ايه الجنان ده ايه الغموض ده محدش فاهم حاجه غير ” يامن ” اللي كان زعلان عليا
فات اسبوع ورا التاني وانا مازلت علي حالتي كل يوم اصحي من نومي بصرخ وبقول كلام مش مفهوم لدرجه جابولي دكتور نفسي
كان يجيلي كل يوم يحاول يخرج مني اي كلمه لكن انا رافضه اتكلم رافضه اقول اي حاجه
لكن الغريبه أنه مكانش بييأس بالعكس كان يجيلي ويفضل يتكلم عن أي هري ويفضل يحكيلي عن الناس اللي كانت عنده زمان واتعالجت
كان يفضل يحكيلي حاجات غريبه ومرعبه
حقيقي اللي يشوف بلاوي الناس تهون عليه بلوته !
معقوله في ناس بالشكل ده في ناس ممكن تأذي حد وتظلمه وتروح تنام علي مخدتها بكل راحه
ازاي بقينا بالشكل ده ازاي بقينا مؤذيين اوي كده ؟!
فوقت من شرودي علي صوت الباب بيخبط
اتعدلت وانا بقول بهمس : – اتفضل
دخل الدكتور بابتسامته اللي مش بتفارق وشه وهو بيقول بمرح : – مساء الخير
رديت بهدوء : – مساء النور
– الاااااه
قالها بطريقه مضحكه فضحكت بهدوء وانا بسأله: – في ايه ؟!
قعد علي الكرسي بتاعه وهو بيحط شنطته: – اصلك اول مره تتكلمي تصدقي هتصدقي أن شاء الله انا لو مش متجوز كنت فكرت في الجواز تاني
و وطي صوته مره واحده : – اوعي تقولي لمراتي دي مجنونه وممكن تصدق وتنكد عليا لسنه ضوئيه
ضحكت علي كلامه من غير ما انطق حرف