مليكة بصتلها بسخريه وقالت : لا يا شيخة ؟ أخويا مش من السهل إنو يتضايق علي فُراق واحده هاا
قامت سارة وقفت وقالت : طب يلا مش هننام ؟
قفلت مليكة التلفزيون وقالت وهي بتقوم : أه يلا علشان نقوم فايقين..
دخلو الأوضة وكل واحده نامت علي سرير وسارة فضلت تفكر في إيه اللي ممكن يغير مود فارس لحد ما نامت..
▪︎ صباح تاني يوم ▪︎
صحيت سارة من النوم علي صوت المنبه قامت إتعدلت بصت علي مليكة لاقتها نايمه ، فصلت المنبه وقامت طلعت هدوم ليها من الدولاب وطلعت من الأوضة دخلت الحمام أخدت شاور وطلعت راحت المطبخ عملت فطار..
طلعت مليكة من الأوضة وهي بتفرك عينيها من أثر النوم ودخلت المطبخ وقالت بصوت ناعس : صباح الخير يا سرسور
سارة بإبتسامة : صباح النور يا قلب سرسور إدخلي خديلك شاور كدة علي ما أخلص الفطار
هزت مليكة راسها وقالت : تمام يا معلم
دخلت مليكة أخدت شاور وطلعت
قالت سارة : مليكة خشي صحي أخوكي
مليكة بتهريب : أوف أنا نسيت موبايلي جوا لازم أعمل مكالمة ضروري روحي إنتي صحيه علشان هتأخر في الأوضة
دبدبت سارة رجليها في الأرض وقالت : الله يسامحك يا مليكة الز*فت
دخلت وهي بتقدم رجل وبتأخر رجل لأوضة فارس بس قبل ما تفتح الباب سمعتو بيعيط وعمال يكرر جملة : الحمدلله ..الحمدلله علي كل حال
خبطت وقالت : فارس
مسمعتش صوت بعد كدة ودقيقه وفتح الباب وقال بإبتسامة : عيونه
قالت بجمود : الفطار
وسابتو ومشيت إتنهد وطلع وراها وقعد علي السفرة وهي حطت الأكل علي السفرة وندهت مليكة وجات علشان تدخل مسك إيديها وقال : سارة إنتي مش هتاكلي
قبل ما سارة ترد سحبت مليكة إيد سارة وقالت : أكيد طبعاً البيست فريند بتاعتي هتاكل معانا طبعاً
قعدت علي السفرة وكانت لسه هتاكل إفتكرت أول مرة لما قالها مش بحب حد ياكل معايا عينيها دمعت وبصت قدامها بشرود لاحظ فارس شرودها وعرف هي متضايقة من إيه وكان قاعد بيلـ”ـعن نفسو علي كل اللي عملو معاها..
قام فارس بعد ما خلص أكل وقال : هنزل أنا أروح مشوار كدة وهاجي علي طول أو إحتمال أتأخر
قالت سارة بتلقائية : مش هتشرب قهوتك وبعدين رايح فين ؟