= نتحرك على فين
هنطلع الاول على اسكندرية ومن هناك هناخد مركب نطلع بيها على اسبانيا
= واشمعنا اسبانيا
ليا ناس اعرفهم هناك وهما مجهزين كل حاجة لما نوصل
= طب كنتي قوليلي من بدري عشان اعمل حسابي
تعمل حسابك على ايه.. وبعدين كل حاجة معايا تحت في العربية ولما نوصل هناك هشتريلك لبس جديد وتليفون جديد.. كل اللي انت عايزه هيبقا تحت امرك
= يعني أنتي واثقة من اللي هنعمله دا
يا أدهم واثقة.. يلا بقا
” غيرت هدومي ونزلت معاها.. ركبنا العربية ومشينا.. كنت قلقان طول الطريق.. حاسس ب حاجة غريبة ، كنت خايف مش هكدب بس بحاول اطمن نفسي بأي شكل لإني معرفش الخوف دا مصدره ايه.. وسط كل دا لقيت العربية وقفت
في ايه
= باينها عطلت.. هنركن شوية على جنب لحد ما اكلم حد ييجي ياخدنا
” نزلت من العربية و بدأت ازقها.. شهيرة نزلت من العربية وقالت
خليك هنا متتحركش.. هعمل مكالمة و جاية
” مشيت وانا ببص على المكان من حواليا بستكشفه.. كان في مصانع قديمة جدا ، مشيت ناحيتها بس وانا ماشي كنت سامع صوت.. صوت خبط ، كأن حد معاه حديدة وبيخبط بيها على الأرض ، مشيت ناحية مصدر الصوت بس ملقتش حد.. المكان كان ضلمة وانا مشغل كشاف الموبايل ، بصيت يمين وشمال ملقتش حاجة، قررت اني هلف و ارجع للعربية بس فجأه نور المكان كله اشتغل وشوفت قدامي.. خالد و غادة و كان معاهم رجالة كتير أوي أكتر من 10.. كنت لسة هرجع و اجري لكن لقيت شهيرة واقفة في ضهري
شهيرة الحقيني.. خالد وغادة هنا
” كنت بشاورلها عليهم.. وهي واقفة ساكتة مبتتكلمش لحد ما غادة بدأت تضحك بصوت عالي
مسكين يا أدهم.. والله صعبان عليا ، مفيش حد ينجدك المرادي
” بصيت على شهيرة وغادة كانت لسة بتكمل كلام
قصدك على غزال يعني.. غزال معانا يا حبيبي ، كل الفيلم دا اصلا من تخطيطها.. الصراحة كانت لعبة كبيرة اوي وانا محبتش ادخل فيها خصوصا بعد ما عرفت انك مع الواد اللي اسمه الفهد دا
فلاش باك
انا هدخل وسطهم.، لازم اسحب أدهم ناحيتي و اخليه يثق و بعدها اسلمهولك.. طول ما هو مع الفهد مش هنعرف نعمله حاجة
= طب هتبدأي ازاي و امتا
انا عارفة ان الفهد عنده عملية.. هدخل انا و ابوظ العملية بتاعته.. بعدها هو هيدور عليا و انا هكون سايبة ورايا كل الخيوط عشان يلاقيني بسرعة و اول ما يلاقيني هحكيله على الاتفاق اللي دار بينا انا وانتي عشان يصدقني و اعرف ادخل وسطهم
باك