حدث بالفعل
فوقت لقيت نفسي علي سرير في المستشفي وواقف قدامي الدكتور ومعاه واحد لابس بدله.
اول ما فتحت عينيا الدكتور قالي حمد لله علي السلامه يا حاجه.. انتي اتكتب لك عمر جديد… وساب الاوضه وخرج.
وفضل معايا الراجل الي لابس بدله الي عرفني بنفسه انه وكيل النيابه وبدا يسالني
ايه حكايتك ؟
بدات افتكر ورجعت بالزمن ورا
انا (عنايات) ست طول عمرها في حالها
كان عمري ١٨سنه يوم متجوزت جوزي (شعبان) وخلفت له تلات صبيان كان طاير بيهم من الفرحه لانه كان وارث من والده املاك واراضي كتير وكان بيحلم ان ولاده يراعو املاكه ويبقو سنده وعزوته لما يكبر.
لكن ملحقش يفرح بيهم وعمل حادثه ومات وهم لسه صغيرين وسابني ارمله في عز شبابها عندها يادوب ٢٣سنه ومعايا تلات عيال..