انا وصاحبتي ندا عندنا هوس كبير بمواقع الرعب والماورائيات, بل ممكن تقول إننا بقالنا تلت سنين بنجري ورا كتاب شمس المعارف الشهير عشان نحمله ونشوف هو بيتكلم عن ايه, ومفيش عندنا أدنى مشكلة إننا كمان نتعلم طُرق التحضير ونحضر الجن والأشباح,
وبالأخص لما سيطرت علينا فكرة إن الواحدة مننا ممكن يكون ليها حبيب من عالم الجن, حبيب قادر يلبي ليها أي حاجة,
ومواقع الرعب مليانة قصص عن اللي قدروا يسخروا جن وحياتهم اتغيرت 180 درجة, وحابة أقولك احنا مش مجانين أحسن تكون فاكر إننا مجانين أو أطفال, احنا داخلين تقريبا على سن ال30, بس الفراغ والعزوبية لحد الوقت ده بتخليك تاخد سكك غير السكك المعتادة, سكك ممكن تكون نهايتها الهلاك زي ما بيقولوا..
امبارح بس اتكلمت مع ندا بالليل يمكن نصف ساعة فيديو كول وبعدها قفلت ودخلت عشان أنام, بس قبل ما أقفل لقيت حد بعتلي على رسايل الأزر وكاتبلي
“أنا معايا كتاب شمس المعارف”
في العادي بكون متأكدة إنه مجرد عيل مراهق داخل يتعرف ويرغي, خاصةً إني نشطة أوي في جروبات الرعب وتعليقاتي كتير وده بيخلي المراهقين حوليا كتير, بس المرة دي صِدقًا حسيت برهبة وبرعشة مسكت في جسمي كله, رديت عليه وقولتله يبعتلي الكتاب, لقيته بكل هدوء كتبلي:
– مش متضايقة من السويت شيرت الأحمر اللي لابساه ده والجو حر
قرأت الكلام وبدأت أحس بتنميل في جسمي كله, كمل كلامه وقال:
– متستغربيش لأني سهل أوي أشوفك واعرف انتي بتعملي ايه
اتعدلت مكاني وبدأ قلبي يدق بعنف, لقيته بدأ يطمني ويقولي انه ممكن يديني الموهبة دي وكمان يبعتلي كتب تسخير تخليني موهوبة ومعايا جن يساعدوني في حياتي, وبدأ يقولي على كل حاجة تقريبا, اسمي, عمري, لابسة ايه, وحتى أسرار في حياتي تقريبا مفيش أي حد يعرفها, كنت بقرأ اللي بيكتبه وانا بتنفض ومش عارفة أرد أقول ايه, لقيته قفل مرة واحدة وبطل يرد على كلامي, وقعدت أستنا انه يفتح يمكن لأكتر من أربع ساعات كاملين بس مكانش بيفتح للأسف..
يتببببببببببببببع