خطيبتي بعتتلي رسالة امبارح على الواتس الساعة واحدة ونص بالليل شوفتها لما صحيت من نومي انهاردة الصبح..
الرسالة كانت عبارة عن كلمتين
ع س ق “حادثة”
رديت عليها اول ما صحيت بس كانت نايمة، معرفش هي بتهزر ولا بعتتها بالغلط، لبست هدومي ونزلت عشان اركب عربية الشغل..
ووسط برودة الجو وسرحاني لمحت العربية جاية علينا، ولأول مرة اشوف حروف العربية او اركز معاها
ع س ق
حسيت بكهربا غريبة بتمسك جسمي، ومن قلقي وتوتري فضلت مكاني لحد ما كل زمايلي ركبوا العربية الا انا، والغريب انهم مشيوا ومحدش خد باله مني، بس بعد دقايق فقت من حالة التوهان اللي انا فيها وندمت اني ضيعت العربية وهضطر اروح مواصلات..
ركبت عربية أجرة واتحركت، وفي نص السكة تقريبا شوفت عربية الشغل عاملة حادثة بشعة، مخيفة، وزمايلي كلهم في حالة حرجة والشارع كله متجمع على العربية..
ووسط رعبي وشلل تفكيري لقيت رسالة واتس من خطيبتي، وزي المنوم فتحتها..
“يا أحمد انا فتحت الموبايل انهاردة لقيت واحدة شبهي متصورة سيلفي بموبايلي بس شكلها بشع”
وبعتتلي صورة لواحدة شبه خطيبتي بس عنيها سودة زي الليل، وقتها فهمت مين اللي بعت الرسالة يحذرني، خاصةً ان خطيبتي وللأسف من الناس اللي عندهم روحانيات بطريقة مخيفة.. خطيبتي اللي ليها قصة اسوأ الف مرة من الموقف اللي حصل معايا ده..
تمت
أحمد_محمود_شرقاوي