انا شب عمري ٣٣ سنة… صارلي ٨ سنين متزوج … وعندي ولدين وبنت
وبشتغل محاسب بشركة عقارات كبيرة واحيانا بشتغل لناس اضافي بعد الظهر
تزوجت مرتي وكانت أكبر مني ب 3سنين … وكانت بنت بتجنن بالأخلاق
وخطبت سنة لحتى احضر العفش واستأجر بيت … وهي تجهز حالها
ما بخفي عليكم حبيتها كتير ايام الخطبة لانها كانت بتجنن بكل ما فيها
شكلها.. لبسها.. لطافتها .. كل شي فيها
ما صدقت متى اتزوجها واكون مع ملاكي ببيت واحد
ليلة العرس كانت احلى ايام حياتي … ماكنت مصدق متى يتسكر علينا الباب
وما حدا يسألنا وين رايحين ووين جايين
وما حدا يطب علينا متل العصابات المسحلة
واخيرا صارت الي واخيرا صارت بحمايتي واخيرا و اخيرا …
مر اول شهر متل العسل كنت طاير فيها خاطري اني احملها وادور فيها
ليوم ما انها فحصت وطلعت حامل وانا انبسطت انه حملت ببكري
وانبسطت اكتر لما كان بكري ولد يا سلام وولدت مرتي ببكري وبلشت المشاكل
مرتي بتسهر طول الليل وطول النهار نايمة
مرتي اللي كانت دايما مسشورة والكحلة ما تنزل من عينها دايماً رابطة شعرها كعكة
وتحت عينيها اسود مرتي اللي كانت دايما معطرة ريحتها حليب
وقد ما بتتحمم ما بتروح وانا اصلا ما بحب الحليب مرتي تغيرت
وين مرتي؟! حتى اهتمام بطلت تهتم فيي … طيب انا شو اعمل
حكيتها مرة ومرتين وعشرة وتوعدني انها تتغير وما بيتغير شيء
بعد ٧ شهور معاناه اجاني الخبر متل الصاعقة مرتي حامل
وهالمرة بس قالتلي الخبر ما انبسطت وبهدلتها ليش حملت ولمتها طب شو اعمل ؟!
مرت ٥ سنين ومرتي جابت ولدين وبنت … ومرتي ما اتغيرت بالعكس صارت اسوء من اول
دايما مشغولة بالولاد وريحتها طبيخ وكل تفكيرها متى تنظف الشبابيك ومتى تعزل المطبخ
ومتى تشطف الدرج مع الجيران وانا صرت اهرب منها
مع صحابي يوم بالكافيه ويوم بنلعب شدة … ويوم اطمر حالي بالشغل قدام اللابتوب …
لحتى في يوم اجت موظفة جديدة في الشركة وكانت ملكة جمال باول العشرينات
لبس وتشخيص وشعر و عطر..ياااااه المرأة اللي بحلم فيها صار كل تركيزي كيف اعلقها فيي
كيف اخليها تحبني دخلت بروفايلها عالفيس وصرت احكي معها بالماسنجر
وأنا كتيير مبسوط وانبسطت اكتر لما عرفت انها غير مرتبطة وكلمة مني وكلمة منها
خبينا بعض كتيير وصرت بالشغل معها وبعد الشغل معها يا بكافيه يا بمول
وبس اروح عالواتس معها صارت كل حياتي بطلت اهتم بمرتي ولا بالولاد حتى اهلي لاحظو تغيير
تلفوني حطيتله رقم سري … ومرتي شكت فيي بس انا انكرت ميت مرة …
حبيبتي واجهتني انه لازم نتزوج وانا كان نفسي اتزوجها بس كيف ؟!
لازم نتزوج … استجمعت قواي وكنا معزومين عند اهلي وكانت كل العيلة مجتمعة
ومرتي كالعادة مشغولة بالولاد بتطعمي بنتي الصغيرة
وحسيت انه الوقت المناسب لافاتحهم بالموضوع وفجأة قلتلهم: انا بدي اتزوج ..يتبع