احسان: ( وهي بتعيط ) ماتقلقش عليا يابابا ده مش دمي
ابو احسان: اومال دم مين ده يابت انطقي
احسان ده دم مريضه جت عندنا في المستشفي كانت عامله حادثه بس للاسف مالحقنهاش
ماما احسان: ادخلي يابنتي.. ادخلي غيرى هدومك وخوديلك دش وان شاء الله خير والله يرحم اللي ماتت ويحسن إليها
احسان دخلت البيت ومامتها بقت تسندها وهي في حضنها ودخلتها الحمام
ام احسان: ادخلي.. ادخلي يابنتي وهجيبلك غيارك حالا
احسان دخلت وقفلت الباب عليها وقعدت في الارض وبقت تفتكر انها كانت ممكن تموت في اي لحظه وبقت تشوف في خيالها نظرات فيروز لعاصي ووقت ما كانوا بيدفنوها احسان مهما كانت فهي بني ادمه عندها مشاعر والموقف اللي حصل قدامها صحي ضميرها اللي كان ميت من سنين قلعت هدومها ونزلت تحت الدش وبقي دم احسان نازل من ايديها في الارض وكل ماتشوف الدم وهو نازل كانت بتبكي اكتر واكتر
———————( في نفس الوقت )——————————
عاصي كان سايق العربيه زي المجنون مش عارف يروح فين او ييجي منين كل حاجه وحشه عاملها كانت بتعدي قدام عنيه كل الشر اللي عمله في حياته كان بيفتكره وبقي يحاسب نفسه علي كل غلطاته ولو كانت هاله قتلته وبقي مكان فيروزه تحت التراب ياترى الناس هتفتكره بأيه كان زمانه ادفن ومشيوا وسابووه وكان هيقابل ربنا بكل الذنوب دي ازاي –
عاصي وقف مره واحده بعربيته في المقطم في مكانه اللي بيرتاح فيه وقرر انه يغير حياته بس المره دي لازم يحسبها صح
مره واحده بيبص لقي اذان الفجر بيأذن وبيسمع كلمه الله اكبر.. حس ان ربنا بيديله فرصه تانيه انه يعيد حساباته في الدنيا ويصلح اللي عمله زمان
————————( في نفس الوقت )———————–
غالب كان قلقان جدا علي بدور
الدكتور طلع من عندها
غالب: طمني يادكتور هي عامله اي
اكتور: انا وقفتلها النزيف العضه اللي اتعضتها مكانتش سهله وباين انه كلب مسعور
لازم تاخد حقنه يوميا عشان تكون كويسه
غالب: تمام يادكتور
الدكتور مشي من هنا وغالب لسه هيدخل لبدور بقي يخبط علي الباب
غالب: بدور