عند زياد
زياد مش قادر يستحمل الاسبوعين اللى جايين يا ترى هتوافق بيه ولا لأ ، شعور الحيرة وحش اوى بس هو واثق فى ربنا خير
بالليل
فؤاد وسلمى بيقضوا اجمل اللحظات مع بعض فى نفس الوقت اللى شخص حزين وقلقان على الاستاذ فؤاد وطبعا كلكم عارفين انها روح
مر اليوم بخير على البعض والبعض الآخر لأ
تانى يوم ، بداية جديدة لكل إنسان
سلمى صحيت على لمسات فؤاد الرومانسية زى كل يوم وفؤاد مبسوط اوى وحاسس أنه خلاص ملك الجنة ومش عايز حاجات تانية بس نسى أن الجنة ممكن تبقى رماد فى لحظة بقدرة ربنا
سلمى صباح الخير يا روحى
فؤاد صباح النور عليكى يا قلب روحى
سلمى ايه الكلام الكبير ده اللى على الصبح
فؤاد اصلى محضرلك مفاجأة
سلمى قامت من على السرير وقالت مفاجأة ايه ؟
فؤاد اكيد مش هقولك لأنها مفاجأة ولو قولتلك مش هتكون مفاجأة
سلمى معاك حق يا حبيبى ، وقامت بايساه من خده
فؤاد مش هضعف بردو
سلمى باسته تانى من خده
فؤاد مش هضعف
فؤاد هقولك المفاجأة بالليل ، عايزة تجهزيلنا عشاء رومانسي كده وتجهز المكان كانى فى فندق 5 نجوم وانا هقولك على المفاجأة
سلمى فكره حلوة
فؤاد حضنها وقال ربنا يخليكى ليا دايما ونفضل مبسوطين علطول
سلمى يا رب يا حب ❤️
نرجع للشاب بتاع الكلية ماجد
ماجد الدراسه فضلها اسبوع وتبدأ وخلاص هشوفك وساعتها مش هسيبك ، شكلك قمر ومن نوعى المفضل وخلاص دخلتى دماغك وكده كده صحبتك منى دى حرف الميم يعنى هتكون فى جروب غير جروبك يعنى هتبقى فريسه سهله هههههههههههه ?
عند روح
روح قاعدة مكتئبة وزعلانه وخائفة وكمان بتفكر أن الكلية جاية وان فؤاد كان قايلها أنه هياخدها ويجبلها هدوم وأدوات الكلية ، طب دلوقتي هتعمل ايه ، إذا كان هى متعرفش هو بخير ولا لأ فقامت ولبست هدومها ونزلت عند حماها تحت
الام ايوه يا روح يا حبيبتى ، عامله ايه ، شكلك خاسس كده ليه ، انتى مش بتاكلى ولا ايه
روح حضنتها وقعدت تعيط جامد
الام قعدت تطبطب عليها وتقولها مالك يا روح ، مالك يا حبيبتى ، تعبانه عندك حاجة
روح طلعت من حضنها وقالت فؤاد يا ماما بقاله 3 ايام مش بيرد عليا وقافل موبايله وقالى انه رأيك شغل لمدة شهر وانا خايفة عليه وعايزة أكلمه واطمن عليه وعماله ارن يدينى مغلق ، قوليلى اعمل ايه
الام بحزن وقالت فى نفسها يااااه يا روح بتحبى فؤاد اوى كده وخائفة عليه وهو بيقضى شهر عسل مع مراته ، ملكش حظ يا ابنى ، هتضيع جوهرة من ايدك علشان خاطر شوية نحاس
الام متقلقيش يا حبيبتي ، اكيد مشغول مش اكتر ويومين كده وهيرن
روح وانا لسه هستنى يومين يا امى ، أنا خائفة عليه اوى وقلبى مش مطمن حاسه فى حاجة وحشة هتحصل علشان كده عايزة أكلمه واتأكد أنه بخير
الام فى سرها قلبك دليلك يا روح ، فعلا فى حاجة وحشة هتحصل بس ليكم انتم الاثنين ، لانه هيخسر وانتى هتتعبى ، بس نعمل ايه ، ده قدر ومكتوب
روح بتقولى ايه يا امى
الام يا روح ، هو اكيد بخير بدليل أنه لو مش بخير كانوا رنوا علينا أو جابوه لكن مدام كويس يبقى هيفضل هناك بيشتغل وهو اكيد مش هيفتح الموبايل فى أول شغله ، يومين زى ما قولتلك وهيرن عليكى
روح حتى بعد يومين مش هيرن ، لانه مش مهتم بيا وانا قاعدة هنا مرعوبة عليه ، هو عمره ما حبنى ولا حسسنى بالاهتمام ، هو شايف انى كويسه بس مش حاسس بأى حاجة من ناحيتى وممكن تكون فى واحدة تانية فى حياته ، الله اعلم
الام متخافيش يا روح ، تفائلى خير واللى ربنا هيكتبه هيكون خير ليكى وليه ، انتى بس اصبرى كمان يومين وشوفى هيرد ولا لأ
روح ماشى يا امى ، انا هطلع فوق بقى
الام لأ خليكى هنا معايا ، افطرى واتغدى واتعشى معايا وساعت النوم نامى تحت أو أنا هطلع انام معاكى علشان متحسيش بالوحدة والخوف
روح حاضر يا امى ، اللى تشوفيه اعمليه
الام ربنا يسعدك دائما يا بنتى ويعوضك خير دائما
روح اللهم امين يارب العالمين ?
عند ندى
ندى قاعدة بتشتغل وفجأة لقت مصطفى داخل عليها مكتبها ومعاه بوكيه ورد
مصطفى صباح الخير يا انسة ندى
ندى صباح النور يا استاذ مصطفى ، ايه المناسبة للهدية الجميلة دى
مصطفى الحمد لله انها عجبتك
ندى هى عجبتنى جدا لانى بحب الورد بس مقولتليش سببه ايه واشمعنا أنا بس
مصطفى علشان لسه جديدة فى الشركة فدى زى وسيلة ترحيب مش اكتر ، بتمنالك يوم سعيد وبالتوفيق دائما يلا سلام