“ازيك يا حليمة أنا أدهم زميلك في الكلية فاكراني, انا لسة راجع من السفر وأول ما عرفت صدفة انك لسة متجوزتيش حبيت أكون أنا نصيبك, وللعلم بعت لندا صاحبتنا من إسبوع لأني معرفتش أوصلك وقالتلي هتبلغك معرفش هي بلغتك ولا لا, ياريت تردي عليا”
فضلت مصدومة من محتوى الرسالة دي, هي ازاي ندا اللي نايمين صاحيين مع بعض على الشات متقوليش حاجة مهمة زي دي, في اللحظة دي رد الساحر عواد, رد بريكورد طويل أوي وطلب رقمي ضروري عشان نتكلم, بعتله رقمي وانا بترعش واتكلمنا, اتكلمنا مكالمة طويلة أوي..
قالي إنه مش ساحر ولا أي حاجة وكل ده أي كلام, قالي انه دخل يكلم ندا على جروب الرعب من فترة وأوهمها انه ساحر عشان يرغي شوية ويخوفها, لقاها بتستجيب معاه أوي وبتطلب منه طلب غريب,
قالتله هدلك على صاحبتي وتعملها حاجة توقف حالها لأن جايلها عريس وانا مش عاوزاه يتقدملها, ولما اعترفتلها إني مش ساحر وان الأكاونت بتاعي فيك وأي كلام رسمت معايا خطة نعملها والمقابل هتفتحلي فيديو كول وأعمل معاها اللي انا عاوزه, قالتلي هتكلم صاحبتي حليمة وتوهمها انك ساحر وانا هقولك على حاجات في حياتها شخصية توهمها بيها,
زي لابسة ايه وشكل اوضتها وحياتها, وهي هتصدقك لأنه هتقولها إن فيه شخص كويس هيتقدملها قريب, وتبعتلها طلاسم من على النت أي كلام وتخليها تكتبها على جسمها وتصورلك, عشان لو الشخص ده اتقدملها نبعتله الصور ويفسخ معاها فورا, وممكن كمان تضحك عليها وتبعتلها نسخة مزورة من كتاب شمس المعارف اللي ماليين النت عشان تقتنع أكتر وترد عليك..
يتببببببببببببببع