راح افارج الكلعة لا ما تنطوني ياها
احلفكم بالله وابخته لا تحرموني منها والله رايدها
– يول اشجاريلك هالصباح سكران ولافي لينا امش من هين
– عمي لا تظلمني ما انت التكرل انا بحسبة ابنك عليش تظلموني
– يول امش منا لا تخلي اعصابي تطلع بيك وافرغ هالورور براسك
– اجتلني انا بايع روحي انا ما اريدها
شلي بروح وولفي بحضن غيري
هذه ما حياة هذه جهنم انا ما اطيك اعيش بيها اجتلني ابخت الله
– لا حول ولا قوة الا بالله
كعدت يازي اعلى الحس والبجى والهرجة الباب الكلعة
حطت غطا اعلى راسها وطلعت تنده : خشان شنهي ياهو هاذ
خشان واكف اباب البيت ويكلو : امش منا الني لا تخليني افجع امك بيك فارج
– انا اكلك اجتلني يعم ان ما اطيتني هواة كلبي ارحمني واجتلني والله ما اعيش بلاها
– هذا شجاريله من يمتى هاوي بت من عدنا
– من زمان وامه جت تخطب شذرة ورديتها
دحج بيه ذاك طافي ويبجي ويروح منا ويجي منا ويصيح ويهدد وما يعرف جلمة ثمة .. تذكر جية خيري عليه عد ما راد فزع اعلى خطبة عمران لشذرة ورادها لابنه تبين ابنه هاوي بته .
كال ليازي : اندهي واحد من الولد يروح اعلى اهله يجروه لا تصعد عدي وافصل راسه عن لشته لهالولد
راح وقاص يركض لبيت خيري كاللهم : ابوي يكول تجون تاخذون راسد لا اكص راسه
تراكضوا امه وابوه اعلى راشد
كامو يجرون بيه وهو يصرخ : هدووووني لا تفركوني منها اكلكم هدوني .. اجتلوني انا بايع روحي اجتلوني ما اريد اعيش يابه احب ايدك اجتلني والله نار كلبي ما تطفي ياااااااابه
شالته امه واخوه
وخيري جا يتعذر ودموعه بعينه ويكلو : احسبها عليه يبو خالد البزر هاذ اتعبني وما جاي يرد نهيته جثير لجنه عصي
– خيري بيتي وحريمي امانتك عد ما واحد من ولدك يحط عينه اعلى وحدة منهن اشلعهن من مجانهن واخليه يعيش كل عمره بلا شوف .. اخذ ابنك ولا تخليني اشوف وجهه نوب الله والله اقسم ءبالله لا احز نحره وافجع كلب امه بيه .
تعذر خيري من خشان
واخذ ابنه ودخل لداره .. تفطر واغتسل راد يطلع يازي طلبت من خشان .. تاخذ شذرة للداية البنت متأذاية
كاللها اوصلكم بدربي تهيروا
لبسن نكابهن خذاهن للداية
كالتللها : البنت محروكة بكفاها ولاون تداوى
اطتها دوة وضمدت صوابها وردت شذرة للكلعة
عكب الضحى هدوا ال موازي اعلى كاع ال عكاب
طرت الهم الزلم كالولهم : لنا يم خشان حك وجاي ناخذوا وانا ما نطانا حكنا نخلي الكل يسبح بدمه
عرضلهم خشان كاللهم : اعلى يا حك جايين تطالبوني
– فرد من ال عكاب داس كاع ال موازي وكيد عمران وخذا حرمته
كاللهم : الداس ماعكم شفتوه
كالو: فرد من الكلعة
– ميزولي الفرد خاطر اعرفه
– عمران يكول حرمتك هي الهدت اعلى الدار وخذت مرته من دارها
– حرمتي منين اصلها
– المرة تبيعة رجلها
– والينكر الأصل ماهو باصيل وام جابر فرد من ال موازي وان جانت حرمتي تضل دمكم وتضل لحكمكم ما الحكم اعليها حك .
– نطيح دوسة الكاع لو رديت البنت لزلمتها وصلحت الغلط السوته يازي
– انا ما قريت بغلط ام جابر خاطر اصححه .. اهي ما غلطت اهي ردت حك انخوذ غصب اعن اهله ..
– نحن لنا بنت يمك يخشان ان ما ردت بنت محمود بنتك مالها ردة
– يظهر اهي عادة عد ال موازي اعلى بيعة بناتم سبككم محمود ابيعة ام جابر وتلاها عمران ابيعة بنت عمه … لجنها ماهي عادة عد ال عكاب الحرمة عدنا كدرها من كدر شيوخها با تنهان ولا تنطي
– نحن جينا بالمعروف وردتا نحل هالامر بلايا دم لجنك انت الما راضي بالمعروف يخشان واعلى اثر هالراي تحمل اثمك
– محشوم من كل اثم ماهو انا الارضى بنتي تعيش ابيت انا ما اخترته لها .. ومن ثمن الزواج يكع لو جان بولي امر البنت ، الشيخ الملج لها ما كاللكم البنت مالها ملجة بلا راي ابوها لو جدها من ابوها اعلمكم اعلى الاصول ان جنتم ما تعرفوها يا ال عكاب .
تكاونوا اعلى جلمته هاي وشلون يكللهم ما تعرفون الاصل
وتصايحوا وناس شبجت بناس جيف يعايرهم باثم محمود وبيعة بناته
وكع الامر اعلى مهلة ينطونها ال موازي لال عكاب خمس ٥ ايام .. يلاكون خالد ومرته ويردون مرجانة لاهله والا .. ياخذون بنته بالزور.
+
ديرة ال عكاب لامور خشان اعلى فعلته
صح الزواج وكع بلا رايه لجنها تظل بالاخير حرمة لال موازي دام ابنه خذه بنت وماطوله زواج كصه بكصه .. لزوم يكون الطلاك مثله وكلمن يرد الحرمة لاصلها
يازي كالتله : وبخت الله ان جان خليت احد يكرب شذرة
والله لا اخلي جثثهم شهور تاكل بيها الجلاب ليما تشبع .. ابو ابوه اليكرب وياخذ بنتي .
احتار خشان بامره
من جهة لومة عمامه وديرته
ومن جهة سوادة عملة خالد وغيبته
واحتار بكاعة يروح يرد ما يحاجي احد ملتهي بروحا
ويازي كلش خايفة من حيرة هشان يا خوفها يرضخ للواقع وينطي بنته خاطر لا يتفشل ويا الزلم
فكرت تحل امر بتها بفلوس
وما جان كدامها غير ذهبها .. فتحت صرايرها
كلبتهن .. دورتهن .. استغربت
صاحت اعلى امها : يمه ذهبي هين ما هو
– والله يا بنتي ما عرف
رديت ادورهن ابحوشهن .. يربي ذهبي ما اغير مجانه ولا احد يكربه صار اسنين صار عدي جهيل و ودكدك ما يوم واحد منهم تكرب لصراير الذهب عجل وينو
ما هليت حجرة من حجر الكلعة ما دورتن
وما لكيتهن .. اخر شي طفت اعلى بالي مرجان
هي اخر وحدة نظمت صرايري عد ما جبت
عزلت هدمات الجاهل عن هدماتي ونظفت حجرتي وتعرف كل صرايري وكلشي بحجرتي اعلى حطت ايدها
يا يمة ان جانت صدك
شكول وشحجي سوايتها لهاساه وجهي اسود وكل ما اريد احجي بحك بنت الكل يصيح اختج .. عجل لو اكللهم بايكتني شلون بيه
يعلتي النامت بزردومي
لا اكدر اضمها بين ضلوعي جن حاويتلي جمرة بصدري
ولا بيه افضح سرها واكول اختي نهبتني
خلتني مثل بلاع الموس لاهو المطلعه ولا هو البالعة منين ما يجرع ملجوم .
كلش اغتاض كلبي اعلى عملت اختي
بجيت بواجي ما بجيتها بذاك وكتي .. يا كسرتي ويا جزات معروفي … اذكر فزعتي الها عد ما خيرني خشانه بينه وبينها وكتله اتبرى مني خاطر امش لابوي وامعنه يجتلها ويغسل عاره ويظلمها .. جتلته وجرحت عمران بخنجر لجلها
تذكرت جرحت عمران
معكول من ذاك الزمن وعمران يتصيدلي وما لاكي اليحزني بيه مثل ما حزيت ايده بخنجر ؟ طالبني بثار ابن عمي وطفى ابزري
داورت دنياي ولفيتها ولكيت اليوفي مهيون
والحك ما مريود والجذب مطلوب وابو الوجهين ربحان
وصاحب الحك بين الذياب معيول لو شمى وضح حكه .
كبل مهلة ال موازي بيوم
جمعنا خشان نحن واهله واخوته وعمامه
وكال الهم جمعتكم اعلى امر .. ورايدكم تشهدون
-اعلى شنهو نشهد
– كاللهم عكب ما تكضون غداكم تشهدون
ذابح بيومها عجل الكل تغدا وانتخم بزاد خشان
والناس تاكل حجه خشان وندسني : اتبعيني
تبعته وانا النار مشتعلة جواي خاطر اعرف شنهو اليريد يعملهخاطر يحل هالمعضلة ومهلة موازي تكضي ضحى باجر
دش حجرة شذرة وكال : زيني البنت بذهابها
– اعلى راي ناوي يخشان
– تعرفين الراي عكب ما ابينو
– بنتي ما اردها يخشان
– البنت بوصايتي ماهي بوصاية احد غيري ..
– بس انا …
– انت لج كل الحشيمة ييازي .. جهزي البنت اعلى بخت الله
شذرة ادحج وترعش من الخوف
طلع ابوها من الحجرة وهي تكضبت بيدية : يم ابخت الله ما اريد ارد لعمران يمه ظالم جتلوني عين ولا تردوني والله ما احمل الردة ييمه
– ما اردج .. لو ادري اصير ضد ابوج لا اردج ولا ارضى بظليمتج .. بس تهيري دام ابوج طلب تتحضرين
لاون نطاوعه لي ما نعرف رايه
– ولو نطاني
– اكول لبسي ولا تخليني اطيح بيج يولي حركت روحي وان اكلج يمه شذرة اتبعي عكلج يمه شذرة فتحي عيونج الناس ذياب ولج يمه لا تمشين بورا احد لا تصدكين احد .. كضيتي عمرج مغمضة وفاهية ليما وصلتي لهذا حالج
لونج ذاك اليوم ما مطاوعه مرجانة وما رايحة وياها ورادة تاخذين اذني كبل لا ترحين جان صابج اللي صابج
ييمه ما اكرهج ولا رايده اكيدج من اغصبج ما تمشين الا بامري .. بس ييمه عيوني جانن بدال عيونج
وكلبي يحس كبل كلبج
لونج تابعتني ما جرالج اللي جرى يبت بطني
لجن ااااااخ من سوايتج
كومي البسي كبل لا ينهد ابوج بينا وتالي اثمه يكع بروسنا ما بروس ال موازي .. كومي
كمت ويا امي اتحضر والبس بذهبي
وكل دمعة اتجرى ولا الاخرى ..كلبي احسه وجر وابوي ما عرف بنيته وجنه عزم اعلى بيعتي خاطريبري ذمته ويبيض رايته جدام اهله وعشيرته
انا المبيوعة
وانا اليصفون حساباتهم بيه
وانا ياخذون غاياتهم وامنياتهم بظلمتي
عبن ما احجي عبن ما اعرف ادافع عن روحي
ما اعرف اكول الـ لا لاحد
استحي من جلمة الـ لا
بس ثاريها وادمنا الما تستحي وتسطي اعلى حك المستحي.
لبست ثيابي وتهيرت بزينتي وذهبي وكعدت انطر جيلة الرحمة اعلى احلامي وامنياتي .. جان النفس بالكرات يصعد بريتي
وبايام شباط وبرده ذاك الحر تلاكفني والحرك ينضح من كل مجان .. الجو بارد لجنه كلبي المستعر وحرارته علت اعلى برودة الجو
جانن عيوني مثل السجن لدموعي
كل دمعة واكفة اعلى جفن عيني كاضبة برموشي وتدحج راي ابوي خاطر تعرف امرها تكع لو تبرى .
+
كضوا الاكل والكل شرب جايه وكهوته
والكل ناطر ابوي ورايه .. حجه عمي وكالو : ها يخشان شنهي نضل نكوم
كالو : ما لاحد طلعة من هين كبل لا انا اكلكم اعلى رايي
-عجل شنهو الراي ؟
– تنطروا يجيكم الخبر
الكل دخل بتوتر ومحد يعرف براس ابوي شيدور
عيونه اتداور ووجه يسأل وجه ( تعرف شي ) وما لاحد جواب
فجأة اندكت الباب
ودخل شيخ ووراه عمي خيري وراشد
وامه وخواته وعمته ..
انا هين وكف كلبي
وعكلبي بطل يفسر ما عرفت شنهو نية ابوي
بس شوفة المحبوب طيرت كلبي بعيد وخلته يهيم
وكف ابوي وكالو : يا هلا شيخ تفضل تفضل
والكل يدحج بوجه الكل
كعد الشيخ وكعد راشد وابوه واهله بباحة الكلعة
ونحن النساوين ردينا ليورا وندحج وانا بسد امي
نظرتي .. وانا ادور جواب بوجهه وما لكيت
حجه : انا رايد اشهدكم اعلى عرس بتي
انا قررت اطي بنتي شذرة لابن خيري .. راشد
اعلى سنة الله ورسوله
انا سمعت هيج لو كلبي طار
شهكت من كل كلبي واحجي بروحي : انا بحلم لو جاي اتخايل ؟ ابوي الكاله حك لو انا اسمعت غلط
عمامي انصدموا من الخبر بس كالوا : بالمبارك
وامي ضلت واكفة لا تحجي ولا تطي ردة فعل
دموع الحزن الجانن مسجونات بين عيوني
انكلبن دموع فرح وهلن هلت واهلية بعرس معدان
كضبت امي وحضنتها
ابوي دحج بينا وامي مالها راي ادحج لابوي
اندارتلي وانا اكللها : يمه ابخت الله لا تعارضين ابوي خليه
– يولي شلون هيج
كطع كلامه ابوي وهو يكله للشيخ : املج شيخنا اعلى بركة الله
حجه الشيخ وملج وابوي اخذ الراي بلا ما يردلي واطى الموافكة وراشد حط ايده ايد الشيخ وابوي وصارت ملجتي اعلى راشد بلا حسبة بال .
جانت لحظات ما اصدكها حك
جنت اضن بروحي احلم .. اكرصت روحي خاطر ارد واكعد من الحلم بس جان حلم صدكي ..
هلهلوا وصفكوا وباركوا
بس الكل ما جان خاشة اباله هالزواجه
شلون وانا حرمة لعمران ابوي يتمم ملجتي اعلى راشد ؟
جا ابوي وكال : خيري وابنه من اهل بيتي وعد ما اطيتج لراشد جن منطيج لواحد من ولدي ومأمن عليج يمهم وعين عليج ما طولج عدهم وعيشتكم اعلى عيشتي
ما اوصيج ول يابه بعكل ومطاوع
تطاوعين زلمتج وتمشين بعكل وتصبرين اعلى المرة كبل الحلوة وياه .
باس راسي
وانا احس بكلبي يريد يطير من مجانه
حط ايده اعلى ظهري ومشاني واطاني لابو راشد كالو : هذه شذرتي وفتحة بزري .. هذة امانة الله عندك تراعيها وتخاف عليها جنها وحدة من بناتك
– اخليها بعيوني يبو خالد انا مصدك بحلم بعلم اناسبك واخذ وحدة من بناتك يراشد هاي زينة الله وهديته بالك تفرط بيها .
حط ايد شذرة بيد راشد وكال : اخذ يبني هاي شذرة ال عكاب صارت عدك يا بختك عد الله الليلة وانت تناسب ابو خالد .. خذها وخلها بين ضلوعك واحميها من الهوى .
خذاها من ايدها والضحكة شاركة ثمه من الفرحة
زفوها والكل مضى وطش خبر زواجة شذرة ال خشان اعلى راشد ابن خيري .
الا يازي ما جانت راضية واعترضت عكب ما كضت الهوسة واندارت لخشان : تضن بعملتك هاي حليتها
– انا صاحب الامر ييازي والشفت الراب بهالصوب
– تشيل شذرة من طين تكعها بوحل ؟
– راشد رايدها واهل راشد رايدينها وانا ايقنت البنت ماهي معارضه واولهم وتاليهم يشتغلون عدي ورزكتهم علي وامرهم بيدي .. ما اكدر اتطمن اعلى بنتي غير من تصير جدام عيني
– وبهالحال اصبحت جدام عينك خشان ذرله خدامك لا هم اخوتك ولا هم اهلك ولا هم منك شما ضاكت روحهم منك راح يطلعونه ابتك
– حده اليجيسها والله لا اخلي دمه بطولا
– يخشان شذرة ردت من بيت عمران يجرالها اسبوع شلون تطيها لواحد اخر
– ازواجها باطل الملجة الما يحضر بيها ولي امر البنت باطلة ومهي صحيحة
– عجل لو جانت بتك حبلة بابن عمران شراح تعمل ؟
دحج بوجهه : ماهي حبلى ولا تحطين هالامر ابالج
– شلون ما تحط هالامر ابالي وانت اطيت بنتك كبلا اتبين من امرها وكبل لا تبرى من اثم عمران .
– عجل شناطرة تكضي مهلة ال موازي وارد شذرة لديار عمران مجنونة
– وشتبين الحل لو جو امس وكالولك نريد حكنا ؟
– البنت اطيتها ومالكم حك عدي وانتهينا
– وتكضي يخشان ؟
– تكضي تكضي دام اطيتها وامنت اعليها .. تكضي
– والله وانا اشوفها ما تكضي .. ولو كضت باول ما تكضى بتاليها يخشان …

يتبع….

