جريت من القاعه وانا مخبيه وشي بأيدي…
وقفت برا عند العربيات وبدأت أعيط…مكانش المفروض أجي…مكانش المفروض اجي.
وسط ما انا واقفه بعيط جنب عربيه أخويا….سمعت صوته جاي من ورايا:_
بتعيطي ليه؟!
لفيت لاقيته…قولتله وانا بمسح دموعي:_ مفيش حاجه يا مستر تميم…شويه تعب..
قالي وهو بيربع ايده وبيبتسم:_ متأكده انه تعب؟!
قولتله:_ ايوا.. ايه جاب حضرتك هنا؟
انحنىٰ بضهره وقالي:_ كنت قايم أرقص معاهم بس لاقيتك خرجتي فَ لفتي انتباهي جيت أشوف مالك.
رفعت عيني في عينه وقولتله:_ انا شوفت حضرتك وانت قايم ترقص معاها مش معاهم…مفيش داعي انك تكدب عليا..
#Nada_El_Shrief
مردش عليا وفضلنا باصين لبعض بعدها قالي بإبتسامه:_
كانت بتسحب أيدي عشان تقومني أرقص معاهم مش معاها…
قولتله وانا بتدارك الموقف:_ حتىٰ لو…انا مليش دخل يعني..حضرتك متهتمش بيا…وبعدين انا حته موظفه عند حضرتك…وفي جوا ناس أهم مني..
فرد نفسه وقالي:_ كلكم مهمين عندي…مهمين يا تماره..
سكت شويه وقالي:_ تعرفي يا تماره إنك مميزه عن باقي اللي جوا…
بصتله عشان يكمل فَ قالي:_ أنتي أرق بنت فيهم…كلهم زي بعض، الإ انتِي مختلفه عنهم..
وبص في السما بسرحان وقال:_ صدقيني انا نفسي مش عارف ليه؟!
قولتله وانا بحاول أصطنع الإبتسامه:_ حضرتك في ناس جوا مستنيينك…أكيد هيسألو سبب تغيبك..