اسمع يالا انت مش هتعمل فيها صاحبي.. خليك في حالك ومتقربش مني تاني عشان المرة الجاية مش هتناقش معاك.. انا هخلص عليك علطول ، انت فاهم ولا لا
= صدقني والله انت هتندم في يوم من الايام على اللي بتعمله دا
” مكنش في رد منه ولما بصيت ورايا مكنش ملقتش حد وشكله هرب.. بصيت يمين وشمال مكنش في،اي اثر لييه نهائي.. رجعت المطعم تاني عشان اول ما ادخل الاقي الناس بتمسكني وبتكتفني
الواد دا تبع الحرامي.. امسكوه كويس
” حاولت اتكلم أكتر من مرة عشان يعرفو اني مليش علاقة بيه ولكن مكنش حد سامعني ومحدش اهتم اساسا.. و روحت القسم
انت متهم ب سرقة مكتب فريد حسني نورالدين
= مين دا معرفوش
انت هتستعبط يا روح ا*مك.. بلاش بقا الشغل دا عشان حافظينه كلنا ، قولي بقا ومن غير لف ودوران ، فين الواد اللي كان معاك
= يا فندم والله ما اعرف.. والله ما كان معايا حد أصلا ولا اعرف حد
عايز تدوخنا برضو يا أدهم.. عايز تخلينا نستعمل معاك الطريقة الصعبة اللي مش هتعجبك
= يا فندم صدقني انا معرفوش والله ومليش علاقة باللي سرق دا نهائي
الناس كلها شهدت ان أول ما النور رجع انت خرجت من الفندق وجريت
= ايوا جريت وراه لإني سمعت ناس بتقول في حرامي.. يعني هو دا ذنبي؟
وانت تفكر بقا اني هصدق الكلام دا.. طب انت لو مكاني هتصدق؟
= بس دا اللي حصل.. انا مبكدبش
ابقا روح قولهم كدا في النيابة
” وفعلا اتحولت على النيابة و اتحبست 15 يوم على ذمة التحقيق.. الدنيا كانت بتضيق بيا أكتر ومعنديش حد اكلمه عشان يلحقني. مبقاش ليا حد في الدنيا.. كنت بعيط بعد ما كل اللي في الزنزانة ينامو.. بعيط لإني مبقتش قادر استحمل اللي انا فيه.. كل حاجة بتحصل من حواليا بتهد فيا وأنا واقف مصدوم مش عارف اعمل حاجة لحد ما حصلت حاجة مكنتش متوقعها.. في مرة كنت هتعرض على النيابة بليل.. و خرجت من الزنزانة عشان اركب عربية الترحيلات لكن فجأه ظهر موتسيكل وسط الناس وضر*ب طل*قة في الهوا و اتفاجأت ان الشخص اللي كان مربوط معايا في الكلبش بيفكه
اهرب بسرعة
” جريت بسرعة من القسم والعساكر بتجري ورايا.. لقيت الموتسيكل في وشي . راكب عليه نفس الشخص اللي قابلته قبل كدا.. ايوا هو ، الفهد ، زعق فيا وقال
اركب
” ركبت وراه بدون تفكير وهربنا من المكان.. كان بيجري بسرعة جدا بالموتسيكل.. مكنش بينطق ب كلمة واحدة ولابس نفس اللبس بتاعه.. حسيت اننا بنبعد عن الناس و بنمشي في طرق غريبة لحد ما دخل مكان مهجور ومشي فيه من يقرب من نص ساعة وفجأة وقف قدام بيت ونزل من على الموتسيكل ومشي لحد دخل البيت.. نزلت وراه وانا مش فاهم اي حاجة.. دخلت البيت اللي هو دخله.. لقيته واقف ومش باصصلي