( صرخات مكتومة)
ما مرتاح
عيوني تستحي بس الدموع اوكاح
(كاظم اسماعيل الگاطع)
شذرة : انزفيت بحلم ما اصدك الصار صدك وايدي بيد ولفي !
سواها ابوي واطاني للراده كلبي ؟
نظرات امي جانن ما راضيات
بس من كثر فرحة كلبي ما جنت مهتمة براي امي
السواه ابوي كلش جبير ، جن بعيشة ضنك وشعور يذبح بعد ما باعني اخوي وتعدى علي عمران.
خذاني من بيت ابوي وبزفة هلاهل وصفكات
خذوني على بيت عمي خيري .. من المستحى ما شلت راسي ولا دحجت بوجه احد
راشد واكف صوبي .. لجنه ما حجه ولا فك ثمة بجلمة
لجني احس بدكات كلبه تريد تطلع من صدره
وفرحته باينة من هوسته وكضبتو لأيدي
شكثر كلبي ارتاح وانا صوبه
دخلنا دار ابو راشد. وانا هين اطمش ادور امي خواتي من ابوي محد منهن لحكتني بزفة .. حت لو راشد موجود بس حسيت بخوف عد ما ضليت وحدي
هوسة وصفكة وهلاهيل وينشدن
كام راشد وضليت لوحدي .. عيون النسوان ضايكتني
واسمع وحدة تكل لمراشد ( وي يدادة شجرالكم راشد ابو طول الحلو .. تاخذولا هالسويده )
تفاجئت بام راشد تكللها ( وي داده خلي بالكلب بالكلب ليش احد يكدر يحجي انغصبنا عليها غصب )
ما فهمت شني غصبوني ؟
راشد رايدني من زمان منهو اليغصبه علي ؟
وباين فرحان ما مغصوب عجل عليش خالتي تحجي هكذ ؟
شلون ما جان كضوا العرس
وخذوني لحجرة زغيرة مفروش بيها مطرحين ووسادتين وصرارة مالت هدوم يم راس المطرح
كعدت والخوف كاضبني
لحد طب لحد اجالي ولحد شافني
دخلوني ومشوا .. ضليت خيفانة وانا انطر احد يجي
شوية ليغاد جا راشد ودخل بدشداشتو البيضة وملتف راسو بغترة حمرة ، دش متوتر ما عرف شيكول .. تهوس
واندار ينزع الغترة
انا مدنجة ما رفعت راسي ولا نطكت بجلمة
اندار كعد ليغاد عني ، احسه يطمش بيه ويتحمد الله ويتشكر
.. حجه : مرتاحة ؟
هزيت راسي بمعنى ( اي )
متوتر حيل ما يعرف شيكول وشيحجي
صاح ( يماااااا اكو عشا للعروس )
جت امه فتحت الباب ( ها يمه )
– عشا عشا يمكنها جوعانة
– يا عشى انت يمة
واشرتلو بيدها ومدري شتغمزلو
سكت هو .. انا مدنجة بس احس عليهم
جا يمي حجه ( جوعانة )
ما رديت
سكت .. هدوء
توتر خوف وحس كلوبنا ينسمع
حجه : اااا انا كلش فرحان .. صرلي يومين ما نايم ولا ضايك النوم .. عد ما كالي ابوي بموافكت ابوج حسيت روحي طير طرت بسما الله اعلى فرحة كلبي
دحج واتكرب مني : انا ما مصدك ابوج اطاج
ضليت ساكته بس كلبي طاير من الفرحة وانا ولفي بصفي يحجي وياي ويحاجيني اعلى شعوره .. شعوري بهاللحظة ماكو جلمة توصفه.
نصى ضوا الفانوس واكربلي ..
بس عد ما اكرب الا يكلي : ما جاي يطلع دم .
ما فهمت جلمته شنهي ؟
عليش يطلع دم .. كام من عدي
غسل ورد اكرب مرة اللخ ، الا يزكح بيه : دم ماكو ياهو الكاربج كبلي ؟
– مدري انا ما عرف
– شنهو الما تعرفين
هيانج انت ما بنت .. جاي تضحكين علي انت وابوووووج
احجي
كضبني من اركبتي يخنك بيه ويصيح
ركضوا امه وابوه دخلوا علينا يصيحون : خير خير فك عنها يول لا يحس ابوه ول عنهاااااا
– وي داده انهجم بيتنا
راشد : ماهي بنت يابه بنتو لخشان ماهي بنت
– ادرى انا ادرى بوضعها حط حجرة بثمك واسكت وحيل عنها
– شنهو يعني تدري تدري بيش
– ما انت الجتلت روحك تريدها ما هرجت الدنيا بسكرك وشربك وفاصحنا خاطر تاخذها هاي هي جدامك لا تفك ثمك ولا تحجي اي شي ارضى بكسمتك جت عندك واسكت
– لا اسكت شنهو انا رايد افهم شنهو التدري بيه انت .. البنت ياهو الكاربلها كبلي
– عدي الليلة على خير راشد رلا تكحمنا ويا ابوها
– اهو يدري بعاره ومن راد يطمه اطاها لي ؟
– بالضبط … طم عاروا وانت ساكت نحن عايشين بخيره عد ما تفج ثمك انا وانت وامك وخوانك نصبح بالشارع تعضنا الجلاب وتعوي ما عدنا كرصة خبز نسد بيها جوعنا
– انا عينا رايد اعرف شنهو الضامه عني
– يول اهلها على جيه صم ثمك واسكت لحين ما يروحون
– عد ما يجون خل ياخذون بتهم ما عدت رايدها البنت الماهي شريفة ما تلوكلي .. وانا الجنت مخدوع واكول بنت من ال خشان وشايفهم بعين الجبيرة تاليتها بنتهم ملطخة بسمعتهم وايدينا ننظف وراهم
ام راشد: سمعة ال خشان اعلى كل السان الحين الديرة كلها تحجي بسالفة خالد وسوايتو انت النايم جفي وما تدري بالدنيا شصايبها
خيري : اسكتي يولي ما عايزنا مصايب .. اطمري ابنج ولا تخلي يهجولنا بهالليل
حجت امو : ونصم ثمنا ونرضى بعارهم خاطر ما نتهجول تبيع كرامتك وعزة ابنك خاطر ما يطردك من كاعو
– اي اتحمل ونتحمل وغصبا ما على الكل نتحمل عار خشان خاطر نعيش مو ابنج رادها ماهو الدك وناح لجلها وهاي هيج جداموا وللمرة الاخيرة اكلكم حسكم ما اسمعو .. لا تفجعونا بهالليل
كام راشد يصيح وعصبي
ويغلط ويشتمني ويكلي : ثاري ابوج ما مطيج من طيب خاطر شافج عار عليه وراد يخلص من عارو براسي راد ينظف اسمو بيا .. انا جرجف لعار ابوج يمحي سواد وجهو بيا
يصرخ ويكرب ويهد ويريد يطكني وامه ترده عني وتكلو : يول لا يجي احد من اهلها اسكت ما وكته الحجي .. بعدين اصبر
– شنهو الاصبر يمه ابوي داري بيها عار ورضاها علي
– ابوك مستعد يحط اركابنا تحت جدم خشان ويدوس علينا لجل كم كرش خشان يتصدق بيهن علينا ونحن راعين حلاله وكاعه وخيره وحستنا نخالة وهاي .. عد ما راد ينطينا مرة اطاها بعارها
انا اسمع ودموعي تجري
انا جان الحايط حجه انا حجيت لجن ما عرفت هم ما يدرون بسالفتي عبن كل الديرة درت بسالفة خالد وعمران حتى ابو راشد الا هو مالو خبر!
وهم يصيحون ويتكاونون وحسهم عالي
صاح ابوهم : اس اس اس جا ابو خالد جا بو خالد جلمة ما اسمع اليغلط جدامة بجلمة والله اشردو نعيمة لو حجيتي اطردج لهلج والله
حجاها وطلع وهي تكلو : عشتو جو يطمنون اعلى عارهم انطم لو بعده
راشد راد يطلع كالتو : استر علينا لا يهجولنا ابوك
جاي تحجي سمعت حس ابوي وامي وراه
وهم بالباحة .. حسيتهم بجيتهم ريح باردة عكب هالصياح والكوان يحضورهم البيت كام يصوصي من الهدوء
راشد لبس غترته وطلع
وامه كرمتني وكرصتني من زندي وخزتني : حسج عينج اسمعج تحجين شي جدام ابوج لو تكولين عالو علي .. محد يخلصج مني.
– ما احجي شي والله
– حسي وجهج وامشي وياي
مسحت وجهي وطلعت راشد دنج على ايد ابوي يحبها ويكلو : هلا بيك عمي
وامو رحبت بامي : هلا زين ما نورنا .. هلا بهالجية تفضلوا تفضلو
وتباوست ويا امي
وامي كربتلي تحبني : بنيتي يمه
وحضنتني عد ما حضنتني انا دمعت عيوني
شالت وجهي : خير يمه شجالج
ابوي جان يحجي ويا ابو راشد عد ما سمع امي كطع سالفته وركز ويا امي وكاللها : وش بها ؟
شذرة : ما بيه شي بس وحشة بكلبي عبن بعد ما ارد للكلعة وياكم
تبسمت امي وهي تكلي : كلعتنا ييما بكفاج وكت اليعجبج حولي والدار دارج وين ما تربين
حجت ام راشد : نحن بعد اهلج شنهو الكلعة حشى اهلها تولي شذرتنا هين مجانها بنيتنا حالها حال بناتنا نشيلها بعيونا
خشان : الله يخليكم بعد ما اوصيكم بيها .. راشد
راشد : لا توصي عمي احطها بعيوني
حجاها كوة على كلبه بدون شعور ولا بسمه
ادحج وجم ما مثل البكلبهم .. وجم جدام ابوي منشرح ويحسوونا احباب وهم خلفه ماهم اصحاب .
همست لي امي : صاير شي يبنتي ؟
ام راشد ادحج علي ومركزة ويانا ، حجيت : لا بس شوية خايفة
– لا تخافين من شي ونحن موجودين
واي شي بجرى وياج شمريلنا وكوليلنا خبر
تمام ؟
– تمام
اندارت امي لخالتي نعيمة وكالتلها : عشاهم جاهز خلي واحد من الولد يندار للكلعة يجيبو
– ان شاءالله الحين ولدنا يجيبوه بس لو ما مكلفة روحج يم جابر انا جاي اعمل الهم العشا
– كثر خيرج ما عليج زود لجن هالليلة عشاهم علينا
بعد ما اوصيج بشذرة هاي بنتي ووحيدتي
يعني اليندل دمعة منها انزل اعليه مصايب الله بكونهن اعلى راسه
– لا الله لا يجيب الدموع وهي بنتي ان شاءالله احطها بعيني
سلموا علينا وكاموا
ابوي جا حبني من راسي واطاني فلوس وكالي : ما احكت اجيبلج صوغة عرس هاي خليهن تحت ايدج وصوغتج تصل ان شاءالله
طبطب اعلى جتفي ومشى عني
وعمي خيري ومرتو يدحجون على الفلوس الحطها بيدي
طلعوا امي وابوي راشد دخل للحجرة بساع والولد راحوا جابوا صينية العشا
جان عشا مخصوص للعرسان امي كالت
بس عد ما جابو اخوة راشد صينية العشا من الباب انخبصو واحد يكلو : اكف اكف بس هاي
وامو تصيح : حيل عنها خل نتعشى .. ابعد
وخيري يصيح : هلله هلله الليلة نترس بطونا لحمممممم
حطوا الصينية
بيها ما لذ وطاب فاكهة ولحم وتمن وخضورات ومرك وصينية محملة التموا عليها كلهم ياكلون وانا جاعدة على صفحة اريد اكوم للحجرة واستحي اكوم .
اندارت ام راشد من الصينية وهي تاكل : تاكلين لو لا ؟ راح يكضوا يولي
– بس اريد اروح للحجرة
خيري: عروس شتشتهي اعزليلها شوية اعلى صفحة تاكلو عد ما تجوع
– شعدل يرحم ابيك هم ولدك خلو شي .. انا اعمللهم عود اذا جاعو .
تحجي والاكل بحلكها .. ودنجت تكمل تاكل
طلع راشد صاح : شذرررة
اندرت له ، اشرلي ادخل لحجرتو
كمت من مكاني وتبعتو .. ودخلت الحجرة
حجه : اكعدي هينا
كعدت وانا خيفانة
منو من البيت غريب عليّ، من اهلو من كلشي حاسة بخوف بس كاتمة هالخوف بين اضلاعي
حجه : يا بنت الناس عمر وانا انطر تصيرين لي واحويج انا ما رايد اضرج ولا رايد اكهرج بس حكي اعرف شنهو الصار وياج .. شنهو الجرى والحصل انا ما عرف
كل السمعت بيه اطوج لال موازي
من ساعتها انا والشرب ما تفاركنا ليما ابوج ودى عليه وجاني ابوي كالي ابو خالد يريدك
تغسلت وصحيت روحي ومشيتله كال ( تحصر بتي اليوم عروستك وراح تاخذها من بيتي بزفة يسمع صيتها الاول والاخر ) انا رحت طاير بفرحة كلبي ما دريت ليش وشلون اطاج ولا شنهو الجاري وياج
حكي لو مو حكي اعرف ؟
هو يحجي وانا ساكتة استمع
رد : ما تحجين مكسورة عينج كليلي فهميني لا تخلين يصير بيه شي واموت البنت النطرتها عمر من تصيرلي الاكيها ماهي مصونة شلون ارضاها
احجي راح اسمعج
– انا ..
– انت شنهو .. اي احجي طلعيها
– انا مالي غرض بالصار
– انا رايد تشرحيلي الصار ما الصوج بيمن
-هو يوم التشاوفنا بالبستان جانت خالتي وياي
– مرجانة اعرفها شفتها
– وخالد جان موجود
– اذكر شفتو صح
– بيومها كالولي امشي ويانا واكنعوني وصدكتهم ومشيت وياهم بس باين جانو متفكين يطوني لعمران ويتزوجون هم
– يطوج شلون .. عليش
– عمران ناهي على خالتي واتفك ويا خالد يطيني اله ويكطع النهوة ويطي مرجانة وهذا الجرى.
-وشجرى بعدها ؟
سكتت فد اختنكت ودموعي تجمعت بعيني ونزلن على خديني
حجه : كملي رايد اعرف اذا خالد اطلج شلون رديتي ؟
– امي ردتني
– كربج ؟
سكتت ، اردف : لا تسكتين كليلي شسوالج ؟
– جتلني وحركتي وعمل بيه الما يخطر براس بشر
خالد هرب بخالتي وال موازي يريدوني ارد لعمران لو خالد يرد مرجانة .. وخاطر ابوي لا يردني اطاني الك
– خاطر اخمد هالعار الجراه خالد خاطر ابيض وجوهكم
وصلة مسح عد ابوج نحن ينظف بينا اثام اهله
سلعة مالها كل كيمة
نعلة الله عليه وعلى خيره
وانا اللي جنت احسب تعاطف وياي وحسبتي النه واطاني بته
والله لو ما جنتي بعار وما جنتي بهذا حالج
الا ما يطيج ولا يدحج بركعة وجهنا
لجن راد ينظف اسمه بينا
سلع نحن عد ابووووووج
كام يصيح بالحجرة ويشتم بابوي ويغلط
انا مدنجة وبس دمعتي على خذي .. طلع من الحجرة شوي ورد جايب وياه دولكة وبطل .. وتنحى عني غاد وكعد يشرب ويغلط ويشتم ويتغنى بالشتايم ليما سكر كام يغني ويجر مواويل وما يعرف يغلط اعلى من ويسب من.
تمددت انام عكب ما نشفت عيني من البجى
صفنت بروحي حتى ولفي من خذيته ما تهنيت بيه ؟
عليش مكتوب علي اعيش الهم وما ارتاح
ضليت الوم ابختي ليما غفت عيني ونمت
وراشد نايم بين بيالات السرب مالتو
للفجر بعدني ما شبعانة نوم
دخلت ام راشد للحجرة ندهتني : اكعدي يلا راح تطلع الشمس
اندارت ادحج براشد وهي تكلي : عمت عيني باول ليلته نومتي اعلى وجهو كفي .. اشوى شراح يشوف ويجيلو من تحت راسج وراس ابوج.. كومي يلا اكفي خاطر تكضين وياي الشغل.
كمت وياها رحت اغسل بعذني اعلي بوجهي صاحت : كل هذا غسال كضى الماي بس عليج فرحانة بروحها عروس عشتو دادة وعارها نحن المبتلين بينو
ان جان الحايط يرد انا ارد
حسيت روحي وطلعت ، كامت تسخرني وياها خاطر نكضي التريوكة .. ونحن جاي نشتغل وراسي مصدع ما ماكلة طول امس واليوم ولا راوية نوم .. اندكت بابهم
طلعت تصيح : ياهوووو
جابر: انا جابر انا
فتحتلو الباب شايل صينية متروسة كشطة وبيض وجبنة وعسل وزيتون .
تلكته من ايدو وهي تكله : مشكور جزاكم الله الف خير كصرت امك يولو عليش ما جتي تتريك ويانا
– لا مشكورة بس كالتلي ودي ريوك شذرة وسلملي عليهم ورد
– وعليكم السلام هلا ومرحبا هلا ببيت ابو خالد تزورونا وتنورونا يخالة نسابة الخير ان شاءالله كل الهلا .
سلم عليها اخوي سكت الباب وصاحت : اشوى اكلها نحصل اجل من تحت راسج ما ربحنا بشوفتج الحلوة .
حطت الصينية وراحت تكعد بعمي خيري ولمتهم
رادت تكعد براشد بس ما رضى يكعد
كالت : نصيبه ما ياكل هالخير هدو بنص السم مالو
التموا على الاكل تريكوا وانا تصيح علي خاطر اكمل شغلها
ليما شبع عمي خيري واندار فتح عينه من النوم وصحى كال : عجل شذرة عليش ما اتريك ؟
– تلحك تلحك زملتها وما اكل عود من يكعد تعمله اكل وتاكل وياه
– تروح تكع يولو لو يصير بيها شي شيفكنا من ابوها الا يكصب اركابنا تعالي يولي اكلي اكربي
– وليمته نضل خيفانين من ابوها وجاك الذيب اجاك الواوي
عيشتيش
– ما عاجبتج عيشة الخدمة العايشها يبنت مضر ذولاكه اهلج وفارجي.
– عشتو فوك ضنكة عيشتو ايتبختر فوكنا واهو مشغلنا خدم عد ويحد حاسبنا ممسحة لعارو
– يولي اكضبي السانج تروح هالعجية تفشي عد ابوها ونروح خمسة بشط ما ينلكيلنا اثر
– فوك شينها تروح تفشي دا اشوف لو مشت لابوها وفشت عن اسرارنا وطلكها ترد لال موازي يتجابل عمران اشوالها .. الا تفشين يشذرة ؟
– لا خالتي والله ما افشي شي يم احد انا مالي شي باحد
– اشوى امشي شوفي راشد ما كعد ، سطبل الخيل من امس محد ساكي الخيول وراعيهن
خلصت شغلي ورحت انده براسد ما يكعد
جابلتو وكعدت اطمش بيه .. جنت اتمنى اكعد جداموا هالكعدة هلي عد ما صرت عندو ضاكت روحي .. الواكع ما جا على هوى احلامي .. جنت اضنو يهيم بيا يدللني يجابلني
ما يسكر ويشتم ويغلط فوك حال اهلو
احلام العرس مثل غيم الصيف .. لملومة وهم .
خالتي رادتني اطلع للكاع مالت ابوي اعاونها بس عمي خيري ما رضى كاللها : اسبوع ما تطلع لا تقشلينا ويا ابوها .
اطتني اكوامة شليف كالتلي فكيهن واعزلي الزين من الما زين وحطيهن بالسلال طن خاطر الضحى يروح بيهن خيري لمركز المدينة يبيعهن ويجي .
كعدت افرزن بين المخضر واشتغل
احس ظهر راح ينكسم من التعب .. ايدي ما كامت تاخذ شغل
خويت جوع ونعاس وتعب .. بس ما بيه اهد
اول يوم الي عدهم واتعاجز عن الشغل شيكولون
اخاف يكومون يحجون لو راشد يصير عصبي ويزيد علي
اتحمل واسكت احسن
الشغل نا موت احد
اكمل وارتاح
اي .. اتحمل ليما اكمل
جاي اشتغل كعد راشد
رد الحيل بيه من شفتو .. كمت لحيلي وكفتلو
ما عبرني .. عبرني وهو يروح يغسل
رد ، كتلو : اعملك تريوكة ؟
دحج بيا : روحي ارتاحي انا اكل اي شي
– لا ما تعبانة
– امشي فاركي عني .. نامي
– لا خاف خالتي تجي تحجي
ضل يدحج علي ما حجه خلا وكام اخذلو كرصة خبز وجر طماطة فشكها بالخبزة ولفها وراح يمشي وهو ياكل بلفتو وطلع من البيت .
رديت اكضي الشغل
بس جثير ما عد يكضي ..
وانا كاعدة حسيت بهوسة برا البيت وصياح جريب من بيت ابوي .. جريت شيلتي على وجهي وفكيت الباب اطمش وادعي الله تعدي على خير .
وانا اطمش جت خالتي تركض مفزوعة وهي تصيح : ساعة الكسرة يولي يوم الاجبلتي علينا راح يكع بيها وليدي وي دادة وليدي راح يروح .. يربي دخيلك ابني .. يا ويلي يا ويلي
ابني ييمة ابني راح يروووووح من اديا
وكفت بالباب تلطم على وجهه وتصرخ وتولول
وانا كلبي نار اطمش
خايفة لا يجون ال موازي لبيت عمي خيري ياخذوني منم ويردوني لعمران .. ضيم راشد ولا ساعة ويا عمران الشفتو ويا عمران لا ينحجي ولا ينكال اذبح روحي ولا اردلو
ابجي بلهفة وفحطانة وخالتي تولول وتدعي
جا جم مرية وكفت ويا خالتي وهي كامت تحجيلهن شلون اخوي اطاني لال موازي وشرد ويا صاحبته وابوي غصبهم عليه وتسولف وتشجي
شافت امي من ابعيد سكتت
كربت امي وهي كالت : وي يدادة كلبي نار عليكم شجاريلكم
– ادخلي شذرة داخل ولا تخليها تراوي نفسها لاحد خشان يحلها
– وانا صالي ساعة اكلها ولج يمه ادخلي يولي لا يكعون ييج ما ترضى هالبنت هم راسها يابس الا راشد وينو
– اهو وخيري ويا ابو جابر
– ابو جابر ياهو .. ها ابو خالد اي صار ابو جابر اشوى يدادة شحصليتو من خالد لعن الله فعلته العمية جاب المصايب علينا هسه انا ما خايفة على راشد ولا على خيري فدوة بس كون ابو خالد ااااه جابر اي ابو جابر بس كونن ابو جابر بخير يدادة كلوبنا نار .. تكولين تفض
– نعيمة لا تضلين تولولين ، دشي داخل والزلم تحلها نحن يجيلنا الصافي
– اي يجيلنا الصافي ليش لا .. يروح خيري ويروح راشد ويتجتلون ونحن يجيلنا الصافي .. الخير جاي ان شاءالله اعلى عين شذرة جاي مثل الماي جثيير
هدتها امي ودخلت وهي تكلي : وجهج اصفر يولي شجالو
– يمة كون ياخذوني
– ياهو البايع روحا ويجيسج يبنتي بردي كلبج ودشي تكليلج لكمة ارتاحي وجهج شاير خشبة من الخوف ادخلي .. ما ماكلة انت
نعيمة : وي يدادة توسلنا بيها ردنا يولي اكربي اكلي تريكي وذرة من السانة وكعت وهي ولا جنها لا رضت تاكل ولا رضت تحط شي بحلكها .. خايفة اي حكها عجل هينة السالفة البنية ماخذين شرفها وعايبيها شلون ترتاح
– نعيمة اكصري السانج ولا تخليني اسمعو .. بنتي ماهي عيب ولا هي ناكصة شرف اطاها اخوها زواجة كصة بكصة وما رضينا وفكينا كسمتها لا تعيبينها وهي ما بيها عيب
– لا يا .. دخيل بختج يداده اهي مثل بنتي وانا خيفانة عليها
الحين ابني ورجلي بالنار واكول فدوة بس كونن انتم بخير .. اي شيهمنا غير سلامتكم راعين لكمتنا يدادة خيرنا من خيركم الله يحفظكم ويسلمكم وتعدي على خير
يولي ضاري .. تعال يمه خل اروح ارد الفرس هدو راشد بلا ما يردو .. امشي البيت بيتج يدادة اروح ارد الخيل واشوف شكو ماكو وارد .
اندارت طلعت واني دارت عنها : شكثر ترغي هالمرة الله يعينج عليها شيجرالج منها ، احجيلي عليش ما ماكلة وجهج ما بي دم
– خيفانة ييمة
– تخافين وابوج موجود
ولونها الگسمة صارت بغير هواي بس ابوج ما راد ظليمتج درى براشد رايدج وحس انت داريه واطاج اله وهاي انت بدار راشد وتحت عين ابوج محد يجيسج ولا يكدر احد يكربج دام خشم ابوج يشتم الهوى .. طمني بالج ولا تهمين .
ودت على الكلعة يجيبولي اكل .. حطت جدامي وخلتني اكل وكالتلي : ارتاحي انا هين عد ما تكضي واسمع خبر واطمن على وضعج ارد للكلعة ، نامي وارتاحي
اكل تحت عينها ورحت لمطرحي اغفي وهي عد راسي
ليما حل المغرب .. كعدت على دشت راشد للحجرة ، شلت شيلتي فوك راسي وادحج امي ما هي .. اندرتلو : ها
ما رد تمدد على مطرحو وحط ايد فوك وجهه
رديت حجيت : كضت ؟
– ابوج راح يكضيها بفلوس ويجفي شرهم عن الديرة
اندار يدحج بوجهي : جم يوم كربلج عمران
– يومين ضليت عندو
– كشفج
– سكتت
تنهد واندر رد ايده على وجهو ويكلي : لو ما بيج عيب ما نطوج لونج عايبة ذبوج بركبتي دنعل الساعة التورطت بشوفج يولي .
-انت ما رايدني
-اريد وحدة كاشفها غيري عليش ناكص غيرة لو شرف ما عدي بس ابوج ال**** مسح عارج براسي .
– الصار ماهو بيدي وايام الشفتهن بال موازي مرارتهن ما اريد اذكرها ايام سودة .. تعرف من كبل فجة عيني عليك لا جنت هاوية غيرك ولا ودي باحد سواك .. بس شنهو البيدي .
يستمع وحاط ايدو
شالها ودحج بيا ، هز راسه ور اغمض ومنسدح
ضليت كاعدة يمو حجيت : اسويلك اكل
ما رد علي
طبت امه وتخصرتلي : يالمسعدة من الضحى وليجاي نايمة وصينيتج اعلى حطتها متزقنبة انت وامج ومهمودة لا يكون حاسبتنا خذم عدج هين .
كبل لا اجاوبها دفرت راسد وهي تكلو : انكلع من هين هذا مطرحي ومطرح ابوك بسنا من امس ولليوم نايمين بالباحة لخاطرك وخاطر هالعيبة هااااي كووووم
وانت امشي حملي السلالي كلهن على العربانة البالباب يااااله
ردها راشد : عربانتيش يمة لا تطلع هديها
– انجعم اشو انجعم مشتغلة الغيرة عده ابو الگلك ما يغار من اهله يخدمون عد اهل هالجحشة بس تشيلو الغيرة لو خدمة اهلو
– يمة ما هيج بس ما اريدها تطلع برا باب البيت
-انثبر المغرب كرب ينزل انطم واسكت ، انت ما تكومين شناطرة نتكاون انا رابني لاجلج خاطر ما يخليج تطلعين كووومي
– لا ما هيج بس السلال اثكال ما اطيك شيلتهن
– دبري امرج يااااله فاركي
كمت منهم وهي تكلو : لا تدحج زيغ عينك لا ما اطلع ضيم اهلها الشايفينو من عينها ما اطلع نعيمة بنت مضر .
طلع انكل السلال بس كل سلة ثكيلة خيل ما تنشال
اشيل منها شوي خطوتين وانزل .. وارد لشيل وعلى هالرنة وكت يل وصلتها العربانة .. اريد احملها للعربانة ما كدرت
طلعت تصيح وتولول علي ودفعتي وعي تحجي طكتني بالعربانة وتكلي : كل عمرنا ابوج مشغلنا هالشغل والفلوس بجيبو ونحن حصتنا كحي .
كمت احاول اشيل بيهن ومحد يعاوني والليل نزل
حسيت بظهري طك بعد ما اكدر اشيل اي شي
بس ما بيدي مجبورة اكضي الشغل خاف لا تحجي
لحد ما مروا ناس من العوجي ويحجون طلع راشد صاح : فوتي داخل
– والسلال
– فوتي يولي بلا حجي
فتت .. سخرتني ع العشا
حجيها كلو مزامخ ومصايح
اعرفها من كبل اول مرة ادري بيها هيج كبل من جانت تجينا تتفدانا تفدي وتحبحب بينا واحد واحد ونحسبها وحدة منه .. تعجبت بيها هيج طلعت تكرهنا
كضيت العشا والتموا .. مالي مجان بينهم اكل
اندرت اريد ادخل للحجرة ، صاحت : منا وجاي ما تنامين بالحجرة مكانج هين بين راشد واخوته
راشد : بس يمه
– وغمة انت تسكت
– يمة شلون تنام بتص اخوتي
خيري : يولي عرسان شلون تنومينم بنص الولد يمكنهم يريدون ياخذون راحتم .. خلي الحجرة الهم شهر
– وانا انطر شهر ليما تلف راس ابني وتشوش عليه
– يولي غير مرتو
– مرتو ياهي اجت امس صارت مرتو واطي لها .. ابني هاذ فجة عيني وبزري اعلى يا مال اشيلو واطي الها .. خاطر تشوبش عليه مثل ما شوبشت امها ولعبت بعكل خشان وخلت ضرايرها سداين والهن عيون لا نفع ولا دفع كل الزود لها وهي صاحبة الجلمة .. وتريد اخلي بتها هيج .. شجالي .
راشد: يمه خوبن رديها عليمن مزوجتني اذا ما تريدينها يمي
– انجعم انت شو ومالك غرض خلص عشاك وامش نام الفجر لازم تطلعون تودون المخضر هاذ ما بعتو اليوم ولو ضل اكثر وخاس خشان يشوي اعلى اذاناتنه بصل .. ياله كوم .
كام راشد من العشة وهي تلف وتاكل
حجه عمي خيري كالي : اكربي تعشي ول يابه
اكربت عد ما راشد افرغ مجانو
شالت صحن راشد من جدامي وضافتو لصحنها وشالت الصحن جريب الوجهه تاكل بيه ، حجه عمي : وشتاكل البنت
– هذا خير الله جدامها
وادحج ع الخبز الضل من راشد : خل تاكلو كلو نعمة الله لو ما يعجبها اكلنا بنت خشان .
ضليت ادحج بيها .. اعلى يا ضيم اجبلت
ما كلت شي ضليت ساكته .. حجه عمي وهو يشيل الخبز يحطو جدامي : اكلي اكلي
– لا انا شبعانة امي ودتلي الضحى غدة كلت ونمت ما جوعانة
– جابتلها هبرة لحم هاكبرتها لغفتها كلها اجي الكاي بس الدسم بالماعون والصينية اعلى حطتها ونايمة اكول خاف على روحك انت لا تخاف اعلى بنت يازي هي وامها حيايا ياخذنك للشط ويردنك عطشان .
جاي تحجي اندكت الباب
كام ضاري للباب ، وهي تصيح : ياهو الباب ابني
رد ضاري وهو يكلو لراشد : عمران بالباب ورايدك
فزوا كلم .. واولهم كلبي فز من الخوف عد ما سمعت : عمران اعلى الباب ….

يتبع….

( وهمان )
على بير المنايا وجيت عطشان
مجبور وشربت الماي راكد
( الكبير كاظم اسماعيل گاطع)
فز راشد من مجانو يطلع لعمران ع الباب ..
فكو وكاله : شرايد جاي لهين
– المرة البدارك حرمتي ، لك مهلة منا لباجر المسا ان ما ردت شذرة لآل موازي .. ما تعرف شعمل بحالكم
– المرة حرمتي جدام خلك الله كلها وان شفت على باب داري نوبة اللخ لا اكطعه لراسك واعلكو اباب اهلك .. فارك ولا تشوفنا وجهك
– انتم مكطمين ومالكم ظهر خاطر احكمم واكعد ويا عشايركم لجن اسمع والله واسم الله ان ما ردت انا وياك والشارع
– هدد وانا اهدد ونشوف ياهو العد كلمته
حجاها وكرب منو .. كضبو عمران من هدومه .. واحد يخزر باللاخ هدو عمران وراشد دفعه .. ردفه : هينه يراشد .. ندحج ونشوف تاليها المن .
عاف البيت ومشى
دخل للبيت امه وراه صرخت : شرايد منك
ما رد على امو ودخل بهمة كضبني من هدومي وجرني وهو يكلي : كربي هين هسا تحجيلي الحك .. عمران طلكج لو بعدج على ذكتو واطوج
كمت ابجي واشاكف عن روحي
كام يصيح : دحجي هين احاجييييج طلكاج لو لاااااا
جاوبينيييي
ركض ابوه وهو يكلو : عنها يولي شلون تحجي وانت كايم فوك راسها يولو بعد عنها
– الحين اريد اعرف هي لطلكت لو لا
– واهي علم معرفة يولي ما تعرف شي من امرها مثل حلال الأبل منين ما يديرونها تندار امشنا نروح لابوها نخبره بهداد عمران
دفع شذرة عنو
وكاللها : هساه تلبسين عباتج ونكابج وتجين ويانا لبيت الخلفوج تا نعرف الحك من الباطل يلااااا
ركضت تلبس بعبايتها خايفة وتبجي
لبست نعيمة العباية ورافكتها وطلعوا لكلعة خشان
دكو الباب عكب وذان العشا .. صاح جابر : ياااااهو
خيري : انا خيري انا جايب شذرة وياي رايدين نشوف بو خالد
فتح الباب : هلا حياكم الله عمي
– ابوك موجود
– اي عمي موجود تفضلوا هلا بيكم
دخلوا وشذرة وياهم متلفلفة بعباتها وبس عيونها طالعة من النكاب وراشد خلف ابوه يتنفخ ويتهفهف ومحتقن وروحه طالعة ، طلع خشان من حجرته وهو يرحب بيهم : يا هلا يا هلا حي الله من جا تفضلو
– زاد فضلك يبو خالد نحن نتعذر ان جان جينا بوكت ماهو مناسب
– لا لا هلا بيكم بكل وكت
طلعت يازي وعي حاطة عباتها ، سلمت عليهم كاللها خشان : اكهوتج يم جابر
– اي ، تامر
حجت واشرت لشذرة كامت وياها وتبعتها
راحن بناحية الكلعة شغلة الشغلة وحطت الدلة وكالتلها : شنهو جيتهم عيالج شوراهم
– يمه عمران معد يعيفني لحالي لحكني اعلى راشد يهددو
– وبيش يهددا تكاتبو على فلوس يطيهم وتفض بعد شنهو اليريدو عمران
– يكلو جدامك منا لباجر المسا ان ما عفتها انا وياك والشارع
– وراشد خوفان من تهديد عمران
– لا ماهو خيفان بس يكلي طلكاج لو لا
– كون جتلج
– لا ما جتلني بس محتار بعمران معد يفك عنم
– هدج من عمران بيت خيري شلونم وياج
– زينين
– ما مضايكيج بشي
– لا فد ..
– شنهو ؟
-رايدة بس هالايام تكضي وعمران يفج منا خاطر اعيش هنية
– تكضي تكضي بس اكلج ها ، منتي خادمتهم يبتي .. رجلج اطيعي تخدمينو رجلج هاذ لجن اهل خيري منتي خادمتم لو ساكو عليج لا تسكتين اليسكت ييمى يكضي عمرو مديوس ، خيري ام وجهين انا اعرفها لا تأمنيلها
جاي تحجي دخلت سميعة
صبت امي الكهوة وكالتلي امشي جدامي كدميها لعيالح
خذيت الكهوة ورحت اصبلهم، حجه ابوي وكالم : شحدا اليدوس الكاع ويكربكم .. لا اكص جدموا
– والنعم منك يبو خالد نحن تحت راية الله ورايتكم تعرف ابني ماهو راعي مشاكل واهو تربات ايدك وخادمك بس عمران جنا حاط حطاطو عد ما شاف نفسو ما كدرلك اندار لينا يهاددنا
– لا تخاف يخيري انا له
راشد : من رخصة عمي وابوي انا بس رايد افهم شغلة اذا ترضالي
خشان : احجي يراشد
– عد ما خذيتو شذرة من ال موازي طلكاها لو بعدها على ذمتو ؟
– العرس باطل يراشد دام ماهو بشور ابوها ما كع الزواج
– بس هو يكول حرمتي وعلى ذمتي ، خافنو يحكني بعد يومين واطلع ماخذ حرمتو .. وحجي الناس ما احملو عمي
شذرة : هو ما … جاي تحجي حجه خشان ويا حجايتها : الزواج باطل
اندار الها خيري وكاللها : شردتي نكولين بنتي
شذرة : ما ملجنا انا وعمران
عكد حاجبو خشان واندار لها : يعني خالد ما خلا يملج عليج
– لا ضليت ابجي وما رضيت احضر العكد ولا اوكلو عني خالتي مرجانة كالتو ما يحتاز تملج دام نحن ملجنا هو كصة بكصة
– وخذاج بلايا ملجة
– عمران كلو انا اخليها توافك ع الملجة ونعكد بس ما ملجنا
يازي : يعني ماخذها ما متزوجها ولا مالج عليها
خشان : عجل عليش ما كلتي هالحجي من كبل يبنتي
– ما ادري ما سعلتوني
كاموا يحجون بينم وخشان غضب كلم : انا رايد اتجفى المشاكل واطي فلوس وتاليتم هم العايلين على بنتي عمران واعد خالد يملج عليها وماخذها من غير ملجة ! غبشة انا ازت لهم طارش يخبرم بامري مالم كل فلس عدي وانا مكاوهم اعلى وعد عمران وسوايته .
طلعنا من عند ابوي .. وهم الوجوه مكشرة .
احترت بامرهم وما عرفتلو خبر .. يم اهلي يضحكون ويمونون ويمدحون وعد ما يدورون ظهورهم منم يكشرون ويحجون ويغلطون … ما حبيت طبعم
رديت وياهم للبيت
وخالتي ما خلت حجاية الا حجتها عليه على امي ابوي اهلي سمعتنا وشرفنا .. ليما دخلت للحجرة تنام وعمي خيري كن لا حل ولا ربط خلفها دخل ينام .. وراشد تنحى ليغاد دثر نفسو
ادحج انا لا فراش لا بطانية لا مجان
عجل وين انام ؟
خفت اسعل واحد منم .. او يمكن استحيت اكثر منا هو خوف انا ما عرف اطلب من احد ولا حتى عرف احجي ويا احد .. حيل استحي كل وكتي اسكت وهذا طبعي مجنن امي تريدني مثلها كوية السان تاخذ حكها من اكبر واحد بس بعد كل واحد وطبعو وانا طبعي ما مثل طبع امي تكلي طالعة على جدتج امي هم مثلي تحمل وتسكت ويجتلها الكهر .
بزوية الباحة تنحيت وحطيت ايدي تحت راسي وتغطيت بعباتي ونمت .. ثاني يوم كعدت خالتي هم كربتني بالسلال كمت اشتغلهن للضحى جا عمي خيري خذاهن بالعربانة ردت كربتني بالغدا .. وكفت اسوي غدا، حجت :
– حنكة صدك يولي نسيت اسعلج
– ها خالة
– ما كن شفت عدج ذهب عجل ذهباتج وينم ؟
– عد امي
– وعليش ما تجيبنم لهين شني تخافين نبوكهم
– لا ما هيج بس ما ذكرت اجيبم كلشي صار بسرعة
– اي نكضي الغدا وعكب الظهر روحي لاهلج كليلم رايدة ذهبي
– حت لو جبتم .. هين ما عندي مجان اضم اغراضي بيهم
– عجل وصرار اهدومج المكطوطة بالباحة شني ؟ جيبهن وحطيهن بالباحة
– ان شاءالله خالتي
– من تجيبيهن ضميهن عدي .. خاف صدك تضيعنهن انا ادثرهن بمجان ما يندلو احد .
– ان شاءالله
عكب ما خلصت الغدا جا راشد وابوه وتغدوا كلم ردت اكعد كالتلي : ما ارضى تجابلين ولدي من يكعدون ياكلون يستحون .. انطري يخلصون غدا اخذي الصينية واتغدي .
راشد حجه : عجل صبي الي والج وخلنا ناكل على كتر
صاحت امه : اي من كثر الاكل وتاكل اعلى كتر انجعم اشو انجعم .. اكل وما اسمعلك حس
– عجل لو ما ضل اكل شتتغدا البنت ؟
– وانت شايل همها يولو ما صالها يومين عدنا كمت تكف بعين اطالب بحكها .
– يمه بس… قاطعته وهي تكلو
– وصم حتى صم اكل وانجعم يولد ما اريد اسمع حسك
خيري قطع الكلام وكالو : اليوم بو خالد ودى واحد اعلى ال موازي يبلغم بخبر امس وكالم انطرو كوامتنا ان ما حولتوا وطيتونا خبركم
نعيمة : المطرت والصحت شمحصل العاكول ؟ راح يكربس الامر بروسم ويلغفلو جم دينار يحطو بجيبتو ونحن شابعين كحف .. وما علينا غير نخمد عاروا ونصم ثمنا وننجعم .
راشد: يما بس من هالسالفة
– اشوفك رضيت بعارك .. امممم ( غمته ) خايب عايب يبني ما عدك كرامة ممسحة عد خشان يول يمسح بيك عيبتو
– عجل ما خبرتيني من الاول ان جنت دارية بيها عار الساه المرة مرتي وتزوجتها.
حجالهم خير : هسسسس من هالسيرة جزعنا … اشكروا الله واحمدوا ياهو البينا يحلم خشان يطينا بنتو ؟ اتركونا ناكل بهدوة بال .
اسمع حجيهم المثل السجاجين بگلبي وابلع الهم واسكت
عد ما كضو شلت الاكل والضال اكلتو ورديت انام .. راشد تمدد ليغاد بالزاوية واخوه يم راسه وانا اطمش ما ادري وين انام .. حطيت البگچة ونمت .
ثاني يوم كبل اوذان الفجر طلعت اشتغل وياهم بالمخضر خاطر يشيلو عمي يخيري يروح يوديه للمركز لمدينة ويرد والضحى هم ياخذ المخضر ويرد يبيعه .. نوبيتين باليوم ..
وراشد واخوته وامه يشتغلون بكاع ابوي وحراسها
جزاة تعبهم .. ابوي مسكنهم ابيت من طين يكعدون بيه .. واكلم وشربم وعازتم .. على ابويه ..
كرايبهم وعمومتهم كاعدين بغير ديرة اغلبهم اذا ما كلم ما عندم بيوت .. خيمة الاحوالة زينة كاعد ببيت طين .. وبيت راشد عند كرابتم عايشين بخير ومبخوتين بكاع ابوي .
مضت جمن يوم على هالحال
اول الايام اشتغل بس بالمخضر اليجيبو للبيت
بس بعد فترة كامت عمتي تلح خاطر امش اطلع وياها للزرع وتكلي ( لو احد سعلج كليلو انا الطلعت ما احد غصبني )
وهذا الكلتو عد ما امي سعلتني كتلها ( يمه مسيجينة تطلع لوحيدها وانا ما عدي شي امل بالبيت ما جنت اتوسللكم اطلع للكاع خليني ) ليما تهدني امي وتجوز ما بعد تكلي لا تطلعين
اتعب وينهد حيل وارد خاوية اتجى اتجي من التعب
بس ما عرف اشجي ..
وعمتي تعبتني تدك وتنوح تريدني اجيب ذهباتي
وانا حاولت اطلبم من امي تكلي : خلي ذهباتج عدي لا تاخذينم عد ما تريدين تلبسين بيتج بكفى كلعة ابوج انداري اخذيهم وامشي .
بس عمتي حارت شتحجي عبن ما اجيب ذهباتي يومية كونة وتكلي انت حاسبتنا حرامية وتخافين على ذهباتج ناخذم وحسبالج نحن عيونا فارغة على ذهبكم والله ليعوزنا )
ويومية على هالرنة
يومية كل ما تشوفني تكلي لو تامنين بيننا ما تخافين تجيبين ذهبج عدنا وتفتح لها سالفة وتتكاون .
سالفة عمران صارت سكتة
لا هو كرب ولا راشد كرب منو ..
ومكاومها ويا ابوي ما خلص .. ابوي يهدد وهم يهددون وبعدها الطلابة مالها حل .. حتى الزلم والناس ملت هالسالفة بينم ..
ضنيتها خلصت .. بس ما جانت الامورمثل ما يتخيل النا .
بيوم جانت عمتي نايمة الظهر
وامي اعتازت حاجة .. اجت دكت الباب علينا
انا جنت خلف الباب عد اشتغل فتحتو بسرعة .. طبت امي ملهوفة وهي تكلي : رجلج وينو
– طالع عليش ؟
– اريدو يزتني لبيت موّنس
– ما موجود تلاكينو عند الخيل يسكيم
– عطيني كاسة ماي ثمي نشف .. بسرعة يولي
مشيت اجيبلها الماي ..
ردت لاكيته عاكدة حاجبها .. كدمت لها .. سعلتني : وين اتنامين يولي
– عليش ؟
– نعيمة نايمة بحجرتج
– ماهي حجرتي حجرتها
– عجل انت وين تنامين ؟
– بالباحة
– انت ورجلج ؟
– اي
– واخوة رجلج ؟
– ويانا
– واختا من تجي هم تجيم فوككم ؟
– بعد شبيدي
– يولي عليش تفتين كلبي بسكوتج انت .. ما هو البيت والكاع والخير كلو خير ابوج .. راضية تصيرين خدامة عد اليخدمون ابوج عليش ؟
– بعد غير هذا نصيبي
– هذا ماهو نصيبج هذي العيشة الرضيتيها لروحج النصيب يتغير اعلى هواج كيف ما هويتي وغيرتي حالج .. بس الضعيفاليسكت اعلى حكه ويكول نصيب .
شربت مايها وودفعت الكاس على بتها وطلعت
راحت للسطبل لكت راشد كالتله : جهز الربل رايدة امشي
– امرج ام جابر
جهزه بسرعة وصعدت وياه حجت: مريت للبيت وتفاجئت امك نايمة بحجرتك .. وشذرة مناطرة الباب
سكت ، ردت حجت : شذرة اطيتها امانة لو ما صنت هالامانة يراشد لا انت ولا هلك يسلمون .
– شذرة شجتلج ؟
– واتاني تشجيلي خاطر اعرف بنتي مرتاحة لو لا
– دامها ما شجتلج خلي هالامر بينا اسرار عايلة ما حلوة بحكج تدخلين بامور الناس
– الناس التكول عنها بنتي وانت تصعد تنزل تضلك خادم ابوها تراعيها وتحطها بعينك ولو كصرت معاها بشي .. جزاتك ويا ابوها .
– عجل ناطروا يجازيني ان جنت مذنب
– ارد واعرف شحجي وجزاتك ويا خشان يولد
– ان شاءالله ام جابر .
وصلها ونطر تخلص .. وردها للكلعة
سبك يازي ومشى لابو شذرة ، كلو : السلام عليكم
– وعليكم السلام هلا راشد
– المسامحة منك عمي رايد اتعذر منك
– عليش
– انا راح اخذ شذرة وامشي بعيد منا
– عليش
– عكب الحجي السمعتو اليوم من ام جابر صعبة احمل الضلة
– شنهو السمعته
– امي وابوي ناس كبار ونحن عدنا حجرة وحدة والباحة باردة ما اكدر اخلي امي وابوي بالبرد ونحن دفيانين بحجرة .. اطيت الحجرة لامي وابوي ورضيت بالباحة انا ومرتي
– اصيل يراشد
– شفايدة الاصالة يعمي وانا اليوم ام راشد مسحت بوجهي الوحل
– حاشى انت مثل ولدي وبمعزة شذرة وما ارضالها
– السماحة عمي الرضيت والما رضيت انا اليوم انغسلت بحجي ما يحملو الجبل .. الا عمي تكلي تصعد تنزل انت وابوك خدم عد ابوها كتلها شجتلج شذرة تكلي لا عجل عمي اذا حرمتي راضين تتحمل ضيمي وياي عليش تدخل بينا وتخربنا ؟
– انا ارد واحاجيها تبطل تدخل بينكم ..
– اذا تسمح عمي انا رايد ابعد واشتغل بالمركز
– ما اسمح انا اريدك فوك راس شذرة وتحاميلها وتكون عدها وان جان على البكان هينة … الوصلة الجريبة كن دار ابوك .. حشها وابنيها طين واكعد انت وشذرة واي شي تعتازوالك مني جم دينار تبني بيهن بيتك .
– ما تكصر عمي انا اتشكر منك الله يطول بعمرك .
– انت وشذرة تامرون وتدللون دام صاين بنتي وساعدها .. كل خيري وحلالي حلالكم انا المن ابني واجمع واعد اذا ما لاولادي وانت ولدي ان شاءالله .
باس ايدو وطلع يبشر ابوه خشان نطاه وصلت كاع وتكفلو ببناء بيتو .. وابوه هوس ودك من الفرحة ويكلو ( خير ما فعل بهالزواجة امورنا تا تصير توب .. اليوم بيت باجر يطيك وصلة كاع تزرع بيها عكبها تصير صاحب كلعة يولد والله وانفتحتلك ابواب السما يراشد )
وراشد فرحان ويا ابوه بعطية خشان
رد خشان للكلعة تعشى وكعد حجت يازي : اليوم مريت ببيت خيري .. تصدك اشفت
– اعلى ذكر خيري اليوم جاني راشد يشجي منج انت معايرته وكايلتو انت خادم عند ابوها
– ويجشي والله يولو
– يازي وان جانو الناس رزكتهم اعلى كاعنا ما ينطيج العذر تحكمينم وتدخلين ببيوتهم واسرارهم
– ومنهو بحال بيتهم واسرارهم انا التهمني بنتي .. دحج حالها جاتلها الكهر واهي ما تعرف تشجي ولا تكول تاذيت تحمل الهم اعلى كلبها وتفنو بكلبها ليما تموت .. الا بدينك بنت ما صارلها جثير اعلى عرسها مالها حجرة ونعيمة متنعم وهي بالبرد تكلك
– انا اطيت لراشد وصلت الكاع البكتر بيتهم .
– المزروعة بيذنجان
– ماهو مهم زرعتها المهم يرتاحون وما تكع الطلايب مالنا حيل
– بهالفعل هاذ يخشان راح تكوي عوده .. يضل كل ما اعتاز حاجة يضك اعلى شذرة خاطر ننطي
– وشنهو الفرك بين شذرة وراشد اثنيم ولدي .. ييازي لا تنسين راشد ربى عدنا وبينا
– اخوتك المن دمك يخشان طمعانين بخيرك وشفنا منهم الما شافته عين هي وهم كرابتك واخوتك تترجى الغريب تكول ابني … اهم لو ما خيرك بنتك ما يكلبونها .. رايدين خيرك
– وشنهو الرايدة اخلي شذرة بهالحال واسكت
– ما تسكت تحثو يصير زلمة ويجد ويعيش مرتو اذا ما هو حمل عرس عليش جا وخطب عليش امو وابوه اترجونا خاطر يخطبون .. اكو احد يخطب وهو حجرة ما عندو ؟ .. اهم رايدين يتجون عليك ويعيشون بخيرك على احساب هالعبلة التحمل وما تحجي
حثه يصونها ويدير امرها اليوم انت موجود وخيرك واجد
عكب عينك شلون يجتلها الضيم
علمه يصير زلمه ويدير امر مرته ويحمل مسؤليتها
ما ينطر منك تدر بخيرك عليه خاطر يعيش بجالك .
– عد ما يكعدون بدارهم انا راح اضل عيني عليه خاطر يصونها وما يتعبها
– بيت خيري يراوونك حنطة ويحطولك شعير جدامك يبينون هم ولا عنهم ووراهم الله اعلم بكيدهم من جلة الحال حاملينك لو اشتد عودهم اول ما يكومون يطكوك .. الخادم ما يحب سيده يخشان .
– لا تظنين بالناس سوء ييازي حبي الله واصلخي ما بينم وخلنا نعيش اعلى حب الله .
سكتت يازي بس ماهي مكتنعة بفعل خشان
بدل ما يحثو على صونت مرته كام يزيد عليه بالخير.
رد راشد للبيت واهو فرحان بوصلة الكاع الطاها اله خشان
دش شذرة تشتغل .. عكد حاجبه وصاح لها : شذرررة
اجته تركض : هلا
– امج اليوم حاجتني وتدخلت بشي ما يخصها .. شاجيتلها انت
– لا وحكك وحك الله ان جان فجيت ثمي وحجيت
– عجل منيلها تدري انت تنامين بالباحة
– جت وسعلتني وجاوبت
– وانت هيج اليسعلج اذبيله كل اسرارنا ؟ ما تعرفين اتضمين بكلبج حاجة .. اسمعج نوبة اللخ مطلعة اسرارنا لاحد لو شاجيتنا انا لو واحد من اهلي … اندمج
خيري : يواشك اعلى البنت توا ابوها اطاك بيت لجلها وجاي منهد بيها
– وان جان يابه .. اسرار البيت ما تطلع لو تحترك هين بنار جهنم واحد يسعلها تكلو يا الجنة العايشتها .. ما تشجي
– والله ما شجيت لاحد
– حجي هاذ امج اليوم رزلتني
نعيمة : خير شنهو الصاير
– ماكو شي يمه هيج
خيري : ابو خالد نطى وصلة كاع لراشد
فرحت وحجت بصرخة : ابخت الله صدك ؟
– اي ينعيمة ابنج غط بالخير بالخييير
– يرايتك يربي .. هيج وعدنا كاع نزرعها وتثمر وناكل من خيرها .. وي ربي ينرادلها بخت
– يمه الكاع ماهي للزرع .. رايدني ابني بيت الي ولشذرة عبن ما عدنا حجرة ننام بيها .
– شنهيييي .. وتاخذك وتمش عني
– يمه وين امش عنج هاي كاعي بصوبج
– لا يمه لا ما ارضى ابني تضل جدام عيني
خيري : زلمة رايد يضل ويا عايلته انت شنهو ويضل يجابلج
– عشتو وانا اخلف واطي ليازي ولبنتها لا داده لا ابني يضل عدي
خيري : هاذ حجي خشان من درى بنتو مالها حجرة ما رضى تريدين يبلينا تاليتو حتى من بيتنا يرحلنا صمي ثمج واكرمينا بسكوتج يولي وين نروح لو طلعنا من كاعو
– ونعيش بذلته واطي ابني حرام والله ما اطي بزري
– يا ذلته هاي العايشين بيها الزلمة مغركنا بخيره عليش تتكبرين اعلى نعمتج
– اي خير هاذ واهو يبعد ام من ظناها خاطر يخلي يصفى لبنتو وتحوش اعليه مثل ما كوشت امها اعلى الكلعة وصاحبها .
– يهيييي كفينا من هالسيرة بسسس
ردها بس ما سكتت عارضت طلعت راشد من البيت
بس راشد وابوه جانوا فرحانين بالوصلة ما اهتموا لحجي نعيمة .
من ثاني يوم بدوا ينظفون وصلة الكاع خاطر يبنونها
وخشان حشم ولدوا من يازي خاطر يعاونون راشد بعمارة البيت .
كضوا البيت بجم اسبوع ..
انتكلت شذرة لبيتها خاطر ترتاح بيه وتفتك من عيشة نعيمة وضيمها .
بس لهين وخلصت ؟
لا والله .. حقد نعيمة اعلى شذرة زاد اضعاف جيف خذت النها وعزلت بيه لوحيدها ..
كامت ادك وتبحوش وراها ..
بين وهلة وكفاها واهي ادحج بحال شذرة ..
شافت بمشية شذرة علامات حبل .. شكت بيها حبلى .
شذرة: عد ما كعدت ابيتي الجديد احوال راشد تغيرت
تعدى سالفة عمران وصار زين وياي .. يحبني يخاف علي .. يشتاكلي .. وهو يشتغل بالكاع اطلع اعاونه من الفجر .. عد ما يصير الضحى ارد للبيت اجزلو الغدا وارد نتغدى انا وياه بين خيول ابوي .
كلت الحمد لله افتكيت من ايام الضنك وزلمتي اعلى مايي وانا اودنه واحبو .. يكلي اعدلي اعدل يكلي اموت اموت .. ويامر ويتشرط وانا عد عينه ما ارد عن امره ابد .. كلش احترمه واحبه
بس امي ما تحبه مدري شجاريلها ما اطيك تسمع اسمو
تكلي انا الي شوفة بالبشر ورجلج من الله كلبي ما يرتاحله .. حاولت احجيلها عنه وعن تعامله وياي وشلون يودني
تصيح ابد .. ولا يدخل كلبي
وهالامر جان بحز بكلبي
اكول ليش امي ما تحب رجلي
كل ما تشوفه تكشر بوجهو وما تسمع منو ومن بحجي ترده وما تحترم جلمته واعلى اسلوبها هاذ هو يموت منها يرد ما يخلي جلمة على امي ما يكولها .
فرد يوم من الأيام ..
جان موسم ربيع وعدنا شغل جثير بالزراعة .. وكلنا عنزرع ونشتغل بالكاع .. امي جانت موجودة .. راشد اقترح على ابوي يتفق ويا التاجر يبيعله المحصول بدل ما نحن نزتو لمركز المدينة ونبيعو
يازي كالتله التاجر راح ياخذ المحصول بنص السعر اللي نحن نبيعو للمركز
كاللها : بس نحن عد ما نبيع للمركز ما كل المخضر عينباع مرات يرد نصو .. لما نبيعو للتاجر راح نضمن يشتري كل المحصول يومياً وراح يوفر علينا جهد النكل من السهل للمدينة
كالتلو : انت برايك هاذ رايد راحتك .. نبيع محصولنا بنص السعر خاطر لا تتعب روحك وتروح تبيعا بالمدينة
تراددوا بالراي وابوي واكف ..
كاللهم : بس انا افكر واعرف شسوي كلمن يجفي رايو
هدهم ومشى وراشد وامي كل واحد منم كام يتهجم على الاخر
امي تكلو : رايد تشوش على الكاع ما انت الا ويحد طمعان بخير ابوها ورايد خيرها ماهي محبة ابنتي
راشد ما سكتلها كاللها : ماني ازود من طمعج من خليتي خالد يتمنن باختج خاطر تكوشين على الكلعة انت واختج تالي انطاها بكلبج وشفتي شعمل بيج وكل واحد يلاكي جزات افعالو
تكاونوا امي وراشد كونة جبيرة ..
انا صرت بينم .. لا اكدر اصف ويا امي ولا ويا رجلي ولا اكدر اهدهم متكاونين وامشي .. احترت بكاعي وانا اجر بامي واحب بيدها واكلها امشي ردي يمه ..
ليما دفعتني منها هدتني ومشت
وام راشد خذت راشد وجرتو للبيت ..
ضليت انا نا اكدر اهد الشغل اعلى النص يبور .. بالزور ضليت خاطر اكضي الشغل الما خلصوه .
جنت عد اشتغل وازرع بالكاع ..
وانا مدنجة .. لمحت احد من بعيد .. شلت راسي
الا وعمران جدامي .. جسمي اعلى غفلة وجت نار بيه ..
نافوخي احسو كام يطلع دخان … هديت الشغل من ايدي
واندرت امشي .
ضحك وكام بمشي بالعوجي ويندار يدحج علي
عفت الزرع وردت امشي .. اندرت ولكيت ام راشد وراي واهي خازتني : شعندوا هاذ يدحجلج
– والله خالة مدري انا خفت عد ما شفتو ورايدة ارجع
– انت خفتي .. علي هالحجي يبنت يازي
هديتيها ورديت للبيت ، لكيت راشد موجود اول ما دحجني صاح : امج حجت بعد شي
– لا راحت
كام ينعل ويشتم بامي ويشتمني انا مشيت احضر الغدا
جا وراي كال : شجالج حالج ماهو اعلى وضعو ؟
– ماكو شي
– شنهو الحاجيته كولي عليش تستحين
– ما شفت امي بعد والله
– عجل عليش دمج مخطوف
– يمكني من الحر .. احتريت وانا بالدرب ليجاي
ما رد عصبي هد البيت وطبك الباب وراه حيل ومشى.
راح لبيت ابوه .. شاف امه بالدرب: سعلها : ابوي وينو ؟
كالتلو : ما ادري عنا جنت بالكاع
اندار عن درب بيت ابوه خاطر يروح يشوف ابوه وينه صاحت وراه نعيمة : راشد
اندار لها ، حجت : شعدها مرتك ويا عمران
عكد حاجبو : عمران شنهو ؟
– عد ما رديت منك خاطر اكضي الشغل لاكيتها بالكاع وهي تومي لعمران واهو يتضاحكلها .
– يتخايلج يمة
– اعلى كيفك تريد لا تصدك انا الشفتو كلته بس شوف يبني حالك ويا بنت خشان ما يسر اهي استعبدتك بالبيت الكاعد بيه حت لو شفتها ويا زلمة ما تكدر تحج عبن تشوفك خادم ابوها واعايش بخيرو
تقرب منها بعصبية : يمه هالامر لا تتكشمرين بيه
– وانا ما جاي اتكشمر .. من الاول كتلك بنتها ليازي ماهي بكفو خاطر تهدها ابيت ليوحدها
-يمه لا تجننيني وين شفتيها
– يني تريد تصدك ما تريد تصدك اعلى كيفك انا امك ورايدة مصلحتك .. مرتك ماهي راحة .
– احلفي
– وروح مضر وتراب كبرا .. هذا اللي شفتو يا ابني يتمضحكلها واهي واكفة تدحج عليه وتاميله.
اندار راشد خاطر يرد للبيت .. يعاقب شذرة
دخل للبيت .. لكى البيت فارغ وشذرة ما هي ! صاح راد بيتها فارغ .. هد البيت وراد يروح يندار للكلعة خاطر ينشد عنها ..
راح للكلعة طلعلو جابر كلو: شذرة ما جت لهين
اشتعل بنار وراح عد يمشي للكاع
وهو بدربه لاكاه عمران .. راشد راد يتحاذى ويدور شذرة
اعترضلوا عمران واهو يكلو : اشلونه البيت ؟ زين ما ؟
تبيض عار خشان يطيك بيت .. تجارة رابحة
– ابعد لا تخليني افعل بيك جريمة
– اشوى انك خذيت فضالتي .
حجاها وضحك وراد يمشي
اندارو راشد وتلاكفو يتكاون وياه .. كضبوا عمران انطاه طكة بنص وجهو طفى عينه .. وراح راكض من دربه
كام يصيح راشد ويشتم ويفشر وراه
كضب عينا .. وراح يكمل للكاع خاطر يدور عمران
شاف شذرة جت من نفس الدرب الجا منو عمران ….

