قصه ماريه
في اسبانيا سنه 1971 راحت واحده اسمها ماريا هيا ة أسرتها لقريه اسمها بيلز و اشترو مزرعه و كان فيها بيت كبير و كل الامور ماشيه عادي جدا في الاول لكن في يوم كانت بتقطع خضار زي اي ست في المطبخ عادي يعني بس الطبق وقع منها وهيا بتلم الخضار شافت بقعه سودا علي الارض مشافتهاش قبل كدا استغربت منها ازاي ملاحظتهاش قبل كدا خالص و جابت كلور بقي وديتول و صابون و حاجات كتير كدا و قعدت تمسح فيها بس الغريب أنها كل ما تمسح حته من البقعه الحته الي اتمسحت دي تتشكل تاني بس نجحت و مسحتها كلها لكن اتشكل مكانها بقعه علي شكل واحده ست علي الارض و مرسومه بدقه يا اخي تقولش فان جوخ الي رسمها طبعا اترعبت و فضلت تمسح فيها اكتر بس كل ما تمسحه يوضح اكتر و كأنها بتلمعه كدا و جه زوجها حاول معاها يمسحه لكن فشلو برضو ابنها جض بقي و جاب اخره راح جايب فاس وكسر الأرض وشال البلاطه الي عليها الوش اصلا و جابو بلاط جديد و الموضوع خلص علي كدا ….
هههه ضحكت عليك يا عزيزي القارئ تفتكر برضو أنا هجبلك موضوع ينتهي بالسلميه دي كلها ؟
بعد شهر بظبط ظهر وش تاني في نفس المكان الي كان فيه الأول بس المرادي وش مختلف عن الوش الاولاني و جابت سجاده بقي و حطتها علي صوره الوش دا عشان ع الأقل متشوفهوش لكن الموضوع كبر اكتر و ظهرت صور وشوش تانيه بتصرخ علي الحيطان في معظم البيت من غير اي سبب تخيل كدا ياصديقي تدخل الحمام تلاقي وشوش حد بيصرخ علي الحيط لونها اسود !!
لا مش كدا و بس دا الوشوش دي التعبيرات عليها بتتغير كل يوم مره وش حزين مره وش بيصرخ مره وش بعيون مبرقه !
و كانت بتتغير يعني الوش دا راجل بكره يبقي وش ست بكره يبقي وش طفل صغير بكره يبقي وش حاجه أشبه بالشياطين و الجن وشوش بشعه علي الارض و الحيطان و السقف !!
و الموضوع اتعرف و جذب شويه من محققين الظواهر الغير طبيعيه و الخوارق و صورو الوشوش بالاشعه السينيه و الاشعه الفوق بنفسجيه كانو فاكرين الموضوع خدعه لكن طلع كل حاجه حقيقيه و الوشوش دي مفيش بشر رسمها
و حطو ميكرفونات حساسه جدا بتلقط اي اصوات حتي البشر ميقدروش يسمعوها و سمعو اصوات زي مايكون حد بيتخنق بتخرج من الوشوش دي !!
و مع تنقيه الصوت سمعو حد بيقول (نحن جميعا اموات اخرجونا من هنا)
و فريق التحقيق قرر يحفر في ارض البيت وبعد الحفر 3 متر لقو اكتر من عشرين جثه متحلله رجاله و ستات و اطفال ميتين بطرق بشعه حرفيا منها الي من غير راس و منها المتقطع و خلافه الأرض دي كانت مقبره جماعيه اصلا و اتدفنت الجثث في مقابر المدينه و الوشوش اختفت بعدها ….
تعالي اقولك معلومه سريعه .. لما بتقرا أو تتفرج علي اي حاجه عن الجن أو الشاطين ممكن تحس ان في حاجه غريبه حواليك او وراك او جنبك هوا احساسك صح لان المخلوق دا بيتجمع حوالين اي كلام عنه انتا فعلا مش لواحدك وهما بالفعل جنبك هما شايفينك بس انتا مش شايفهم . اتكلمنا كتير ياصديقي عن لعنه الفراعنه و جبنا حاجات كتير منها بس اللعنه دي يقال انها سبب في غرق السفينه تيتانك طب ايه علاقه تيتانك بالفراعنه انتا جاي تهرج هقولك اصبر كدا علي رزقك أنا عمري غشيتك دانتا حبيبي المهم ياسيدي في القرن ال 19 تم اكتشاف مقبره الاميره أمن رع وكان فيها المومياء بتاعتها و كان مكتوب علي المقبره (يصاب بالموت كل من يزعج الاميره)
ومع ترجمه العبارات الهيروغليفية الي في المقبره اكتشفوا أنها اميره و حد مهم و كدا يعني و العالم الانجليزي دوجلاس موراي اشتري المومياء من تاجر امريكي مجهول كدا سنه 1910 و التاجر دا اصلا كان اشتري المومياء لما اكتشفوها في مصر و هربها لبريطانيا موضوع التهريب زمان كان عادي و سهل مش زي دلوقتي وباعها ب 4000 دولار ودا كان سعر رخيص جدا العالم الانجليزي الي اشتراها استغرب ازاي شيئ اثري زي دا يتباع بالسعر دا (ما عشان وراه مصيبه ياحبيب قلبي)
بعد ما اشتري المومياء بدأت المصايب تيجي علي دماغه بعد بيع المومياء التاجر المجهول دا مات في ظروف غامضه كدا و بعدها العالم الي اشتراها كان في رحله صيد و انفجرت البندقيه في ايده من غير اي سبب و حصل إصابات كتير في دراعه وتم بتر دراعه وقته