= وانا دوري هيكون ايه
حاجة سهلة خالص برضو.. احنا هندخل البنك عادي جدا.. انا هتسحب و هروح على مكتب المدير.. أنا عرفت انه بيخرج يصلي الظهر في الجامع.. اول ما يخرج من مكتبه هندخل البنك.. انا هدخل المكتب وانت هتكون واقف في البنك ومراقب خطوات اللي رايح واللي جاي و اول ما تحس انه حد بيقرب ناحية المكتب هتكلمني
” اتحركنا في نفس اليوم.. وصلنا قدام البنك الساعة 12 ونص.. ناقص نص ساعة والظهر يأذن.. فضلنا واقفين بدون ما نلفت الانتباه.. لحد ما الظهر آذن بالفعل وشوفنا مدير البنك وهو خارج.. دخلنا البنك بعده بهدوء.. وقفت انا في البنك و الفهد بدأ يتسحب ل جوا.. فضلت واقف متابع خطوات الناس كلها بس وسط مانا براقب شوفتها.. شهيرة عبدالرحمن.. حب الجامعة ، حب عمري كله واللي سيبته يضيع مني بسبب الخوف من أني اروح و اعترفلها ب حبي عشان في الاخر ربنا يعاقبني و اتجوز غادة.. كانت واقفة مش واخدة بالها مني.. قربت منها
ايه دا.. مش معقول ، شهيرة ازيك
” ابتسمت ابتسامة خفيفة
= الحمدلله.. مين حضرتك
انا أدهم.. فاكراني
= لا الحقيقة مش فاكرة
اللي كنت معاكي في الجامعة .. مش فاكرة ادهم بتاع الملخصات؟
= يا نهار ابيض.. عامل ايه
انا تمام.. انتي اللي فين ، اختفيتي كدا فجأه
= سافرت مع بابا عشان كان تعبان جدا و بيتعالج برا
طب هو ايه اخباره دلوقتي؟
= هو توفى
انا اسف.. ربنا يرحمه
= المهم طمني انت عامل ايه في حياتك ، اتجوزت؟
و طلقت
= بالسرعة دي
الايام بقت سريعة جدا والله يا شهيرة.. فجأه لقيت نفسي اتجوزت كدا معرفش ازاي
” ضحكت وأنا حسيت ساعتها اني بدوب من جمال ضحكتها
طب ايه.. أنتي بتخرجي فين ولا بتعملي ايه بالظبط
= انا دايما قاعدة في كافيه اركان.. مبتحركش من هناك
أنتي لسة بتروحي الكافيه دا؟
= ولا عمري ازهق منه
يعني هشوفك هناك
= لو عايز تعالى
دا انا عايز أوي.. عايز خالص