يتبع….

( قصة جرح )
مرسومة بجلدنا ذيچ الأنياب
والجرح لو طاب هم يترك نياشين
(للشاعر كاظم أسماعيل كاطع )
شذرة .. جنت ناسية المخضر بالبستان وعد ما رديت للبيت تذكرتو .. عكب ما طلع راشد من البيت لبست عباتي ورحت اركض خاطر اجيبو وارد اعمل الغدا .
لكيت سلة المخضر بمجاني .. شلتها لمتني
وطريت الدرب مسرعة خاطر ارد اعمل الغدا كبل رجعة راشد
وانا جاي امسي ما احس الا راشد جدامي يهرف ووجهو مدمى
صرخت وزتيت سلة المخضر من جتفي وركضتلو
وانا اولول ( يممممه اش صاير بيك اشنو هالدمممممم)
بعدني بلهفتي وصرختي
كضبني من راسي وشتمني وفشر علي وجرني واهو يكول ( تلعبين علي بنت *^^٪؜* تخلين اطلع وتروحين تتواعدين ويا حبيب الكلب ، اليوم احركج اليوم اليوم ما اخليج عدلة )
كمت ابجي وارتجي واكلو ( والله ما عدا افهم انا اشعاملة .. حب الله وهدني راشد لا يدحجنا احد من الديرة راشد .. هد راسي الخت الله )
حجيي جان بالهوى النار ماليه افاده علي
وكلبه يلهب مار ما يسمع ولا يحجي .. كضاها فشار وتهديد
دحكني اخوي وقاص وارشد يجر بيه من راسي ، ما كربلي ولا حجه وياي راح يركض للكلعة يخبر اهلي .
وصلنا للبيت وراشد جر عودة وكضبني جتلني لحد ما خلى جسمي ينز دم من كل صوب وانا ابجي واترجى بيه يهدي .
كضبني من راسي واهو يكلي : شعندج ويا عمران بالبستان
– وبخت الله ما عندي وياه شي وبخت الله ما متكربة منو
– تجذبيييين عليييي
– والله ما اجذب راشد ابخت الله والله جسمي بعد ماله حيل يحمل .. احب ايدك
– اليوم اكضي عليج بالله … لا ما اخلي ادفنج هين واغسل عارج ما اطلع انا راشد .. يول **** تخلين اطلع وتريدين تتواعدين ويااااااه
– وحك الله ما متواعدة ويا احد رحت اجيب المخضر خاطر اعمل الغدا وبخت الله انا ما عد اجذب .. رااااشد
احجي وهو يطكني ..
كثر ما جلد بجسمي خدر جسمي من الطك وانا اصرخ
ذبني وكعد ليغاد يحج ( كالتلي امي لا تنفرد بيها هاي بنت يازي ما تتأمن يولي انا احطج ابيت .. انا اكعدج انت راحة واكعدج .. تركبيلي كرون انا الغشيم وصدكت ما عدج شي ويا عمران بس يظهر جنتي مستطيبة للعيشة معانو .. وابوج طلكج غصب .. بس هين لا ما علمتج لا اشوفج نجم الليل بظهرج انا تلعبين علي تكليلي رايحة اجيب المخضر تجذبين علي وعمران يجي من الشارع الانت تجين منه ورايدتني اصدك بيج .. يولي ان جان ابوج اطاج خاطر يفتك من عارج انا اطمج والله .. لا اعيشج الويل والعذاب كل يوم واموتج كل يوم وما تموتين .. صبرج بس لا اندمج على كل يوم لعبتي بيه علي .. واعلمج ياهو راشد التتمعشكين براسو بنت الكلب انا اعلمج .. بس صبرج
عد يحجي وانا ابجي .. اندكت الباب
فزيت انا من مجاني عرفت اهلي اجو ووقاص خبرم بكصبة راشد الي بالشارع وهو يجرني للبيت
التفيت ورا البيت احس بدموعي .. غسلت وجهي واسمع حس ابوي واهو يكلو : اس ما اسمعلك حس شذرة وينها
لبست شيلتي ولفيت شعفتي خاف يشوفها ابوي
وتسترت خاطر ما يشوف جروح اديه وطلعتله : هلا يابه
اندارلي واهو يكلي : طكج هالجلب .. دحجي اشوف ان جان طاكج والله اصلبه هييين
صرخ راشد : شووووفها ويامن لكيتها
– يابه ما طكني بس شوية عصب وماكو شي يبعد عيوني جيتني بهالظهرية عليش وقلقت حالك رد ما بيه شي
– عجل شبلاه يصارخ مثل جحش ينهك
راشد : عمي لكيتها هي وعمران بالبستان شرايدني اشد كرن وما احجي مرتي هاي لوووو لا
شذرة : الصوج ما بيه بعمران ما عد يهدنا بحالنا يابه لاحكنا للبستان ويفتر علينا .. واشد عصب عد ما شاف ما رمن البستان وانا بالبستان
– عمران شعدج بكاعنا
– ما دخل البستان بس جان مار من الشارع ما عرف ابالو شنهي انت ابعدو وخلينا يهدنا بحالنا
– وهالجلب كون طكج
– لا حشى ما طكني والله شوية عصب وكام يصايح شسوي بعد رجلي وعصبي اهد بيتي على شوية اعصاب
اندارو واهو يكلو : لو مسيت شعرة من شذرة يا راشد والله لا اعلكك اباب بيتك واخليك عبرة لكل واحد يفكر يمس احد من ال خشان .
– يابه ما طكني .. شوية اعصاب وهوسة مرة ورجال تصير ابخت الله لا تحاسبة .
ما حجه راسد ولا رد عليه بس هد البيت وطلع
وابوي ضل وانا اغطي بروحي خاطر لا يشوف اثار الطك بيدي ..
حجه : ان جانو ماذيج لا تسكتين ول بنتي
– يجعلك سالم يابه اعصابه طلعت وتهون ماهي مشكلة تنحل .
– عد ما كالي وقاص راشد كاضب براس شذرة يجر بيها طلعت اعصابي واجيت اركض
– عمت عين كلبي اعلى كلبك يابه عسنه الله لا حرمني منك
– اذا تعتازين شي زتيلي خبر خاطر اجيج انا لو امج
– تامر بويه
– عاملة غدا لو تجين وياي تتغدين
– لا عساك سالم انا هسه اجهزوا
– يالله الله يهدي سركم سدي بابج يابه وان شفتي عمران نوبة اللخ خبريني خاطر اكسر جدموا .
– الله يحفظك يابه يبعد عنك كل نايبة ان شاءالله .
طلع ابوي من البيت صكيت الباب وراه كعدت ابجي
جسمي ما بياش احركوا من الوجع ولا بيه اكوم اجهز الغدا .. ضليت امدده بفراشي وابجي .
اندكت الباب .. بالكوات جريت روحي حطيت شيلتي على راسي ما لفيتها ايدي تون علي .. واجر بروحي جر للباب خاطر افتحو
وجابر يصيح : شذرررررة
– اي اي جيت
فتحت الباب جان شايل بيها صينية غدا بيها التشتهي نفسك خبز ولحم ومخضر ومرك وتمن
كتلو : عليش جبتها جان تغديتو بيها انتم
-نحن تغدينا وامي كالتلي وديها لاختك تتغدى بيها .
– يطيكم العافية خليها جوا
– شبيج
– ما بيه شي احس بروحي نحلانة من الشغل اليوم اشتغلنا جثير
– راشد طاكج
– لا عد كلك من الشغل راشد ياهو مالته
– انزين .. اتغدي ومن تحتاجين شي ودي علي
– يطيك العافية خوية .
خلها يم الوسادة مالتي وطلع وصك الباب وراه .. كعدت روحي ما اشتهي الزاد وجسمي يون علي .. انحب من الوجع
من كل صوب يوجعني .
انفتح باب البيت وانا على انحيبي ودايرة للحايط
حسيت براشد جا .. ما حجيت ولا هو حجه .. كعد ليغاد عني بس اسمع حس حسراته واهو يتنهد .
شوية وجا يم راسي باسني براسي
وكعد عد الوسادة اندرتلو والكى دموعه بعينه .. فزيت من مجاني : عليش تبجي
– اعرف جاي اذيج بس ما ادري الحك وين انا عد ما شفتج جاية من الصوب الجاي منو عمران .. عكل ما ضل براسي
– وبخت الله ما كربت صوبه
– يا شذرة انا ادري بيج انت اطهر من الجامع بس جاي اتعذب .. جلمته واهو يكلي ( اشوى انك خذيت فضالتي ) انا اخذ فضالته ؟
– عمران نجس وواحد راعي مشاكل والود وده نتجاتل ويصير دمنا طشار يستراح بهالمنظر
– وشلون افتك منو ؟
– هده لا تجي صوبه ولا ترضى يجي صوبك وان جا .. امش لابوي وشاكيله اهو يردعا عنا
– وانا مرة اروح اتشكى لابوج
– انهروا ما يجي صوبنا بس لا تخلي سبب بمجاتلنا .
تعذر مني وحب راسي وكعدنا انتغدا انا وياه …
ثاني يوم جانت لشتي حيل تعبانة ما بيه اشيل روحي من الكاع ، راشد ما رضى اطلع للشغل كالي : ارتاحي اليوم ابيتج ممنوع اتطلعين خارج
ضليت ممطولة بمطرحي ..
شوي غاد جت ام راشد ، دكت الباب حيل .. بالزور لميت روحي خاطر اكوم افك الباب .. دخلت واهي تنده : شذيرة … شذرة وينج
– هلا عمة
– لا هلا ولا مرحبا بشوفتج عليش ما طالعة للشغل
– راشد ما رضى اطلع
– وشنهي بكيف راشد وانا اضل مثل الجحش اشتغل ليوحدي
– عمت عيني عمة بس عبن مريضة اسم الله عليج لشتي كن مشلولة ما اكدر احمل روحي
– عساج بالشلل يولي جذبج هاذ يمكنه يمشي على ابني عبنه كديش ومعمي على مخه بس علي ما يمشي تكومين وياي هساه تعاونيني بالكاع الا وروح ابوي اكضبج هينا اكصبج انت واليطلع وراج .
ما رديت عليه
هزيت راسي وكمت اتجى خاطر الكى عباتي وشيلتي
كامت تحجي تكلي : انا جدام زلمتي وولدي التف بشيلتي انزعها وانت بطرك الثوب وحدج بالبيت .. دلنج لا تكولين احد يطبلي لا تحسبين ما تستحين فرحانة بروحج عدج بيت ونايمة بطرك الثوب خاطر تغوين الجحش ابني واهو مثل المطي راكض وراج .
هي تحجي وانا ثمي ساكت ان جان رديت عليها بنص جلمة
توني جاي اريد اطلع .. اجا اخوي حميد
عمتي خزتو وطلعت وانا كلت لحميد : جيت بوكتك اطني ايدك
نطاني ايدو
كمت اتجى عليه وامشي للبستان وانا اجر بروحي ولابسة نكابي .. وصلت الكاع ما بالكيف جسمي ممروض ما اطيك اشتغل .. حميد عد ما شافني اون وعمتي تصيح عليه
رد لاهلي يخبر امي
ماهي جثير الا وامي فوك راسي واهي تصيح : ماهو شغلج يبنتي الكاع كاع ابوج وابوج منطي حك رعيانها .. كومي وردي لكاعج
عد ما سمعت امي تحج هيج كضبتها كتلها : يمه ابخت الله لا تترادمين وياها
– عجل كومي من مجانج وردي بيتج وما اطلعين دارج حت لو جنتي صاحية
– على كيفي جاي لستغل ما اتعب حالي
– شذرة والسماج شذرة ان ما رديتي هساه اعملها مصيبة فوكج وفوك عمتج هالما تستحي
– يمه ابخت الله
– هدي الله بجلالته وكومي يبتي
ضليت بين نارين .. نار ارد واتجفى حجي امي خاف لا تتكاون ويا عمتي واخاف ارد وشيفكني من السان عمتي وهوستها .
كمت اتجى وانداريت الها .. كلت الها : عمة من رخصتج انا راجعة للبيت اجهز الغدا الراشد لو جا .
حجت امي : وعلى يا مال تترخصين صاحبة الكاع وانا ما ادري .. الكاع كاع ابوج يشذرة اضل جم دوب اذكرج مشغلة روحج خادمة بكاع ابوج وتترخصين اليشتغلون عده .. ماهي عيشتج على احد ولا عايشة عد احد .. حتى بيتج بجال ابوج ومحد له فضل عليج … امشي ولا تترخصين من احد
– يمه اخت الله لا تسوينها كونة فوك راسي عكب حجيج هاذ دحكي شراح تعمل بحالي
– يولي ياهي هاي التعمل عليج مضعضة اكضبج اجتلج هسه واطلع حركة دمي بيج فوك مرضج هاذ .. يكفي اتسرتي على ابنها امس وما حجيتي لابوج وخافنه حسبالج ما علم .. الا يعلم بس ما حب يدخل عكب ما انت دسترتي على عيبة ابنم
– ابنم رجلي يمه انا بكل صايحة افزع ابوي يجتلا ما يصير .. زلمة بعد وعصب.
– يولي عشت عمر ويا ابوج وعملت العمايل ووكفت دير بحالها اعلى حيلها ما فرد يوم شال ايدو وطكني .. وانت بساعة اعصاب كضبج وكضى بيج التوبة وتاليتو هذا حالج تتجين وما تلاكين من امو الرحمة جارتج من بيتج خاطر تكضين شغلها .
-شسوي يمه اداري كرصتي
– يمااااااااي يولي راح تعلين كلبي وكرصتج اعليمن عليهم يولي عايشة ابيت ابوج ومخضرج ومسواكج من كاع ابوج ياهو البيهم شايل من جيبو ومنطيج خاطر تدارين كرصتج وياه
-ميخالف
طكتني حيل على راسي صكعتني : اخ يمة عجل انت فوك الحمل تعلاوة والله جسمي بايد
– وعسنج بالازود دامج ادافعين لجتالج
– اسم الله جتالي شنهو يمه هاذ رجلي
-امممم غمة تغمج انت ورجلج
ما رديت عليها وصلتني للبيت وكالتلي : لو سمعت بيج طالعة للكاع اكصبج واوز ابوج يزف عمج وينعل شيبة اهلهم
دخلت بيتي وتمددت بمطرحي جسمي يون علي حت لغدا بيتي ما بيه اكوم .
نعيمة عد ما سمعت حجي امي
راحت لراشد تولول وتكلو : امها جت ما خلت على حالي حال بس طك ما طكتني شلون شذرة طالعة تعاوني
راشد عد ما سامع هيج راد للبيت .. طبك باب البيت بكوة واندار عليه شتايم شلون امي هاينة امي كالو : وبخت الله انا مالي خص امي عد ما درت انا مريضة وعمتي مطلعتني غصب هجتني وكامت تحجي وخبطت بالحجي .
كام يسب ويشتم باهلي ..
وقسم قسم الا يبعد عن كاع اهلي ويبطل يشتغل خدام بكاع ابوي دام امي ذالتهم بعيشتم .. انا ان جان الحايط حجى انا حجيت هديته يحجي اليحلاله وانا ساكتة
عد ما تعب من الغلط والشتايم .. تنحى ليغاد وكعد
انا تجيت روحي ورحت كعدت جدام المشعل خاطر اجهز الغدا حجه : عجل مو ما بيج حيل تكومين شو جاي اطبخين وين ونينج وبجاج ؟
– عجل اهدك جوعان غير بيه ما بيه اكوم اعملك لكمة تسد بيها جوعتك .
سكت وكعد وراي .. حجه : هلكثر تحبيني يشذرة
– الله يعلم وازود
– بس انا جاي اذيج
– اذيتك لو جانت كره ما اصبر بس ساعة عصبية .. عجل انا ارتع وياك ساعة راحتك وانت تشعرلي .. وانفر منك ساعة عصبيتك … اذا ما احملك بمرك كبل حلوك ما اصبح مرة .
سكت .. شوي وكال : خليني اعاونج
– ما يعتاز انا جاي اشتغل
– ميخالف الما تكدرين تكومين له كليلي
كمنا انا وياه نجهز الاكل اني اثرم واطبخ واهو يناوشني ما اكدر انوشه … ليما كضى الغدا خذا صينة الاكل ومشى جدامي واهو يصيح : على كيفج امشي لا تزيدين على روحج ..
بالزور اكوم من مجاني شفت باب البيت انفتحت على كيف .. عمتي دخلت منها وهو يكلي : اذا ما تكدرين تكرمين انا جايج يحيلي لا تكومين انا اكومج .
جاي يحجي طبتله للحجرة لكته مدنج للصينية يحطها بالكاع واهي صرخت : وانا حسبتك الكاك ماخذ حكي واكول ابني هساه الكي كاضبها وكاصبها مجهزلها الغدا وكاعد تتغزل بيها وصايرلها خادم يلجحش .
– يمه اهي العملت الغدا انا بس شلتو ما عملتو
– تعاونها بدل ما تكصبها عكب عملت امها
– يمه حتى الله بجلالته ما يحملها شذرة شنهو البيدها
– وكاعد تدافعلهاااااااا
شيلي صينية الغدا وركعيها براس راشد وكضبت البيت مصايح ومكاون واهي تغلط عليه وتشتمو وهو ساكت عنها …
ردت علي دفعتني ومشت لجدورة الغدا تفعتهن وهي تصرخ : اهله مذلولين بكاع ابوها واهو كاعد يدللها ويعمللها لغدا ويندهلها … يحيلي لا تكومين انا اكومج من باد حيل وماتت روحك يول انا اخلف وبت شذرة تاخذ .. تسع شهور شلتك تاليتك تذب امك لجل ***** .. بعت حليب امك بجلمتين مسمومات من ثم عالمسمومة
ابني اليوم مات ما اكول بعد عدي ولد تحرم علي يراشد لو سميتك ابني جزات عملتك هاي كلت ابني اليوم الكي نافض روحة ولايم الصوبين لجل عين امه .. تاليته يحيليييي يحيليييي .. يماااااي ينار كلبي كون اشعل البيت نار واحركك انت وحيلك .. يكون انت وياها بمرض ماله دوا ولا له طبيب .. عسنكم بشلة الحااااال ربي
– يمه اهدي ما يصير هيج شجالج .. انا لو شذرة حاجية وياج لو مسمعتج حجاية يشهد الله ما اهليها اعلى ذمتي بس ما طلع منها شين عجل اعيبها بفعل امها .. ترضيها
– ترضيهاااا ترضييييييها .. هاي الكدرك الله عليك .. يول اكلك ودت اخوها على امها وحشمتها علي وانت اتدافعلهاااااا يا وسفة السنين الربى بيك يراشد .
بس خلك خلك وياها .. خلك بعارك عد ما تحط البطنها من عمران ذاك الوكت حطلك اثنين كرون مثل كرون الثور وجابلها لشذيرتك يالاغم .
حجتها وطلعت .. واهو اندارلي : انت حبلى يولي ؟
– لا وبخت الله مدري عن امري
– شنهو الما تدرين عجل امي شلون تكلي حبلى حبلى منين
– شنهي حبلى منين شجالك راشد
– عجل شلون امي تكول حبلى من عمران شجاب عمران عليك
– امك بعد ما تعرفها تكوم تكعد تعايرني بعمران
– يعني انت ما بحبلى
– لا ماني حبلى
– البسي نكابج خاطر اخذج للداية تكشف عليج وان جنتي صدك حبلى وضامة علي يشذرة محد يخلصج من ادي
– يراشد والله مالي علم بروحي
– عجل امي منين تعلم اذا انت ما تعلمين
– ما ادري وبخت الله
البسي ..
لبست وطلعت وياه بعز الظهر اخذني اعلى بيت الداية يدك بالباب حيل كامت تصيح : شنهي جاين كوامه هو هيج اليدك باب ما تستحون ما تكلون وادم نايمة اكو واحد يجي الظهرية
– اعذرينا ما حاطتلج عريضة ابابج وكاتبتلنا شروطج خاطر نعرفها
– شرايد
– رايد اعرف مرتي حبلى لو لا
– روح ورد عكب العصر
– تكشفيها هالساع لا والخلك محمد هالبيت اهدو فوكج
– كامت تتصايح وياه واهو يصيايح وانا ارد بيه واكلو : راشد انفضحنا ما هيج .. راشد
طلع رجلها تحاجى وياه .. وكال لمرته : فحصي مرتو وفكينا منو
دخلت وياها واهي تحجي وتهين عبن راشد هد عليها اتفحصتني من ورا خشمها .. اندارت وكالتلي : وانت ما تدرين بروحج حبلى
– ليش انا حبلى
– عشتو انا وين ماكو واحد الله مفين حظه يزتو على كلبي .. يولي بطنج ها علوها وما تدرين بروحج ما حسيتي بحركة جاهل ابطنج
– لا والله ما احس ما عرف
– كومي شو كومي
كمت من مجاني وانا مصروب على راسي
عمتي منين عرفت انا حبلى كبلي ؟ انا ما ادري بروحي هي شلون عرفت .. وشكل لراشد ان درى انا حبلى راح يصدك جذب امه .
طلعت منها واهو تلكاني : ها شني ؟
طلعت وراي الداية : حسابج دادة ياهو المالكم فاتحة بيتي سبيل ثواب
راشد اندارلها يكللها : لا خلفة الله عليج عكب صياحج ومكاونج فلس احند ما اطيج
– عجل هو الفكر وابن الفكر شيطلع منا غير الفكر
انهد عليها يريد يتكاون وزلمتها رد طلع يرده .. واهي تدعي بالشر وتصيح : روح عسى اللي ابطن مرتك ما تشوف منه الخير يجعله شالع كلبك وعاق ماهو بار ويحطلك بكل درب بللوة وما ينذكر اسمك منو بس بالفضيحة .
كام يتكاون ويغلط عليها وزلمتها رجال فقير يدفع بيه ويهدي بيها لحد ما دخل وصك الباب وراشد اندار كضبني : يعني حبلى يولي
– راشد وبخت الله توني دريت بروحي حبلى وراية الله
– حبلى منين
– راشد ما استاهل هالجلمة منك انا بعمري ما همت بواحد غيرك
– ولو جان صدك ابن عمران
– ماهو ابنه البطني منك
– وياهو الكال وابوج خذاج من عمران بليلة ويوم حطج ابيتي
– راشد لا تكول هيج الحرام ما يحبل وعمران جان خطية بالحرام الله يجازي خالد بيها .
– الولد هاذ ينزل ما اريدو
– راسد الجاهل رزق الله
– رزكة من ظهر عمران انا ما رايدها هاليوم تنزلين الجاهل
– وشلون انزله
– ما ادري تجتلين روحج تسلخيها المهم هالجاهل البطنج ما يجي للدنيا .
رد وهو الدب كله شتايم وفشار بسيرتي وبسيرة شرفي .
وانا دموعي تجري ان جان نطكت بجلمة
بس ادعي الله يهدي علي
وان جان البطني من عمران ما يجعله ابطني ولا يضل يوم واحد .
ردينا للبيت واهو حطلي سطلة ويكلي اصعدي واطفري منها خاطر ينزل .. وفوك العشر مرات اطافر وما ينزل مني شي
كضبني ونومني على بطني وصعد فوك ظهري كطع نفسي كمت ارافس جوا رجلو واصرخ واهو ولا اباله ويزكح ويكول : البطنج ينزل يعني ينزززززل ما ارييييده.
من شافني ما طلع مني شي
اكضبني ورد اجتلني سلخني بيها ليما خويت وخرت منه
هدني وطلع من البيت .
هالكثر بجيت
مدري ابجي منه .. لو من تهايم امه لو من البطني يا خوفي يطلع من عمران .. ما صار على سالفتي ويا عمران ٦ اشهر ازود اكثر ما ادري وبطني جان ابلي كبرانة كرش عبن ما كبرانة مثل النسوان الحوامل هيج عالية .. ادحك امي عد ما تحبل وتريد تجيب بطنها تصل لخشمها .. وما تكدر تتنفس .. حالي ماهو مثلها .. بس حبالتي طلعت عليها .. احبل بحيضتي .
راح ورد بالليل وعلى نفس الشتايم والغلط بس بلا طك
وانا حالي يزود ما ينكص كل ما جالو الوجع يزيد علي .. وما عرف شعمل بحالي .. ان شكيت ابوي ما يرحم راشد يكصبو .. ولو سكتت الوجع ما ينحمل وضليت معلعلة بعلتي لا انا حاملتها ولانا الشاجيتها .
مرت ايام راحت ايام
وراشد على حالو ما يكربني امو تحش براسه على ابو البطني ماهو منه .. من عمران
زادها عمران الخبيث عد ما صادف راشد واهو جاي بعربانة الحصن من المركز .. نادالو : شلونها يولو .. طمني على اخبارها
واكف راشد وموكف عربانته ونازل .. كالو : شكلت
– مشتاك اسمع خبرها عكب ما خذتها من حضني ودفاي
نط راشد من عربانته وكضب بعمران يكلو : لو سمعتك تجيب سيرة مرتي على السانة يول والله اعدمك
تكاونوا بينم .. لحد ما دفعو عمران واهو يكلي : يول ارضى بكسمتك انت ماخذ فضالتي وراح تضل عايش على خير فضالتي بس عمرك ما راح تنسى ونيشاني بيها
رد تلازم وياه راشد ويخنك بي وذاك كاضبو ويضحك بخبث ويكله : دحج بكفاها راح تلاكي اثر جكارتي بكفاها .. عد ما كربتلها وارتحت وياها .. حطيت نيشاني خاطر اليمسها يعرف اهلي ملك ياهو ومنين ماخذها .
تخبل راشد راد يكتلو .. هذا دافعو عنه ومبتعد بس سمم اذانه خاطر ما يتهنى بزواجته من بت خشان ولا يتهنى بخيرم
راد راشد .. متسودن للبيت
عايف العربانة بلا شد وراكض للبيت .. كاضب شذرة ومصلخها خاطر يكشف عليها دارها ولاكي اثار جكارة عمران بكفاها .. متسودن
كام يصرخ ويكللها : كشت روحي منج يولي ما اريدج .. اجتلي روحج وفكيني منج .. ما احمل اشوف وجهج .. يولي نايمة ويغيري وتجيني تجامعيني انا اخذ وحدة كاشفها غيرررري
كاضبها يخنك بيها لحد ما رايدة تموت هادها وطالع
ضالة تبجي وتعاني الوجع وما تفتح باب دارها وتشكي عذاب راشد لاحد .. تكول بلكت الله يهدي وتواسي روحها عسى بليلة ينهدي ويرد مثل كبل يودها
يوم عن يوم يزيد كره راسد لشذرة
عد ما يشوف بطنها تكبر
والاثر البكفاها .. ويرد يحاول يجتلها ويتراجع ويتعوذ الشيطان ويهدها ويطلع ..
وعلى هالحال فوك الشهرين ..
بيما فد يوم جان جايب ويا صرة بيها علبة
كاللها: انداري
سألتها : شنهو هاذ
كاللها : هاذ من امسح كفاج بيه يروح الاثر مالت الجكارة
هي رضت وصدكت هاذ يمحي اثر كالت : بلكي الله يمحي الاثر ويخف غيض راشد .
رضتله يمسحها بهالدوا … كضب وصلة ولفها سواها عطابة وبللها بهالمادة ومسح ظهرها .. عد ما مسح جسمها الجلد انسلخ ويا مسحت الوصلة وشذرة شاغة روحها للسكف
نزت منه وهي مثل المحتركة فرفحت روحها
كامت تروح وترد بالحجرة تفرفح وتكلو : راح اموت اندهلي احد .. احب ايدك جاي امووووت
كاللها : لا هاذ هو انمسح الاثر .. اتحملي هو جم يوم ويطيب الاثر
هدها وطلع وهي ضلت روحها فايرة بالبيت ..
لليل عد ما رد لكاها على هالحال مفرفحة وتلوب وما تكدر لا تكعد ولا تكدر تنام على ظهرها .. حاطة شيلتها بحلكها وتعصر من الم مثل العدها ولادة
كشف عليها لكاها دم احمر .. جاب وصلة نظيفة من اهدومها وحطها وشدها على وسطها وكاللها : اتحملي جم يوم يروح الوجع المهم الاثر مالت جكارة عمران تروح .
مرت ٣ ايام وحالها يزيد ..
يجون اهلها ما تحجي تخاف يكتلون راشد تكللهم : وجع حباله
كالتلها امها : يولي مو حبلنا شكثر ابطون ما توجعنا هالكثر يولي دحكي وجهج بسواد العباية وفجوج طالعة اليكول طالعة من الكبور شجاري الحالج اكو شي ضامته علينا
– لا ما بيه شي بس تعبانة شوي
كاموا اهلها يودولها الاكل والشرب كن تكرمت من الوجع
يلحون عليها خاطر ياخذوها للطبيب ما ترضى خاف يكتشفون عملة راشد ويحاسبنو .
بهالاثناء وهالفترة .. تم اعلان دولة اسرائيل
وتم فتح باب التطوع بالجيش العراقي .. للي يريد يروح لفلسطين يحارب .
هين راشد شافها فرصة ينضم للجيش العراقي ويفتك من خشان وخدمة كاعو .. قدم اسمه وكالوله .. تاخذ اوراقك وتطلع لبغداد.
بلغ اهله وكالم ثاني يوم من الفجر هد الديرة وتوجه لبغداد خاطر ينظم للجيش العراقي.
لا شذرة تدري بحالو ولا اهلها .. بليلة ويوم راشد اختفى عن البيت وحالها يزيد ما ينكص .
ذيج الساع اضطرت شذرة تخبر امها براشد خاطر امها تنشد عنه عليش ما جاي لبيته صاله ثلث تيام
راحت امها لبيت اهله .. كالتلها : ابني طلع لبغداد راح يصير بالجيش العراقي
ردت يازي خذت بنتها خاطر تضل عدها وهم يخدموها بس حالها ما جاي يطيب .. لحد ما امها غصبتها تاخذها لمركز المدينة خاطرتكشف عليها .
خذاها خشان ويازي وطلعوا بيها للمستشفى
عد ما كشفوا عليها الاطباء تخبلوا وكاموا يرزلون باهلها .. وكايليلهم : بنتكم بيا زنزانة تعذيب جانت
– جانت ابيت رجلها واهي حبلى وتشكي من بطننها ووجع حمالها ما يخلص
– البنت ما عد تشكي من بطنها البنت متعرضة لاذابة بماء الذهب ( تيزاب ) لجسدها
صرخت يازي واندارت لشذرة : ياهو العامل بيج هالعملة هاي
احجييي
شذرة كايمة تبجي
كايم ابوها يصيح ويلوم عليها ويتوعد لراشد واهله
وشذرة تحلفه ما يمس اهله بسوء تكله ( مالهم غرض بعملة راشد وهم ما يدرون بفعلته هو راد يمحي اثر جويات عمران بجسمي ما يدري يصير بيه هيج )
تخبل ابوها من سمعها اتدافع لراشد وهي هذا حالها
وامها فوك وجعها كامت تكصر وتعض بيها وتكللها : لو احطج واكصبج هالساعة ما يبرد كلبي منج .. يولي تستاهلين كل اليجرالج عبن راضية .. حاطة بزنزانة تعذيب واهو واهله عايشين بخير ابوج يولي مالت اكضبج واسلخج الج مو راشد واهله .
الدكتور كتب لازم تجيب الطفل باسرع وكت
لا الطفل ما بحالة جيدة .. خشان كايلو : اعمل التشوفه زين وبيه مصلحتها وشتامر انا حاضر .
نقلوها والدكتور يكللهم .. لا بتكم ولا طفلها بخير اذا ماتت او مات نحن ما مسؤلين انتم اللي ساكتين حالتها كل هالفترة بنتك عظمها طالع من التيزاب لو ضالة اكثر وعلى هالالم جان ماتت عدكم بالبيت الله دزكم وجبتوها لهين فاحنا ما مسؤلين بكلشي يحصل وياها
خشان كايله : ما عليك زود افعل التشوفة مناسب
نقلوها لصالة الولادة وحاولوا وياها خاطر تجيب
بهالوكت خيري جا خاطر يعرف بحال شذرة
تولاه خشان رزايل غسله غسل وكالو : حسابك بعد جيابها لو ما طلعت منها شذرة لا اكتلع عينك وعين اهل بيتك .. كلكم عدي ما تسااون نعل من نعال شذرة عدي وابنك يعمل بحالها هيج احمدوا ربكم اطيتكم بتي وابنك يعذبها هييييج
ابوها وعمها يتذابحون برا وشذرة داخل شافت الموت بعينه وهم يحاولون يخلوها تطلك .. ليما بعد ساعات طويلة من الألم … جابت
جو يبشرونم ويكلولم .. جابت جابت
فزوا وهم يكلولهم : جابت بنية
خذوا البنت ونطوها ليازي .. تكرب خشان منها وكاللها : نطيها لجدها يسميها نحن مالنا ابزرهم .. انا ناطر شذرة ما يهمني ابطنها ..
جاي يحجي طلعت دكتورة كاللها : ابشري يابه
كالتلو : وضعها كلش مو تمام النزف ما عد يتوقف ادعولها
حجتها وخيري كاضب البنت ويدحج وناطرين حال شذرة
ندهوله وكالوله : جيب الطفلة خاطر ينكتب اسمها
– اسمها
– اي لازم تتسجل بياناتها .. شراح تسموها
احتار شيسميها تذكر بنت جان عاشكها كبل بس اهلها ما اطوها كام وكالو : اسميها وسام ….

