جوزي بقى له فترة غريب جدا و متغير عليا
وبقى يعمل تصرفات مريبة لدرجة لما بمسك ايده بيسحبها بسرعه
وبقى يصحى كل يوم الساعة 3 بليل يطلع يقعد في الصالة لوحده !؟.. واسمع صوت وشوشه
مابقاش حتى بيخلي عيني تيجي في عينه وبقى يخاف اني ألمسه انا مش عارفه هوا ماله ؟!
بس الاكيد أن في حاجه مش طبيعية بتحصل ونفسي أعرف هي إيه ؟!
انا ياسمين 28 سة متزوجه من 8 شهور .. وبشتغل في صيدليه .. وجوزي سمير موظف في بنك ..
هوا شاب وسيم جدا وحبينا بعض من 3 سنين تقريبا وبعدها بسنتين اتجوزنا .. اللي عرفته عن سمير أنه قبل ما نتجوز كان مقطع السمكة وديلها ماكنش يسيب واحده الا لما يحاول يتعرف عليها .. بس بعد ما حبني عقل وبقى انسان طبيعي بيهتم ببيته وزوجته
صحبتي غدير دايما تقولي اني محظوظة بواحد زي سمير طيب وكريم وجميل.. واتعرفت على غدير من ساعة ما اشتغلت في الصيدليه اللي انا فيها .. وهي جدعه معايه وفرحتلي جدا بجوازي .. أول 7 شهور في جوازي كنت حاسه اني في حلم كل حاجه ماشيه كويس جدا
لحد من شهر لما سمير بقى يتأخر عن معاده عشان ضغط الشغل .. بقى يرجعلي البيت بدل 8 بقى يرجع 10 بعدها بقت 12 .. والوضع استمر اسبوعين كده … بصراحه انا ما استحملتش التاخير الكتير ده قعدت معاه وقولتله يصارحني لاني اكيد زي اي واحده هشك فيه لما يتاخر كده على غير العاده
بدأ يقولي انه شغل وصدقيني وانا مش هضحك عليكي وهخونك ليه ؟ وبقى يزعق معايه كتير جدا بس انا بجد ادايقت مابحبش حد يكذب عليا وطبعا انه يفكر حتى انه يخوني .. استنيت سمير تاني يوم واول ما رجع متاخر ودخل الحمام مسكت موبايله وفتحت المكالمات بتاعته كلها مالقتش غير اسامي رجاله
انا بصراحه كنت بحكي لغدير صحبتي واحنا في الشغل عن موضوع التاخير ده قالتلي في حاجه مش طبيعية ..قولتلها انا فتحت موبايله مالقتش حاجه .؟ قالتلي ولو ممكن يكون بيمسح المكالمات او مسمي البنات باسماء رجاله
هنا الموضوع نرفزني بجد … مسكت موبايله وبعت لنفسي كل الارقام اللي عنده وبقيت زي المجنونه طول النهار في الشغل اتصل برقم واكتب اسمه طلع راجل فعلا اشطب اسمه..وبتصل من شريحه برقم جديده جبته .. فضلت اتصل كتير بارقامه كلها لحد ما خلصت تقريبا كل الاسماء .. كلهم رجاله ماعدا انا مسميني “حبيبتي”
وقبل ما اروح اليوم ده وانا خلاص كان قلبي مطمن على سمير انه فعلا مش بيخوني كان فاضل 17 رقم قولت أكلمهم بكره .. ورجعت بعدها عالبيت وقبل ما افتح باب الشقه سمعت صوت حد بيتحرك جوة قلبي اتقبض لان سمير ما بيرجعش دلوقتي .. قومت نازله للبواب وندهته يطلع معايه
قام قايلي ان الاستاذ سمير رجع من بدري .. انا اتخضيت طلعت تاني عالبيت وفتحت ودخلت لقيته سمير قاعد بياكل عالسفره قولتله مالك رجعت بدري ليه النهارده قالي تعبت واستئذنت النهارده وبعدها قام ودخل نام
قولتله
يتببببببببببببع