الجزء الثاني من هنا?????
عارفه ايه اهم حاجه في الشغلانه دي .. قولتلها ايه ؟ قالتلي انك تحفظي الناس وتحفظي كل حاجه .. قالتلي في حاجات بعملها اعمال وفي حاجات مش مستاهله اعمل عايزة تشغيل دماغ .. قالتلي انا اللي كنت عامله للبنت دي العمل عن طريق بنت عمتها اللي جاتلي عشان بتكرهها
واديها التانيه جاتلي عشان تفك العمل .. اللي انا عاملاهولها .. بصي اللي بيجي هنا لازم تستفاد منه على قد ما تقدر لانه مش فاهم الحقيقه فين ؟ فهمتي حاجه
قولتلها تقريبا .. قالتلي دخلي اللي بعدها .. طلعت بره لقيت واحده وواحد قاعدين خايفين .. قومت اخترتهم هما ودخلنا لست البيت .. زي ما بيقولوا عليها .. قالتلهم اقعدوا
البنت قالتلها احنا متجوزين بقى لنا سنتين ومافيش اي حمل كشفت طلعت كويسه هوا كشف طلع كويس مش عارفه المشكله فين ؟
قالتلها استني .. راحت طلعت كيس قماش جواه عضم قالتلها حطيها تحت المرتبه بليل وطفي النور وما تتكلموش مع بعض بعدها لحد الصبح
شكروها وحطوا فلوس في السبت ومشيوا وانا طبعا هموت واسئل ليه ما يكلموش بعض .. لسه هسئل قالتلي لان اللي هيرد عليها مش جوزها هيبقى جن لابسه عشان يخلف منها
وشي جاب الوان وعرقت بصراحه .. قالتلي مالك خوفتي ليه انتي عارفه في كام جني في الاوضه اللي احنا فيها للحظة جسمي قشعر جامد .. قالتلي بعدها عايزاكي تدبحي فرخة من اللي في الاوضه التانيه وتجيبيلي رجولها وريش منها
قولتلها حاضر .. انا حاسه اني عايزة اعيط بس مضطره اعمل اللي بعمله ده مش هلاقي مكان يشغلني في يومها دخلت عملت اللي قالتلي عليه وروحت البيت اللي تحت عند الست اللي استضفتني عندها وانا معايه 800 جنيه بقشيش بس من الناس اللي بختارها تخش جبتها في يوم دي الميزة الوحيده ان الشغل ده شكله بيجيب فلوس كتير
نمت مع الست الطيبه دي اللي استضفتني عندها وكان اسمها نعمات وعرفت ان الست الكبيرة اسمها ست رقية
نعمات ساعدتني زي ما تكون عارفه اني هنا ومحتاجه مساعده حاجه غريبة جدا ..بس مش مهم جايز ربنا بيعوضني عشان تعبت في حياتي
نمت اليوم ده اول يوم ليا بره بيت خالي وبيتنا ..
حاسه اني خايفه نعمات نايمه في الاوضه التانيه وانا الاوضه بتاعتي دور ارضي وباصه عالشارع .. الدنيا سكون بشكل مرعب .. سامعه حاجات بتخروش حواليا وجسمي بدا يقشعر بدات اتلفت وانا نايمه وفي صوت بدأ يظهر .. بدات اقلق بجد
الصوت جاي من ركن الاوضه واحد بيتنفس بحشرجه نفس ..
زي ما يكون مش انسان او حد بيتنفس بصعوبه وانا خايفه اقوم اولع نور الاوضه فضلت نايمه بعدها وانا باصه على ركن الاوضه لحد ما نمت ونعمات صحتني العصر وقالتلي قومب بقى كفايه نوم انتي ما نمتيش بقى لك كتير ولا ايه
صحيت واتغدينا سوى وبعدها طلعنا لست رقية .. لقيتها بتقولي عايزاكي تاخدي الورقه دي وتروحي على العنوان ده تدفنيها فيها .. قومت وانا مش عارفه اعمل كده ولا لا بس روحت في الاخر لان مافيش قدامي حل تاني وحفرت حفره وقبل ما احط العمل فضلت افكر احرقه وخلاص ولا انا كده هئذي نفسي وهي هتعرف اني ما عملتش اللي قالتلي عليه.. بعدها ردمت عليه فعلا ورجعتلها
كانت الشمس غابت والناس بدات تيجي وتستنى دورها عشان تخش لست رقية .. لقيت بنتين شباب شكلهم صغير ايه جايبهم لست رقيه الموضوع استفذني فقولتلهم تعالو البنت ادتني 200 جنيه ودخلت بعدها قعدوا وقالو انهم متغاظين من واحده صحبتهم وعايزين يئذوها ما قالوش متغاظين منها ليه بس ليه في ناس كده اي حد مضايق من حد يروح يئذيه ..