يتبع….

((( بقلم زينب ماجد )))
الحلقة_١٦
(مصرع في صبيحة ما)
انا الخواف يا دنيا انا الخواف من كلشي
لو احلم حلم مو زين انا ارجف كبل رمشي
(كاظم أسماعيل گاطع)
من بعد جيابة شذرة ..
حالتها تعسرت كلش .. وخشان ويازي كلوبهم ترجف اعلى بنتم وخيري يتراجف من غيض خشان وواكف ليغاد وبيدو الجاهلة
الجاهلة ضلت تبجي بيدا ..
كال : يمكنها العجية رايدة ترضع عتبجي
يازي : دورلك وحدة ترضع حفيدتك نحن ما بحال رضاعة بتي ما بين الحيا والموت ولو صابها شي لا انت ولا اهل بيتك تنفكون مني .. لا اسوي بيكم سوايا ما عبد سواها بحد بس صبركم علي
خيري : انا والله ما ادري عن سالفة راسد واهو لا كاللنا ولا شذرة استكت خاطر انا ارد ابني منيش ادري بعد اشم ايدي وادري بخبرها

خشان – ادعي الله شذرة تطلع بخير الا والله يراشد ما يسلم مني .
سكت خيري والجاهلة تبجي بيده ..
ليما اخذها ورد بيها للديرة خاطر يشوفله وحدة ترضعها
دخل بيها على نعيمة كالتلو ( وشنهاي الجايبها لينا ؟ )
– هذه بنت راشد وشذرة ماهي بخير
– حشى ما جانت بت راسد ولا تكون هالبنت بنت امها
– حبي الله يمرا عجل امها ياهي غير مرتو لراشد
– عليش نسيت عملت خشان عد ما شالها من عمران وذبها اعلى راشد ياهو الكال العجية هاي من راشد مو من ذاك الزلمة
– استري علينا وسدي هالسالفة وشوفيلج احد يرضعها راح تموت من الجوع العجية
– والله لا هاي مني ولا هي بنت ولدي .. روح ذبها اعلى ال موازي وكلم شذرة خلفت منكم
– انت شني تخبلتي عكلج صابه شي انا اشيل العجية هاي واذبها اعلى الغرب ولو نشدنا خشان شنكلو ؟ ذبينها على ال موازي لو رادتها امها
-تجي تاخذها عليش باليتنا ببليتها
– يولو امها بين الحيا والموت من تحت راي ابنج حارك المرة بتيزاب واهي حبلى وسالخ جلدها وهساه يازي وخشان غيضهم يفور علي وعلى ال بيتي من تحت عملك راشد الله لا يبارك بيه

– لا تدعي على وليدي لجل ناس ما ينعرف ساسم من اصلم .. وليدي بحرب رايح يدافع عن فلسطين وعن العرب ابني شرف لكل ويحد ما عندو شرف ونقصو الشرف
– راح تعمين علينا بسوالفج هاي ضلي
ماخذها ورايح للجيران مودي على مرة توها جايبة
راح للبيت نطاها فلوس وكاللها: خليها عدج ليما تطلع امها وترضعها .
نطاها ورد لبيته نام
ثاني يوم راد يطلع لمركز المدينة ياخذ المخضر بعربانته ومنك يمر على المستشفى خاطر يستفسر عن حال شذرة .. بس عد ما كعد ابنه (محمد ) كالو : شذرة جت عد اهلها وحالها صعب
كالو : اه عجل محد ودى علينا بجيتها
– انا جنت برا وسمعت بالليل محد منم جانا
– عجل انا طالع لو جا احد كلو ابوي طلع لمركز المدينة والبنت عند بيت قحطان مرتو كن توها جايبة ووديتها ترضعها .
– خوش .
شذرة : ردوني للبيت بالليل .. عكب ما خلصت روحي من الوجع .. وانا بعز الوجع انده ( يمه كالولي جبتي بنية وينها )
وامي ما ترد علي .

دخلوني الكلعة وحطوني بمجاني .. ووكف ابوي على راسي كالي : عليش عامل بحالج هيج وما تحجين .. انت ان جنت ضانه فعلتو هذه تكع عليج غلطانه فعلتو هاي اهانة لال عكاب كلها كاعد بارضنا وياخل من خيرنا .. ويحرك بنتي .. هاذ ما احترمني ما حاطلنا اعتبار من وراج
يازي : اي والله من وراها لو ما بتي اكول تستاهل اكثر عبن ساكتة يولو بيتج خطوتين عنا وواصلة الموت وما تكلين خاف ندري برجلج ونحن الف مرة سعلناج اعلى وضعج كلتي تشاليع ولادة وما تكلين اهو حارك ظهري بتيزاب.
– بنتي يمه وينها ؟
– اهو هذا اللي كاتلج بنتو ؟ دحجي حالج يولي خيطين عن عن الموت ادري عن روحج
– يمه هاي بتي اريدها
– تجيج ما تروح عد اهلها ارتاحي واهي تجيج باجر
ما ارتحت ولا كلبي ارتاح .. الوجع كلاني اكل نايمة صفح لا اكد اندار من الوجع ولا اكدر ارد على ظهري ولا اتمدد على بطني على صفحة وحدة .. روحي تلوج الليل كله
عد ما صبح الصبح .. جابتلي امي ترويكة .. كتلها : ما اشتهي الزاد صدري يدر اعلى بنتي اريدها
كالت : اكلي وانا اخل اخوتج يجيبونها بس خل تطلع الشمس .

كلت كشمرة خاطر امي ما تظل تلج
بس الوجع كتلني الوج محتارة منين ما اجيب روحي انلجم واتلوى الوجع الشالته روحي بهاليوم ما اضن شالو احد .
عكب طلعت الشمس جابر اخوي راح على بيت راشد طالعتله نعيمة : ها خير
: نريد الجاهلة بنت شذرة خاطر ترضعها
– ما ندري عنها خيري مدري المن اطاها
– المن اطاها شنهو غير امها تريدها
– وان جان امها تريدها عليش اتذبها باول يوم جيبوبتها لو هسه حن الدم
– انا اتعب من حجي النساوين اخبر امي تجيلكم واهي تفتهم موضوعكم
رد كاللها : يمه نعيمة تحجي من كفى ثمها وتكول خيري مدري المن اطا البنت
طار كلبي عد ما دريت ابنتي منطيها وما تدري عنها خالتي ردت اكوم من مجاني امي ما رضت كالتلي: ضلي عدج وانا امش اشوف وين ودو العجية

مشت دكت الباب على بيت خيري
طلعت الها نعيمة كالتلها : اشوف طالعلج حس ينعيمة ؟
– حشى لجن الصار ماهو هين
– واشنو هو الصار بيكم … ابنكم محروك ظهره بتيزاب والحاركه شارد ؟
– لا مهو حارك ظهرها الولد كايللها خاطر يمحي اثر بظهرها مدري شني وهي راضية وكايلتله امسحه
– عجل انت تدرين بصوابها
– اي وكاللها امشي واديج للطبيب هي ما راضية عجل بعد شيسويلها
– من هاي شرد وما كال لاحد .. انت على ياهو جاي تنصبين .. لو رد ابنج احركو بتيزاب مثل ما حرك بنتي وهساه انا جاية خاطر اعرف بنت شذرة وينها
– اشوى طلعت منج يم جابر كا بنت شذرة ماهي بنت راشد
– كصري السانج ينعيمة ماهي انت ولا هي امثالج التعيب بنتي بشرفها
– انا ما كصد…
– الكصدتي والما كصدتي لا تنسين روحج منهي والواكفة جدامج ياهي اتصدون تنزلون اتصلون اعلى حالكم عمركم كله عايشين بخيرنا وكاعنا من تالي يطلع حسج .. اعرفي ويامن تحجين عبن لو طلع السانج انا اعرف شلون اكصه

احمدو ربكم نطيناكم بنتنا نسيتي روحج عد ما جيتي تتخطبيها وانا اردها لا ابنج من ثوبها ولا يصلها .. لجن يحيف الدنيا وغيضها الذب شذرة اعلى حالكم بس هين .. ما جنت يازي لو ما وجعت كلبج مثل ما وجع كلبي ابنج ابتي .
واسمعلج ينعيمة الا والله لا اطلعو من ثمج واكصو
وهالساه انا اروح للكلعة وانطر وهلة ان ما اندكت الباب وجبتي بنت بنتي الا والله ما تنامون ليلكم بهالديرة .. وشوفولكم كاع تلفي وجوهكم .
هفت عباتها واندارت
نعيمة ما حجت نص جلمة بوجهه كلت الرزلة كلها من ثم ساكت .. ردت يازي للكلعة .. من بعد نص ساعة جا ابن خيري وبيد وبنت شذرة .. ردتو : عجل امك عليش ما جابتها تتكبر عن امرنا نعيمة ؟
– امي مشغولة بحصدت الكاع ووصتني ازتها
– وصللها خل تحب الكاع المشغولة بيعها زعم لو تكبرت على هالكاع ما تلاكي كسرة خبز تسد جوعتها بيها .
خذت الجاهلة من عنده وردت تنطيها لشذرة وهي مطروحة
دحجت على شذرة فرحانة ابتها .. حجت : اشجنيتي من راشد يشذرة
– العشك ماهو تجارة ييمه خاطر اجني ما هو بيدي انا احبه
ولو سالتيني شايلة بكلبج عليه عكب فعلته هاذي
يشهد الله ما شايلة غير المحبة والدعى يرد بسلامة

– لو رد بسلامة ما راح يسلم من غيضنا
– يمه عمران ما يهدوا بحالو حجاله عن اثار جكايرة بكفاي وراشد زلمة واي زلمة بمجانه ما يتحمل احجايات عمران عليش تردون راشد يبلعن
– وبعدج تدافعيلا .. يولي لو اكضبج واسبحج بتيزاب ما يبرد كلبي منج يولي حاركج يا عشك هاذ ويا حك .. حك يحرك عمران لونه زلمة صدكما كدرته عليج يالمخداية يعرف تصمين حلكج ما تحجين .. لجن فنه لو كدر لعمران لو تقارش ويا ال موازي .. هالدثو .
– اسم الله عليش راسدتو يتجاتل وياهم ولو تجاتل ما يخلونا يجتلونه
– عجل ان ما يكدر اعلى الفاعل عليش يطلع مراجله براسج
– بس ….. صرخت امها
– لا تدافعين يول لا تدافعين .. صمي ثمج واسكتي حركتي افادي
شذرة : سكتت وضليت اداري ابتي .. ادحج بيها كلت لها : يمه شسموها ؟

– ما نشدت عن اسمها سميها انت
– لا يمه عيب غير عمي يسميها
-ضلي كبري بيهم واهم زغار .. ضلي
نطرت اعرف شمسميعا عمي خاطر ما اسمي على سمايته
لينا جا عكب الظهر اهو و عمتي يتحمدولي بالسلامة بس لا امي ولا ابوي طلعوا ورحبوا بيهم ولحد جابلم ماي .. جو كعدوا بحجرتي وسعلوني على وضعي بس محد جا وتكرب للحجرة
عمي استحى حيل وخالتي اغتاضت
حجيتلا : عمي ما كتلي شسميت البنية
– سميتها وسام
اندارتلا نعيمة : وعليش سميتا بهاذ الاسم
تحجي واهي دايرة تخزه
بلع ريجه وكاللها : هيج انشدهت ما عرفت شسمي وجا هالاسم على بالي وكلت اسمي
– وبنص شدهتك وانت ما ذكرت غير هالاسم ؟
– بعد سميتها
– لا سميها نعيمة على اسمي
– ما يصير بعد اتسمت
– انت شناوي يخيري ها .. وشذكرك بهالاسم هاا شنهي حنييييت

– عفا الله لا انا كاصد شي ولانا حان .. اسم طرى اعلى بالي وسميتها .. عدج العافية ول بنتي انا رايح من تعتازين شي ندهيلي .. وسلمينا اعلى اهلج واتعذريلنا منم
كام لحيله خاطر يطلع ويتهرب و نعيمة تكضبت بذيلا هدها وطفر واهي طلعت هايمة ورا .. تصيح : خيري لا تشرد مني اكرب احاجييييييك
تبسمت ودحجت بوجه بنتي : اسمج وسام ييمه
ان جان زين هالاسم عليج ويزيد بحظج كون خوش
كعدت اداريها واعتني بيها انا ابيت اهلي ..
امي شايطة من عملة راشد .. كن الحرك بظهري ماهو بظهرها وكل ما خفت ابوي تهيجه خاطر لا يهمد غيضه اعلى راشد .. وتتوعدلا لو رد تحركه مثل ما حرك كلبها بصوابي .
ضليت عدهم ايام وليالي طويلة
امشي لبيتي بين الوهلة والاخرى خاطر انظفه بس ما يرضى ابوي ابات بيه مع اني حنيتلا واتمنى ارد لبيت انام براحتي اغسل صحوني اعمل اكلي .. وتصيرلي عايلة واشوف بنتي تلعب بالبيت .
مرت شهور .. وراشد ما حصلي خبر عنه
كالو اللي راحو للحرب تجتلو بس انا الي امل برجعته
كلبي يكول يرجع .. صح اذاني بس مدري ليش اكعد احطله سبب بفعايله واطي حك حتى لو ما جان له حك .. حبي له ما جان بانصاف مدري شعامينة اعلى هالمحبة وماهي بيدي .

