فارس بصلها بنظرات مش مفهومه أو بالأصح محدش فهمها غير نيرمين بس وقال : أهلاً نيرمين
نيرمين أخدت شنطتها وقالت : همشي أنا يا ميرا و هجيلك في وقت تاني سلام يا فارس
فارس شاورلها وهو مبتسم..
قالت ميرا : خليك هروح الحمام وأجي علي طول
أخدت موبايلها ودخلت ورنت علي رقم وقالت : متجيش إوعي تيجي
الشخص بعصبية : إحنا هنهزر بقا ولا إيه انا تحت عمارتك
ميرا بسرعه وقلق : لأ لأ إمشي تاني معلش أءءء..أصل قرايبي عندي معلش خليها مره تانيه
قفلت وفتحت باب الحمام لقت فارس واقف وباصصلها بإبتسامة باردة وقال : كنتي بتكلمي مين يا ميرا ؟
ميرا بلعت ريقها وقالت بتوتر : ك..كنت بكلم بتاع الدليفري
فارس بشك : وبتاع الدليفري بتكلميه في الحمام ؟
ميرا رجعت شعرها لورا وقالت : لأ أصل هو رن وأنا في الحمام وكدة
فارس ربع إيديه وقال : و واخده موبايلك معاكي الحمام ليه كنتي حاسه إنه هيرن ؟
إبتسمت وقالت : نسيتو في جيبي يا حبيبي
إتعلقت في دراعو وقالت : وبعدين سيبك من كل دا وتعالي نقعد مع بعض أصل إنت واحشني أوي
إبتسم ليها وطلعو قعدو في الصاله وهي بتتكلم معاه وهو شارد تماماً في حااجة ناوي يعملها ..
ميرا قالت : فارس
فارس وهو مازال شارد رد وقال : إيه يا سارة
ميرا بصتله بصدمه وقالت بزعيق : فارس أنا ميرا
فارس فاق وقال : بتزعقي ليه يا ميرا ؟