رد عليه نوح بِصوت مش واضح : الأفعال بتقسي ، نادين ممكن تقسي عليا وتدوس علي قلبها علشان اللي عملتو
رامز بِهدوء : مش إنت يبن الناس روحت وحكيلتها كل حاجة ، هي أكيد فهمتك بس محتاجة ترتاح علشان اللي شافتو يا نوح مش قليل ، حط نفسك مكانها ، فكرة إن الست تشوف جوزها بيتجوز وفيه واحدة تانيه في حياتو دي لوحدها بتحسسهم بالنقص وبتك”سر يا نوح بتك”سر بجد ، فَ هي شافت كتير وإستحملت كتير أوي ومن حقها ترتاح شوية مش كدة ولا إيه
مسح نوح دموعو وقال : خايف فُراقها يطول أنا بجد مش قادر أعيش من غيرها والله ، أنا مش طايق البيت من غيرها ، اللي مصبرني ريحتها اللي فيه
دخلت سارة وهي ماسكه صينيه عليها عصير حطتها قدامهم وعيونها مدمعه لإنها كانت جايه وهتدخل بس سمعت كلام رامز ونوح مرضيتش تقاطعهم ، حطت الصينيه قدامهم وقالت : لو عوزتو أي حاجة إندهو عليا أنا برا
طلعت برا ومسحت دموعها اللي نزلت وقالت : ربنا يريح قلبك يا نوح ونادين ترجعلك بإذن الله
▪︎ بعد مرور أربع شهور ▪︎
طلع رامز من أوضة الأطفال وقال لِنوح اللي قاعد في الصاله : يبني حرام عليك أنا من ساعة ما نادين مشيت وإنت ملقحني معاك هنا ، يمكن بفكرك بيها لامؤخذة يعني ولا إيه ؟
ضحك نوح ضحكة خفيفة وقال : عارف إن متقل عليك بس مش حابب أقعد في البيت لوحدي ، بس لو حابب تمشي خلاص إمشي
قعد رامز جمب نوح وقال بِهزار : لأ قاعد علي قلبك لِحد ما نادين ترجع بإذن الله ، تيجي تستلم الشيفت مني بقا
ضحك نوح ضحكة خفيفة وسكت ، بص رامز علي شكل نوح وقال : طب إنزل نضف نفسك عند الحلاق يبني ، إنت دقنك كبرت وشعرك برضوا مهو مينفعش كدة