مر شهر وخمسة .. وعشر اشهور وراشد ما هو
لا شفتا ولا سمعت عنو خبر .. اسمع من اخوتي امو ضايمها الضيم اعلى حالو .. وابو مشى لبغداد مرتين ينشد عن اسمه خاطر يعرف حي لو مستشهد بفلسطين بس مالو خبر !
اعتكفت وخاب حالي
حزنت جثير وكمت اتنطروا نطرة
ابجي والليل اخلصه بذكره ادعي يرجعلي ولبنتو بسلامه
انتهت الحرب .. وفازت اسرائيل وخذت كاع من اهل فلسطين واستوطنت بغير حك وفشل العرب باسترجاع حك فلسطين .. واهل الحرب ما ردوا .
ابوي عكب السنة خف غيضه عن راشد وصار ينشد معارفوا والي راجع من الحرب وما يعرفون خبر عنو .
الا ما بليلة من الليالي .. اسمع امي تكلو لابوي : لا تخبرها
خشان : بس هذا رجلها .. ولزوم تعرف خبره
فزيت من مجاني وطلعت مفزوعه : سمعتم خبر عن راشد
فزوا اعلى جيتي حجه ابوي : حبي الله ول يابة فززتينيا
– عرفتم شي عنه يابه ابخت الله احجي
– راشد مخابر اعلى نصير ابو الكهوة وكايلو يبلغ اهلو هاذ الاسبوع يجي

فزيت اعلى هالخبر وصحت : الحمدلله الف الحمدلله هو بخير ما ميت .. الف حمد وشكر الك ربي
يازي : هالحجي ما يغير شي من الماضي ان رد وان ما رد .. مالج رده له
– بس يمه هاذ…. قاطعتني
– ونسيتي عمايلا بحالج ؟ يولي نسيتي شعمل بيج حرك ظهرج بايزاب وبعدج تحنين له
– يم ابخت الله لا تحرمين بتي من ابوها
– بتج من فجت عينها واهي ما شايفة ابوها ولا تشوفه .. ماله لزمه لا الج. ولا الها
خشان : يا يازي خلي شذرة تاخذ حكها وخلنا محن ما ندخل ان جانت هي الضايمة واهي الراضية نحن ما نغصبها اعلى طلاكها
– لا نغصبها شناطر يحركها مرت الاخرى ؟
– ما يسويها
– وشمنعا لو راد يسويها ما هو سواها كا انت ما ترضى تعاكبه
– السالفة مضت عليها سنة
– سنة عندك ماهو عندي صواب راشد بجسم شذره لهساه ينز بكلبي ما يبرد دمي لا ما جرعته من نفس الكاس الشرب نتي منا
– هذه بنتي واهي رالرايدة ترجعلا

– وانا ما على يكفها بنت خبكة ما تعرف حكها وين مضيعة روحها ومصيعة حكها بعمى كلبها اللاحك راشد مدري اعلى يا مال من زين حاله من زين ماله اسوى فكر ونايم بكترنا .
تضايكت من امي عبن ما ترضى ارد لراشد لو جا
تمايلت عنها وابتعد وكمت انفرد بروحي ومن تحاجيني ارد بغير بال ..
لي ما جت وكعدت كبالي وكالتلي : انا من ما اريد اردج له كارهتج ؟ معاديتج ؟ يولي عليش من انصحج ما تنصحين انا يستفيض حالي من اشوفج عايشة شاة بنص ذايبة ياكلون بلحمج وانت الراضية وابوج ماهو هين ولا انا هينة بال .. يول عملته هاي لو سكتي عنه .. عمرا ما ينردع بعد واح يتعلم يطكج ويحركج ومامن تسكتين ..
– يمه السالفة مرت عليها سنة واهو جان بحرب عليش نفتح جروح كديمة
-وهاي الجروح ياهو العاشها غيرج
– وانا مسامحة
– يبنتي اكلج وارد اكلج اليسكت عن حكه يكضي العمر مهيون مديوس
– اعتبريها فرصة ولو عادها ما ارد
– وننطر منه يعيدها يولج بعكلج انت
– ابن ادم يخطي وسبحانه الما يخطي .. وارشد خطي وماكو احد ما يستاهل فرصة يعاود امره ..
– لو تاب ؟
-ومنهو الكالج اهو ما تاب ؟
-انا هم انشد ياهو الكالي هو تاب خاطر ارد بنتي المدمغة له ؟

– فرصة
– هالفرصة لو اطيتها اطيها لاجلج بس شرط اليصير وياج تحجيلي ما اضمين
– صار
– نشوف الصار بس كبل هاي ما تردين للبيت الا عكب ما هو يجي ويطلب السماح من ابوج ويتعذر وياخذج وياها منتي رخيصة خاطر تردين بلا عذر .. لاون يتعذر ويتوعد ما يعيد فعلته .
– ولو ما جا ؟
– عله لا جا ولا كبل، شلج بالما رايدج ؟
كعدت اتنطر اليوم باجر يرد ما معلومة ساعته
كلبي يتنطره اعلى الشوك لحظة لحظة ..
ليما بعد ٥ ايام .. الصبح
واسمع وقاص : شذررررررة شذررررررة
فزيت اركض : ها يولو
– شفت راشد بالشارع رايح لاهله شفتو
– صدك عليك الله
– والله شفته
هرع كلبي ردت اطلع للشارع اشوفه صاحت امي : وين
– بس ادحج

-دشي داخل ..
– يمه بس اشوفه
– عدا يكلج ماشي لاهله انت ياهو مالتج
– يمه لا تطفين فرحتي ابخت الله
– ردي لدارج يشذرة واتنطر اليحبك يندل خدك .
رديت وانا اعلى نار ..
بودي اطير وامشيله واشوفه عكب السنة المرت شصار ويا شجرالو .. وشلون صبح شكلو .. مشتاكتله كلش .. حيل مشتاكة وكلبي ولهان لشوفته
الساعة التمر بسنة
جا ابوي الظهر وتغدوا وخبرتو امي ودخلو لحجرهم وانا وبنتي نتنطر جيت راشد اعلى نار
جنت اظن العصر يجي واحد منم يردني ..
بس الساعة تمر ثانية ثانية ومحد بين .. مجابلة الباب وعين ادحج اطراف الباب بلكت المح احد منم يجي
ومن يجي احد افز ويطلع واحد من اخوتي وارد اهمد
كرب المغرب وشمس الله بدت تنزل .. ومحد من اهل راشد بين !
صار الغروب ووذن الاوذان وجرت دموعي ويا جلمة ( الله اكبر ) نصلوا العشى وتعشينا اعلى ضوا الفوانيس بس حرام لو روحي اشتهد الزاد كد ما اشتهت تختلي بروحها بحجرة وتصك عليها
هود الليل ونامت العيون وماكو احد منم كرب

نام وما فكر يجيلي ؟ ما دز احد من اهله يجيبني لا مشتاكلي ولا مشتاك لبنتو الما شايفها .. انا ناطرة وهم لو هو تعبان
لا تعبان انا فاضية وما عدي سالفة كاعدة اتنطر
زلمة راد من حرب تلاكي هساه نايم يرتاح
بس ما المفروض راحتو بشوفتنا ونحن اولى من الكل ؟
لا بس يمكنه التعب كضى عليه
ارد احط اسباب واعذار حتى لو ما جانت صحيحة
اواسي روحي بيها .. واكنععا خاطر لا تفيض بحزنها
بس بالنهاية نمت والدمعة بعيني.
كعد الفجر اتنطر الجلمة بلكت احد جاي وانا نايمة
بلكت اكو خبر جديد بس الوجوه ما بيها جديد وعايشين يومهم ما دارين عن النار المستعرة بين اضلاعي وانا اتنطر احد ما جالي ولا ذكرني
مدري اعاتبو مدري اعاتب روحي التحب وتهوى هالكثر
مدري شحجي ويا الروح وبيش اكنعها .
مر الصبح
وجا الضحى .. واعتلت شمس الله وصدح ظهرها .. ورد كفاها وبين عصرها وروحي خمدت نارها وبهتت فرحتها وماتت امانيها .
من بعد العصر وانا كاعدة الاشي بتي بالباحة

اندكت الباب فتحتوا زهرة .. جان عمي خيري وخالتي نعيمة
عد ما سمعت باسمهم .. كلبي فز ونفض ترابه ورحت اركض من مجاني لحجرة امي وانا اكلها : اجو يمه اجو
– ياهمه ؟
– عيالي اجو
– عشتو اجم اهل الملك فيصل ؟
– يم ابخت الله كومي
– صيحي واحد من اخوتج يندا لابوج يجي
– وصي ابوي لا يكبح وياهم
– يولي شو استحي واثكلي شويتين واتنحي
هدتني ومشت وانا اترفكس بمجاني .
ليما جا ابوي وكعد كالوله : نريد نرد مرت راشد لبيتها وراشد مستحي يجي يكف جدامك اعلى الصار وهو يتعذر منك
كالم : البنت راح ارضى تروح وياكم وترد لبيتها لجن والله واسم الله لو عرضلها شي اخر من راشد ما يفكني منه غير اطلاع روحه .
تعهدولا ما يتعرضلي ويحطني بين عيونا ومن هالحجي
صاحبي وانا كلبي طاير كالي : بويا امشي ويا عيالج وردي لبيتج وديري بالج اعلى بيتج وعامليهم بما يرضي الله وان شفتي احد عال عليج .. بيتي ما يبعد من بيتج غير خطوتين لا املص اذانو اليعترضلج .
حبيت ايده وكتلو : الله يديمك اعلى راسي يابه
حبيت امي وسلمت على البالبيت وشلت بتي وطلعت ..

وانا بالدرب شايله وسام تبجي
وانا الاشيها : راح اشوفين بابا يلا دحجي دحجي هذا بيتنا
حجت عمتي : اشوى ينعرف ابوها تا تشوفه
نزها عمي : نعيمة فكينا من هالسيرة
– انا رادة البيت كوا على كلبي جريتني من البيت تجرجر خاطر اجيلها وهاي سويت العلي .. اسلم عليكم
هدتنا ومشت
عمي ضل يوصي بيا ويكلي ؛ ما عليج من احد انطري زلمتج يجي وطاوعي وصوني يلا بعد عمج عدكم العافية
– تسلم عمي الله يعافيك
دخلت البيت بكل حماس رحت انكض الغراض وارتب البيت واكشه .. واغسل ليما خلصت جريت بتي خاطر انومها حسيت الباب انفكت ، انحبست انفاسي .
دخل راسد للحجرة انا مدنجة
حجه : شلونج يشذرة
نومت بتي بمجانها وكمت اتلكيته بلهفة سلمت عليه
كام يتعذر مني جثير ويحبني براسي ويوعدني بايام بيضة .
حيل ضعفان وسمران جثير عكب ما جا من الحرب
كعد الليل كله يحجيلي عن الصار وشلون مر بالموت جم مرة ونجى منه بعجوبه

جنت كلش فرحانة بشوفته واهو يحجي
حيل مشتاكتلا ومشتاكة لتفاصيله وحجاياته
نام وانا عيوني ما نامت بعدها ما شابعة من شوفه لينا فج الصبح نمت .. خذتني النومة للضحى كعدت اعلى حس بتي تبجي .. خليتها بحضني ارضعها .. شال راسه هو وكام يحبها براسها ويكلي : وكحة لو هادية
– لا والله مانها هادية مشعوطتني بوكاحته .. ساحبة من الصوبين
تبسم : من امي وامج
– الا ازود وجعلك لا اشوفها لو بجت تجتل بالجدامها
– بت ابوها .. انا اريدها هيج تطلع ما تنكدر
– ابشر واهي باينه لا تنكدر ولا تنحمل
– لا تفترين اعلى العجية يولو
ضلينا نضحك وكمت سويت ترويكة تريكنا بيها ..
وكعدنا نحج ونسولف وكضيناها سوالف ما وصلنا عتبتة الباب اهو مشتاكلي وانا مشتاكتله .
مرت ايام ونحن اعلى هالحال ..
جانت اجازتو شهر ويرد يالتحق بالجيش
بس كال : هالمرة ابغداد اداوم ما خارج العراق .
كتله : اشوى
جانت ايامنا هنيا .. شهر كضاه وياي براحة بال لا ضايكني بجلمة ولا ضايكته وعايشين بحب الله نتسامر ونتغازل .

عكب الشهر راح التحق ثلث تشهر ورد
ارتاح يومين بالبيت وعكب اليومين شال وسام كعدها على اجتافه .. وراح بيها للكهوة يكعد عصريات خاطر انا اكضي شغلي ويا امه .
غاد بالكهوة عند ما داخل .. عمران جان كاعد
مدحك بيه من داش راد يرد بس صاحبه ما راضي عازمو على بيالة جاي ..
صاح عمران من مجانه : جايك واصل ابو وسام
– اجفينا شرك يبن موازي مانا رايد جايك
– افا عليش
حجاها وكام من مجانه كعد كابل راشد
كالو : ما رايد اعلك وياك فك عنا وفارج يعمران .
– المن هالحليوة هاي .. كن تشبهني ما دحج خشمها عيناا خشمي . ما حك ؟
راشد مغتاض وكاضبو من ياخة دشداشتو : لا تحاول وياي ولا تكرب من عايلتي هالمرة سويتها وكضبت بنتي مرت الاخرى والله لا احطلك الجيلة بنص جفك لو حاولت
– بس انا اشكرك .. جثير اشكرك عبن شايل عاري ومبيضا .. لا ومزود بعد .
حاجيها ومدحج بوسام
وراشد متخبل .. متكاون وياها .. كايمين اللي بالكهوة يفاككونم .. ليما مطلعين راشد من المجان وطاردينو

رد وهو مشتعل غيض اول ما رد كضب بشذرة واهو يكلها : محد يثبت الجاهل غير امه اصدكي واحجلي البنت هذي بنت من ؟
– بنت يراشد شخبرك ؟
– عجل عمران شلون يحسبها بنتا ؟
– والله ما هي بنتا البنية دحج شكثر تشبع عمي خيري وانت الشاهد وتكول تشبه الوي والله هالزلمة رايد يعث ايامنا
– ولو جانت صدك منه
– ماهي منا ولا تصدك حجيه ولا تكرب صوبه ابخت الله والله هاذ رايد النار .
فك عني لجنه ما فك يدحج بملامح الجاهلة
ورد يكول : صدك بيها منو .. انا جاي اشوفها تشبهلو
– والله ما بيها شبه منو حرام عليك يراشد البنية بنتك عليش تكرها بهالمراواة
– ولو جانت بنت وانا متوهم
– انت متوهم صدك بس بضنك البنية بنتك والله .
اعتكف شهر اجازته .. ما طلع ولا شاف احد
وساعة ووكت اهو يدحج بوجه وسام .. ساعة يكول ماهي مني وساعة يكول ( كلبي يوالفها جنها منه .. لا كلبي يكول بتي اني ادريها بتي )

صحيت ليلة من الليالي وهو شارب بالليل وحاط الفانوس ويدحج بوجه وسام ومصوب الرشاشة مالتو صوب وجهه .. فزيت من مجاني اصرخ: راشد سلاحك عن وجه البنت
جريت سلاحه عن وجهه وهو بكل هدوء يسالني : لو صاوبتها تموت ؟
– راشد ابخت الله هدك من هالتفكير هاذ
– ما راح يهنالي بال لا ما اتاكد هالبنت اصلها منين
– هذه بنتك راشد حرام والله حرام الجاي تسوي بروحك وبينا
– بس ما راح افتك من هالتفكير غير لما اجتلها
– تجتل الجاهلة راشد تخبلت اهي شذنبها بحجايات عمران المسمومة هاذ رايدنا نتحارج وما نعيش بهنا عليش تفضيلو امالو
– بس حك هيه تشبهلو
– لا ماهي تشبه لاحد هد الجاهلة ابخت الله .
بالزور خذيت السلاح منه … وضميته بمكان
ثاني يوم الصبح حجيتله على السواه .. تعجب يكلو : حسبالي جنت احلم ما جنت بوعيي
– كتلو جوز من الشرب راح تضيعنا وتضيع روحك بهالسم
كال : بس هذا اليخليني انسى وما افكر
– انت نا جاي تنسى وتخلص ليلك مداحج بوجه الجاهلة

– لا بعد ما اسويها بس كليلي سلاحي وين
– ما ادليك الا ما يجي يوم روحتك لبغداد اكلك .
ضل يضحك وخذاها بضحك وكشمرة
بس كلبي كاضبتو بيدي .. حيل خايفة من حركاته وساعت شربه ما يفرزن الحك من الباطل عد ما يشرب ويتراواله يجرم باحد كن يكتلني لو يكتل الجاهلة .. كمت اخذ الجاهلة وانام بالزاوية واخليها منها للحايط واكفكف عليها خاطر لا يدحج بيها بالليل
كبل روحته لبغداد بيومين ..
بالدرب وهو جاي يجيب الشرب مالو .. شافه عمران
وصاح عليه :ما اوصيك بامانتي داريها زين حبها نيابة عني
وكف جدامه راشد وكالو : انت بايع روحك ؟
– روحي عدك بالبيت
– عجل اكرب اخذها لو جنت زلمة
– المرجلة خليناها الك انا عار اسوي العار وانت تشيلو عني ههههههههههههههههههههههه
ضحك ومشى .. بس عالمرة راشد لا كضبو ولا تكاون ويا بس اندار يدحك عليه واهو ماشي .. ما حجه شي
رد بس ساكت ..
سعلتو شذرة اذا جان رايد عشى : كايللها نامي ما رايد منج شي هديني لحالي

يومين وهو على نفس هدوء يشرب وهو ساكت ينام النهار ويكعد وهو ما يفج ثمه ويا احد .. شذرة خافت منه حيل
حلفته وكالتله : بيك شي ابالك شي
كاللها : انا عزمت امري
– كالتله : عليش عزمت امرك
كاللها : يجيلج الخبر
من بعد يوم من حجايته هاي جان محضر روحه يطلع الفجر لبغداد .. يومها ما شرب حضرتله بدلته العسكرية وحضرتله الاكل مالو الياكله بالدرب وخلت اسلاحه خلف الباب ..
الليل كلو المر لا هو غمض ولا انا هنالي بال وغمضت خايفة يعمل بالجاهلة شي ويشرد .. عشت بحرب بداخلي محد يعلمها .. لحد ما شفتو طلع كبل الفجر حبني براسي وطلع
عد ما طلع وامنت .. سركيت الباب حيل خاطر امن اكثر وانام
نمت نومة طويلة للضحى …كعدت اعلى حس الباب يندك
فزيت افتح الباب
طلعت امي : هلا يمه
– شني موته اكو احد لهاساع نايم .. شنهي نومتج
– يمى الليل سهرناته ويا راشد الا طلع يلا نمت
– اشوى فكنا روحه بلا رده
– على بختج يمه تدعين اعلى راعي بيتي

– هدج من هالتمسلت واسمعي شحصل
– شحصل
– مصيبة وبس عد ربج خبرها
– عليش يا ستار شكو ؟
– وصلنا خبر كبل شواي
– اي
– لاكين عمران مجتول
– يمممممه ياهو الجاتلا ….

يتبع….

يا شوگ امس شمعة هوانه اتعالج باخر نفس…!!
شد حيل يا جدم الندم …!
كاظم اسماعيل الگاطع
شذرة :-يمممه ياهو الجاتلا ؟
– مدري عنه خذاه الشر وفكنا مالنا
امي تحجي وانا وجهي كام يطي الوان وافكر ما بيني وبين نفسي … معكرل راشد له ايد بهالسالفة ؟ امس طلع ما نايم ويكلي عد نية ..
طلع اعلى غير اوانة
كل مرة الفجر يركب للمركز خاطر يصل لبغداد
هالمرة من الليل طلع بلا نوم كضاها صفنات ويضرب اخماس بسداس .. وانا الجنت خايفة لا يجتل بتي .. سواها وجتل عمران
لا لا ما معكرلة … ما هو

زكحت بيه امي : يولي مو احاجيج شجالج ؟
– ها يمة
– وين بالج
– لا ماكو .. عد فكر شعمل غدا
– غدا المن اشو انت بطرك روحج اكربي تغدي عدنا وردي لدارج
– اي
– يولي اعلى بالج شي
– لا يمة شني شجالج وياي
– راشد له ايد بجتلة عمران
– لا لا سني راشد ياهو مالته يمه لا تجيبين اسمه دخيل بختج زلمة بالجيش وطلع لشغله معليه بدم هالنجس السم مالو جتلو
– ها اي .. الله يجفينا شرم .. يلا انفظي بيتج وكشي وتعاي وياي نطلع لكاع مزعل مرتو جايبة ونرد للبيت الظهر
– لا يمه روحي انت انا على راحتي اكضي شغلي واتبعج للكلعة
– ولونه وجهج ما برد كلبي واعرف وراج سالفة وخطفت وجهج هاي وراها براغيث حجي بس يا خبر اليوم بفلوس باجر بلاش
هدتني ومشت بس انا جسمي كام يرعش

بين الشبه متوكدة راشد ورا جتلة عمران وبين الشك
وضالة افرزن بروحي يمتى طلع ويمتى عمران انجتل اذا كبل طلعة راشد معناتها راشد بري من دمه !
كشيت بيتي وغسلت بتي وطلعت للكلعة لكيت خواتي من ابوي جايات هن وعجيهن .. لهيت اسولف وياهن بس كلبي يم هالسالفة ..
رد جابر من برا .. كضبتو اسعلو
وانا اندهلو : جابر .. جابر
– هلا
– اكف اسعلك شنهي شصار اعلى سالفة عمران
– مكلوبة الدنيا والوادم صايرة شعواط لهالساع ما يرضون يدفنوه ليما يلاكون جتاله
– اهو يمتى انجتل ؟
– يكلون بالليل كلشي ما بي جتلته الفجر واحد مصوبه بجم جيلة اثنين مدري ثلاث والله ما ادري .. عليش تسعلين
– هيج اخاف لا يروحن يبلشونا بدمه
– اهو زلمة خبيث وجثير له ناس تكرهه عليش نحن اللي ننلام ياهو مالتنا بجتلو ؟
– اشوى انا عدالي يجيسونا بحجوة … انت شخبارك شنهي راح تروح امي ما راضية اعلى روحتك .
– انا لو صليت اعلى حجي امي اصبح ملاج وانا هذه ماهي رغبتي .. رايد التحق بالكلية العسكرية ابغداد والكي دربي بعيد عن الفلاحة والزراعة

– امي لجلك عبن ما تكدر تفارجك
– كل الامهات هيج لو ضليتا اعلى منشاهن ما انخطي من مجانه
– بعد التشوفه انت اصبحت زلمة وتعرف مصلحتك بس لا تاذي امي تراها تعبت جثير واهي شيالة اهمومنا
– الله كريم .
راح شوي وانا مشيت يم خواتي
جا ابونا نشدني عن راشد مشى كلتلو ( اي من الفجر طلع لبغداد) وضلينا نسولف ولاهين ما نحس الا الباب تندك
طلع جابر شوي وصاحوا اعلى ابوي .. طلع ابوي
انشغلنا شنهو الخبر ؟ …
ونحن ندحج الا ابوي يصيح : انده لاختك ام وسام
كمت من حيلي ووقاص يجيني يكلي : شذرة ابوي يريدج
– شنهو اليريده ؟
– مدري بس خيري واخو راشد بالباب .. كومي بسرعة
لفيت شيلتي عدل وخذت اطرافها اغطي بيها وجهي ورحت من ورا الباب اصيح : هلا يابه
خشان : بنتي ذوله جنود ول يابه رايدين يعرفون راشد يمتى التحق بالجيش
عد ما سمعت جنود وينشدون عن وكت طلعته انا كضبتني الرعشة كلتله ؛ عليش بويه
– تحكيك يابه جاوبيهم
– من اول امس طلع

– من امس لو اول امس ؟
– لا اول امس
– ابوه يكول امس
– لا وهمان .. اول امس طلع الفجرية
ابوه بسرعة كلب كالو : مرتو اعرف خافنه صدك اول امس مدري ما اذكر انا ما شايفة صار يومين بس كالي راح التحق يوم الثلاثاء
– لا لا طلع مبجر عده شغلة ابغداد وراح اول امس
ندستني امي : يولي ما اليوم طلع
خزيتها وعضيت اعلى شفتي وانا اشرلها تسكت
سكتت وضليت اتسمع من ورا الباب .. مشوا بعد ما خذوا حجينا .. دخل ابوي وحجه : شنهي اول امس ول يابة ما كبل شوية سعلتج كتيلي الفجر طلع
– لا لا امس الفجر يعني ينحسب اول امس
يازي : تراهم يودون اعلى بغداد ويعرفون يمتى التحك ويمتى جا
– لا هو اليوم التحاكه بس طلع من اول امس كالي عدي شغلة غاد ابغداد
يازي : يولي رجلج له ايد بجتلة عمران

– حرام ان جان هو اله ايد مسيجين يجي يجفي وينام ماله غرض باحد حتى الكهوة عبن عمران يكعدلا ع البلعوم ما عاد يروح لها
يازي: والله مدري بس حالج ما يعجب ان جانو متورط لا تسدسدينلو اليجتل مرة سهل اعلية يجتل مرت الاخرى
حجت مرت ابوي سميعة ( ان جان سهل اليجتل مرة يجتل اثنين صبح انت الجاتلته )
– وشلون تبينتي هيج يم العريف
– ماهي انت الجتلتي ابوج ماهي بعيده تجتلينو خاطر لا يصل بزرج .
– خافي اعلى بزرج من عمران وين ودى وبيا هبية ذباه ولا تخافين علي واعلى بزري
– بري عمران لو ما اختج تنام براسه حرام ما يخطي ابني ولا يكع هالطيحة هاي عد ما راح هالروحه هاي بلا ردة تلاكينه جاتل روحه خاطر يشوف ابوه واهله واختج نايمة براسو وما ترضى
– غم الزلم المالها راي وشورها بيد نساوينها .. ابنج دثو يسميعة لو ما جان دثو ما يبيع اخته ولا يحط روحه هالحطة هاي لو مرة تحجي لو نبي يوصي .. بس عو المشى بلا عكل واختي ما ابريها من اثنها وانا بريه منها وطالبتها ثار شما ريتي تشتم الهوى .
ضلن يداهرن ابوي مال من سوالفهن هاي مجروخة على اذنه صار اسنين هدهن وخش للحجرة .. وانا خذت بتي وكتلها : يمه انا امشي
– وين مولية ؟
– يمه لبيتي انوم بتي وارتع انام شوي اغفالي وهلة

رديت وانا بالي يجرخ .. وكلبي يرجف انا فتكتلي فتك اخاف لا يعرفونه .. فد لا يكتشفون هو امس طالعة ويشكون بيه .. شجالني جذبت
انا كمت اسدسد جنه عاملها صدك
اهو ما عمل شي ياهو الكال راشد عملها ..
ضليت كاضبة كلبي واحطتو بشيشة .. اسبوع كن ما عرفم منهو جتال عمران .. وسكتت السالفة الا ارتاح كلبي .
بهالاوان كمت احس ابطني شي يلبط ..
عرفته جاهل مثل من جانت وسام ابطني .. بس شكثر علي ما عرف .. بس الاحسه بطني جبيرة ..
عدت الايام ويوم يجر يوم وانا اطلع ويا خالتي للكاع اعاونها
وان جان السانها ما ينكدر بس شسوي اساير عيشتي ما بيدي شي .. لو جان واحدنا ما يتحمل الاخر محد عاشر احد .
بس خالتي تكرم تكعد تسمي وسام بزرة العوج
اكلها خالتي عجية وما تفهم شي يواشج بيها
تصيح وتكول ماهي بنت راشد ولا اسميها بت ابني
هذه البنت لا هي منا ولا شايلة معالمنا ما تشبه احد من عدنا
مليت وانا احاول اخليها تكنع بس من شفت الحجي ما منه فايدة سكتت .
رد راشد بعد ثلثت اشهور من روحته ذيج

الزلمة رد موش اعلى حالو .. مدري شصايبو
حابس روحا بالبيت اسبوع ما طالع ابد .. حتى لاهلو ما راح
من اجابلو يزهك يكوم ينافر ويسب ويشتم وما يتحمل صوت من الجاهلة .. ولو هديته وطلعت لكاع يعصب ويصيح ( هادتني مثل الجلب بالبيت ما تدرين عن امري )
احترت بحالو شعمل
نظراتو لوسام صايرة تخوف .. يكض هالجكارة ويدحج اعليها وجنه رايد ياكلها .. كمت اخاف اخلي ينفرد بيها .. واخاف اخليها عده واكضي شغلة .
رحت سولفت لامي البكلبي كالتلي : اهو عليش هيج حاط احطاطو على هالجاهلة ؟
– ما ادري يمه حال راشد ما يسر وكلما جالو عد اخاف منو ماهو راشد اول .. نظراتو تصرافتو كلشي بيه يخوف
– احذري منه وعد ما تطلعين تشتغلين زتي هالبنت بالكلعة يداونا لبين ما تردين .
اعلى كولت امي كمت كلما اطلع اخلي وسام بكلعة ابوي ومن ارد اخذها ..
رديت فرد يوم وسام تلعب يمي
حجه اهو : شنهو غدانا
– تمن ومركة بيذنجان غسل وهس انا ازهبلك
صبيتله بسرعة وكابلته اكل واوكل بوسام حجيت بملاشاة : راشد لو صبحت عدنا بنية اخرى شنهو تسميها واذا صار ولد شنهو ابالك

– عليش هالسوال ؟
– اخاف ترد نوبة الاخرى للجيش واجيب وانت ماكو خاطر اسمي
– وانت حبلى
– ما رحت داية بس بطني تلبط وادري بروحي حبلى جم شهر واحطو هالكلت اسعلك
– منين حبلى يولي
– سمي باسم الله شجالك منين بعد منك غير
– انا طول هالثلث تشهر ما جاي لهين بعد منين حبلتي
– وانا اكلك جم شهر واحط وانت تكلي صالي ثلث تشهر غايب حمالي مالت ٦ شهور سبعة
– يعني كبل موتت عمران
– راشد حب الله شنهو الحجي هاذ
– عليش تتهربين احجي كبل موتت عمران لو بعد
– مدري عن موته زلمة انفطس وجتل مدري عنه انا عليش تربطني بيه
– ما تعرفين جتاله ياهو
ضليت ادحج بيه : لا
– انا جتالو

جتلته بدم بارد وما رف جفن عيني عد ما حطيت جيلات رشاشتي بكلبا .. عد ما شفتو واهو يلبط لبطت موت كلبي من جوا ارتاح كلش ارتاحيت .. ضلالي شي واحد اعملو ..
يحجي وانا مبحلكة عيني خوف
كلمة ما نطقت حجه حجايته الاخيرة ودفع الصينية عنا وكام
بسع كضب بتي وجريتها لحضني ما اندارلي وراح يغسل .. رد وانا متصنمة على حطيتي
التف بالجرجف واندار ينام
ادحج بيه خوف شنهو الرايد يعملو بعد ؟
جتل بدم بارد وبعدو متعس يجتل احد
يعاو هاذ الأحد .. دحجت ابتي
حصنتها حيل ( دخيلك ربي ما اخلي يكربها ) كمت من مجاني مصت الصحون وعليتهن .. وكضبت عباتي وطلعت من البيت اركض للكلعة .. دشيت وكت الظهر
دشيت حجرة امي بلا بال .. دست العتبة واشوف ابوي نايم
بسع رديت صاحت امي : ياهي شذرة
– ها يمه اجيت
طلعت وهي تشيل البردة عن الحجرة وتحج : ها ولي شجابج بهالظهرية الحارة
– يمه انا خايفة

– منيش
ضليت ادحج من هين وهين .. حجت : ول احجي يمصكوعه شنهو الخايفة منه
– اكلج بس ابخت الله ما تحجين لحد
– يولي انا امج المن ابيع سرج
– ماهو سري بس عاهديني
– معاهدة يولي بس احجي كولي شنهو الصاير وخاطف وجهج
– عمران
– عمران ! شماله ؟
– راشد هو الجاتلة
– وشمدريج ؟
– اهو كبل شوي اعترف بكلشي يكلي جالتو بدم بارد وضلي شي واحد اعملو بعد
– شنهو البعد يحمله كلبي من هالراشد يولي شنهو البعد ما عملو
– انا خايفة يجتل بتي
– والجاهلة شذنبها من كل هالهوسة

-هالجاهلة طول عمراها راح تشيل ذنب اهي ما عملتو .. انا نفسي ما ادري ان جانت صدك هي بت راشد لو عمران ما عرف يمه .
– خطيتج بركبة ابوج السد السالفة بزواجتج الكشرة هاي
– يمه الحجي هاذ ما وكته كليلي شعمل
– اشتعملين بعد اخذي حذرج منه وراكبي لا يغيب عن عينج ولا بتج تغيب عنج وعد ما تنامين خليها بكترج
– ما مفاركتها والله يمه بس عيشة الخوف تتعب
– بعد هاي كسمتج شتسوين
احترت بكاعي شعمل .. بيتي ماهو امان
لا اكدر اهده واضل عد اهلي ولا اكدر امن اعلى بتي وانا مجابلته .. وين امشي وشنهو الاعمله .. عيشة اكضيها كلها ها جاك الذيب اجاك الواوي .. عيشة الما تراد
رديت للبيت .. شال راسو : وين مشيتي
– رحت اجيب من امي كشرة برتقال مطحون ما عدي
– شتعملين بيها
– لهالعجية بطنها تنفخ

– يمتى جيابتج ؟
– مدري عنها وما ادري انا باي شهر الله حاطني
– لو جانت بنت سميها ناره وان جانه ولد سميه … ثائر
دحجت عليه : هالاسماء الهن اسباب ؟
– سمي وبلا كلام
– ان شاءالله يكون ولد وتكون حاضر بجيابته تشيلا بيدك وتسمي بنفسك
– الله كريم
سكتت عنه .. للعصر جاي امه تسعل عنه : تكلا لا تجي لا تمر شنهي مجابل هالمرة وكاعد هاي تالية الربى انا اربي واتعب واكسر ظهري وتاليتك لا تمرني لا تدري عني مجابل شذرة وكاعد
اندار علي كالي : شذرة اخذي الجاهلة واطلعي للكاع
دحجت بيه رايد يزيحني
حجت امه : اوردي الحلال كبل لا ينزل الليل
خذت بتي ولبست عباتي وطلعت من الدار

اندر اسد الباب واشوفها تتكرب منه يسرها ..
ما جنت اعرف بنيتهم ولا اعرف شمضموملي
رحت اورد الحلال .. وحشيت الكاع وكشيتهن وكضيت شكو شغلة ضالة ورديت جت خالتي كالت ( باجر اتطلعين وياي نحش الطماطة انا انكسر ظهري واهل الكلعة كل شغلم علينا ما طلعنا نشتغل بهالكاع جنا حجوشا يجيبون ويحطون اعلى ظهررنا اطلعي وياي عاونين )
– اي عمة
رديت وثاني يوم من غبشة شلت بتي واهي نايمة شديتها على ظهري ورحت احش بالكاع .. اعتلت الشمس وانا اشتغل بالكاع طكت حرارتها بوجهي وبتي شايلتها اعلى ظهري وبطني ها علواتها وكفت اعلى حيلي اجر نفس واحس العرك عن كصتي وار بظهري ليورا وجعني حيل
اندر وانا اعدل ظهري ولن اشوف راشد معين كسريته علي وينشين .. تجمدت بمجاني كتلو : ها يبو وسمة رايد جتلتي
نزلها عن عينه وتبسم وتكرب مني : رايد اتكشمر وياج
نزل كسريته وحس عن كصته العرك وهو يدحج بالبستان
حجه : مليت من كعدت البيت
كن احترت بامري

امش للجيش انطر يوم يوم يمتى ارد ليكم واكعد وياكم وارتاح بالبيت .. اجي للبيت ما متعود اعلى الكعدة يضيج خلكي من انا لا شغلة ولا عملة
-عجل اكف ويانا وحش التكدر عليه
– لا مشتاك اصعد اعلى الخير رايح اترخص من ابوج واشوف حكل الخيل اوردهن واركب ارتع بيهن
– اعلى راحتك
مشى عني وانا عيوني ملازمة دربة كاضب كسريته ويمشي مدنج الظهر .. رفع راسه واندار ليورا شافني مبحلكة بيه تبسم وراح يركض هو وكسريته
اخذت نفس وتنهدت يربي معد اعزف كاعي من سماي
شلون امن بحالي وياه
بجت بتي فكيت الربطة من ظهري ونزلتها ارضعها بس صدري كن كطع الحليب كام ما مثل كبل يدر صار حليبه خفيف .. كعدت ارضعها بس ما شبعت بارضاعها ..
كمت بيها ورحت لبيت اهلي
طبيت امي كاعدة تعمل اكل للغدا
ها الله يساعدج يمه

– هلا، شني اليوم وين
– بالكاع نحش الطماطة
– ما كضت هالطماطة صالهم شكثر بيها
– ما ضللها شي
– يردى حالج ما جنج اعلى بعضج .. شنهو الجاري ؟
– تعبني امر راشد يمه
– علاش ؟
– كبل شوية شفتو يعين علي بكسريته
– وشتظنين بيه
– مدري شظن بس كلبي ما مستراح لهالسالفة
– اتظنينه كاصدج
– حاجيتو بس يكلي اتكشمر وياج
– انا كلبي ماعو مستريح الراشد هاذ كلبي ملجوم منه منهد سالفة التيزاب ذيج اليحرك بشر بتيزاب هذا شعوره ميت ينخاف منه
– والتالي يمه ؟ انا تعبت لاني كادرة اتحملوا لو اتحمل خوف العيشة وياه ولا انا كادرة اوسع اهله .. امس زاحتي من البيت خاطر يسر امه
– بيمن سرها
– مدري عنهم بس احس سالفة اليوم اهي فيض من سالفة امس

– تكصدين اهو وامه متفكين اعلى جتلج
– ويمكن موش جتلي جتل بتي
– يهل المظيليمة هاي من اجت للدنيا لليوم الدنيا ملاحمتها بعصا سودة مدري حظج مدري حظها .
– يمه ارشديني جن عكل ما ظل براسي ليلي ونهاري كاضيته بالخوف
– احملي ايام جيته بعد شتسوين اهو جيته شهر وروحته ثلث تشهر .
– مدري شيحملهن .. اشوى يلا اكوم اروح للبيت اجهز الغدا كبل جيته
– وين راح هو
– كال رايح لابوج استرخصه يمر للخيل
– زين لا تخليني شيصير وياج كليلي
– تمام
طلعت من الكلعة .. سمعت حصان يجري وراي
اندرت ادحج راسد صاعد اعلى ظهر الحصان تبسمت من شفتو : صار شكثر ما شايفتك اعلى ظهر الفرس
– انا هم مشتاك لركبته .. اطيني ايدج اتصغدين وياي
– ها راشد خير شجالك منا الوادم شنهي وين كاعدين

– نسيت نفسي عدالي نحن ابغداد
– ليش شنهي ابغداد يصعدن حصن
– لا ربل بس تدرين بنات بغداد حلوات .. يلبسن كله من هاذ يسمنه نفنوف مدري شني وفوكة كبعة من هاي العريضة وشعرهن يتطاير
– يا مفرعات ؟
-تلاكين المفرعات وتلاكين ملبسات العباية وكذلهن طالعة
– حلوة بغداد
– اي كلش حلوة اعلى يوم اخذج تشوفينها حيل جبيرة وبيوتها ماهي مثلنا بيوت طين لا محجر
– بغداد بعد انا مركز الموصل ما واصلتو الا بجيتبتي وما شفت منا شي اتريد ارصل بغداد واشوفها .. حلم
ضل يضحك ويمشي جدامي بالفرس ويصيح : يردلى يردلى سمرا قتلتيني خافي من رب السما وحدي لا تخلايني
ينشد ويضحك وانا اعلى ضحكته
مد ايدو لوسام يكلي : ناوشي اصعذها جدامي
– لا خاف تكع

– خايفة عليها مني ما انا ابوها
– اي ابوها بس بعدها زغيرة
– لا تخافين اطيني
خذا وسام من ايدي وراح يركض بالفرس بس جنه ركض بكلبي كمت اسرع وراه .. واصيح : راشد حب الله ولا تسرع بالفرس البنية تخاف راشد ردها راااااشد .
واهو يركض بالفرس انا شفته بعد ايدو متعمد ..
ولن البنت تكع من اعلى الفرس للكاع اعلى راسها
رحت اركض مفرفحة كمت اصرخ : كتلك نزلها اش عملت بيالبنت كتلت بنتي … بنتيييييي
شلتها من الكاع واهو هد الفرس واجا يركض : ما بيها شي لا تخافين
– اش الما اخاف منو دحج البنت سكرت من البجي
– ما ادري فلتت من ايدي
– راشد انا شفتك شلت ايدك متعمد
– كصدج انا متعمد اعلى جتلتها هااا احجي … انا متعمممممد ؟

– راشد بالله هدني اروح للحكيم
– مالج روحه ردي للبيت
– راشد البنت راح تموت دحج سكرت
– انا اخذها ردي انت
– احر ما بكلبي ابرد ما بكلبك راشد ابخت الله خليني اروح وياك اوديها
– كتلج ودي
امشي وهو سحبها من ايدي بكوى فرفح كلبي خفت لا يعمل بيها شي كمت اجر بيده .. وهو يدفعني ويصرخ عليه .. البنت كامت تذب من راسها ابيض .. تجننت كمت ادك على راسي كلت بتي راح تموت
كمت اصرخ وابجي
وقاص اخوي سامعني وجاي اعلى حسي راشد سبكني ما رضى امشي وياه كتلو وقاص اركض لا تهده ولا تخليه يحيد بيها بوحده هو الجال البنت
ركض وقاص وابوي جان مار شافني بهالحال تبع راشد بسرعة وهو يكلي : ردي بيتج انا اجيبها الج ردي
ضليت واكفة بنص الدرب محتارة
ما ادري ارد لو اتبعم .. بس ما طول ابوي موجود ما خفت ..
تبعتم ورحت اركض وراهم .

