صباح الخير بالنسبة لكم مساء الخير لس بالنسبة لى عشان أحباب الله سهرانين🥲💔
المهم، زوجي ليه أخت وحيدة وقت ماخطبني كانت فى أجازة تانية ابتدائي هى اصغر منه بحوالى ١٨ سنة ومني بحوالى ١٣ سنة، ضمنيا انا وهي اتفقنا انها تناديني أبلة إيمان ومشينا تمام اوي طول سنة الخطوبة، بمجرد مااتجوزت كنت عاوزة أقول لحمايا ياعمي لأسباب كتير أوي تمنعني من كلمة بابا وحماتي ماما عادي رغم الاتنين مش من قلبي بس يلا عشان عيون زوجي😅
المهم تاتش من هنا على تاتش من هنا راضيت العالم وقلت يا بابا، المهم بقى انهم خلو الآنسة الصغيرة تناديني باسمي، جت قعدت معايا كام أسبوع هي ومامتها بعد الفرح بمدة البنت رايحة جاية تناديني بلاهدف لاحل تقولي باسمي طبعا انا كان بيجيلى أرتكاريا أول مابسمعها خصوصي انه طالع منها مش مظبوط ووحش🙂
ناهيكم عن فرق السن وبحس بالاهانة بجد، أخدت منها موقف واتنين وتلاتة وبوضوح كنت بفهمها ان دا عيب واني حد أكبر منها ولها فى مثال بقول لجارتي ياابلة فلانة وهي اد جوزي اساسا، وان لو نادتني باسمي بس مش هرد عليها دا لما أصرت على فعلها يعني ، تسمع الكلام مرة وتنقلب فورا كدا اتأكدت انها مش من دماغها يعني، اخدت رأي زوجي المهم ماعرفش يخليها ترجع لابلة تاني فسكت وانا مش راضية لاسباب كتير يعني، المهم دلوقت بروح عندهم البيت ولو اصحابها فى الشارع خبطو وفتحت بيقولولى ازيك يا إيمان عاملة اي كأني كنت بلعب معاهم فى حوش المدرسة!!!
رغم اني بقى معايا طفلين يعني أبسط حاجة فى الأرياف هيقولو ياخالتى أم كذا، بصراحة دمي انحرق وناوية أحرج أي حد هيكررها تاني، أعمل إي مع ولاد الشارع الأغراب وممكن أعمل اي مع أخت زوجي ترجع تناديني أبلة تاني والا اشيل موضوعها من دماغى ؟ البنت فى ٦ ابتدائي دلوقت و فى أحايين كتيرة بكون انا القائمة على توجيهها وتربيتها وتصويب سلوكها لما بنكون مجتمعين سواء فى بيتي بالشهور او حتى أثناء زيارتي عندهم لان والدتها اتوفت وحتى أثناء حياتها البنت ماكانتش بتتوجه فمش منطقى أكون مركزى كدا بالنسبة لها وتنادينى هى بردو كدا خصوصا انها طول الوقت عاوز تثبت انها راسها براسي انا وزوجى لما قعدت معانا كام شهر وكنا مسؤولين عنها من الألف للياء،
رأيكم أعمل اي ؟ عندي مساحة أتعامل مع الموقف مش هخاف عادي