قالولها عايزين يخلو شكلها وحش عشان هي بتتمنظر بجمالها قالتلهم حددوا عايزين ايه قالولها عايزين شعرها يقع
طلبت منهم حاجه من ريحتها يعني ممتلكاتها .. ادولها سلسله بتاعتها سرقوها من شنطتها خدتها وحطت معاها ريش ورمتها في صندوق حديد وولعت فيها قاموا بعدها وحطوا فلوس في السبت ومشيوا وانا متخيله صحبتهم هيكون احساسها قد ايه صعب ؟
شغلتي دي على قد ما هي متعبه نفسيا بتخليك تشوف جانب وحش اوي في الناس كلها .. وأغلب الاعمال اللي بتتعمل عند الست رقيه بتبقى حد متغاظ من حد او حد عايز يئذي حد .. برغم التعب اللي انا فيه بس الوضع بقى وحش اوي .. بعدها طلعت لقيت واحده شكلها بنت ناس اوي ولابسه ذهب كتير دخلتها
قعدت مع الست رقيه وادتلها صوره قالتلها انا عايزة انتقم من الراجل ده قالتلها عايزة تعملي فيه ايه ؟ سكتت شويه قالتلها معرفش بس عايزاه ياما يحبني يا اما انتقم منه ورقيه سالتها عن اسمها قالتلها انجي وسالتها عن اسم امها وتاريخ ميلادها .. واول مره اشوف حد يسيب كم الفلوس ده جوه السبت سابت فلوس كتير جدا ..
بقيت مخضوضه من اللي حصل كانت الست رقيه استكفت ساعتها النهارده وقامت وقالتلي خلي الناس كلها تروح احنا خلصنا .. الست رقيه قامت نزلت ومش بتنزل غير لما يكو حد مهم وتقيل جدا ما ينفعش يجيلها هوا بيبعتلها عربيه تاخدها
وممكن يكونوا ناس من بتوع الرهانات الكبيرة وخصوصا زي ما سمعت طراطيش من بعيد في البورصه او ماتشات كورة كبيرة كنت بسمع انها تخاريف بس الواضح انهم بيدخلوا في بعض اللعيبه الرئيسيه او حارس المرمى ويعرفوه ان معموله حاجه عشان ياثر على لعبه
المهم الست رقيه نزلت وانا مسكت صوره الشاب حسيتها لطيفه واسمه كان مكتوب على الظهر بتاع الصوره هاني محمد خدت الصورة ونزلت تحت على غرفتي في شقة نعمات وعملت سيرش عالنت على اسم الشاب ولقيت صورته ظهرت اخيرا وكان مع واحد صحبه دخلت صفحته قلبت فيها شكله انسان كويس بعتله رساله عالفيس قولتله
انجي عايزة تئذيك ليه انت عملتلها ايه ؟ واستنيت شويه ما ردش طلعت اتعيشت مع نعمات ورجعت فتحت الفيس لقيت مافيش رد نمت يومها وقبل ما اطلع لست رقيه لقيت صوت رساله عالفيس .. فتحت لقيته هاني بيقولي انتي تعرفيها منين ؟
قولتله انتي متخانقين ليه رد عليا بسرعه ؟ قالي انا مش زعلان منها بس هي عايزه كل حاجه تبقى ليها بالعافيه وانا بحاول ابعد عنها هي اللي بتجري ورايه ..
قالي انتي مين وتعرفينا منين ؟ قولتله لا ماتشغلش بالك خلاص انا حبيت اساعدك بس عشان حسيت من صورتك وعينيك انك شاب غلبان
فضل يشكرني كتير لحد ما نعمات ندهت عليا قومت ماسحه اسم هاني محمد من ضهر الصورة وكتبت اسم تاني ..وطلعت حطيت الصوره زي ما كانت امبارح قبل ما الست رقيه تيجي وفعلا جت وبدات ادخلها الناس وبدات تديني حاجات اعملها ادبح مش عارف ايه واحط خرز لونه ايه مع ورقه هي بتدهالي في قماشه واربطهم
لحد اخر اليوم نزلت لقيت هاني باعتلي كلام كتير بيحكيلي كل حاجه حصلت معاه مع الست دي وعرفت انها غنيه جدا ومفتريه بصراحه هوا شاب وسيم بس هي هتموت عليه وعايزاه يحبها بطريقتها ويسمع كلامها هي اتعودت اي حاجه في الدنيا تحتاجها تاخدها
يتبع…..
لمتابعة الجزء الثالث من هنااااااااا ????