وصلت للحكيم ابوي كام يحجي علي عبن اجيت
كل لوقاص اخذ اختك وامشي …
رديت ويا اخوي بس كلبي نار
اجت امي ليه وخالتي وابو راشد لحكم .. وصارت هوسة
وامي وخالتي تكاونن .. امي تكله ابنج ناوي اعلى شر
وخالتي تكللها .. اذا الشر نايم ابيته اشلون ما ينوي اعليه
بنص كوانهن وحجيهن انا ابجي
اجا ابوي شايل وسام لافين راسها مدمى
وراشد كن عيونو طاكة من البجي كضبت بتي ابجي واتفحصها كال ابوي : عينج عليها الحكيم يكول لا تتحرك ولا تركض وانطيها هاذ الشراب
راشد : شلون جانت فرحانة وتلعب مدري شلون سهت ايدي عنها وفلتت كل الصار بيها من تحت راسي
خشان : لا تهم هساه ما طولها زينة نحمد الله ونشكرة بسكم من الحجي هاذ اللا يجدم ولا ياخر
طلعوا اهلي من الدار وانا احس بدموعي وراشد كاعد صوبي

امه ندسته وكالتله : عينك اعلى البنية نحن نمش نزل الليل
طلعوا كلم وهو كرب يم راس وسام يبجي
كتلو : راشد لا تبجي انا شفتك انت فلتتها من اعلى السرج متعمد
– كل الصار والجاي يصير منج
– انا ؟ انا شنهو العملته وشذنبي عليش محملني ذنب انا مالي بيده شي
– كله منج
– مني شلون
ما رضى يحجي وكعد يبجي اعلى راس الجاهلة متندم
دحجت بدموعه صدك شفت بيهن ندم
احرت بيه وبشعوره مدري شيفكر وشنهو براسه
ضميت بتي ونومتها بحضني ونمت للفجر شفتو كاعد والكسرية بيدو يعين بيها فزيت كتلو : متجوز من هالكسرية ليما اصوب احد منا بيها
– رايد اطلع اصيد يولي
– بهالوكت
ش عجل الصيد بيا وكت

خذا الكسرية وطلع للبر يصيد طيور هو وصحبانة بالريف .
مرت هالايام بهدوء …
شذرة اداري ابنتها بالبيت مجابلتها لا تطلع شغلة ولا عملة
وراشد يومية ويا صحبانة ما يرده الا الليل
وعد ما يرد يصف هالكاسات هاي ويشرب لحد ما يطفي وينام
كضى شهر اعلى هالحال ..
والتحق راشد بالجيش لبغداد ..
لذاك الوكت ياا شذرة ارتاحت شوي وكامت تنام الليل رغد .
ما مر شهر الا وطلكت شذرة
خذتها امها وخالتها وراحن للداية ..
جيابتها جانت حيل صعبة بالموت يلا كدرت اتجيب الجاهل
وعد ما جا الجاهل جان ولد .. فرحت شذرة حيل

وكالت : راشد وصاني اسمي ابني ثائر اذا جا ولد وهو ما موجود
صدك وسموه ثائر ..يندهولا ثاير ..
ردت عكب الضحى لبيت اهلها بالكلعة .. خلصت انفاسها وكضت .. وردت للبيت .
وبيوم من الأيام
وراشد ابغداد عمة شذرة لحت اعلى شذرة
كالتلها اطلعين وياي للكاع
شذرة ما كالت باطل .. خلت بتها يمها وشد ابنها بربطة وعلكته بركبتها ودندلته يلم بطنها وضبته وكامت تشتغل .. جتها ام راشد كالتلها : انا رايحة لفوزية مرت عباس عدي شغيلة وياها انتي حوشي ذني ولو كضيتي ردي لدارج
كايلتلها شذرة : تمام
مرت ساعة وهم يشتغلون سمعوا صوت طلقة ثارت
يازي اندارت وهي تكلم ؛ مو جنها صوت الجيلة جريبة ؟

وقاص : خاف واحد جتلا جلب
– مدري بس كلبي ما مرتاح روح شوف اخوتك وينم .. كللهم لا يبعدون من هين
بنص الكاع صوت اصريخ جهال ..
وقاص حجه لامه : يمه تسمعين صوت الجهال
– يا جهال ولك
– انا عداسمع جهال تبجي بعيدين
– مدري ما جاي اسمع روح شوف شنهو الصوت
مشى وهو يتبع صوت الجهال .. دحج من بعيد وسام تصرخ وتبجي من كل كلبها والجاهل البعده ما طالع الاربعين سكران من البجي ..
ركض ليهم من لمح وسام
عد ما وصل غاد ويريد يشيل وسام يندار ويشوف اخته متكومة بنص الحشيش وسابحة بدمها وابنها اعلى صدرها يبجي
صرخ : يممممممممه الحكييييي يمممممممه

يتبع…

(دگة الرارنجية)
تذكّروني
تذكّروني بدمعة، بحچاية، بجگارة
حتى أگولن ما نسوني .. تذكروني
(كاظم أسماعيل الكاطع)
تكرب وقاص من وسام بت اخته .. تبجي بصوت عالي ومفزوعة .. كرب منها يريد يشيلها بحركة راسه اندار يدور امها .. بنظرة سريعة واهو يريد يشيل وسام ويدحج الجاهل اليبجي .. شاف شذرة واهي طايحة … فز من مجانه وراح الها مسرع
كضبها واهو يندها بقوة : شذرررة شذرررة
شال الجاهل من صدرها واهو يكلها : اكعدي احاجيج شجالج
دحج الدم جواها .. بسرعة كلبها شاف الثوب لازك على الجسم من الدم .. وشذرة لا حس ولا نفس
فز وذب الجاهل من ايده وركض يصرخ : شذرة مصيوووووبة شذررررررة انصابت الحكوووووو
ركضت يازي اعلى حسه وهو ينده : شنهي يولي شكوووو
– شذرة يمه مصيوبة بجييييلة
صرخت بعلو حسها ( يممممممه بتي ) وركضت لشذرة
كضبتها تنده بيها : شذرة … شذرة يمه حاجيني فكي عينج حاجيني يمممممممه
ولكم بتي راااااااااااحت يا ناس …. بتيييييي
ما جتال شذرة غير راشد
جتل بتي يمممممه
الخفت منه طحت بيييييه
ولج يمه احبيبة كلبيييييييييي
ركض وقاص على مجان ابوه
والديرة فزعت اعلى خبر جتل بت خشان
سمع خشان بالخبر جا اعلى عمى عينه يركض ويصيح : وينها دلوني بيها وينهاااااا
يركض وهو يسمع يازي تصرخ بنص البستان
جالها مفزوع وهي تكله : خشان بتي ماتت جتلوها خشااااان جتلو شذرة
دحجها
ما شالنه اركبه .. طاح من طوله وكعد جدامها : يابه شذرة اكعدي بويه حاجيني .. شذرة احاجيج بويه تسمعيني
يحاجيها ويمسح اعلى وجهه وخدها واهي مغمضة نص من عيونها وما بيها نفس … ميتة
جرها من ادين يازي وخذاها بين اديه
حضنها وكام يصرخ … التمت الناس العالم ..
ويازي تصرخ وتصيح ( ما جتال بتي غير راشد واهله هم الجتلوها … هم الجتلوهاااا )
خشان شال شذرة بين اديه وكام
كلها فزعت وراه يريدون يلحكون بيه ما يعرفون شيريد
يندهون وراه ابو جابر .. ابو خالد .. اكف اصبر انطر
شايلها وهام بروحه يمشي
جابها وحطها بمخزن يصير بالكاع ينفتح وتخلي بيه اغراضك الزايدة .. حطها وكال : ما ادفنها ولا اغسلها الا يطلع جتالها .. وانا الاجيب جتالها ..
الزلم التفت حوله …
جر اسلحته من المخزن وسلح ولده وكاللهم
اليوم ثار اختكم ينوخذ … ثارها ما يبات ليلة
اليوم ينجتل جتالها
التفتو اعليه الزلم كالوله : ابو خالد تهدا بالله غير نعرف جتالها ياهو خاطر نهد .
يازي بلا وعي تصرخ بجلمة وحدة وتصيح ( ما جتالها غير راشد اهو الجتل بتي وكطع كلبي .. راشد جتال بتي )
اندارولها : ام جابر عدج خبر اعلى حجيج نهد بلا دليل غير نعرف راشد وينه وعليش جتلها
تصرخ وتردد نفس الجملة
خشان كلبه يسعر نار وكاضب بسلاحه ويريد يطلع والزلم لازمته وتكله ( تمش تهد اعليمن )
يصيح : اخذ بثارها من جتالها اليوم جتالها ما يبات ليلة
يصرخ ويتكاون ويا الزلم يريد يطلع وهم واكفين بوجهه رايدين يعرف عليمن يهد لا يروح يجتل احد بري من دمها وتصير المصيبة مصيبتين
كوة كعدوه ووالتموا حوله يهدون بيه ويكلوله ( نحن وياك وكلنا تحت عيناك بس امر واطنا اسم جتالها )
صارت هوسة بالكلعة ..
نسوان الديرة اجن .. وخوات شذرة من ابوها
وبزرهن واهلهم وصياح ونياح
وخشان وولده متسلحين ..
وابن شذرة انبح حسه من البجى واهو بيد وحدة من بنات الديرة
ووسام ما يندري خبرها وين
انتبهو وهم بنص هالحال
لا خيري ولا نعيمة ولا واحد من اهل راشد حاضرين ..
لا كربوا ولا وصلوا .
خشان يكلهم .. اطوني مجال اطلع اهد واجيب راس خيري
هدوا وياه ومشوا لبيت خيري لكوه نعيمة تبجي وادك اعلى راسها ..
كضبوها وجرجروها وهي تصيح : الني ماله بدمها .. ابني بري من دمها ماهو الجتلها
– راشد وين
– والله ما هو راشد .. راشد ابغداد ماهو هين
الخت الله لا تهجمون بيت انا وعايلتي بري من دم شذرة
صرخت بيها مرة من ال عكاب وهي تكللها : البري يكرب ينحب يفزع ما يضم راسه عد ما يسمع بجتلتها
– انا يوم السمعت يازي تصيح راشد جتالها خفت اكرب والله خفت .. نحن مالنا بدمها
كامت تصرخ وتبجي وتتبرى من دم شذرة
نشدوها عن خيري كالتلهم : بعدو بمركز المدينة يبيع المخضر ويجي
انشدهوا بهالسالفة .. وانداروا على خشان وهم يكلوله
اطنا البنت ندفنها
يصيح : ما ادفنها كبل لا ادفن جتالها .. والله وبالله ثارها ما يضيح ومها ما يبيح وخشمي يشتم الهوى الحرك دمي بيها لا ما اخلي دم بكل صوب من الديرة
حجه وقاص : وياهو الكال حجي امي صحيح ؟ وراشد واهلها هم المتورطين بجتلتها ..
جتلتها مثل جتلة عمران .. جيلة بظهرها مالها ثاني
يمكنهم ال موازي هم الورى جتلة شذرة
عكب ما تبرينا من دمو وما كضبوا اعلينا شي
يمكنهم نفذوا بيها بنفس تنفذ بعمران
الكل دحج بحجي وقاص شافوا رايه صحيح
وزادها واحد من الديرة كالم .. شفت ناظم اخو عمران اليوم بديرة ال عكاب مر الصبح .. هو السواها
كوموا وروحوا هدوا اعلى ال موازي بالتفك
هدو بيوتهم ودكوهم .. وكفت الديرة اعلى حيلها ..
طلعوا ال موازي رايدين يهدون .. بس الرمي اعلى بيوتهم
فزعت الدير الثانية اعلى حس الفشك وردوا ال عكاب عن دكتهم .. طلعوا ال موازي يريدون ثار بيوتهم الاندكوا
وصارت هوسة بين الديرتين ..
ادخلت بيها شيوخ وعشايروا وكضبوا الأثنين عن الهد
وكعدوا يعاودون بامرهم .. خشان عيونا تلهب نار وتاهم ال موازي بجتلة بته بكاعه
وال موازي مدبلين غيض اعلى ال خشان وبكلوبهم هم الورى جتلة عمران ..
تنادبوا وناظم كعد وقسم ع القران هو جان جاي يشوف واحد بال عكاب عده شغل وياه .. ماله بجتلة بت خشان
ردوا للديرة ويا الغروب ومشوا على الراحله ناظم وشهد شهادة خير .. وكالم ( ناظم جاني اعلى شغل انا وياها نريد نشتغله وهو يمي جان لحد ما ودعته الضحى وطلع من الديرة لا جان بيدو سلاح ولا هو تفاگ)
كالوله بس طلعته منك وكت جتلة بت خشان
كالم .. مدري عنه بس لا شفتو جاي مسلح ولا بنيته ثار
جنه متفكين يجيني نحجي على الشغل خلصنا وراح .
اجا خيري وطاح على رجلين خشان وهو يكلو : انا وركبتي تحت جدمك يبو خالد ان جان الي لو لابني ايد بجتلة شذرة .. ثارنا من ثارك واهي مرت ابني .. وابني ابغداد وايدي بيدك نعرف جتالها ياهو .
مضت اول ليلة اعلى جتلة شذرة .. وهود الليل
وهي بالمخزن مسبحة بدمها وثارها بات وجتالها مجهول
وامها طول الليل فاكدة وتصيح ( راشد جتال بتي )
بجي يازي بصفحة ..
وبجي ابن شذرة بصفحة الليل المر لا هود ولا سكت
من حس الجيلة الجاهل مفزوع لا عرف ينام ولا خفت حسه
احتارن بيه خوات شذرة
كضن الليل سهرانات ويا الجاهل ما يدرن بيش يسكتنه
ودنه المرضعه ترضعه .. بس الجاهل ما يرضى الحليب بس يبجي .
والزم تقنع بخشان يطلعون شذرة من المخزن خاطر يدفنوها .. اكرام الميت دفنه ما يصير تبات ليلتها بلا دفن حرام .. وهو يكلهم الا اطلع ثارها يلا تنام بتي رغد بكبرها
بس ما رضوله للفجر تكاونوا وياها خاطر يطلعون جثتها من المخزن .. فتحوا المخزن وطلعوها .. ولكولها لهالساه مبللة
صدرها يدر اعلى ابنها حليب ومتفيضة بالحليب ومختلط حليبها ويا دمها .
يازي من شافتها بهالحال كامت ادك اعلى راسها
وتصيح : وج شذرة يمه متي وعينج اعلى ابنج
عينج نامت وكلبج ما نام اعلى بزرج
يمه كلبج علم ابنج يبجي يريدج
متي وصدرج ما مات يدر اعلى بزرة
اخ يا لجمة كلبي يا يمة
والله كطعتي كلبي يولي ييمه
شلون بحالي عكبج .. رضيتي بحالج هساه
ولج كتلج ردي من العشك يمه
شاة وحبت ذيب .. جتلج ومحد له ايد اعلى جتلج
انت هاذ حالج وجتالج يمرح يولو ينار كلبي يممممممه
ولكن احترك كلبي اعلى بتييييييي
الكل يبجي وينعى اعلى نواعي يازي وبجاها اعلى بتها
طلعوها من المخزن غسلوها وجفنوها وراحوا يشيعونا لكبرها
الكلوب تلهب نار اعلر ثار مرة بزرتها الليل ما نامو من البحي عكبها .. صياح جهالها اعلى كبرها يبجي الكلبه صخر .
دفنوها وردوا للكلعة نصبوا عزا الها ..
خيري ونعيمة واهل راشد كلم بالعزا حاضرين
ثلث تيام العزا … ومحد يعرف شنهي اسباب الجتلة وياهو الجتلها .. خشان شاك بال موازي جاتلينها مثل جتلة عمران وماخذين ثارهم بلا ما يخلون اعليهم دليل .. بس يازي ما شكت بحد غير راشد .. طول ايام العزا وهي تردد ما جتال شذرة غير راشد
عد ما كعدوا وياها .. وكالولها
يا مرة راشد ابغداد .. لا هو هين خاطر نحكة .. ولا بغداد جريبة خاطر نكول جا ورد .. وهو زلمتها عليش يطك مرته وهي نفسه
كالتلهم … انتم ما تفهمون ولا براسكم عكل
تشكون بال موازي ورا جتلة عمران وتكولون جتلة عمران تشبه جتلة شذرة وجتلوها بنفس الديرة .. عليش ما تكولون جتال عمران وجتال شذرة واحد ؟
كتلهم بنفس الجتلة ومجهولة اسبابه
راشد بعظمة السانه اعترف لشذرة وكاللها انا الجتلت عمران .. وضل عدي شي واحد اكضي .. وطول هالشهور شذرة عمت عيني عليها خايفه وابالها يجتل بتها .. ثاريه جان ناوي اعلى جتلتها .
حجه اخو خشان كاللها : اذا نضل اعلى كركة النسوان العشاير تصير مذابح والدم بكل مجان شمدرينا الحجي هاذ حك ؟ شمدرينا ما من حلاة روحج جاية تصفطين هالامور اعلى رجل بتج .. ال موازي غشمة ما يعرفون جتال ابنهم ؟ وساكتين لليوم
حجيج هاذ كفي .. الزلمة عده من بتج ثنيوين عجايا انحرموا من امهم لا تحرمينهم من ابوهم وتصيرين سبب بجتلته
تكاونت يازي ويا اخو خشان ..
واخو خشان كام يلوب بخشان ويكله لا تتبع حرمتك وتجتل راسد بلا اثر .. الزلمة عده اثنين جهال لو تيتموا بيا ركبة يطيحون وياهو اليتحملم .
وكع خشان بين نارين
نار بته ونار ثارها الما بعرف شلون ياخذه وياهو الوراه
نار يازي ونار اخوته
يازي تكله راشد ورا جتلة شذرة بس بلايا دليل
وخوانه ما يفزعون ويا ويجتلون راسد الا عدهم دليل بجتلته لشذرة .
عد ما سكت خشان ولزم حزنه
اغتاضت يازي حيل وهجرته وكامت تعايره تكله ( خوف من اخوتك طميت ثار بتك .. بتك جرى دمها بكاعك وانت ساكت تدور اسباب .. نسيت سلون جانت تغطي اعلى راشد يوم جتلة عمران من جذبت وكالت هو التحق كبل امس وهو جان بيومها ملتحق .. راشد نذل وذيب كدر ينفذ اعلى كل الباله وما يحط ادلة وراه .. وضل انت تنطر دليل الا وحك هي الكاع التربي حنطة وشعير يخشان ان جانك سكتت اعلى ثار شذرة انا ماني ساكته .. وراشد الجتلها بلايا دليل لا ما اجتله بنفس جتله ما يرتاح كلبي ولا يبرد دمي من هالراشد .
من بعد عزا شذرة .. وتهمة يازي الثابته الراشد
خيري ترخص من ابو جابر ياخذ عايلته ويطلع من الكاع
كوم خشان واطيهم الرخصة يهدون الكاع
هين يازي تسودنت عليه
كامت تصرخ وتعربد وتصيح : شجالك تطيهم اذن يهدون الكاع يولو هم الورا جالتهم وتهدم غير تخليهم جدام عيونا نراكبهم ونعرف اثرهم وان جانهم متورطين بدم بتنا لو بري .
كاللها : الحك يظهر ما ينام هدي دمج وعوفيهم ان جان الهم ايد بدم شذرة يظهرهم الله وما اخليلهم باكية
ما راضية بحجيه وزعلانة عليه ما واطى السانها السانة
اعتزلته وكرهته اعلى سكوته جيف سكت اعلى دم بتها ورضا بحزنه وما دور جتالها وهي دمها يفور .
جانت تفكر بطريقة تعرف بيها راشد متورط بدم شذرة لو لا
بس ما تعرف منين تبدي .. فكرت
لو جان رايد يجتلها ومحد يحس بيه لاون يجتلها بيام دوامه خاطر ما تطيح العين عليه خصوصا هو يعرف اخر ايام شذرة صبح سرها عد امها تسرها بكل فعايل راشد .
راحت للكهوة منكبة وطلبت من الكهوجي .. يخابر الها اعلى وحدة ابنها .. اللي ابغداد يدرس
.. اسبوع وزتلها الكهوجي طارش كاللها ( جابر يريدج اكربي حاجي ) لبست عباتها ونكابها وخذت وقاص ابنها وراحت للكهوة كضبت بالتليفون وحجت ويا ابنها ..
بلغته بجتلة اخته
الاخر كام يبجي ويتحسر
جيف اخته ماتت وهو بعيد وما يكدر يجي .
كالتله : البجى ما يرد اختك ييمه .. لاون نكوم لحيلنا ونعرف الحك ونظهرها .. رايدتك تروح لوحدة راشد وتعرف كبل ثلث اسابيع جان بالجيش لو نازل لو ماخذ رخصة لو شنهو وضعه .. رايدتك تعرف وضعه غاد خاطر اذا جان بوكت جتلتها بواجبه .. ابعده عن ظنوني واندار لامه ادور ساعة جتلة بتي وين جانت وشنهو خبرها
كاللها : تامرين يمه بس انا ما عرف وين يداوم راشد بالضبط خاطر انشد .. تعرفين وين
كالتله : اسعل واردلك .. بس انت لا تكطع باجر خابر بهالوكت خاطر ابلغك
سدته منه وراحت تدور تريد تعرف وين يداوم راشد بالضبط
شيم وحدته خاطر تطي العنوان لابنها يدور خبره .. بس ما عرفت الكل ما يدري عن مكان وحدته
ردت ثاني يوم للكهوة مكسورة ظهر وابنها وقاص وياها
نادالها ابو الكهوة اجالها : ها ام جابر شنهي
– الله يستر عليك ما تخابر اعلى جابر
– ما هو امس مخابرته
– راد من عنوان وحدة راشد وما عرفته وكتله اخابرك ولاون احاجي خاطر لا يعتمد علي ويروح يبحث عن اسمه غاد
– وحدة واشد اعرفها ..
فزت من مجانها : ابخت الله عليك تعرف
– راشد بن خيري لو غيره ؟
– اي اي هو .. ابخت الله كلي ان جنت تعرف عنه شي
– والله هو كبل من اجا حجالي عن وحدته ودعاني لبغداد واطاني عنوانه لو اجيت لبغداد اجي خاطر يدليني بيها بس ما رحت
– شنهو عنوانه
– اطاها اسم الوحدة
وخابرت على ابنها
ساعة دعوه للاتصال يلا حضر حجت وياه واطته عنوان وحدة راشد .
راح جابر يبحث اسبوع عن اسم راشد بالعنوان اللي اطته له امه وما يلكي .. لحد ما وصل لخبر … راشد هارب من الجيش صارله ٤ اشهر !!!!
رجع خابر على الكهوة .. طلب امه
ودى الكهوجي اعلى ام جابر للكهوة تحاجي ابنها
عد ما سمعت بابنها طالها خذت واحد من ولدها وراحت تركض للكهوة خاطر تحاجي جابر .. اللي يدرس كلية عسكرية ابغداد.
خذت سماعة التليفون وحجت : ها يما ؟ ابشر .. طمن كلبي شنهو الخبر
– يما انا رحت لوحدة راشد ودورت وما لكيت اسمو
– ييما غيدان كالي هاذ عنوانو يطلع كايلو غلط
– لا يما العنوان المنطي لغيدان ماهو غلط الغلط براشد صارلو اربعة اشهر هارب من الجيش
– شنهوووو .. شنهو هارب من اربعة اشهر
– هذا الكاله مدير الوحدة مالتو يما عد ما سألت عنو كال هارب صالو ٤ اشهر ما جاي ولا ملتحق .
سدت التليفون وهي مبحلكة وصافنة ( يعني صدك ظني راشد هو جتال عمران وجتال شذرة ؟ عمران انجتل كبل اربعة اشهر .. اربعة اشهر وين جان اذا ما جاي لهله ؟ وين عايش ؟ )
اندارت وهي تفكر خيري من ترخص من خشان يهد الكاع وين مشى ؟ اهله جانوا يعلمون بامره ؟
اتذكرت حجي شذرة من تكللها ( يمه يطلعني من البيت ويسر امه ) ثاري حاجي لامه خبره ونوايا ونعيمة تدري بكل مصايبة وتدسترله وخشان هد جتالين اهله بلا راي ..
هدت خشان ما فكرت تعودله تكلا
داست الكاع وطلعت لعشيرتها .. لآل موازي
كربت لبيت عمها وصرخت وناحت بالباب .. ركض عمها وكاللها ( خيرج يحرمة ال عكاب شنهو الجايبج )
– الجابني جتال بتي وجتال عمران
– جتال عمران .. ياهو جتال عمران ؟
– راشد اهو الجتل عمران .. وكتها كل لشذرة عد ما جان سكران وما صدكته وكاللها ضل عدي شي واحد اعمله خاطر يرتاح كلبي .. وعملته جانت جتلة بتي
– ومنين عرفتي خبره وهو المتورط بجتلتهم
– كل هالوكت يوهمنا وما نظن بيه ونكول هو ابغداد .. يعمي الزلمة طلع هارب من وكت جتلة عمران ما ملتحق .. راشد اهو المتورط بدم شذرة وعمران اهو جتالهم .. مليت وانا اكلكم اهو الجتال وما بيكم احد يسمع لي .
انتفضوا ال موازي .. وراحوا يدورون اعلى خيري
ردت يازي وعلمت خشان بخبر راشد .. رد هو الاخر انتفض يدور اعلى خيري واهله وين مشوا
راحوا لديرة خيري وعمامه .. سألوا عن خيري
نكروا مكان خيري وكالوا ( مالنا علم بخيري واهله اهو طالع من كاعنا من عمر )
فتشوا عن اهل خيري رادو .. ما لكو خبر عن اهل خيري
ردوا ال موازي وال عكاب وهم هادرين دم خيري وولده
يازي علمت الزلم ما راح اتدور ولا راح تتعب روحها بالدوارة راح تظل تهوس وتهدد ومحد منهم يدور بداخل عن خيري واهله ..
اعتمدت على روحها وتنكبت وراحت لديرة اهل خيري
ما علمت خبر … خذتلها اسبوع .. تروح وترد بديارهم وتشتم خبرهم .. لحد ما طاحت باخو راشد الزغير وهو طالع بالباب
كضبت الها حجرة جلمود وحطيها براسه
الولد جان ابن ٨ سنين .. شالته جوا العباية وطلعت من ديرتهم خذت الها عربانة وردت لال عكاب .
ضمته عن هين خشان خاطر لا يسعلها ولا يخرب عليها تفكيرها عد ما يمنعها من روحة ديرة ال خيري .
كل هالخبر واهي معتزلة خشان ما يجيس السانه السانه ولا تكربه عكب سكوته على ثار شذرة ورضاته لال خيري يهدون الكاع بدل ما ينبشهم ويطلع خبرهم .
ثاني يوم وصت وقاص ابنها يضل عد الولد ويتاكد مكيده ويحذر ابوه ما يعرف بخبرم .. وبلغته هي طالعة
دوسي الكاع من الفجر .. واطلعي لكاع ال خيري
عرفت نعيمة راح تضل بلاعة الموس لا تكدر تصيح وتدور ابنها تنكشف ورجلها وولدها مهدور دمهم .. ولا تكدر تسكت وابنها ضايع .
جابلت الدار الخذت منه الولد .. وكعدت
متنكبة وكاعدة بعز البرد تنطر احد منم .. يبين
لحد عكب الضحى ردت نعيمة وهي تتجبجب بنكابها وتمش مسرعة
عرفتها يازي من مشيتها ..
الحكيها وصيحي باسمها : يا نعيمة .. لا تظنين تبعدين من غيضي ماهي انا التنام اعلى حك .. العين بالعين والسن بالسن وجروح الوادم كصاص
اندارت لها نعيمة وهي تكللها : ابني تدرين عن خبره
– انا ما ادري عن خبر بتي شذرة خاطر ادري عن اثم ابنج يمكنه راح مثل ما راحت شذرة
دكت على راسها وكامت تصرخ .
هدتها ومشت .. مطمنة بال هساع ما يعتاز بعد هي التكطع دروب اتدور عليهم .. هم واحد واحد راح يطلع ويبين خاطر يدورون ابنهم .
ردت ال عكاب وبلغت ابنها يكل ابوه بخبر اهل خيري بدرتم .. وودت خبر عن مجان اهل خيري .
هدوا ال موازي لديرة خيري وهوسوا غاد وهللو وهدووهم
طلع عم خيري وقسم كالم خيري ودع مرته وحريمة وجهاله وما ندري عن خبره واحلف اعلى القران شاهد حال ان جنت ادري عن خيري واهله .
وودى خبر لال عكاب يبلغه ان الجاهل النباك من كاعه امانة والامانات مالها بالثار .. والماخذينه جاهل ردوا ودوروا خيري وولده وينم .
رد خشان يسعل عن خبر الولد الماخذته وكايل الها : ما دامه جاهل وامانة نحن مالنا بالامانات ثارنا ويا خيري وولده ماهو ويا الحريم والعجايا .
يازي : اسم الله اعلى اسمك من الامانة يخشان انت راعي بخت لا مسيت امانة ولا كربت لدار احد واخذت منه .
– بس الوادم جاي تطالبني بالزغير
– وانا اطالب بدم بتي
– دم بتج ما يجي بدم الزغير
– ثار الزلم وحد وثار النساوين وحد .. اتبرى مني لو حكوك بيه ثاري ويا نعيمة ما يخلص لا ما اشوف ولدها مجتلين وكلبها امر من كلبي اعلى جتلة بتي .
– انت كلما فعلتي فعلة شنيعة صحتي اتبرى مني .. كبرتي والشيب جاس راسج خلي الامور للزلم واكضبي بيتج يم جابر .
– فعل الزلم لا يوطيني ولا يرضيني .. انا ما مبالية بكلعتك ولا برضاك .. السكت اعلى دم بتي ما لي برضاه وان جنت رايد اهد الكلعة هالساع اهدها ومانك مهددني يخشان وخلي البيت يلم حزنك وخلي التاريخ يذكر خشان ال عكب سكت عن ثار بته وكعد ينحب بحجرة اعلى بته وامها الكامت بثارها .. ان جانت الزلم ما تجيب حكوك نسوانها تطلع الحك من حلك السبع … وانا اهل لكل فعل يبدر مني.
اغتاض خشان عد ما عايرته بسكوته وتكاونوا
وولدهم يفاككون بينم .. خشان يصيح ويك بولده ويكلهم : ان جنتو تعلمون بخبر الولد علموني لا تدسترون لامكم .
ويا كوانهم هدت نعيمة بالطابوك اعلى الكلعة وهي تصيح : انا وابني مالنا بفعلكمممم الني زغير بري من كل اثاممكممممم ردو الني يالما تخافوووون الله … ردولي ابنيييي
طلع خشان يتكاون وويردها عن الكلعة بس نعيمة ما سكتت وهي تصيح : لا تذم ابني وبتك الماهي شريفة ركبت عارها براسنا جابت نغل وركبتو براس ابني .. انتم الردتو تحطولنا كرون وما تريدون تحجون مسحتو عاركم بينا وجايين تلومون ابني عد ما انتفض .. طم عاركم الما عرفتم اطمونا … شذرة عار شذرة جابت نغل من عمران وربتوا براس راشد وتريده يحسبها بنتو
كام يغلط عليها خشان ويحاول يبعدها من الكلعة شهرته وخزته والناس كلها تدحج صريخها وكوانهت بنص الديرة .
طلعت الها يازي وخوات شذرة من زهرة وهدن اعلى نعيمة
كتلنها وشردت منم .. وهي تصرخ بكل ديرة اعلى عار شذرة وتكلهم .. جابت نغل من عمران وراشد بيض وجهه حك ابني ببياض وجهه .. مغتاضين جيف طلعنا عارهم وهالساع ماخذين ابني الزغير يبزونا بيه ما كفاهم العملوه بينا ردوا اعلى الزغير
راح تصيح وتنوح بكل درب وتتهمهم بشرفهم ..
يومين اكتضت الديرة بهالحجي بت خشان جايبة نغل من عمران ومركبته براس راشد ..
وظنون الناس الما تخلص
من هاي كتل عمران واهل عمران سكتوا
وخشان سكت اعلى ثار بته
ثاري بتهم جايبتلهم العار وعبن هم يشتغلون خدم عده رايدهم يسكتون …
جثير اقاويل وظنون طالت ال خشان اعلى جتلة شذرة
وطش خبر زلمتها الجاتلها عد ما علم ان البنية مو بته بس خشان رايد جتله فوك عار بته
بجلمتين وبيومين
انكلب الحك باطل .. والجتال مظلوم
والمجتول ظالم .. موازين تغيرت اعلى اثر حجي طش ماله صحة .. بس لأن الناس اطش الفضيحة وتداورها وتصدكها اكثر من الحك .. محد يدور الحك ولا احد يصدك الصدك دام الصدك بيه ستر .. الفضيحة تحول الحك باطل والباطل حك .
خشان اغتاض من الفضيحة الطالت اهله
وما بيده شي يفعله .. الحجي اطش ماهو اعلى السان زلمة خاطر يحكه من ناس لناس وسمعنا وكالولنا .. واكثره حجي نسوان ما ينلم .
اندار على يازي بلاها بكل الفضيحة الصارت وكاللها : وين وصلتنا فعايلج ردي الحجي الينكال عنه ما كمت اكدر اطلع وجهي جدام الناس عكب الحجي النطش بالديرة
– كل الصار والدار من تحت ايدك لونك من الول ما انطيتها لراشد وذبيت بتك هالذبة هاي ما صار كل هاذ كتلك يخشان هاذ مو فعل تزوج بتك خاطر تمنع عمران منها كتلي لا تدخلي وخلي الحجي للزلم اتحلها ماهو هذا حلك من الاول حلها انت .. انت الشيل المصايب الوكعت علينا
مليت وانا اصيح راشد جتال شذرة صفيت ويا اخوتك ضدي
وهم جانوا بيدك وخذامك ورضيتلهم يهدون كاعك ويستكون عليك ومتجاهل صياحي ونوحي خاطر تبين جدام اخوتك ترا ماهو انا المرة تمشيني وخاطر لا يكولون خشان مشى ورى حجي يازي صار بينا كل هذا
لو مصدكني من الاول وما مدور جتالها بعيد وكاضب خيري بفعلة ابنه ما صار الصار جاي تلوووومني وانت الضيعتنا وحطيتنا بهالمصايب هاي
خشان يصيح ويلوم ويازي تصيح وتلوم وواحد يذب اللوم بالاخر وصوت كوانم واصل لاخر الديرة
طلع خشان وهو معتاض وعرف ما يسكت هالحجي غير يلزم بخيري وابنه خاطر يحطم جدام زلم ويفاصلهم وياخذ عكه بعرف العشيرة ويرد ماي وجهه عكب فضيحة نعيمة
الوضع جان هوسه الى ابعد حد
خشان يدور خيري وراشد
ونعيمة ادور حوالين الديرة تريد ابنها
والناس تحجي .. وال موازي يومية هادي اعلى ديرة خيري عد ما جذبوا ونكروا ما عدهم علم باي خبر عن خيروي وهم طلعوا مخبين عايلته عندم .
ناس تجرخ بناس
بهالوكت … راشد زل وظهر
خذاه الحجي وشاف الناس اطته حك بجتلة شذرة وطم عار وشاف اذا ضل على هالوضع هذا مهدد وجاك الذيب جاك الواوي ما يعيش .. اظهر وروح على شيخ عشيرة جريب من ال عكاب .. من زمان وانا مغتاض من عمي ابو خالد اطاني بته وهي اعلى ذمة واحد ثاني وخلفت وجابت من ذاك وهي اعلى ذمتي وكل ما احجي يهددني ويهدد اهلي وانا رايد الامان منك نكعد ونفصل اذا الي حك ياخذونا بالعشاير .
هذا الجان رايده خشان يكعد بالعشاير ويطلع حك بته ويبريها ويظهر جذب راشد ..
ال موازي علموا بكعدة ال خشان وال خيري
وعرفوا راشد راح يجي .. وخشان تجاهل يازي برضاته بالكعدة مالت العشاير .. غاض ولده اخوة شذرة كبل لا يغيض يازي وقاص شيل تفكة وحطها بظهرك واتبع ابوك واتربص لراشد … وال موازي تسبكوا ليهم وكعدولهم من ابعيد يتنطرون
لحد ما كرب خيري وراشد واخو راشد الاصغر منه وكفوا عد شجرة الرارنجية ينطرون الشيخ الماخذين منه الامان
وقاص بس شاف راشد من بعيد صاح ؛ تتهم اختي بالفضيحة يوووووول تجتلها وفوك جتلتها تتهمها يالعااااااار
اسحب اقسام وحط جيلتين بكلب راشد
انتفضت الزلم طلعت اعلى الصوت .. راشد جان جاي مسلح واسلاحه بظهر بس اتصاوب اخو راشد كوم اسحب اسلح اخوك واصرخ وصوب وقاص براسه ..
خشان وشاف ابنه انجتل جدامه ركض يصيح .. يهم على ابنه جر السلاح من عنده .. اخو راشد وهو بحماة دمه يصرخ ( تكتلون اخوي يالعااااار اليوم اجتلكم كلكمممممممم) وصوب خشان بثلث جيلات وحدة براسه واثنين بجسمه.
هدوا ال موازي واشتغلت التفك وصوبوا اخو راشد وخيري و
وراشد فوك جرحه .
وبدكة وحدة طاحوا ثلث مجاتيل خشان ووقاص وراشد واخوه وابوه .. بدكة معروفة بسهل نينوى طشت بوكتها وكلها عرفت هالدكة بأسم ( دكة الرارنجية )
كامت الديرة اعلى حيلها وما كعدت
خشان جبير ال عكاب مات !
انتفضوا ال عكاب كلم اعلى هالدكة .. والزلم شالت تفكها وهدت اعلى المضيف الكفل راشد وناس لطخت بناس وضاع اثرها وراح حكها وسال دمها .
جانت المصيبة الجبيرة اعلى يازي
فوك حك بتها تجتل زلمتها وابنها .. فقدت وراحت تصيح وادك اعلى راسها بالشارع .. جانت مصيبة جبيرة يصعب ذكرها على الكلوب وحادثة ما تنسي .
بهالوكت جا خالد ومرجانة وحطوا رجلهم بكلعة ال خشان
وانصب عزا ال خشان وابنه .. ووكف خالد بعزا ابوه ومرجانه وكفت بالعزا جنها هي راعية الكلعة مستغلة جرح اختها وكسرتها اعلى بتها وابنها ورجلها .
عد ما كضى العزا دكت ايدها اعلى رجل اختها وكالتلها : ارتاحي يبت امي وهيدي .. راح راعي الدار وجا غير والكلعة ردت لاهلها
اندارت يازي وصوتها مبحوح وعيونها يا دوبك تشوف بيهن من البجى وكالتلها : اي والله يبت امي الدنيا ماهي للكوي دنيانا للما يستحي .
انكسر ظهر يازي بموت خشان وضاع سندها
وطلع الها كل سن جان يصكه الغيض منها .. واصبحت سمعية ومرجانة هن راعيات الكلعة وخالد جبير ال عكاب .
وهيج انتهى فصل من فصول قلاع الضر.

