نديم برجاء منبهاً اياها:
– خلي بالك من نفسك يا كاميليا … بلاش تتهوري تاني وتدخلي نفسك في مشكلة مع حد.. اديكي شوفتي كان المجرم ده ممكن يعمل فيكي ايه
اومأت بتأكيد:
– حاضر
__________
دلفت كاميليا شقة والدها..
كانت الأضواء مغلقة في الصالة، لكن التليفزيون مفتوح، “صفاء” ام “كاميليا” تجلس على الأريكة وكأنها تغالب النعاس..
لتفتح كاميليا باب الشقة وتدخل.. فنهضت صفاء وهي تضيء النور
همست كاميليا بتوتر :
– مساء الخير يا ماما
صفاء بتهكم:
– نقول صباح الخير يا ماما بقى .. ده الساعة وصلت 12 ! وانتي لسه مرجعتيش
كاميليا بتبرير:
– مانا قولتلك اني هشتغل النهاردة شيفت مسائي
صفاء بغيظ:
– للساعة 12 يا كاميليا !! شغل ايه ده اللي يقعد لنص الليل..
كاميليا محاولة السيطرة على نفسها حتى تتمالك أعصابها أمام امها هي لا تريد أن تعرف ما حدث لها :
– هيقولوا واحدة بتشتغل وظروف الشغل اخرتها شوية
صاحت امها بغيظ:
-انتي عايزة سيرتك تبقى على كل لسان ! عايزة الناس تقول عليكي ايه …
كاميليا تكاد تنفجر فوالدتها تربط كل حياتها بالناس :
– ماما انا تعبانة ومش قادرة اتكلم.. لو سمحتي انا عايزة انام.. والصبح نبقى نتكلم
قاطعتها امها بلهجة حاسمة عندما لفت انتباهها شيء هام :
– لا هتتكلمي … وبعدين !
نظرت لها بصدمة فكاميليا قد غيرت ما ترتديه وبيدها حقيبة ورقية لإحدى المحلات أصحاب الماركات الشهيرة :
-ايه ده استني هنا.. انتي مكنتيش لابسة كده وانتي نازلة .. غيرتي هدومك دي ازاي .. ولبس مين ده اصلا ؟؟؟؟
تلعثمت كاميليا بالكلام :
– دول يا ماما … لبس جديد عادي
هتفت امها “صفاء” بنبرة ساخرة:
– اوعي تقولي اشتريتهم.. دول اكيد تمنهم غالي اوي …
صمتت كاميليا.. لا تريد أن تكذب عليا وبنفس الوقت لا تريد أن تقلقها
اخذت منها الحقيبة الورقية التي بيدها فجأة :
-وريني الشنطة اللي في ايدك دي كده؟
صاحت كاميليا باعتراض:
– يا ماما انتي بتعملي ايه ؟؟؟
شهقت امها بصدمة وهي تفتح الحقيبة وترى ما بها :
-يلهوي .. ايه اللي قطع بلوزتك كده وايه الدم اللي عليها ده … ردي
هتفت كاميليا بحنق وعلى ملامحها السهر والإرهاق:
– طيب انا كنت هحكيلك بس ممكن تهدي وتوطي صوتك … كمال وجدو ودانا نايمين
همست برعب:
– فهميني ايه ده ؟؟؟ انتي حصلك حاجة ؟؟؟