وفين وفين لما قدرت أنام ولسة كلامه عمال يرن في وداني, ازاي عرف انا لابسة ايه, وشكل أوضتي, وأسرار في حياتي كمان, بل ازاي عرف معلوماتي الشخصية, عديت اليوم ولقيته باعتلي تاني يوم,
وبعتلي ملف لكتاب شمس المعارف, حسيت وقتها بحماس رهيب وجريت على ندا عرفتها, لقيتها هي كمان طارت من الفرح حرفيًا, فتحت الملف لقيت كتاب كله تعاويذ وطلاسم ومكنتش فاهمة منه نص كلمة حرفيًا, بس اللي بدأت يوم بعد يوم اتوهم بشخصيه هو الشخص اللي كلمني على النت وبعتلي الكتاب, بل وعرف عني تفاصيل في حياتي محدش يعرفها تقريبًا,
كان اسم الأكاونت بتاعه “الساحر عواد” ورغم خوفي ورهبتي منه إلا إني شوفت فيه القوة والنفوذ, الحاجة اللي ممكن تكون حبل النجاة وتحققلي حاجات كتير في حياتي أنا محرومة منها..
وبدأ الكلام ما بينا ياخد منحنى تاني تماما, كان بيكلمني على فكرة انا ليه داخلة في التلاتين ولسة متجوزتش, بلغته إن ده أمر الله, قالي انه ممكن يساعدني بل ويكون سبب إن عريس كويس جدا وغني جدا يجي يتقدملي بس بشرط أعمل كل اللي يطلبه مني بدون أي تفكير..
كنت خايفة ومترددة بس كلامه كان زي الحلم, أنا اللي فقدت الأمل إن يجيلي شخص كويس دلوقتي عندي فرصة كبيرة في إني أتجوز حد كويس جدا, سألته أنا ممكن أعمل ايه بدأ يقولي اننا هنعمل نوع من أنواع سحر الجلب, بس نوع قوي بيسخر نوع من الجن بيجذب ناحيتي طاقة الزواج, وبدأ يفهمني إن الزواج طاقة زي أي طاقة ولازم أفتح حوليا ثغرات عشان تستقبل الطاقة دي, وبدأ يطلب مني أرسم طلاسم على جسمي وانا عريانة تماما..
بدأت أخاف وأقلق من كلامه بس كان بيطمني, وقالي إنه شايفني وبيشوفني دايما, فمش اللي هعمله ده اللي هيأذيني, خاصة إنه طلب مني أصور جسمي وهو مرسوم عليه الطلاسم ولازم جسمي يكون واضح وظاهر جدا, ولما رفضت بدأ يهددني ويخوفني, ويقولي إنه يقدر يعمل حاجات كتير ودي فرصة العمر ومينفعش أضيعها..
وغصب عني بدأت ارادتي تتسحب مني وأسمع كلامه وكأني مقيدة تماما, وبدأ يبعتلي حروف غريبة ويطلب مني أرسمها على جسمي وأصورله جسمي وأوريه, طلب مني فوق ال20 صورة وكنت غصب عني ببعتله, يمكن خايفة, يمكن متشوقة للي ممكن يحصل وخلاص هشوف الدنيا, معرفش أنا بعمل كدا ليه من الأساس..
يتببببببببببببببع