يتبع…

( ما بعد المصيبة)
تگدر ماتگول الاخ ؟ وبصدرك غفة الخنجر
(كاظم اسماعيل الگاطع)
الظلم سلاح ذو حدين
يأما يخرج منك إنسان عاطفي يشوف نفسه بكل مظلوم ومتعاطف مع كل البشرية، او يصنع منك انسان ظالم جامع للأحقاد بداخله فيحقد على كل البشرية .
الحقد هو اول خطوة بطريق الشر .
وسام هي الطفلة اللي انكتلت امها ومات ابوها وضاعت وضاع نسبها .. هل هي صحيح بنت راشد لوامها حبلت بيها كبل زواجها من راشد وترجع لعمران ؟
من بعد موت خشان الكلعة اصبحت تحت وصاية خالد
ويازي بموت بتها وابنها ورجلها .. انطفت
قلة حيلتها .. وانكسر ظهرها وراح الجان ساندها
لا اهل لا عمام ساندينها ولا اخو ولا حتى اختها العملت ما عملت من اجلها طاحت ع الكلعة وسيطرت عليها وكعدت تتشمت بصواب اختها .
انكسرت كسرة جبيرة ما عاد لها حيل تحاجي احد لو تاخذ حكها من احد عكب الصار باهل بيتها وبزرها .
يگولون لو طاح السبع كثرن سچاچينه
بطيحة يازي فز كل واحد جان ما كادرلها
سميعة مرت خشان الاولى .. مرجانة اختها .. خالد ابن خشان
كل واحد بيهم يتمنى يشوفها باردى حال قسطا بالايام الجانوا هم مالهم كلمة ولا الهم دور وكل الكول وافعل الها .
انكسارها فتحلهم المجال بظلمها .
سميعة : نحن نكرب صارلنا شكثر اعلى المصاب المفكودين ويازي لازمة حجرتها عودن حزينة تاكل وتشرب وتنام شنهي فوك ما ناخذ حكنا منها نشتغل الها خدم ؟
مرجانة : الحك لا تكوم تشتغل ولا نريدها بالكلعة سنين الكضيناها ونحن بالف يا ويل حالنا واهي منعمة بجال عمي وكاعدة ومتربعة بالكلعة هساه تكعد ويانا .. كضى العزا خلها تاخذ بزرها وتطلع من الكلعة
خالد : انا الود ودي اطردها اليوم كبل باجر بس وين تطلع ؟ الناس تاكل وجودنا على ابو ها طرد مرت ابوه من الكلعة بس طاح ابوه وتاليتنا نطلع نحن الظلام ما هي !
سميعة : لا اصطبر لا تطلعها هسه عليش تستعجل براحتها انا رايدة اشوف ذلتها جدام عيني كون تشتغل وتخدم وانا متربعة رجل اعلى رجل مالي غير اطر الديرة بعباتي وافتر وارد الاكيها محضرتي الزاد والمشرب .
خالد : يمه انت بعد راعية البيت وصاحبته والكلعة كلها تحت امرج وباللي تامرين بيه
مرجانة دارت بوجها عن احجايته وسميعة ريعت وكامت تمدح بيه : اللهي علي شانك يوليدي يا بعد اهلي وكل طوايفي يعلي علومك ويحفظك الي يراعي بيتي
خالد فرح بمدح امه وراح بنص الكلعة ينده للكل ويكللهم : كربوا لهين وينكم
الكل التم الا يازي بحجرتها بانكسارها فصاح : يازي ما هي شنهو تستعر مني لو ما عاجبينها ؟ لو نحن ماهو بمكامها ؟ يازي ياااااازي
راحوا ندهولها .. ما اجت
مشالها للحجرة كاللها : انا مو جاي اصيح واندهلج عليش ما تردين ييازي ؟
– المرة يطيح زلمتها وتغمض عينه مالها طلعة من دارها عكبه وانا طاحوا كل اهل بيتي لا الي رجل تجري ولا الي حيل يحمل .. جفي غيضك عني يبن سميعة .
– انا ابن خشان وراعي هالكلعة واتسمى باسم ابوي ما بسم امي يالما تعرفين معنى الحيا
– ان جانك حطيت عبات ابوك اعلى لشتك وتربعت بمجانه امشي اعلى اثره وخلي سيرته بين عيونك خشان ما جار اعلى مظلوم ولا صار عون لظالم .. عاش عزيز ومات عزيز وعاشت الديرة بخيره .
– عجل من كلامج افهم انا ظالم ييازي
– الحقد هو اول باب للظلم وانت انترست اذانك احقاد جانت تايمة بكلوب اهلها سنين ماكدروا ييبينوها بوجود راعي الدار
عكب طيحت الراعي الامر صار عدك وانت خّير امرك يا تفتح اذنك للغير يسيرك يا تحط سيرة ابوك جدام عينك وتراعي اهلك وديرتك .
انتفضت سميعة وانهدت بيها تغلط واشتمها بنص الكلعة وحسها يلعلع .. ما ردت يازي ولا جاوبتها .. خالد مام يجر بامه من حجرة يازي ويهدي بيها وهي تكلو ( تحرضك علي خاف تسمع حجايتي واهي الجانت مخلية خشان جفية بديها تعمل عملتها وتمسح بيه اثامها )
كام يهدي بيها ويكللها : ادريها حية جاتلها السم يمه انا ابنج من ايدج هاي لايدج هاي وتخسي كلمن تجيب طاريج بشين.
زادت احقاد سميعة وابنها اعلى يازي
كل يوم تحرضه امه ويروح ينهد على يازي يصيح ويغلط
وساكم وادها بالسيط والخيزران ياهو المن اخوته يغلط لو ما يأتمر بامره ويعاند يكضبوه ويعلكوه من رجليه ويجلده
يخلي يازي تتكلى اعلى بزرها ..
بهالوكت تعبت صحة يازي حيل ..واتمرضت من القهر
وابنها ببغداد يدرس كلية عسكرية ما تعلمه ولا تخبره بحاله خاطر لا يهد حلمه ويجي يعيش بحرب وغيض ويا اخوه
هدته يبني نفسه على حساب صحتها وحيلها
وضلت هي وولدها وجهال شذرة تحت رحمة خالد وامه ومرجانة .
جاروا عليها باشد انواع الظلم
حرموها وحرموا ولدها من الاكل .. وبالحسرة تحصل اللكمة الها ولبزرها .. يكضبون اولادها يجتلونهم جدام عينها ..
كضبوا ابن شذرة دفعوه لجدته ام راشد
عد ما اخذو ثاير واطوه هين يازي فرفحت ورادت بكل طريقة تجيب ابن شذرة .. بس لا حيلها وصحتها ولا احد ساعدها
ضلت الليل والنهار كاضبة بوسام بنت شذرة تنعى وتبجي
جاروا اعلى اصر شذرة وحرموا ذكرها اعلى كل السان .. ومحوا اسمها من كل طاري
وعد ما تنذكر الدكة الطاحو بيها المجاتيل
يكلون … الخادم تعالى اعلى سيده وثار التفك بينهم وتجاتلوا
حادثة مات بيها اكثر من ٥ .. اختصروها بجم جلمه ومنعوا سالفتها اعلى كل السان خاطر ما ينذكر اسم شذرة
عبن طاريها عار
مرة كتلها رجلها من عرف جايبة جاهلة من غيره
شنهو الادلة وين الاسباب .. محد داور بيها
محوا اثرها محد يكول شذرة
لا مرت خيري تتشرف بشذرة ينكال اعلى ابن ابنها
ولا خالد يرضى يعترف اخته جتلها رجلها وغسل عاره
محى اثرها وحكما اعلى كلمن يجيب طاريها بجلد ليما يمحيها من راسه ويتوب يذكرها .
وهذا اكبر ظلم اتعرضت له شذرة
حتى اكبر من الظلم اللي تعرضتله بحياتها وهي عايشة
عد ما باعها وسلمها لواحد غريب خاطر ياخذ اللي يحبها .. وينجار عليها الضيم وتنرد لاهلها يكوم ابوها بلا عدة يسلمها لابن الخادم مالو خاطر يسكت حلوك الناس عنها ويطم السالفة ويمحي اثرها .. يكوم رجلها بتعذبيها وحركها لا مسها احد كبله الى ان جتلها وتخلص منها .. وعد ما انجتلت محد انصف حالها
كالو عار .. شردت من رجلها الاول واخذت الثاني بلا عدة ورجلها جتلها وقرر اخوها الباعها يمحي اثرها
الغاثة بسالفتها ماهي شين فعلة راشد وجتله الها وغسل عار .. محى اثرها خاطر لا ينكال خالد باع اخته وانطاها لواحد وهيج صار بحالها .. محى اثرها خاطر هو لا ينعاب بجلمه
فحرم على الكل محد يجيب طاري شذرة ولا يذكر سيرتها ولا يحج شنهو جانت سالفتها .
مشت الايام والسنين والظلم يجور اعلى يازي
يزيد الحال ما يعلى ..
مرجانة عد ما اجبلت ع الكلعة جانم عدها من خالد اثنين ولد من خالد من بعدها حبلت ببطن ثالثة وجابت بنية وسمتها (( زبيدة))
الظلم والجور الجاره خالد اعلى اخته شذرة واثرها ..
قدره الله اعلى حاله وعياله .. بس كالو اصبر
وسام جان عمرها ستة سنين اقل اكثر .. محد يذكر بالتحديد بس يذكرون الحادثة ..
فرد يوم من الايام جانت مرجانة تصيح على وسام تريدها تنكل ماي بالبستوكة خاطر تسبح زبيدة بتها
وهي تصيح : وسام وسام وصول وينج .. اكوم العب السياط اعلى ظهرج يولي
اجتها وهي تكللها : جبتو
– عليش تاخرتي
– مكدرت اشيلو
– عجل منو الشاله الج يالجذابة .. وتجذبين ما تكدرين تشيلي
حجتها ودمغتها مرتين اعلى راسها
وهي جاي تدمع بوسام .. فلتت البستوكة من ايدو وسام اعلى رجل العجية .. زبيدة
نطت العجية تصرخ فرفحت من البجي
فزت مرجانة وهي تصيح : الله لا يبارك بيج جتلتي بنتي يولي شيفكج من اديّ اليووووووم .
كضبت وسام من شعرها لفي بيها الحجرة ودفعيها وجري الخيزرانة وتولت البنت جلد ليما جسمها صار اسود من الطك
البنت وكعت مثل الميتة من الطك
تلاحكتها يازي اعلى اخر نفس دفعت مرجانة منها وكام تصرخ : يولي ما تستحين ما تخافين ربج ببنتي يتيمة لا اب لا امو تجورين عليها .. يولي تجورين عليها قسطا بيه شنهو العملته وياج شين وتجازيني بهالمجازاة يبت امي يولي جتلت ابوي لجلج .. عمت عين ذاك اليوم خالته يجتلج ولا جارتج منو
جرت وسام وهي تريد تطلع من الكلعة تركض بيها للمضمد
كضبها خالد : وين انت حاسبة الدار مالها حرمة خاطر تطلعين كيف ما حلالج ؟
– البنت عتموت ابعد من درررربي
– وان ماتت ادفنيها بظهر الكلعة وعد ما تخلصين اكري الفاتحة
حجاها وهو يدفع بيازي عن الباب كامت تصيح : البنت يتيمة يول خافوا الله شنهو العملته الكم وتجرون اعلى حالها ما اطلع انا امش انت واخذ بنت اختك
جاي تحجي هو عافها وراح يمشي يريد يعرف مرجانة شبيها عليش تولول .. دخل عدها وبنته ناطة من البجي
كضب بنتو وكام يصرخ وينشد شبيها كالتلو : وسام كسرت رجلها بالبستوكة
اخذ بنتو وراح يركض طلع من الكلعة
ويازي واكفة بوسام تصرخ تريد تطلع تسعفها وسميعة تكللها : راعي الدار كالج مالج طلعة من هين يعني مالج طلعة ..
ادفعي سميعة عنج وفكي الباب وطلعي
ركضت على بيت مرة جريبة منهم تعرف طب عرب ذبت البت يمها وكالتلها : البنية لا حس ولا نفس يولي جابليني ودحجي حالي .. شعمل بيها انا حار كلبي بهاليتيمة
كضبتها المرة غسلت الها ودواتلها كم جرح من طك الخيزرانة كايم يجري دم .. ارتاحت وسام عدها شوي لحد ما وكفت لحيلها حجت يازي : ها جدة تكدرين تمشين لو اشيلج
كامت تبجي وسام وتاشر على رجلها تكللها : توجعني
يازي شالتها وخلتها اعلى ركبته وكامت بيها تشكرت من المرة وكالتلها ازتلج حكج بيد واحد من الولد اعذريني اجيت امسرعة وما دريت اعلى روحي خاطر اشيل شي وياي
كالتلها المرة : لا صدك جذب روحي يولي ولا تزتين احد ان جان ما عدج
– يزيد خيرج نحن اهل خير لجن الزمان جار اعلينا وكلب حالنا عمت عين الكاع الخذت الزين وهدت اعلى كلوبنا الردايا
– عجل الردي ما يصيبو شي .. الزين اهو الينعاب
– لا عاب حلكج داده … الله كريم .. الله يعلم بالحال ويشوف ولاون يوم يظهر الحك ويبان وتشفى كلوبنا
– والنعم بالله ما خاب كلمن وكل امره له ..
– يعطيج العافية اختي وجازاج الله بكل خير
مشت واهي كاضبة وسام من اديها ومكعدتها اعلى جتافها نشدتها : تكدرين تمشين جدة ظهري اذاني ما عاد لي حيل يحمل عكب امج وضيمها يجده
نزلتها من جتافها وكالتلها : بهيدة يواش اعلى كيفج امشي لا تتعورين
خذتها ودشت للكلعة خالد حينها جان مشتعل غيض اول ما شافها كام لحيله وكاللها : انت بظنج تعانديني
– حرمتك تعدت اعلى بنت اختك وانت لا شالتك حمية ولا شعلت الغيرة بدمك اعليها رحت تركض بعجيتك وانت تعرف الجاهلها ما صابها شي جايد بكثر العملته هالظالمة بهاليتيمة
مرجانة : ياهي الظالمة انا انا تكليلي ظالمة شنهي جتلت ابوي لو خليت عشاير تتراطم وتصير دم لو ابعد ابو عن ابنو لو عملت شوي من العملتي انت بهالديرة
– تعايريني بجتلت ابوي حكج والله وسماه حكج انا استاهل اتعاير بجتلة ابوي .
خالد : هييييين حجيج وياي تخالفين كلامي وتطلعين
– كلامك اعلى عيال بيتك يزي عاد تحملت جثير واكول اسكت وما اريد الطلايب بس الشفناه والجرالنا بس مالت يطال ظلمكم حتى اليتيم لهين واكلك اكف لا انت ولا غيرك يخالد .. محيت اثر امها وناوي تمحي الجاهله ..
ان جانت وسام اثم وعار فهالاثم والعار انت تسببت بيه عد ما بعت اختك لعمران خاطر تاخذ …
جاي تحجي كضب عكاله وجلدها اعلى وجهه واهي تحجي
وبرجله دفعا للكاع وداس اعلى ظهرها : حسج عينج اسمعلج حس ييازي الغيض البكلبي منج لهين واصل
دفعته منه وهي تكله : اليطك مرة .. مرة يبن امك
حجت هي لو ابتلت .. كضبعا بعكاله يطكها فزعوا ولدها يردون يدافعولها كضب كل ولدها وطكهم …
وجر وسام واطلع من البيت
صرخت يازي : جيب البنت وين موديها جيبها .. احاجيك … جيبهااااا وين ماخذ الجاهلة خالد حرام عليك خاف الله من حوبة هاليتيمة خاااالد
طلع وسميعة وراه صكت الباب وسركته وكالتلها : مالج طلعه اهو يدير امرة ردي لحجرتج وكافي بيج الجتله هاي انت وولدج هيدي واكعدي بدارج
– ابعدي عني الجاهلة وين اخذها … ميليييي
دفعتها وراحت تفتح بالباب ..
كامت تدفعها مرجانة .. فزوا ولدها يريدون يساعدوها
جارت عليهم مرجانة بالخيزرانه وسميعة ويازي الصياح بينهن وصل لاخر صوب .
هوسة وهرجة ومحد درى بخالد وين ابعد وسام
رد من بعد ساعة ودخل الكلعة تلكتو يازي وهي تكلو ( وين وديت الجاهلة احجي )
– اكلعتها الله يكلعها ويكلع سيرة امها
– شنهو العملته الك هي وامها شنهو السونه خاطر تجازيهن هالمجات يالما تخاف من ربك تخسي تورث ابوك بشرك هاذ يول ابوك جان كافل يتيم ما جار اعلى يتيم ولا عال بمرة ولا سطى اعلى حك احد
هساه انت ماخذ حك اخوتك وجاير اعليهم وحاسب نفسك رب هالكلعة وانت لا باصلها ولا بذيالها ..
– هذا العدي يعجبج يعجبج ما يعجبج مطرودة انت واولادج من هالكلعة يا باب يفوت جمل .. انكلعي وخلنا نفتك من شرج واثمج واثم بزرج من يوم الشافج ابوي بذيج الظهري وابوج مبسط بيج يبيع هالكلعة ما شافت الخير شين ما خلفتي ولا جازاج الله وصولتج رحمة .. انكلعي منها وفكينا
كام بيازي وولدها وطردهم من الكلعة
كعدت بالباب مهضومة تبجي .. لا اهل لا عمام لا احد يسندها ويشيلها عكب خشان ..
يحاجيها ابنها مجبل : يمه كومي ندور وسام
– ول ييمه والله وسماه ما ضلي حيل اكف بيه رحمتك ربي ما ظل حمل بالروح
جرت شيلها على عينها وكعدت تنحب
عكب ما جانت راعية هالكلعة شما تسوي خشان يغفر ويسند
انكسرت عكبه كسر جبير محد يجبره .
تبجي وتنحب .. اندارت الكعدة مو الها وراها ضيم جبير
والليل راح يجيجل ويتيمة بتها ما تدري وين عنها
كالتلها : ول يمه اسندني
اطاها ايده ومشت هي وولدها
مجبل وعثمان ومسعد وناصروحميد
راحوا يدورون وسام وينبشون خبرها لاجن ما لكولها اثر ..
نزل الليل وهي وولدها يجولون الديرة .. راحت لبستان ال خشان خذت حصير من الكاع فرشتها ونامت هي وولدها
للفجر وكلت مجبل وعثمان يروحون يدورون وسام وهي ومسعد وناصر وحميد يروحون لعم خالد خاطر يشكون طردتهم من البيت
راحتله ودكت بابه ..
كام يطلعلها سوالف عتيكة نايمة بكلبه
ويحملها كل الصار كالتلو : انا حرمة وجيت لايذة ابابك اشكيلك ان جان عدك دم تفزع بلا منّه ولو جان بكلبك غيض عني عود فرغه عكب ما تفض امري هاي الاصول يبن الاصول
– وانت هليتي اصول انت لعبتي بعكل خشان حرمنا الخير والجاه وعشت انت وولدج متنعمة بخيره لوحدج
– ان جان لك حك اعلى خشان كول الكلعة ما ورثها من ابوها ورثها من امه اعلى يا حك جاي تحجي ومنين تريد ورث من مرت ابوك .. وخشان ما كصر باحد كل بيوتكم هو البناها وشالكم من الخيم وحطاكم ببيوت وبعدك مغتاض جيف عشت بخيره
– انت ياهو وتدخلين بال عكاب وشانهم حكنا حكو نحن نعرف الحك المن ووين اصله انت ادخيله اعلينا ما جنينا منج غير الطلايب
– مو عبث كالوها لا تطلب الحاجات الا من اهلها وانت ماهو اهلها
عافته وكامت طلعت من بيته
هو رايح على خالد كايله : لا تشمت الناس بينا وتخلي يازي ادكلك طبل بكل مجان جيبها وسيطر عليها بدارك بطردتها راح تفضحك وتفضحنا يازي ذيبة ينخاف منها .. اتجفى شرها وردها دارها
رايح خالد مودي عليها وطالبها وصايرة كعدة كالتله : انا ما رايدة ارد الدار رايدة حكي وحك ولدي من الدار .. انت واحد واخوتك سته .. حط كاسم شرعي يكسم الحصص وكلمن ياخذ حصته
انتفض وهو يكلها: باحلامج اهدم الكلعة واطي حصص والله ماني هادم شي ولا الج رجعة لدار
– الدار ماهي دارك خاطر تطردني منها انا ما رايدة شي منك .. طالبة تدليني ببنت شذرة وتطي حكي وحك ولدي وهذا حك الله
كام يهد عليها شلون تشنده عن بنت شذرة وسواها هوسة وهرجة وطلع مغتاض محتال خاطر يتهرب من حصص اخوته
عمه فوك ما يكله حك اخوتك اطي
يكللها : حتى خالد ناشبتي بعيشته واريدة تهدمين داره فوكه محد يفتك من شرج انت .. بس شتترحى من وحدة جتلة ابوها بيدها ما تهدم دار .
هدوها ومحد نطاها حك
وراحت حطتلها خيمة ببستان خشان هي وولدها
وحاولت بكل صورة .. تتواصل ويا جابر خاطر تعلمه بحالها وحال ولدها وببنت اخته الضايعة ومالكت الها اثر
من بعد اسبوعين كدرت تحصل جابر وتخبره
عكب اسبوع اجالها افتدي بالبنطرون والقميص ولبس وهندام لا يشبه لبسهم ولا يشبه هندامهم كل الديرة دحجت حاله من واحد اعربي الى واحد افندي يشابه البغداديين بهندامم
حضنته وبجت وشكت وكالتله : لهين يمه وبس بعد ما احمل خلصت كليتك واتخرجت وصرت ضابط شيل الحمل عن امك ولم اخوتك ودور بت اختك تراها يتيمة ومالي خبر عنها
– بنت اختي علمني بحالها خالد هي بمكان امين احسن من هين
– عرفت منه يمتى ؟ وينها
– مالنا بيها يمه .. انا علي بيج انت واخوتي
– وبت اختك
– اي اخت يمه ذيج الكتلها رجلها لمن عرف جايبه من غيره انا مرتي ومعارفي هنا اذا دروا اختي مكتولة بغسل عار اطم راسي من العار يمه
– اختك عار يول اختك مظلوم لا تزيد بظليمتها جابر انت اكثر واحد يدرب بحالها لا هي خلفت من غير رجلها ولا هي عار انكص السانك اعلى الحجاية ما ضنيت بيك هالظن حسافة البطن النكلتك يمه
– يمه هسه انت رايدتني اعيلج انت واخوتي لو رايدتني افتخر بعار اختي ؟
– لا تكول عنها عار جاااابر
-يمه جاوبيني تروحين وياي لو شلون
– ماالي طلعة من هين ولا انا هادة الكاع الا بنت اختك ترجع وخالد يطي حصصكم
– انا جان اعلى الحصص انا ماهو بحال حصة من الكلعة حالي احمد الله واشكره وان جان اعلى بنت اختي فهي بامن واطمنت عليها ما يعتاز تخافين عليها
– ان جنت انت ما بحال حصص انا رايدة حكي وحك ولدي
– يا يمه الله يسلمج عدي الطلايب وكومي عيشي عندي
-اهد كاعي وكاع ابوك واروح اعيش ابغداد
– وشجنيتي من هالكاع غير الموت كم واحد دفنتي بهالكاع يمه .. شناطرة تكضين ع الكل
– وبت اختك
– بت اختي بامان يمه
– علمني عن دارها
– وعد لو رحتي وياي راح اعلمج واطمن كلبج عنها .. انا ما بقيد اتكاون ويا خالد خلنا نفض الطلابة هين ونمش وبيتي ابغداد يسعنا ويع اخوتي وعين غطا وعين فراش الج ولاخواني .
خذاها من ثاني يوم وطلع بيها لبغداد
عد ما وصلت بغداد بنكابها وولدها بدشاديشهم دخلوا دار جابر
تلكتهم مرت جابر ( سعاد ) رحبت بيهم بس يازي شافت بملامحها تعابير الاشمئزاز .
كعدت وياهم شوية واشرت لجابر يكوم
وراحت للمطبخ : كم يوم راح يبقىن عدنا ؟
– شنو كم يوم امي واخوتي ذوله
– اي امك واخوتك على عيني وعلى راسي بس اني ما اكدر اعيش وياهم بنفس البيت ما اتحمل
– هاي شبيج سعاد عجل وين يرحون
– ما ادري دبر امرك
– الله كريم هسه خل يكضون هالفترة هين لبين ما الكالهم بيت ويكعدون جريب من عدنا
– بيت ! اي بيت جابر ترا انت لهسه مطلوب لابويه على البيت هذا من وينلك تشتري بيت بعد
– ابوج مو غريب انا ما ماكل فلوسه بس عداتشوفين الوضع شسوي بعد
– ليش وقلعة ابوك مو جانوا عايشين بيها
– اخوي ما يريدم بالكلعة تكاون هو وامي
– اي واتكاون ويا امك وجايبها اليه اني اتحملها لا غيني لا اني ما اتحمل تروح تاخذ حصتك وحصة اخوانك من اخوك وتكعد امك واخوتك بيهم هنا شوف حالهم دشاديش وبوشية وابد ابد مو مناسبين يعيشون هنا واعتقد هم ما راح يتأقلمون
– سعاد اكول لو تسوين عشا ونأحل الموضوع هذا البعدين هواي احسن
– لا عيني لا هم هواية يحتاجلهم كومة اكل واني حامل ما اكدر اوكف ع الطباخ هواية واطبخ اعذرني تريد تطبخ ذاك الطباخ واطبخ انت لاهلك
– هيج صارت سعاد اهلي ذوله
-اي ما بيه شي مو جايبهم وتريد اتحملهم اتحملهم ويايا لعد واطبخلهم
– لا حول ولا قوة الا بالله
– حتى تعرف احنا ما راح نكدر نتحملهم اهنانه اتصرف جابر وشوفلك حل لهالمشكلة بسرعة .. اني راح اروح لبيت اهلي لبين ما انت تحل الموضوع ….

