طب احكيلي بقا.. انت مزعل غادة ليه
= وانت عرفت منين
غادة من الصبح عندنا تحت وقاعدة مع مراتي تحكيلها وقالتلي انكو اتخانقتو امبارح.. قولي بقا اتخانقتو ليه
= وهي مقالتش اتخانقنا ليه
طب ما تعملها اللي هي عايزاه.. لو عايزة تتبنى طفل اتبناه و اخلص يا أدهم من وجع الدماغ دا
= اتبنا طفل!! ، هي قالتلكو كدا؟
اه.. هو مش هو دا اللي حصل ولا ايه ؟
= هو دا اللي حصل اه
طب ما تعملها اللي هي عايزاه و ريح دماغك
= هفكر حاضر
بص.. انا هنزل اتكلم معاها وهقولها انك موافق عشان تخلص من الخناقات دي
= لا متعملش كدا
ليه.. انت عاجبك وانت نايم على الكنبة كدا يعني؟
= بقولك ايه يا خالد.. اخرج انت من الموضوع دا و سيبني انا هتصرف
ياابني انا عايز اساعدك
= طب سيبني بس شوية وانا هفكر احلها ازاي
ملهاش حل غير اللي انا قولته.. وأسمع كلامي بقا ، تعالى انزل معايا و اتكلم معاها انت بنفسك
” كنت مش مركز معاه اساسا.. وكان تفكيري كله في أنها كدبت عليهم طب ليه.. اكيد عشان عارفة ان كلامها غلط ولو قالت كدا كلهم هيقفو معايا انا مش هي.. ولكن نزلت معاه بالفعل و اتكلمت معاها وحاولت اقنعها ب وجهة نظري و دا طبعا كان قدامهم بس لكن انا كان ليا تصرف تاني خالص.. بعد نقاش طويل وافقت أنها تطلع معايا على الشقة تاني و بمجرد ما قفلت باب الشقة
انا داخلة انام شوية.. تصبح على خير
= خدي هنا.. انتي ايه اللي أنتي قولتيه تحت دا
قولت ايه
= مش عارفة قولتي ايه؟
قصدك على موضوع التبني
= برافو عليكى.. طب ما أنتي فاكرة اهو
و انت ايه اللي مزعلك من الموضوع دا ؟
= عشان مقولتيش الحقيقة.. مقولتيش على اللي أنتي عايزة تعمليه
عشان دي مش حاجة تتقال
= ماهو عشان دا غلط.. عشان دا كلام ميطلعش من واحدة محترمة
قصدك ايه يعني
= قصدي اللي أنتي فهمتيه