بسنت قالتله بغباء:_ مش فاهمه نوكلهم يعني..
قالها بقرف:_ بس يا بت…تميم بيه كلفني إني افضل هنا لحد ما كله يمشي، وانا عندي معاد مهم دلوقتي، عايزكم تتولوا الموضوع دا.
كنت هعترض بس بسنت قالتله بسرعه:_تحت أمرك يا مستر معتز..
قالنا وهو بيبعد:_ هديكم مكافأه علىٰ الموضوع دَا..
قولت لبسنت وانا بزعقلها:_ انتي بتوافقي ليه؟ عايزه تفضلي للأخر..
قالتلي بتبرير:_ وفيها ايه انتي وراكي حاجه!!
سبتها ومشيت عشان أشوف سالم وأعرفه، بس اتفاجئت بيه بيرن علىٰ موبايلي..
:_ايه يا سالم؟
“_تماره معلش انا نسيت ملف مهم أوي في البيت، ولازم أروح اجيبه، استنيني لحد ما اجيبه!!
:_ملف ايه دا؟!
#Nada_El_Shrief
” _مستر تميم هيمضي عقد بينه وبين شركه تانيه النهارده، والمفروض هيمضوا عليه بعد ما يتعشوا، وانا المسؤول عن ملف الصفقه، ونسيته.
:_ طيب ماشي هستناك بس متعوقش.
في خلال نص ساعه كانت القاعه فضيت واتبسطنا انا وبسنت لما عرفنا ان مستر معتز قال لرجال الأمن ينفذوا اللي هنقولهم عليه..
القاعه فضيت ومتبقاش غيري انا وبسنت، ولأن بسنت كانت جايا مع صحابها اللي مشيوا من غيرها فقعدت معايا
نستنىٰ سالم.
وإحنا واقفين برا في الهوا لاقينا مستر تميم وناس تانيه من ضمنهم البت الصفرا اللي قعدت جنبه والراجل اللي اعترض طريقي في القاعه…