الجزء الأخير ????
ببص لاقيت حماتي بترن عليا، فتحت وهزرت معاها شوية وبعدين لاقتيها بتقولي: ” ألف مبروك يابني ”
قولتلها بتعجب: ” مبروك لإيه؟ ”
قالتلي باستغراب: ” هي سمر مقالتلكش إنها حامل؟ ”
كملت كلامي بهزار وقولتلها: ” لا طبعًا قالتلي بس الواحد بينسى كتير الفترة دي ”وبعدين قفلت معاها ودخلتلها الأوضة، شديتها من إيديها بعنف وقولتلها: ” مقولتليش ليه إنك حامل؟ ”
سابتني وراحت قعدت على حرف السرير وقالت:
” عشان مكنتش أول واحد جه معايا للدكتور ومقابل ده مكنتش أول واحد عرف ”
تمالكت عصبيتي وقولتلها: ” وجبتي فلوس منين؟ ”
من الفلوس اللي كنت بتدهالي في المناسبات
وتقولي روحي اشتري بيها حاجة ليكي، مكنتش بشتري حاجة وبحوشها.
” الهدية مسمهاش هدية لو مش أنت اللي مختارها، الفلوس متلزمنيش
لو مكنتش بتدهالي بحب، لو مكنتش أول شخص تسندني وقت تعبي،
هتبقى آخر شخص أشاركه بيه،
وعلى فكرة الحاجة اللي بتيجي متأخر ملهاش لازمة ”
قرَّبت منها خطوة عشان أصالحها،
لاقيتها لفت راسها الناحية التانية وكأنها مش عاوزة تكلمني!
نزلت من البيت، كان شعور وحش وأنا نازل وبتمشى لوحدي.
المشوار كان كئيب بدون ضحكتها، كلامها، مشاركتها ليا.
دخلت أقرب محل هدايا وبحط إيدي في جيبي لاحظت إني نسيت المحفظة،
ملقتش غير عشرة جنيه!
فجيبتلها لون المانيكير اللي بتحبه، ودخلت الشقة لاقيتها قاعدة في رُكن بتعيط فيه،
بصيتلها بزعل وقفلت إيدي على العلبة، وقفت قدامها ومديت إيدي، وأوَّل ما فتحتها نطت من الكنبة، وحضنتني!
كانت كل شوية تديهولي وتقولي: ” امسك حطلي منه ”
ولما كنت أقولها: ” اشمعنا ده؟ ما انتي عندك كتير غيره ”
كانت تقولي: ” عشان أنت مختاره ”
وبعد ما نامت بصيت في الروشتة وعرفت ميعاد الكشف.
وأول ما الميعاد جه، صحيت قبلها واستأذنت من مديري إن هروح متأخر شوية،
وبعدين صحيتها وقولتلها: ” يلا البسي عشان تروحي تكشفي ”
ولما قالتلي: ” وشغلك؟ ”
قولتلها: ” إنتي أهم ”
.مستحيل أوصف فرحتها وتقديرها ليا وكلامها عني.
بقيت أول شخص بتجري عليه، بتشاركه، بتحتفل معاه.
الست مش عاوزة كتير هي بس عاوزة القليل بطريقة هي بتحبها، بتحب دايمًا إنك تميَّزها.
هي مبتفكرش قيمة الكلمة قد ما بتفكر هي هتتقال إمتى!
مبتفكرش الهدية بكام، قد ما بتفكر هتديهالها إزاي؟
ودايمًا الحاجة اللي بتيجي متأخر بتفقد معناها ♥?
#عزة_العمروسي
الي اللقاء في روايه جديده ???
