معتز وهو بيشاور لجوا : إتفضل يا فارس هنبدأ من دلوقتي
فارس وقف مكانو وباصص للمستشفي من جوا بتردد
مسكت سارة إيده وإبتسمتله بثقة وتشجيع
مسك إيديها جامد ودخلو الممر سوا
وصلو الأوضة اللي فارس هياخد فيها الكيماوي وبدأ يتركبلو الأجهزه وسارة ماسكة إيده وعماله تطمن فيه وهو خايف..مش خايف من الكيماوي ، خايف لتسيبو وتبعد عنو
وزي ما يكون حاسه بيه قالت وهي بتشبك صوابع إيده في إيديها : متخافش مش هسيبك هفضل جمبك لحد أخر لحظة..
وبدأ فارس ياخد الكيماوي وكإنه مش حاسس بوجع طول ماهي جمبو وبتبصله بنفس الإبتسامة…
غمض عينه بقوه من شدة الوجع اللي حس بيه فاجأة و داس علي إيد سارة بس سارة قربت الكرسي وفضلت تطمنه
▪︎ بعد جلسة الكيماوي ▪︎
كان فارس طالع من الأوضة.. وقفو معتز وقال : فارس الأفضل إنك تتحجز في المستشفي لحد ما نخلص خالص يا فارس
فارس بإعتراض : مينفعش شغلي وبابا ومليكة ميعرفوش حاجة
سارة ببساطة : إحنا مطلعناش شهر عسل كلم باباك وقولو إننا طالعين شهر عسل بس هنطول شويه تعويضاً وكدة