بس قولت اما افصل شويه من المذاكره …

بعتله

انا استحاله انسى الي انت عملته فيا ” كنت بضحك وانا ببعت المسدج “

جالي الرد

انتي مين !!! انا اصلا بعت لرقم غلط

ف استهبلت وبعتله

وكمان نسيت رقمي يا استاذ يامحترم !!! وعاوزني انسى ونتصالح !!

” ضحكت اكتر بعد المسدج دي”

بعدها بشويه جالي الرد منه

هو انتي طبيعيه !! احنا مانعرفش بعض فوووقي

اخدت بوق من مج الكابتشينو وانا ببعتله

على فكره انا كنت فعلا هسامحك وننسى ونبدء من اول وجديد بس خلاص يا اوستاذ يامحترم

بعدها بفتره جالي الرد

لا والنبي هرفس , هرفس عشان تسامحني ، ماتخلنيش اعملك بلوك !!

معرفش ايه الي خلاني اتهور بعد المسدج الاخيره دي واكلمه !!

اتصلت مره ، مردش ، اتصلت مره كمان ، مردش ، في المره التالته ، كنسل عليا !!

انا اتضايقت !!! ايه دا ثانيه واحده ، هو انا هبله !! هو في ايه مالي !!

بس الفضول خلاني ابحث برقمه من على ماسنجر على صفحته على الفيس…

ووصلت ليها فعلا ، بس البيه كان قافل البروفيل وصورته مش واضحه !!

فضول جويا كبير ناحيته , رسالته كانت ماليانه مشاعر ، حتى هو كان صادق المشاعر ناحيه الشخص الي بيحبه ، لدرجه انه رفض يتكلم معايا ، دا انا يبني بيقفو طوابير عشان بس ابص لحد فيهم

معقوله لسه فيه رجاله بتكون بتحب بجد !!

طب ولو هو بيحبها بجد ، ليه اتخانقو مع بعض !! على ما اعتقد انا لو فيه حد ف حياتي زيه عمري ما هسيبه ، اوووف وبعدين بقى

فتحت اللاب وكملت مذاكره ، وعيني كانت على الموبيل ، كأني مستنيه مكالمه مهمه !!

قفلت الموبيل خالص !! هو انا هبله ، ما علينا كملت مذاكرتي

وبعد تقريبا ساعتين ، مسكت الموبيل وقلبي كان بيدق

ياترى اتصل بيا وهو مقفول ، ياترى هلاقي منه رساله على الواتس

قلبي بيدق بطريقه هستيريه

فتحت الموبيل ، واول ما فتحته سمعت صوت رساله على الواتس

قلبي بيدق ، مش عارفه ليه

جمدت قلبي ، وفتحت الرساله ، لاقتها من صاحبتي وكانت بتفكرني بخروجه بكره بعد ال exam

وبعد كدا كان صوت صرصور الحقل !!