قعدت فرحت لان الكرسي كان كويس ومريح مش زي الحديد اللي كنت قاعدة عليه اللي كان بيكسر ضهري
فضل واقف هو في نص اللجنة وماسك مج نسكافيه بيشربه وعينه على كل حد
وبين حين اللي اخر كان يجي يبص في ورقتي بفرح كده ويكمل لف في اللجنة
خلص وقت الامتحان بدا يلم مننا
اخد من كله الورقة وكله خرج مش فاضل غير انا كنت براجع
– دكتور ممكن دقيقة بس لو سمحت ؟
= اه طبعا كملي وانا مستنيكي تخلصي
فضل واقف مستني اخلص وبيبص في ورقتي وبيضحك ف قولت في سري
– هو ايه ده بيضحك ليه هو انا كاتبة نكتة في الورقة ؟ ليكون بيضحك عشان اجاباتي غلط وفرحان اني هسقط ! يارب استرها عليا
راجعت مرة كمان وقفلت الورقة وسلمتها له
لميت ادواتي وحاجتي وهو كان بيرتب الورق وبيحطهم في ملف الامتحانات
– دكتور ممكن اسالك سؤال ؟
= اها
– كنت بتبص في ورقتي وبتضحك من حوالي دقيقتين هو انا حليت غلط لدرجة ان رسوماتي والتصميم والاجابات خلوك تضحك ؟
ضحك تاني وقال
= الصراحة مكنتش بضحك عليكي كنت بضحك على نفسي
– ليه ؟
= انتي حليتي كويس جدا على فكرة انتي رسمتي تصميم مبنى خيالي وتحفة اوي ودقيق بالشكل ده خلال 3 ساعات بس ! تعرفي لو تصميمك للمبنى اتنفذ على الحقيقة بجد مش هياخد اقل من 6 سنين عقبال ما يتنفذ بالشكل العظيم ده. يعني انا ضحكت عشان وانا في سنك لغاية دلوقتي مخطرش على
بالي اني اصمم مبنى زي كده صحيح نجحت بتقديرات حلوة خلتني دكتور هنا بس انا لغاية اللحظة دي موصلتش لمرحلة الخيال والابداع اللي عندك انتي
– وده معناه ايه ؟
= معناه انك هتبقي مهندسة شاطرة بجد هتستاهلي لقب المهندسة فعلا
فرحت من كلامه اوي دفعة امل دخلت جوايا بسبب كلامه الجميل
شكرته وخرجت
روحت عند هدير سالتها عملت ايه في الامتحان
* بصي هو سهل بس ملحقتش اعمل قياسات المبنى الوقت خلص
– انتي عملتي اللي عليكي ربنا يعوض خير يا حبيبتي
* يارب. بقولك معلش مش هقدر اروح معاكي النهاردة عشان مصطفى جاي ياخدني
– اااااه خطيبك بقا وحبيبك عايز يطمن عليكي حقه طيب طيب روحي معاه
* سلام يا سلاسل
– سلام
مشيت هدير وانا روحت كفاتيريا الجامعة اشتري اي حاجة اكلها عشان جعانة ولسه مشواري طويل
اشتريت مولتو بالشيكولاتة لسه هفتح الكيس لقيت الدكتور قاعد في ترابيزة لوحده وبياكل كريب كان فاتح تليفونه
على حاجة بيتفرج عليها
قربت منه من غير ما ياخد باله وبصيت على تليفونه اشوفه بيتفرج على ايه وهنا كانت المفاجاة الكبيرة التي لم يتوقعها الجميع !!
دكتور سيف بيتفرج على مسلسل تركي !!
– الللله مين يصدق ان وراء الراجل اللي مخوف الجميع جانب منه بيحب التركي الله كمان بيتفرج على مسلسل السجين
قعدت على ترابيزة معاه وكان مش حاسس بحاجة ومنسجم مع المسلسل اوي ف قولتله
– يا دكتور سيف
سمع صوتي بصلي بتفاجىء قفل تليفونه بسرعة وخباه وقام من كرسيه وقال بتوتر
= مروحتيش ليه ؟ الامتحان خلص ليه لسه قاعدة هنا ؟
– مفيش كنت بشتري مولتو اكله في الطريق لان باخد وقت في المواصلات
= اها
– مالك متوتر ليه يا دكتور ؟
= متوتر انا متوتر ؟ لالا مش متوتر ولا حاجة بس الجامعة فضيت كله مشي ف استغربت انك لسه قاعدة
– حلو اوي المسلسل التركي اللي اسمه السجين مش كده يا دكتور ؟
= مسلسل تركي ايه ؟
– اللي حضرتك بتتفرج عليه دلوقتي خبيت التليفون عشان معرفش خايف اقول للدفعة انك بتابع تركي صح ؟
= ما انتي لو قولتي كده هيبتي هتضيع بين الطلبة
– ليه يعني ؟ هو غلط تتفرج على حاجة بتحبها يعني عادي انت حر اعمل اللي يريح حضرتك
= انتي بتتكلمي بجد ؟