القرين : أنا دخلت فيه قريب جداً كنت الأول دائماً قاعد في أوضة زبيدة وبراقبها سنين وأنا قافل قلبها من إنها تحب حد ..
نهر : يعني إنت كنت لابسها طيب خرجت منها ليه …
القرين :لا مدخلتش فيها لكن لما سليم كبر اتلبستوا هو وأنا اللي أثرت عليه وخليته يصر عليها علشان تعترف بالحقيقة وسليم كان تايه مش مظبوط ودخل على أوضة زبيدة لما رجع علشان يستسمحها بعد ماسمع كلام شمس ونور وقتها أنا
حليتها في عينيه
وهي مش هتقع في حبي أنا بس هو شاب وسيم وجميل ولازم أسيطر عليه علشان أكون مع زبيدة وتحبني ..
نهر : طيب ليه ما لبستش زبيدة ولبست سليم …
القرين : زبيدة اه أحياناً بتكون ضعيفة لكنها قريبه من ربها أوي مفيش فرض بتفوته ودايما بتقرأ قرآن مقدرتش أقرب منها بس أنا عشقتها بجنون ومش هسمح لأي حد يقرب منها …
نهر : وسليم ذنبه إيه بس…. إنت بهدلت دكتور وشاب علشان رغباتك وليه ظهرت قدامي دلوقتي ..
القرين : علشان إنتي قدرتي تتملكي من عقل وقلب سليم وبدأ يرفض وجودي وبدأ يسيطر على نفسه وإنتي السبب حتى الدكتور النفسي مقدرش يعالجه بس إنتي واقفة قدامي ومش خايفة مني ..
نهر : أعوذ بالله من الشيطان الرجيم أخاف منك إنت ليه وربنا معايا حرام عليك أخرج من سليم وارحمه ..
القرين : إنتي كمان شبه زبيدة قوية وقريبه من ربنا وقرأتك للقرآن كل يوم على رأس سليم بعد ماينام استفزتيني بعد ما كنت موهوم إن سليم بشخصية مالك وسليم كان لازم يسمع كلامي ويتجوز زبيدة ويقع في حبها مش فاهم إزاي حبك إنتي …
نهر : وإنت بقى مضايق علشان قدرت أسيطر عليه صح …
القرين : اه وأنا هبعده عن تأثيرك ..
نهر : ولو مبعدش من تأثيري هتعمل إيه ..
القرين : طول ماإنتي بعيده عنه هيبقى بعيد عن تأثيرك وعلشان كدا ظهرتلك وبقولك مش هتتجوزيه لأنك لو اتجوزتيه هتموتي فاهمة …
نهر : ومين اللي هيقتلني إنت …
القرين : اه مش خايفة عايزه تجربي ..
نهر بتحدي : مش هتقدر..
القرين : إنتي بتتحديني ..
نهر بتحدي : اه علشان إنت موجود في جسم سليم وإنت اعترفت دلوقتي إنه بيحبني وزي ماهو مقدرش إنه يمضي على عقد جوازه من عمتي زبيدة مش هيقدر يقتلني …
سليم عينيه تحمر ومسك ايدها بعنف وصوته أتغير ..
انا هقتله لو مرجعتنيش عند زبيدة ودي آخر بلد هتروحي فيها وبعدها تروحي على طول على مكان زبيدة فاهمة ….
ساب ايدها وبدأ جسم سليم يتنفض
نهر بدموع : خلاص بلاش أرجوك سيبه أنا هوديك عندها….
سليم وقع مغمى عليه
نهر تجري ناحية سليم..
نهر : سليم أرجوك فوق ياسليم أرجوك …
باك ****
ريهام : يا نهار أسود يانهر وإزاي قدرتي تقفي وتتكلمي معاه من غير خوف ؟ وسليم عامل إيه دلوقتي ؟…
نهر : حرارته ارتفعت وفضلت طول الليل أعمله كمادات بارده و اديته حقنة خافضة وحرارته منزلتش
نهر بدموع : خايفة يموت مني ياريهام …
ريهام : القرين دا مش سهل يانهر وهو بيوريكي هو يقدر يعمل إيه في سليم طيب هو فين دلوقتى ؟
نهر : سألت على شيخ في البلد وحكيتله وهو بيقرأ عليه قرآن دلوقتي…