الصورة اللي في البوست دي، حقيقية.
في زمن قديم جدًا، على حسب الاسطورة.
كان في مملكة كبيرة في تايلاند، على ضفاف بحيرة اسمها Khong Long . المملكة كانت كبيرة، قوية، والملك فيها كان عنده ابن اسمه الأمير Fahoong.
الأمير كان من اصل طيب، محبوب، ذكي، الناس كلها بتحترمه، لكن هو كان وحيد، مش قادر يحقق رغبه اهله في انه يتجوز علشان يبقى في وريث للمملكة، علشان مش لاقي فتاة احلامه.
و زي قصة سندريلا وكل القصص اللي الأمير بيتكعبل فيها في فتاة احلامه في الغابة، الامير Fahoong كان في احد الايام بيتمشى على ضفاف البحيرة، وسمع غناء في منتهى الجمال، اغنية سحرية رهيبة لكن حزينة، خلته يقع في حب صاحبة الصوت من قبل ما يشوفها حتى.
بدأ يدور عليها في كل مكان لكن اول ما بدأ يدور الصوت وقف فجأة، وملقاش حاجة. سمع عياط، ولمح حاجة بتتحرك عند شجرة فراح يدور بسرعة لكن للمرة التانية، صاحبة الصوت اختفت.
كل اللي لقاه جلد ثعبان، جزء منه قرمزي وجزء منه اخضر، بيلمع وشكله غريب جدًا مختلف تمامًا عن اي جلد ثعبان شافه في حياته.
رجع بيه لأهله، وهو مقتنع خلاص تمامًا انه لقى حب حياته، صاحبة الصوت اي كانت هي مين.
الفكرة ان هي كمان شافته وقتها، وحبته بردو من غير ما تتعامل معاه، بس المشكلة انها مكانتش بشرية، كانت من جنـs كائنات اسطورية اسمها Nāga.
الناجا على حسب الاساطير، كائنات قديمة جدًا، عايشة في عالم مختلف عن العالم بتاعنا، عالم اسفل عالمنا اسمه “Patala”. الكائنات دي مزيج من بشر وثعابين، بتظهر على شكل يا انسان رأسه فيها ثعابين ( اه زي ميدوسا )، يا نص انسان ونص ثعبان، يا ثعبان كامل وبيتحول شكل بشري علشان يعرف يختلط بالبشر.
الكائنات دي موجودة في اساطير كل دول شرق اسيا بالمناسبة، وموجودين في ال3 ديانات، الهندوسية، البوذية، والجاينية.
المهم يعني. اللي موجودين من الكائنات دي في العالم بتاعنا، بيتم اعتبارهم حراس الانهار، بيعيشوا بالقرب من الانهار او في الكهوف. وممنوع تمامًا ونهائيًا انهم يتزاوجوا مع البشر. ممنوع ارتباطهم بالبشر عمومًا.
علشان كدة الامير في القصة لما راح قال لأهله، الملك والده عرف مين صاحبة الصوت، دي واحدة من الكائنات دي ابنه ملك، اسمها Nakkarintrani.
بس بما انها من الناجا ( الانثى بيطلق عليها Nagini بالمناسبة أو ناجيني ). فالارتباط بالامير كان مستحيل. بس علشان قلبهم مينكسرش، اهله واهلها قرروا انه هيسمحولهم بالجواز، بشرط واحد ان الأميرة متتحولش نهائي لشكلها الاصلي ومفيش مخلوق يعرف حقيقتها.
واتجوزوا في حفل عظيم وعاشوا حياة عظيمة، لحد ما الوقت مر كتير ومفيش نسل، لإن البشر والناجيني مينفعش يجيبوا نسل مشترك. الناس مكانتش تعرف ده بس بدئت تتكلم.
يتبع….