انا جوزي تخين و كان تخين من قبل الخطوبة و قالي لو عندي مشكلة في الوزن فقلت له لا و انا مش بتاعت مظاهر و كده
بس كنت على امل انه يخس عشان صحته و عشان شكله و شكلي قدام الناس
انا بقيت اتكسف امشي معاه والله من منظره
هو عمل دايت و خس بتاع عشرين كيلو بس لسا محتاج ينزل مش اقل من 25 و هو زهق و بينزل ببطء
ف قلت له يعمل عملية تكميم ف قالي بيخاف من العمليات و الوزن مش مستاهل عمليه و احنا اولى بمصاريفها
بس انا بقيت مخنوقة منه و من شكله و كل ما بشوفه بتنرفز و اتعصب على اي حاجة و مبقيتش اخليه يقرب لي بقوله قرفانة من جسمك و كان بيسكت ،
لحد ما في مرة كان بيعاتبني على حاجة هبلة كده لقيتني هبيت فيه و اهنته في رجولته و جرحته جامد لدرجة ان دموعه نزلت قدامي
منطقش و لا كلمة قالي البسي رايحين مشوار و خدني على بيت ابويا و قاله زي ما خدتها من بيتك رجعتهالك معززة مكرمة بس بنتك من اللحظة دي متلزمنيش و حقوقها كلها بزيادة هتبقا عندها
و من وقتها عملي بلوك و مش عارفة اوصله عشان اعتذر له
انا مش عايزة اتطلق و مش عارفة اصلح الموضوع ازاي انا عارفة اني غلطت بس مش الغلط اللي يوصل للطلاق
اعمل ايه عشان يسامحني و ميطلقنيش