يتبع…

(صنعة جديدة)
وذاك انا وجرحي اعله حاله
ينام ويندهه الونين
(كاظم اسماعيل الگاطع)
يازي كاعدة تدحج بحياطين البيت
لاهو بيتها ولا هي بيئتها ولا هو مجانها معودة اعلى بيت الكلعة وحيطانه العتيكة وعيشتها البسيطة ، تدحج بولدها محد منهم مرتاح
حجه ناصر : يمه راح نضل هين ؟
مجبل : عجل وين نروح ؟
ناصر : يمه انا غاد ارتاح اكثر ما ادري هين ما جاي ارتاح
حميد : تونا جينا يواشكم نشوف شيصير ما يصير
يازي تطمش عليهم من ثم ساكت والسؤال يداور ابالها : وين التالي ؟ وشلون راح تكدر تعيش وتاخذ ع العيشة هينا ؟
جا جابر دخل ها يمه البيت بيتج انا راح ازت سعاد لاهلها وارد ما اطول … حجاها ومشى ومرته خذت جنطتها ومشت وراه .. ضلت اتدحج بكفاه
حجا ناصر : هاي بدايتها الله يستر من تاليها
مجبل : هي طلعت على جيتنا لو شني ؟ يمه
اندار لامه
يازي : شلون ما اشوف لاهي ضلتنا ولا هو مچانا بس الصبر يغير القدر نصبر ونشوف وين تاليها .
راح ثلث ساعات ولدها مددوا ونامو من التعب وهي ظلت كاعدة تطمش اعلى الحال .. رد جابر ودخل وهو يكول : ها شني اخوتي ناموا
– عيشة الحضر غيرتك يجابر ونسيت الاصول اهلك جايين من مجان بعيد تهد البيت انت وحرمتك وتطلعون
– يمه انتم ما خطار البيت بيتكم وانت ام الدار
– ام الدار ما طابتلها كعدتنا هين حملت روحها وراحت بس مالي عتب اعلى الغريبة عتبي على الحملت الضيم والمرار خاطر يخلص كليته ويشيل حملي تاليته هدني وهد اخوته وراح يجري اعلى رضاة وحدة صارلو وياها اشهر ؟
– يمه سعاد حامل
– حبلت بيكم ٨ ما كلت فد يوم حامل وتنغصت عن ضيف جا لو ما راعيته
– يمه حاسبة روحج ضيف انت الاصل حسافة حاسبة نفسج خطار ابيت ابنج
– ابني الما حطلي كدر وانا برماد عباتي توني ابيته يهد البيت ويطلع بالجذب زاد لاخوتك ما حطيتلهم واهم مجبلين من درب بعيد وبطونهم لزكت بظهورهم ابالهم رايحين بيت اخوهم يعزبلهم ويترس ابطونهم .. تاليها بفعايلك هاي نيمتهم جفى اعلى وجوهم يجابر
– يمه
– الدرب الجابنا يردنا يوليدي
– شلون تردون وياهو الالكم غاد ؟
– النا الله
– يمه سمي بالرحمن واكعدي
– راح اكعد لجن ماهو لاجلك لا .. بس الليل جلجل والدرب ابعيد يصبح الصبح واعرف دربي
– يمه كولي يا الله
– احسب احسابك ترد وياي وتناشب خالد بكلعة ابوك .. من خيرنا طلع حك النجمة الحطيتها اعلى اجتافك من خير الكلعة وخير ابوك .
– يمه انا دوام ما اكدر ارد يلغاد شلون ارجع شلون اكعد غاد السالفة كلش ما ترهم سمي باسم الله وشيلي فكرة ديرة عكاب من بالج انا مستعد اخذ بيت صغير الج ولاخوتي هين هم يكضون دراستهم وهم يبعدون عن عيشة العرب ومكاونهم
اندارت عنه وهي مغتاضة
ابنها التحملت الطك والمر وما حملته حملها تاليته متزوج ومرتب حياته وما حاطها بحسابه ..
راح جابر وهو مسوي صينية اكل متواضعة لا بيها لحم ولا دجاج وعادة العرب السفرة اذا ما ينحط بيها لحم بحسبة ما محشم ضيفه وما موجب ضيافته
كعدوا ولدها ياكلون بس هي ما مدت ايدها للزاد استهضمت لا هو خيره قليل ولا ما عنده راح جاب خضورات وحطه جدامهم مثل الحلال
بلعتها وسكتت
لثاني يوم رادت ترد جابر اغتاض وضاج وما رضى
ويكللها : تريدين مني اتكاون ويا خالد اعلى الحصص
وهي تكله : عليش تتكاون عجل نجماتك الشديتهن المن ؟ اذا ما خذت حك اهلك بيهن .. نحن ما مطالبينا بغير حكنا وما مطالبين تتكسم الحصص لو ما هو يطردنا من كلعة ابونا فوك حكنا نسكت .. اليسكت عن حكه لا يبجي اعليه من ينوكل ولو ما خذينا حكوكنا لا عجب باجر عكبه تطلع الكلعة وخير ابوك باسم خالد واخوتك اديهم بالحايط .
ما رضى يطالب بحك ..
ولا رضى يردون ليغاد
بس اسبوعين ومرته ما رادة للبيت وهو مكضي وكته بالدوام وضالة يازي وولدها لا هم اهل الدار ويسرحون اعلى كيفهم ولا هم المرتاحين ..
ليما زعلت عليه ودارت وجهه عنه
كام وخذالها بيت جريب منهم .. اشتغل مجبل ومسعد .. وناصر وحميد وعثمان كاموا يدرسون باعدادية تبعد عن المنطقة اللي هم بيهم مسافة ..
بس ما طابت عيشة الحضر اليازي
وين السهل وبساتينه الواسع والهوى العذيبي اليلفي من كل صوب ووين درابين بغداد الضيكة وبيوتها الظلمة .
مر الشهر والشهرين وهي تنوح اعلى عيشة السهل وروحها تلوب اعلى اصلها وديرتها واعلى كولتهم اليطلع من ملته يموت بعلته .. وملة الحضر ماهي ملتهم ولاهي عيشتهم .
من بعد ٨ اشهر .. مجبل چل من عيشة الحضر هين وساند امه يرد ليغاد .. وحميد راد وياهم .. لمت غراضها وقررت ترجع للسهل
اعترض جابر واغتاض وما رضى
بس هي وولدها جانم مقررين .. كالتله : نحن ماخذين امرنا ومنتهين مانا بعازة رايك .. الشورة عليك ترد دين اهلك وياك باخوتك عثمان ومسعد وناصر .. يكضون كلياتهم وانت التتحمل مصاريفهم وعيشتم .. ما هاذ حك الاخو اعلى الاخو
رضى بكفالة اخوته .. وكاللها : يضلون هين بمسكنم بنفس البيت وانا اتكفل بمصاريف الدراسة والعيشة مالم وبين الحين والاخر امرلم وان شاءالله عيني تراعيهم .
اجر سيارة وخذاها هي واخوته الباكين ورد للسهل استقبله خالد وكالو : الكلعة جدامها المطلوب منها ما تطلع من الدار الا بعلمي وتحترم اهل الكلعة
كالتله : عيشة الكلعة ما اريدها .. ما تطيبلي كعدت اهلها انا رايدة بيت خيري وبيت شذرة تفج واحد اعلى الاخر وتوسعه ونعيش انا وولدي بيه
كاللها خالد : بس بيت خيري عايش بيه رضا الفلاح هو وعايلته .. اخذي بيت شذرة
حجه جابر : رضا الفلاح ماهو اهم من امي ولا هو احك منها خاطر تعز عليهم عيشتها بيه
– انا ما عاز عيشتها بس رضا وعايلته وولده شايلين كل شغل الفلاحة .. وما عدي بيت غيره اطي الهم
جابر : تبلغه هالساع يكعد ابيت شذرة العتيك ليما يشوفله مجان توسع البيت وتفج بيت شذرة ويا الاخر
ما رضى خالد وكام يلوي بلسانه ويجيبها منه ويردها منه اخر شي كاله : انطيني وهلة ادانش امري
ردته يازي : ادانش امرك لو تمش لامك ومرتك تشوفهن يرضن لو لا .. الجبير التمشي الحريم لا خير البيه ولا بكباريته .
كام يحجي ويرفع حسه ويتجاوز عليها اغتاض جابر وانتفض من اتجاوز على امه جدامه وكاله : هاي بعدني موجود واتجاوز اعليها وما حطيت حشيمة لا لمجانها ولا حطيت كدر الي وما طولك ما عدك كدر لاحد .. احسب احسابك نقسم الورث بينا وكل واحد ياخذ حكه
كام يشمر عليه ( وانت شنهو وتكسم كلعة ابونا وهاذ ارثنا وهاذ تاريخنا واعلى كص اركبتي الكلعة تندم وتتكسم وانت احضيري ونسيت عادات اهلك وعشيرتك )
ومن هالحجي مشامر اغتاض جابر وطلع
كضبو خالد وكالو : اطني فد الليل ابلغ رضا واهله
كالو : عحل بهالليلة امي وين تركد واهي ما تطيبلها مجابلة امك وحرمتك
كالو : افرغلها بيت شذرة تكعد بيه
كالتله يازي : الا كول احمل رضا واهله لبيت المرحومة وجدامك اسبوع تلاكيلهم محمل غير محمل وتردلي بيت بنيتي .
اغتاض منها خالد حيل ..
اضطر يبلغ رضا ينكل اهله لبيت شذرة واندارت هي ومسعد ومجل كعدوا ابيت خيري القديم
اطاها جابر فلوس وكاللها : خابريني يمتى ما اعتازيتي
كالتلو : طلب اخير طالبتو منك
– شنهو ؟
– بت شذرة
– يمه سدي سالفة شذرة
– بتها يتيمة والله يعلم بحالها الحين
– عايشة عد جدتها
– يا جدة ؟
– ام راشد
– يولي هي الما رادتها شلون عايشة عدها
– يمه عايشة وبالف خير لا تخافين عليها
– الاكيها عدهم
– لا تروحين ولا تعمليلنا طلايب يما
– اتيسر بدربك وعينك اعلى اخوتك لا تكصر بحگم واذكرتي انا وابوك بيهم
– احطم ابطن عيني ان شاءالله
سلم عليها وطلع ..
وظل ابالها تروح تنشد اعلى بت شذرة شنهو حالها
بس .. من بعد ٨ شهور
٨ شهور محد سال بحال هالعجية
شلون نامت
شكلت
اشربت
اشسوت
يوم الخذاها خالد ذباها اعلى باب بيت ام راشد
ما رايدتها ام راشد وذابتها بالشارع ..
ضاله ثلث تيام بالشارع تاكل اعلى فضالة الناس
ليما شايفها واحد من اهل خيري اسمو جدوع وكايللها : انت شنهو اهلج ما خذوج
– انا نطرت جدتي تجي تاخذني بس ما جت
– عجل خالج خالد وين
– ما يريدني
– عليش
– طاحت البستوجة من ايدي على بنتو وطردني
– وشحملج البستوجة انت ؟
– عمة مرجانة كالتلي اجيبها
صفن بيها .. جاهلة حافية ووصخة وشعرها كله تراب ووصخ .. وكاضبة بخبزة يابسة تكرط بيها واديها متربة .
كاللها : عليش هاذ حالج
ردتو : جتلوني الجهال فد انا ما سكتتلهم هم جتلتهم .. لاجن هم جثيرين ومرقلوني بالتربان
دحج بيها جاهلة بس ملسنة ماهي من العجايا اليخافون لو ما يعرفون يحجون سابكة جيلها .. وملوتة .
كاللها : اذا اعيشج عدي تشتغلين ويا
– اي والله عمي شتريد اشتغل انا اكدر بس اطني اكل .. جوعانة
– عجل خوش تعاي وياي .
خذاها وراح للبيت .. اطاها اكل وماي تشرب وتغسل .. وتنام بس ما تنام ويا عياله وحريمه .. عده مجان يحط الجحش مالو بيه كاللها ( هين تنامين وهاذ فراشج ووسادتج ونا اريد طلايب بس اسمع منج شي اردج للشارع )
كالتلو: لا عمي والله ما اسوي شي
اول ليلة كضتها بخوف .. تخاف لا الجحش يكربها وياذيها
بس صاحب الجحش رابط الحيوان مالو غاد عنها
كضت الليل فزات تخاف لا يزكطها
للفجر دش عليها جدوع كاللها : ياله كومي لحيلج خاطر نجهز نطلع للشغل
كعدت هي وتبعته ..
كاللها : جيبي الزاد من ام ام محسن
راحت جابت سلة بيها لبن وسفطت خبز وزبد
اعطتو السلة وصعدت بالعربانة وهو يربط الحجش مالو بالعربانة كالتو : عمي وين عنروح ؟
-لسوك المدينة نبيع المخضر ونرد
كامت تدحج عليه وهو يصعد الشليف مال المخضر جان الجو بيه لسعة برد الفجر .. اطاها اللفاف مالته كاللها : اكضبي
اخذتو تلتف بيه صعد هو وضرب اعلى ظهر الجحش ومشى
وهي كاضبه بالعربانة وملفلفة نفسها ليما وصل للسوك وهرجة السوك والشمس طالعة كاللها عاونيني
رادت تنزل ويا الشليف بس ما كدرت شمر اعليها كماشة وكاللها : جفيها غاد وافرشيها
ركضت تفرش هي جر منها وكام يفرش
وكام يحط المخضر ويبيع وهي تعاونه .. للضحى جاع فرش وكاللها عينج اعلى البسطة خل اكلي شواي
كعد ياكل وهي عينها على المخضر لا احد ياخذ منو
عد ما شبع كاللها : اكعدي اكلي
كعدت تاكل وهو يدحج بيها
كاللها : شنهو كلتيلي اسمج
– وسام
– الله ما بس كالب حالج حتى اسمج كالبو
سكتت رد كاللها : لو طلبت منج شي تعملينو ؟
– اي اعمل
– اذا عملتي راح اطيج فلوس هواي
– اشنو هو
– اكربي
كامت وكربت يمو
كاللها : شايفة ذاك الزلمة الكاعد
– دحجي زين محفظتو طالعة من مخبايتو
– اي
– اذا كدرتي تجيبيها .. راح اطيج فلوس جثيرة تشترين بيها اليحلالج
-بس اخاف يكضبني
– اهوووو انت ما تنفعين الخباكة جاتلتج الله ذبج اعلى كلبي تعلاوة حمل كل خير ما بيج .. اكعدي هين ولا تشوفيني طولج ياله انكلعي
مشت ردت ابمجانها بس الدمعة تلالي بعينها
وضلت ادحج ع الزلمة الكاعد ومحفظتو مايلة من مخبايتو
كامت تروح يمه تخاف وتشوف نفسها ما تكدر وترد
ومن ترد ويشوفها جدوع ردت يسوي حركة بثمه ويغمها ويندار عنها
خافت لا يكوم يذبها بالشارع وترد تاكل من الفضالة وتنام بالشارع .. ردت بس اللزلمة ضخم ويخوف تخاف لا يدحكها ويجتلها وجدوع ما يفزعلا
ضلت ما بين ترد وتروح
وما دبرتها تبوك .. باع المحصول مالو
ورد الدرب كله يرزل بيها ويغلط ويكلها : انت نا تنفعين وانت تعلاوة حمل وانت ما بشاطرة وما تكدرين للصنعة
كالتلو : اخاف
كاللها : محد يخاف بس الجبان تمشي وتكفين يم الرجال وتكعين عليه جنج عثرتي وما تدرين وبشطارتج تسحبين محفضتو من مخبايتو وتجيبيها
كامت ثاني يوم وثالث يوم واسبوع بس ما كدرت تمد ايدها وتبوك من الناس تخاف .. وجدوع يوميا يهددها
لحد ما استجمعت حيلتها وحطت عينها على واحد صاحب بسطة يلهى جثير عن الدخل مالو ويحجي ومن يحجي ويا احد ينسى نفسه بالحجي وما يدري عن مخبايتو
كامت واتسللت جريب منو تروح وتجي
نطرت يجي احد ويلهي .. خاطر تسطي على مخبايتو
وصدك جت مرا عجوز وكامت تحجي وياه وكف هو يعد ويصف عن ايامه كبل ويحجي بنفسه وشلون جان كوي
هي اتسللت من جوا باكت الدخل كله وحطتو بعبها بلا ما ينتبه عليها وراحت تركض وكلبها يريد يوكف من الخوف وهي : عمي جدوووع عمي جدوووع
اندارلها : ها يولي
ختلت جوا وطلعت الفلوس
فرح حيل وكام يكلها : هله هله هاذ الشغل الزين والله وتعلمتي يا وسام وكمتي تعرفين تشتغلين
حبها براسها واطاها شي قليل من اللي نهبتو وكاللها : هذا كلو الج واذا اشتغلتي اكثر وجبتي .. راح اطيج بعد اكثر
وضرب على ظهرها وهو يكول : عفية عفية تربايتي ما ضاعت .. والله عرفت انج سبعة وادبريها
وهي فرحانة بنفسها وتكلو : انا دحكتو يحجي جثير ويلهي رحت اتسلل من تحت واخذت اللي عندو كلا وجبتا
– والله عفية انت كوية يولي من اتكبرين الا تعبرين الرادم جفي اعلى الذكا العدج .. من اليوم وغاد ازيدلج بالزاد ما طولج .. كمتي تعرفين تشتغلين
رجعوا وبالدرب انطاها تفاحة
هي شافت التفاحة لو عيونها رادن يطلعن من مجانها من الفرحة
كامت تحبحب بعمها وتتشكروا : رحم الله والديك عمي رحم الله والديك والله انت احسن عم بالعالم .. اودك جثييير
وردت حبته
كاللها : لا لا منا وجاي راح ادللج جثير ما طول عرفتي تشتغلين وتفيدين عمج وتفيدين روحج.
هالتفاحة خلاها تتحمس اكثر ..
كامت تتصيد الناس تصيد خاطر ترضي عمها ..
وبوكة على بوكة .. ومرة على مرة خفت ايدها واخذت على النشالة .. كامت تفرح من تبوك بوكة قوية
عبن جدوع بيوم اللي تبوك فلوس هواي يطيها فلوس .. ويشتريلها تفاحة تاكلها وتستلذ بيها
بيوم وهم راجعين الظهر كالتو : عمي انت ما تعرف جدتي وينها
– جدتج يكولون راحت عاشت ابغداد
– بس هي اتحبني عليش ما جت تشوفني
– شلها بيج تعبتيها انت ما تنحملين
– والله ما عملت لها شي انا جنت اعاونها واجيبلها الماي واجابلها واحبها وهي هم تحبني فد عمة مرجانة وجدة سميعة ما يحبوني فد هي تحبني
– بعد راحت لبغداد انسيها
– واعيش بلا اهل
– انت تعرفين امج
– لا ما اعرف امي يكولون ماتت وانا زقيرونه وابوي هم مات
– بس عدج اخو
– اني عدي اخو ؟
– اي اسمه ثاير عايش عد جدتج ام ابوج
– يعرفني ؟
– لا ما يعرفج وشلج بيه
– لا فد كلت يعرفني
– لا ما يعرفج هدي هساه اريدج تركزين بشغلج زين تمام
– تمام
– المرة الجاية اذا جبتي خوش شغل اشتريلج برتغاله
– عليك الله عمي ؟
– والله بالله الا اجيبلج برتغال
– الله خاطر احنص نورية بت نويصر الخياط ذاك اليوم ما اطتني كشر وياها تكلي انت وصخة
– تدرين شلون اخذي البرتغالة كلها وصيحي عمي اشترالها الي حنيصج حنيصج واكلي البرتغاله والكشور ولا تطيها .
فرحت وكعدت تخطط شلون تبوك بوكة زينة المرة الجاية خاطر جدوع يشتريلها البرتغالة وتروح تحنص نورية بت نويصر الخياط .
ذاك اليوم .. حطت عينها على تاجر دشداشتو بيضه وعكالو احمر مهندم وباين من هندامو جيبتو ثكيله ومخبايتو متروسة
كامت تفتر وتلوب وراه .. تنطروا يلهى خاطر تسطي على مخبايتو .. وكفت عندو تطمش عليه ادحج بيه .. انتبه عليها تغشعو .. كاللها : ها يولي مضيعة يمي شي
عافتو ومشت .. خلتو يلهى
وردت تتكرب يمو .. هو شك البنية هاي بيها شي تفتر عليه بس راد يشوفها شعتريد تعمل .
ضلت ادحج بيه تروح وتجي تطمش عليه
وهو مشوي نفسو لاهي عنها .. اعتقدت هي لهى بالفتو ويا البگال .. تكربت منو وسوت نفسها تعثر وتكع عليه وتطول ايدها لمخبايتو تجر المحفظة ، الا ويكضبها ويكلها : صالي ساعة مراقبج واريد اشوف شتريدين تطمشين روحة ردة .. تبوكين محفظتي يوليييي
كامت تصيح – لا عمي والله ما بكتها انا فد وكعت هين
– وكعت هااا ، عليا اهلج وين اليوم اكطعج سبع وصل
حجاها وكفخها على راسها كامت تبجي وتكلا : الله يطيك عمو عوفي والله بعد ما اعملها .. بس عوفي
– هششششش اليوم اكصبح اليوم بعدج بكد النعال يولي وتبوكين من تكبرين شتعملين بالوادم هااا .. اليوم اربيج خاف اهلج ما ربوج
كضبها بالصندل مال جتل وطك
وهو يسعلها : وين اهلج
دلتو على عمها جدوع .. كالو : جدوع
– هلا ابشر عمي امرني
– هذه بنتك
– لا والله ما هي بنتي بنت شارع واشغلها وياي رحمة لله استخطيها واجيبها وياي تشتغل بس تعبتني ما تكف يمي كلو هادتني ورايحة تلعب ان شاءالله ما ضايكتك بشي
– من جانك جايبها وياك تشغلها ما تعرف تحط عينك عليها مسربتها بالسوك تبوك وتحط بمخبايتك .. ما تستحي اعلى حالك
– شلووون بايكتك اهي بايكتك ولج انا كايلج بوكي
اليوم اكصبج اليوم .. انا كاااااايلج بووووووكي
كامت تحج بيه وهو يخزرها وتخاف تحجي وماكله جاله من الزلمة
كوم جدوع والزم عصايتك التهش بيها المخضر واكضب وسام ولسوعها بالعصى كامت تصرخ وتبجي وتكلا : عمي ما اعيدها والله ما اعيدها .
عافها الزلمة وراح
وهو جرها من شعرها : كون كلتيلو عمي اليكلي بوكي
– والله عمي ما كتلو فد هو طكني وجتلني بالصندل مالو
– يلا تستاهلين عبن ما تعرفين شلون تدارين امرج غبيه غير تاخذين حذرج .. تضلين ذول عمرج غبية وكل خير ما بيج
انا تعبت منج
عالة على كلبي لا نفع ولا دفعفد جيب وجيب
واطي بهالزاد واجيب بهالتفاح وما صاير بعينج
لهساه ما تعرفين تشتغلين .. تعبتيني
جاب الدرب كلو يرزل بيها
وصلوا البيت
دخلت يم الجحش اندثرت بوسادتها وكامت تبجي
يومها ما طلعت من المجان وعد ما نامت اثار الجتلة الكلتها اثرت بيها وكسرت جسمها ما كدرت تكوم منها
ثاني يوم الصبح دفرها رادها تكوم تطلع وياه
ما كدرت تكوم من مجانها .. من شافها مريضة ومصخنة والجتلة مأثرة بيها .. كاللها : يلا ضلي اليوم لا تطلعين اروح لوحيدي باجر عود اذا طبتي تردين للشغل بس كون تنتبهين لا كل مرة هيج تنجتلين وتنامين لا فايدة ولا زايدة بس خساير أچل
عافها واخذ الجحش مالو وطلع
ضلت تبجي بمجانها .. وتحن لجدتها يازي وتتمنى لو ترد تاخذها وتتذكر كلام عمها جدوع وهو يكللها : جدتج يازي راحت لبغداد
كامت تسال نفسها .. عليش عافتني بالشارع ما شغلت عني
اهي ما تحبني انا جنت اخبها عليش هدتني انا اشتاكيت الها اريدها .. كل النا عدهم ام وعدهم اب وعدهم اخو وخوات وانا ما عدي شي بس عمي جدوع يطكني وياذيني اذا ما جبتلو.
لثاني يوم حالها ما تحسن .. دش جدوع وهو يجر الجحش مالو ويصيح : وسيممممممة وسام دحجي شنهو جبتلج دحجيييي
شالت راسها وشافتو شايل البرتقالة بيدو
فزت من مجانها من الفرحة وراحت تركضله : هاي الي
– عجل المن .. انا جايبها الج خاطر تشدين حيلج وتردين تشتغلين وياي لا تخلين الشغل علي وحدي بعد تعودت اعلى معاونتج وياي
كامت تحبحب بيه وتكله : مشكور عمي
– لا انت وسيمة عزيزتي خاف تكولين عمي جدوع ما يحبني .. شوفي شلون ادللج حت لو انت خبكة وما تعرفين تشتغلين بس تتعلمين بعد شوي شوي هالمرة درس صار ما تعيدين وتنتبهين مرت اللخه ما تخلينه يحس عليج .. بس انت اخذيها ماكو شغلة بلايا تعب وشكى وهاي الشغلة تتعب حيل وتنطكين وتاكلين جتل بيها بس فلوسها حلوة تسوى الواحد ينطك وينجتل من وراها
هساه كومي عدلي حالج وعلي وجهج هاذ الجاتله الوصخ ولمي شعفتج هاي اليغشعها يخترع ويكع من حيلا … يلا عمي لا كومي
– تمام عمي
بس .. عمي
– شنهو بعد برتغالة وجبتلج عاد لا تكومين تتمزهدين
– لا ما اريد شي فد رايدة اشوف اخوي مو تكول عايش يم جدتي ام ابوي
– ذاك هو بيتهم وروحيلهم
– اخاف اطكني جدتي وتطردني
– لا روحي واندهيلا من الباب واهو يجيج
– جبير لو صغير
– ازغر منج بعام يمكنه ازود والله ما ادري عنه .. روحي اطلعي كله مجابله هالحيوان هاذ وكاعدة
– مو اخاف انت ما ترضى
– لا مالي غرض بيج بس لا تجيبلي الطلايب تراه ارد اجتلج بالعصاه ها .
– لا لا ما اعمل شي ما ترضاه
– عفية عفية بالسباعية يلا .. اخذي برتغالتج وروحي دوري اخيج ولعبي وياه .
طلعت للشارع بس شافتها ظهر
ردت .. صاح :
– عمي ظهر محد طالع راح اضم برتغالتي ليما يصير العصر خاطر تطلع نوير بت نويصر
– خوش خوش
دخل بيته ودزلها الزاد بيد ابنه اكلت وهي تدحج ع البرتقالة كل شوية تريد تفشكها وتاكلها بس تصبر بروحها خاطر تطلع وتتشيم بيها جدام نويرا بت نويصر .
ليما صار العصر .. راحت وكربت من بيت جدتها ام راشد بس ما شافت احد طلع .. وخافت تكربلم عبن عبن هذه جدتها نسرة وما تودها كلش لو غشعتها تجتلها .
راحت تمر من جدام نويرا بت نويصر
ذيج شافتها شايلة البرتغالة .. جت تتكربلها وكالتلها : ابوي خيطلي لعيبة كماش نلعب اني وياج وناكل البرتغالة
كالتلها يلا ..
راحت دشت لبيت نويصر الخياط يلعبن بالعيبة الكماش
وصارن صاحبات وعود هن امهات وعدهن جهال ويرضعن باللعيبة ويكمطن بيها .. اثناء ما جاي يلعبن نويرا تقلد بامها وتصيح : يولي يالصكعة جيببلي الفلوس من تحت البساط الفوكو الوسادة خلي اروح اشتريلو مدفاية العجي كن مات برد يولي
كالتلها : عليش انتم تحطون فلوسكم تحت البساط
كالتلها : هاي امي كل ما تريدني اجيبلا فلوس تزتني على شي تكلي جيبيلي من تحت البساط الفوكوا الوسادة الحمرا .
– مثل عمي بس عمي يحط مخبايتو تحت سلة الفلفل ويضل مجابلها خاف احد يبوكا بالسوك
– انت تشتغلين وياه بالسوك
– اييي
– ويطيج فلوس ؟
– يطيني جثير ويجيبلي تفاح وبرتغال
– ابوي لو يرضى اشتغل وياج
– يييي تصيرين زنكينه كلا فلوووس
– صدك الا اكل لابوي واجي اشتغل وياج
ضلن يلعبن وهي بالها شكل يم مجان الفلوس
وكت الرادت تطلع لهت عن نورية واتسللت للمكان الكالت الها عليه تحت البساط الفوكو المخدة الحمرة .. شالت لكت الفلوس بمجانهن .. جرتم وخلتم بعبا وراحت تركض من البيت وتصيح : عمي جدووووع عمي جدووووع …

يتبع…