تميم بيبص عليا تاني…وبص عليها وبعدها رجع بص عليا وانا متغاظه وضحك وهو بيبصلي…بعدها اداني ضهره وقعد يكلمها…
سمعت صوت بسنت من ورايا بتقول وهيا بتاكل جاتوه:_
شوفتي الحريم…مش احنا..يا شيخه انا قرفت من نفسي..
:_مش وقت كلامك دا..روحي شوفي بتعملي ايه..
“_هكون بعمل ايه…بقولك ايه انا في واحد هنا معانا عمال يبص عليا ويبتسم..شكله قمور…ما تديني رقمه!
:_انتي اتهبلتي يا بسنت…هجبلك رقمه ازاي..
” _يبنتي ما هو اخوكي.
قولتلها وانا بشوح بأيدي:_ امشي يا بسنت مش وقت هزارك دا..
مشيت بعد ما هزقتني…راجعت كلامها في دماغي ورجعت بصيت علىٰ البنت اللي جنبه..عندها حق..انا ايه وهيا ايه؟
رجعت بصيت عليهم لاقيت مستر تميم باصصلي من غير ما يحرك ملامحه لأي تعبير…
#Nada_El_Shrief
بصيت في الأرض بعدها قررت اني هقوم أمشي…وانا قايمه سمعت صوت مستر معتز بيقول:_
انا رأيي نسيبنا من الرسميات ونقوم نفرفش شويه…جه وقت الرقص…
كلهم سقفوا والأغاني اشتغلت…كل واحد خد صاحبته او حبيبته ورقص معاها…وفي الصحاب اللي رقصوا سوا…
بصيت بحزن علىٰ مستر تميم بس الحزن اتحول لصدمه لما لاقيتها قامت من مكانها وماسكه ايد مستر تميم في ايدها…
مستنتش أشوف الباقي عشان عارفه…هيرقصوا!!