في النهاية طلب آخر صورة, أرسم على رقبتي ونص خدي اليمين وأصور صورة واضحة, وفعلا عملت كدا ووعدني إن الخير هيجي في حياتي خلال أيام وبس, وفعلا وقعت في حلم جميل, وبدأت أتخيل شكل العريس اللي ممكن يجي يتقدملي, والحياة الجميلة اللي مستنياني..
وعلى الساعة 12 دخلت عشان أنام وانا عايشة في حلم جميل أوي, بس وسط نومي بدأت أسمع صوت حد بيكح بطريقة غريبة وبصوت خشن أوي جوة الأوضة بتاعتي, حسيت بالخوف الشديد وقمت من مكاني مفزوعة, حاولت أبص يمين وشمال وأفهم ده ايه بس الأوضة كانت ضلمة تماما, في اللحظة دي حسيت بحرارة شديدة جاية من ضهري وصوت أنفاس خشنة أوي, كأن فيه حيوان نايم ورايا, لفيت وانا جسمي تقريبا منهار من الفزع لقيت, لقيت راجل عجوز بعين واحدة وعنده قرن في جمجمته, وكانت عنيه واسعة ولونها أحمر دموي,
مسافة ما شوفت المشهد ده جسمي كله اتخشب مكانه, مكنتش قادرة أهمس أو أتكلم بنص كلمة, وكأني فقدت الحياة كلها..
ومن عنيه بدأت قطرات دم تنزل منها وتتحرك ناحية جسمي, كل ده وانا عنيا جاحظة وجسمي مشلول تماما, وفضلت قطرات الدم تتحرك ناحيتي لحد ما لمست جسمي, وأول ما لمسته حسيت بنار وكأنها مية مغلية لمستني, صرخت بأعلى صوت ووقعت من على السرير وطلعت أجري برة الأوضة وانا حاسة إني بموت, وإن شياطين الدنيا كلهم بيجروا ورايا..
أمي خرجت بسرعة عشان تفهم فيه ايه بس مقدرتش أنطق, دخلت أوضتي لما شافتني مرعوبة وفضلت تفتش يمين وشمال بس مكانش فيه أي شيء, قالتلي يمكن يكون كابوس ومسابتنيش غير لما هديت تماما, وعلى الساعة 8 الصبح دخلت عشان أخد دش, كنت مرهقة وجسمي لسة فاقدة السيطرة عليه,
ومسافة ما وقفت تحت الدش وفتحت المية لقيت المكان كله ضلم وكأني في قلب قبر مظلم..
يتببببببببببببببع