عاصي قعد في اوضته كالعاده وهو قاعد بيبص لقي عبد الرحيم بيخبط عليه
عبد الرحيم: عاصي بيه
عاصي: في ايه
عبد الرحيم: في شيخ تحت وبيقول انه عايزك
عاصي استغرب..
عاصي: شيخ.. شيخ مين.
عاصي نزل تحت لقاه الشيخ اللي قابله في الجامع
عاصي: ( باستغراب ) انت.. انت
الشيخ: انا عارف انت تلاقيك بتقول عرف عنواني منين
عاصي: ايوه فعلا
الشيخ: انا لاقيت المحفظه بتاعتك في الجامع وفيها مبلغ مالي كبير استنيتك تيجي تاخدها بالايام وانت ما جيتش لحد ما قررت انا اللي اجيلك واديهالك بنفسي وشوفت من البطاقه العنوان بتاعك
عاصي: ( بابتسامه وهو بياخد المحفظه من ايد الشيخ ) ياااااه انا قاعد في اوضتي طول الفتره الي فاتت دي وما اخدتش بالي اصلا انها ضايعه
الشيخ: للدرجه دي.. دي فيها فيزا كارد وفلوس وبطاقه ازاي ما اخدتش بالك
عاصي: الهم اللي شايله فوق كتافي مخليني حتي ناسي نفسي
الشيخ: وناسي تحلق دقنك كمان
عاصي: ( حط ايده علي دقنه وبص وراه في المرايه ) فعلا دقني طولت
الشيخ: وتفتكر انك تطول دقنك وتحبس نفسك في اوضتك ده هيحللك مشاكلك
عاصي: وتفتكر ايه اللي هيحللي مشاكلي
الشيخ بص حواليه وشاف النعم الكتير اللي ربنا مديها لعاصي
الشيخ: انت في نعمه محدش يحلم بيها..قرب من ربنا.. واتصدق علي الغلابه وحقق حلمهم.. اتبرع للمستشفيات.. غير حياه ناس كتير للاحسن في ناس بتضيع كل يوم خليك انت سبب في حياتهم تبقي احسن.. كتييير بيتمني يبقي عنده ربع اللي عندك ولما تعمل اللي بقولك عليه هتلاقي ربنا شرح قلبك وزال همك وخفف ذنوبك واهم حاجه ماتنساش الصلاه
عاصي وقتها ( سرح ) وافتكر بدور وانه بأيديه يكفر عن ذنوبه فيها