نهر : أخ نسيت اسأله إن كان لوحدوا أو في حد معاه أكيد متجوز بس لو كان اكده كان جال جايين مش عارفه المهم إني هوضب البيت الصغير اللي كانت ساكنه فيه صابحه وزبيدة للدكتور اكده يكون في الجصر وعلى راحته ولو جيه دكتور تانى يجعد امعاه أني هنزل أبلغ أم محروس
❈-❈-❈
سليم : تعالي ياأمي أقصد ياآنسة زبيدة ولا أقولك مدام أحسن
زبيدة : بجى اكده ياولدي إعتبرتني غريبة
سليم : معلش سامحيني أنا سمعت الحكاية من طرفك إنتي لازم أسمعها من حد تاني علشان أصدق إنك ما قتلتيش أمي علشان توصلي لأبويا وممكن هو كان كمان مدبر كل دا إن أخوها يقتلها وإنتي وهو تعيشوا في هنا
زبيدة : وأني هكذب ليه أني عمري ما كدبت عليك بحاجة ابداً وجلتلك كل الحجيجة علشان أني مش متعوده على الكذب
فاكر لما سألتني زمان فين أبوي هل أني ضحكت عليك فاكر رديت عليك بإيه
سليم : أكيد فاكر قلتيلي أبوك إنسان كويس لكن أحياناً التربية والبيئة هي اللي بتكون السبب في تصرفات البشر ومشيهم في طريق الغلط زي الغبار اللي بيكون في مكان أول مابيجي حد ويمسحه بيظهر معدنه النظيف هو دا اللي أقدر أقوله دلوقتي
يابني
سليم : إنتي قلتي إنك وقتها كنتي بتحبيه لدرجة إنك غفرتي كل أخطائه لكن ماتوقعتش إنك مش أمي وإنك يعني آسف على الكلمة دي عشيقته
نزلت دموع زبيدة وانهارت : أني في نظرك اكده الله يسامحك
سليم : أنا مأقصدش أجرحك تعالي ارتاحي بس إنتي إزاي جيتي لوحدك وإزاي عرفتي إني مسافر ..
زبيدة : أبوك جالي إنك جاي وإني لازمن أكون امعاك
سليم : الدكتور نور عمل كدا أنا قلتله ما يبلغكيش
زبيدة : لاه أبوك مالك جالي في المنام وجالي إنك جاي ولازمن أكون امعاك جومت من النوم مفزوعه أني خايفه عليك ياولدي وممكن أضحي بحياتي عشانك
سليم : لا دا حلم متخافيش سليم في نفسه حتى وهو ميت لسه بيحبك
زبيدة : أني عارفه إنك من يوم ماعرفت الحجيجة وإنت بتكرهني ودخل الشك في جلبك من ناحيتي لكن اني صادجه معاك في كل كلمه جلتها ..
سليم : وأنا قلتلك مش هقدر أصدقك إلا لما أعرف كل حاجة مش يمكن تكوني اخدتيني لحد ما أكبر وبعدها ترجعي بيا وتقولي إني إبنك وتورثي كل حاجة وطبعاً وقتها لما يعملوا التحليل هيتأكدوا إني ابنهم
زبيدة : خليك في شكك ديه بس أني لو زي مابتجول إكده وإني بحب الفلوس كنت زماني أمك عن جد وكنت وافجت على الجواز من مالك زمان يبجى اكده أني طمعانه في الفلوس
أني لو زي ماجلت كنت لما أتجدملي الدكتور عز وهو عندوا المال والجاه كنت وافجت وسبتك لنور وشمس يربوك وعمرك ماكنت عرفت حاجه عن الماضي
سليم وهو بيبصلها ومش مصدق اللي بيسمعه ورفضتي تتجوزي