الحور العين

لو سمحتي من غير اسم
قصتي يمكن غريبة شوية، انا يا بنات
مكسور خاطري اوي اوي
انا جوزي مات من ٦ شهور وزعلانة عليه اوي اصلي كنت بموت عليه، صحيح هو كان خاين وبصباص بس انا كنت بحبه اوي وهو للامانة كان ببحسسسني انه بيحبني المهم كنت بنتخانق لما اقفشوا بيكلم بنات او فيديوهات وكدة

المهم ميجوزش عالميت الا الرحمة ربنا برحمه بئة. اللي قاهرني انه عمل حادثة وكان تعبان اوي وفضل عيان بالمستشفى يجي ٧ شهور متركتوش ولا يوم يا بنات ولا يوم، دا انا كنت متقطعه بين البيت والعيال والمدارس والمستشفى
كنت اطبخله وأكله بإيدي واجيبله كل اللي يجي في نفسه من غير ما يطلب وآخد بتلي من هدومه ونضافته وكل حاجة كللل حاجة، لدرجة انه الدكتور قاله ربنا يباركلك في مراتك،

ومن باب التشجيع قله شد حيلك يا عريس! جوزي رد عليه من الحور العين ان شاء الله الدكتور اتكسف من وقفتي معاهم وقاله اه ان شاء الله بس برضه الزوجه الاصيلة ندعيلها بالجنة برضو لانه كان شايف اد ايه متقطعه عليه، فرد جوزي كان ببصة لية بطرف عينه وقال باستهزاء خفيف كدة (كواعب اترابا) قصده انه عاوز في الجنة من الصبايا الكواعب مش عايزني انا، والله يا بنات الدكتور اتحرج اوي مني وكان هاين عليه يطبطب على كتفي ويقولي معلش بس طبعا

معملش كدة، الراجل مات بعدها بأسبوع ودلوقتي ليه اكتر من ٦ شهور وانا لس مقهورة من الموقف ده وخصوصا اني سكت خالص ساعتها وقلت بعدين اعاتبه لكنه مات وانا كل ما افتكر الموقف ده احس قلبي اتحرق، بالله عليكو يا بنات قولولي حاجة تهدي بالي ومتخلونيش اندم اني فضفضتلكم وخصوصا اني والدتي متوفية وانا طفلة وماليش حد احكيله. عمري ٣٦ سنة. عندي ٤ اولاد.