عند نهر وسليم
نهر :ممكن البرشام دا ..
سليم : برشام إيه ..
نهر : اللي إنت اديتني منه إمبارح ..
سليم : اااه بس ليه عايزاه ..
نهر : هو ممنوع أشوفوا ..
سليم : لا طبعاً إتفضلي دا دكتور نفسي هو اللي كتبته ليا من وأنا صغير …
نهر : بتقول إيه من إمتا بالضبط ..
سليم : مش فاكر تقريباً وأنا في إعدادي كنت بحلم بكوابيس اخذتني أمي الدكتورة شمس للدكتورة دا …
نهر : وليه كان بيجيلك كوابيس ..
سليم قعد على الكرسي وأخذ نفس عميق وبدأ يحكيلها في نفس الوقت زبيدة كمان كانت بتحكي لمالك
زبيدة : أني وصلت للدكتورة شمس بمعجزه سنه كاملة وأني بدور عليها دورت عليها في كل المستشفيات لكن ملجيتهاش
في الوجت ديه اتعرفت على سعاد ومنصور وهما اللي ساعدوني إني أوصلها لما وصلت للمستشفى اللي بيشتغلوا فيها كانت طالعه من المستشفى بتاعتها هي وجوزها ومع إنهم كانوا مستواهم المادى بسيط إزاي مرة واحدة اكده بجى عندهم مستشفى …
مالك : أني عرفت إنهم شركا مع الدكتور عز وهو كان ببشتغل في بلاد برا ..
زبيدة : مش هو ديه السبب الرئيسي في اللي وصلوا له ..
مالك بتعجب : طب هو إيه ..
فلاش باك***
شمس خارجة من المستشفى هي ونور جت تركب العربية وقفتهم زبيدة
زبيدة : فين ولدي سليم ..
شمس : بسم الله الرحمن الرحيم إنتي موتيش ..
زبيدة :لاه ..
شمس : يعني هربتي من السجن صح ..
زبيدة : من غير لف ولا دوران يادكتورة أني عارفه كل حاجة عنك ولو فكرتي تبلغي عني إني عايشة أني كمان هبلغ عنيكي ..
شمس بعصبية: تبلغي عني أنا ليه إن شاءالله ..
زبيدة : التهم كتير أولها خطف ولدي مني ..
شمس : مش إبنك أنا كتبته بإسمي خلاص وأمه خدت تمنه من قبل مايتولد ..
زبيدة : هي دي التهمة التانية إنك استغليتي مهنتك كدكتورة في مستشفى في الصعيد بعيد عن الجانون اللي بيحاسب والعادات وإنك بجيتي تستغلي البنات الحوامل من ورا أهلهم او اللي أهل جوزها جاهلين وعايزين ولد مش بنت فتساوميهم وتشتري ولادهم جبل مايتولدوا ..
أني كنت عبيطه افتكرت إن نعمه صعبت عليكي بجد لكن إنتي ضحكتي عليها وزغللتي عينيها بالفلوس هي كمان بس المرة دي إنتي اللي خدتي الواد صوح أما الولاد الباجيين بتبعيهم للناس اللي معندهاش عيال صوح….
نور بخوف : الكلام دا ميتقلش كدا في الشارع ..
زبيدة : أني مهامشيش من اهنه أني عايزه ولدي …
شمس : ملكيش ولاد عندي روحي اشربي من البحر إنتي معندكيش إثبات …
زبيدة : لاه عندي إثبات وشهود كمان ماهو من سوء حظك إني لما دخلت السجن جابلت فادية أول ضحياكي وحكتلي إزاي إنتي ساومتيها على ولدها وإن أهلها وافجوا علشان يخلصوا من الفضيحه وبدال ماتنزل العيل يفضل في بطن أمه وإنتي تأجري شجة للبت لحد وجت ولادتها ولما تولد تعمليها عملية رجعتها بنت بنوت من تاني في المجابل تاخذي الولد وشوية ملاليم تترمي لأهل البنت ..
نور : تعالوا نقعد في أي مكان ونتفاهم واللي إنتي عايزاه هنفذه ..
شمس : إنت بتقول إيه ..
نور بحدة : بقول اللي سمعتيه ومفيش نقاش ..
باك ****
مالك : يا ولاد الكلب هو في بشر اكده وطبعاً أمي كانت عارفه بكل دين وبدل ما تاخد فلوس دفعت للدكتورة فلوس ..