الفتاة

بنت،
بنت كانت واقفه علي حرف الترعة ولابسة لبس خفيف وعمال تغني وكأنها قاعدة علي البحر، معرفش ليه حسيت بكهربا شديدة أول ما عنيا لمحتها، .

ريقي نشف وقلبي بدأ يدق بسرعة غريبة، مين دي وواقفة هنا بتعمل ايه من الأساس، فكرت أقرب منها واشوفها او اسألها عن ولادي بس اترددت كتير، وفضلت واقفة مش قادرة أشيل عنيا من عليها إطلاقا..

بس الغريب إني بدأت أسمع صوت اهات، وكأن فيه حد بيتعذب، والصوت كان مميز أوي، وواضح وضوح الشمس، ده صوت ابني، عمال يتوجع ويستغيث وينادي عليا، والأغرب ان الصوت كان جاي من الترعة، .

وبالأخص من عند البنت دي نفسها، معرفش ليه حسيت انها رابطة ابني بتعذب فيه، ويمكن بتقتله، مسكت حجر كبير وقربت منها وانا بترعش، بتنفض، قربت وقربت لحد ما شوفت لقطة بشع،مش هنساه لحد ما أموت..