خرج الدكتور وعينه في الأرض وقدامه شاب متعور وهدومه كلها دم
الدكتور : قدرنا ننقذ المريضة بس للأسف مقدرناش نلحق الجنين.. البقاء لله
بدر : جنين !!! جنين ايه يادكتور
الدكتور : حضرتك تقرب للمريضة ايه الأول ؟
بدر : انا خطيب اختها .. جنين ايه اللي بتتكلم عنه احنا هانخرف !!
حضرتك اكيد متلغبط بين اخت خطيبتي وواحدة تانية
الدكتور : مستحيل .. مش اخت خطيبتك إسمها زهرة وقصيرة وشعرها أسود طويل ؟
بدر : أيوة بس مستحييييل تكون حامل دي اشرف من الشرف ولا حد لمسها أصلا انت بتقول ااااايه
الدكتور : ده التقرير الطبي بتاع زهرة تقدر تقراه وتتأكد من كلامي .. عن إذنك
بدر مسك التقرير يقراه .. بدأ يبرق وعينه تحمر لما اتأكد من كلام الدكتور بجد
التقرير وقع من ايده في لحظة مش قادر يستوعب فيها اللي بيحصل !
بدر للممرضة : العربية اللي خبطت عربيتنا اللي كان فيها مات ولا عايش ياانسة ؟؟
الممرضة : سبحان الله .. الشاب اللي خبطكم بالعربية جبناه هنا ولسة ملحقناش نعمله حاجة اختفى وهرب بالجروح والكسور اللي كانت فيه
وطى بدر جاب التقرير من الأرض
وراح في اتجاه الاوضة اللي فيها زهرة
زهرة نايمة علي السرير دماغها ملفوفة بالشاش وشعرها الاسود مفرود ع المخدة جنبها ودراعها ملفوف .. بدأت تفتح عينيها وتفوق