قولتله طيب مالك اكشف عليك عشان اجبلك دواء لو اي مرض لسه بتبدأ اعراضه نلحقه اذا برد او صداع قالي مالكيش دعوه بيا سيبيني في حالي وزعقلي بطريقه خلتني اعيط بجد ..أول مره يعلي صوته عليا بالقهوة دي زعقلي زي ما اكون حد عايز يئذيه
فضلت قاعده في الصاله اليوم ده ما ارضتش اخش انام معاه في اوضتنا وكنت نايمه في الصاله لقيته صحاني بليل بيقولي خشي نامي جوة .. قولتله مش عايزة قالي خشي نامي جوة الغريب انه كان بيتكلم بصوت هادي جدا وشكله ثابت خالص من غير ما يبصلي في عيني .. انا قلقت بصراحه قولت ما اكبرش الموضوع ودخلت انام لقيته قعد مكاني
نمت وتاني يوم روحت الشغل واتصلت بالارقام اللي فاضله بس كان فيهم رقم اسمه نور كلمته فتح قولت الو قفل .. استغبيت نفسي جدا المفروض اني استناه يتكلم الاول اتصلت بيه بعدها مغلق وغير متاح كلمت باقي الارقام مافيش حاجه رجعت اتصل بنور تاني الرقم مغلق .. كلمته من عند غدير جايز عملي بلوك برده مغلق
ورجعت البيت بعدها لقيت سمير في البيت .. قولتله بقيت كويس النهارده قالي ايوه .. وبعدها دخل نام معايه وعلى بليل لقيته اتحرك من جنبي وطلع بره في الصاله بعدها سمعت صوته بيتوشوش مع حد .. قومت بعدها من السرير وندهت على سمير بعدها لقيته سكت لما وصلت الصاله لقيته بيبصلي وساكت قولتله ايه اللي مصحيك ؟
قالي مافيش حاجه مش جايلي نوم .. قولت لغدير تاني يوم قالتلي انتي روحتي بتندهي عشان غبيه ..انتي اتسحبي بالراحه لما يعمل كده تاني واسمعي بيقول ايه ؟ قولت خلاص لو عمل كده تاني هطلع اتنصت عليه وفعلا تاني يوم صحي بليل وطلع الصاله فضلت صاحيه وانا مضايقه وسمعت صوته بيوشوش حد
قومت بالراحه من السرير والساعة كانت 3 الفجر واتمشيت فالطرقه بهدوء شديد ..وسامعه دقات قلبي وبحاول اتحكم في صوت نفسي واتنفس بالراحه اول ما قربت من الصاله سمعته بيقول كلام مش قادرة أحدده عشان صوته واطي وأول ما قربت منه اكتر سمعته بيقول ..
انا مش هعمل كده تاني .. انا مش هعمل كده تاني .. وأول ما بصيت عليه شوفت حاجه غريبة جدا خلت جسمي كله يقشعر وجسمي اتثبت في مكانه لما شوفته وهوا ..باصص للحيطه وبيتكلم ومش ماسك الموبايل واتخض جدا اول ما شافني قالي في ايه ؟ قولتله صاحي ليه قالي مافيش حاجه روحي نامي انتي
روحت انام وانا عماله افكر في اللي انا شوفته ده .. حاسه ان سمير مش طبيعي ابدا .. ما بقاش يبصلي في عيني وبيحاول يهرب لما بحاول ألمسه عادي حتى .. تاني يوم روحت الشغل ومارضتش احكي لغدير حتى مش عارفه ليه بس مش قادره احكي حاجه زي كده
تاني يوم رجعت مالقتش سمير فتعشيت انا وبعدها دخلت اخد دش سمعت صوت في الصاله .. قولت اكيد سمير رجع طلعت بعدها ببص في الاوضه مالقتش حاجه ببص في الشقه كلها مالقتش حاجه فجأة سمعت صوت عالي في اوضتنا وانا كنت في الصاله وصوت حاجه عماله تتحرك جوه
قلبي اتقبض قوي وكنت خايفه روحت لغرفتنا ببطئ وكنت فاكره اني كنت سايبه دولابي مفتوح لقيته مقفول ومتوارب وفي صوت نفس جاي من جوه قربت منه براحه وانا قلبي بيدق جامد وجسمي كله بيترعش وقومت فاتحه باب الدولاب ….
لقيت
يتببببببببببببع