هي اكيد مراحتش بعيد يعني هي قريبة من هنا بس هتكون فين بقا.. مكنش في غير مكان واحد ، البيت ، جريت بسرعة عليه لحد ما وصلت ، طلعت السلم لقيت باب شقة خالد مقفول.. سندت عليه ب ايدي لقيته اتفتح والواضح انه متقفلش كويس.. دخلت جوا وقفلت ورايا سمعت صوت جاي من اوضة جوا.. مشيت بهدوء ناحية الصوت وسمعت غادة وهي بتتكلم
انت مين وعايز مننا ايه.. خلي بالك انت مش هتعرف تهرب من الناس اللي تحت دي.. شوف انت عايز ايه و خده بس فكنا
” باب الأوضة مكنش مقفول كويس.. كنت شايف غادة وخالد وهما قاعدين مربوطين على الكرسي والفهد واقف قدامهم.. خالد ساعتها بدأ يتكلم
انت تبع أدهم؟
” الفهد قرب منه و ضر*به بالقلم
تبقا انت تعرف أدهم.. لو شوفت أدهم قوله يسامحني ، قوله اني مكنتش عايز اعمل كدا
” غادة اتكلمت في الوقت دا
بقا انت بقا تبع أدهم.. انت الدكر اللي هو باعته عشان ياخدله حقه.. طب لو هو راجل اوي كدا وعايز ياخد حقه كان جه هو بنفسه لكن انا عارفاه.. عبيط واهبل ويخاف من خياله.. عايزاك بقا تقوله اني مش هسيبه.. مش هسيبه حتى لو في اخر الدنيا
” الفهد قرب منها و رفع في وشها المسد*س.. في اللحظة دي دخلت بسرعة ونزلت ايده اللي فيها السلا*ح
بلاش
” رجع خطوتين ل ورا ووقف ساكت.. لفيت ورايا وبصيت عليهم وهما مربوطين قدامي.. خالد كان باصص في الارض اما هي كانت بتبصلي بكل شر
جايب واحد يحميك يا دكر.. طب مش عيب
= انتي اخر واحدة يا غادة تتكلمي عن العيب.. أنتي واحدة معندكيش شرف.. البلد كل دقيقة الحاجات فيها بتغلى اكتر وانتي كل شوية بترخصي أكتر واكتر.. انتي بايعة نفسك لأي حد
” ساعتها خالد رفع وشه وبص ليا
يعني تفتكر يا خالد لو هي جالها واحد معاه فلوس أكتر متخيل أنها هترفض وهتكمل معاك.. دي باعت جوزها.. يعني مليون في المية هتبيعك ، انا بس اللي صعبان عليا هو انت يا خالد ، استفادت ايه لما عملت كدا.. بالعكس دا انت خسرت ، خسرت مراتك وخسرت اخوك وقريب هتخسر الهانم اللي قاعدة جنبك ، انت مبقاش عندك حاجة كويسة في حياتك
” غادة هي اللي ردت عليا ساعتها
وانت بقا اللي عندك حاجة كويسة في حياتك
= كفاية انك مش موجودة فيها.. دي بالنسبالي أكتر حاجة كويسة
” الفهد قرب مني وهمس
يلا بينا بسرعة.. الرجالة اللي كانو في الفرح طالعين على هنا
= طب انت عندك مكان نهرب منه
هنهرب من السطح.. يلا بسرعة