انا محتاجه نصيحه منكم لوجه الله انا بنت عمري اكتر من 35سنه امي ماتت وسبتلي مسؤليه اخواتي الاصغر مني وكمان مسؤلية ابويا الكبير ف السن واللي كان محتاج رعايه اكتر من اخواتي. اهتميت بيهم كلهم وجوزتهم وتعبت وكفحت وفضلت انا وابويا واخويا الصغير فابويا مات واخويا دخل الجيش وفضلت انا ف البيت كل واحد ف اخواتي سواء البنات أو الاولاد
بقوا مشغولين ف حياتهم وفين وفين أما يسالو عليا وانا ظهر عليا كل التعب والحزن والهم إللي مريت بيه ولا كنت بهتم بنفسي زي البنات ولا كاني بنت كان كل همي اهتم باخواتي وابويا وشغل البيت. وانا الحمدلله بصلي واصوم وف حالي. بس من فتره كدا وبالصدفه اتعرفت علي واحد من النت وانا مليش اوي ف النت والتلفون بس اهو إللي حصل وكمان من طبعي اني
بتكسف جدا. بس والله العظيم مكنتش اعرف ان ده كان هيحصل. المهم سالني علي اسمي وسني وكدا وانا قلتلو معلومات غلط عني يعني مكنش سني الحقيقي وف معلومات تاني قلتهالو غلط علي أساس انو تعارف وخلاص بس المشكله ان التعارف ده شويه بشويه قلب لحب. حرفيا انا بحب الشخص ده اكتر من أي حد ف الدنيا واتعلقت بيه واتعودت عليه جدا لدرجه فوق الوصف. هو بيشتغل برا مصر. هو كمان سنو كبير بس انا
اكبر منو للاسف فعلا حبيتو وبهتم بيه وبيحكيلي عن شغلو ومشاكلو وهو بيقول انو بيحبني وانو مفيش حد بيحبو ف الدنيا زيي. بس هو ميعرفش سني الحقيقي ولا شكلي الحقيقي ولا ظروفي الحقيقية ودلوقتي عاوز يتقدملي وانا حرفيا بموت. هو عادي يعني لو انا سبتو هيحب وحده تانيه وهيتجوز بس المشكله فيا انا مش عارفه هعيش إزاي من غيرو ولا عارفه
الوقت هيعدي عليا إزاي يعني علي الرغم اني عرفت من فتره كدا انو بيكلم وحده تانيه غيري. وسمحتو ورجعتلو تاني. انا فعلا نفسيتي تعبانه جدا جدا مش حد يعرف إللي جوايا غير ربنا
انا كان نقصني الحنان وانو حد يهتم بيا ويسأل عليا وانا والله حبيتو اكتر من نفسي
ودلوقتي انا مش عارفه اعمل أي والله مش عارفه انام ولا اكل ولا اعمل اي حاجه
وبيتنا ملل جدا ومفيش اصحاب ولا حبايب افضفض معاهم
قولولي اخرج من العلاقه دي ازاي وانا اخرج نفسي من حبو اللي جوايا ازاي
انا عارفه اني غلطانه بس والله مكنتش عارفه انو الموضوع هيوصل لكدا. بس اهو إللي حصل
بالله عليكم قلولولي حل بس من غير تجريح ولا اهانه. كفايه عليا إللي انا فيه