حور بسعاده:يلا يا جماعه الاكل جاهز …
الكل قام وقعدوا حوالين السفره …
تقى مرات احمد بصت للاكل وبعدين بصت لحور:انتى اللي عامله الاكل دا..
حور بفخر:ايوا أنا وبصت لمى..ومي ساعدتنى ..وبعدين غمزت لعمار اللي ابتسم لمى..
تقى:اممممم جميل جدا نفسك حلو في الاكل أنا نفسي اتعلم اعمل المكرونه صح كدا
حور:ابقى تعالى وانا أعلمك وبصت لعايده:مش كدا يا حماتى…
عايده كانت حاطه السلطه قدامها وبتاكل منها وعينيها على المحشي والبيشاميل اللي بقالها سنين مكالتهمش وريحتهم خلتها تبصلهم بشهيه لكن كبريائها منعها انها تمد ايديها.وتاكل…
حور لاحظت دا وقامت من مكانها…
وقربت من عايده وحطت قدامها طبق فيه حته مكرونه..
وابتسمت:مش دي اللي هتبوظ الدايت وهمستلها:متقلقيش هتفضلي مزه وحلوة …
عايده ابتسمت غصب عنها وخدت منها الطبق وادم بص لحور بفخر والكل بص لعايده باستغراب أنها بتاكل من الاكل دا لكن ابتسموا على حور اللى باين انها خدت محبة عايده اللي محدش بيقدر ياخدها…