السلام عليكم ورحمة الله وبركاته
عندي مشكلة آنا متجوز من ١٠ شهور و مراتي شايلها من ع الأرض و معيشها عيشة ملكة وطبعا فيه فرق مادي كبير بين العيلتين بس ده مكانش فارق معايا لان اهم حاجة اني حبيتها وحتى أهلي محدش اتكلم خالص في ماديات وقت التجهيز وان هما ع قدهم في الجهاز و كده بالعكس أبويا قالي مدام انت مبسوط و مرتاح ملكش دعوة اهم حاجة البنت …
طلباتها كلها مجابة وبحبها و بتحبني و كل شوية هدايا و فسح و خروج و مشتريات خاصة ليها كل اسبوع تقريبًا وآنا ع قلبي زي العسل وهي بصراحة انسانة كويسة ودلوقتي هي حامل بس لسه مش عارفين نوع الجنين…
لحد هنا تمام … جه في يوم حصل مشكلة وانا اتكلمت بعصبية هي ردت رد مش كويس للاسف ضربتها بالقلم و دي اول مرة في حياتي أعملها و عارف اني غلطان …ولا ده اسلوبي
المهم خرجت رحت شغلي و رجعت من الشغل لقيت اخوها عندنا بيقولي ايه اللي ع وشها ده بقوله انت عارف اللي حصل اصلا ولا لا ؟!
مخلصتش كلامي لقيت لكميتين في مناخيري دوخت و اتعورت و بعدها جيت اقوم لقيته بيضرب وإنا مش شايف اصلا ومكنتش مدي خوانة آنا ممكن افرمه بس هو فاجأني و مراتي نازلة صريخ و تشده و كده … و خدها و روح بيتهم
المهم آنا خرجت رحت عملت تقرير طبي و محضر و مش هسيبه غير اما يتحبس وهي خلاص قررت اطلقها ولا عمري هدخل للناس دي بيت ولا هما ييجو عندي .
دلوقتي هي وأمها عمالين يبعتو ليا رسايل و يبعتو لأمي أحنا غلطانين و هنقاطعه و هييجي يعتذرلكم كلكم …
ومراتي تقولي متاخدنيش بذنبه آنا مكنتش اعرف ان ده هيحصل …
آنا مش قادر اتخطى الموقف ولا قادر اسامح مراتي و قفلت تماما منها و مستحيل ارجعها و الواد ده هحبسه لازم .. مش عارف اعمل ايه محتاج رأيكم ؟