تعارف السوشيال ميديا

انا مش هقولك انا مغلطتش لا انا غلط وغلطتي مش قليل وندمانه بجد من قلبي

انا بنوته عندي ٢٤ اتعرفت علي شاب علي السوشيال وبعد محايلات كتير منه

اتكلمنا واتعرفنا اكتر وخد رقم موبايلي وبقالنا مع بعض فتره وكان بيبنلي

أنه في قمة الاخلاق والاحترام وانا صدقته واتعلقت بيه لدرجه اني كنت بحمد ربنا

في صلاتي علي أنه في حياتي وكان واخد مني رقم والدي وعنوان بيتي وشغلي

عشان كان المفروض هيتقدم وكل شويه يقولي أن حصلت عنده مشكله

وكل لما المشكله اللي قال عليها تتحل يقولي الشغل والضغط ويتلكك

وبعدين قالي أنه تعبان وهيعمل عمليه ومش هتحرك فتره وانا كل ده كنت مصدقاه

ولما كنت بشك في أمره ارجع احن واقول كل تأخيرة وفيها خير وطول ماانا بتعامل ب نية صافيه

وفعلا انا حباه ومشاعري حقيقيه ربنا مش هيسيبني ولو هو مش فيه الخير ربنا يبعده عني

ومن حوالي اسبوع كلمتني البنت اللي المفروض عرفني عليها علي انها أخته

وقالتلي أنه كدب عليا ف كل حاجه كدب عليا في شكله لانه كان بعتلي صورة غير صورته

وكدب عليا في شغله و مكان سكنه حتي اسمه طلع كدب كل حاجه قالهالي فعلا كدب

وانا اتأكدت من كلامها المشكله بقي مش هنا المشكله أنه مستلف مني فلوس بحجة

أن ظروف شغله كانت واقفه والعمليه والتحاليل والحاجات دي كلها وسحب مني حوالي 4000 جنيه

انا مكانش في دماغي الفلوس خالص ولا فرقالي لحد بقي ما عرفت من أخته أنه مكانش

فيه عمليه ولا تحاليل ولا اي حاجه من دي وأنه كمان متجوز ومعاه ولد

انا بجد مش عارفه اتصرف ازاي استعوض ربنا في فلوسي ووقتي واقول حسبي الله ونعم الوكيل

ولا اواجهه واخد حقي منه محتاجه نصيحه بجد واللي محتجاه اكتر من النصيحه

انكوا تدعولي وبالله محدش فيكوا يابنات تثق في اي حد الا لو دخل بيتك وكلم اهلك

ويحصل بينكوا مواقف تكشفلك إذا كان حقيقي في مشاعره واخلاقه ولا لا

وبجد حسبي الله ونعم الوكيل في كل واحد يجي علي اي بنت منك لله