قال أحمد بحدة:
– مش مجبرة أصلا تقولي … أوعي تقولي إنك مطلقة والكلام ده .. قولي إنك آنسة .. هما يعني هيدوروا وراك
– بس كده مش كذب
رفع حاجبه بثقة:
– كذبة تحميك.. وصدقيني كده أحسن
– تفتكروا ؟
– اه طبعا
ليتصل بها كمال شقيقها يذكرها بالرجل الذي أتى إليهم منذ عدة أشهر يصلح التكييف وأخذ رقم كمال .. ليخبره عن إعلان بالشركة لموظفين جدد لتقدم كاميليا به ففرحت كاميليا بشدة وحكت لأختها وزوج شقيقتها..ففرحوا بشدة
قال أحمد بتحذير :
– روحي و قدمي.. وبلاش تعرفي حد هناك إنك مطلقة أساسا
همست كاميليا بترجي:
– يارب اتقبل بقى واشتغل
تأتي الراحة في أصعب اللحظات.
في لحظة ما قبل اليأس ..
يأتي إليك أكبر مما كنت تعتقد .. وأجمل مما كنت تخطط له .. وأحلى مما كنت تصلي وتدعو من أجله.
______________
بعد تحديد موعد للمقابلة بالشركة ..
كانت تسجل بياناتها أمام موظفة الاستقبال قبل أن تقابل ال HR للشركة
سألتها الموظفة وهي تملأ الورقة :
– الحالة الاجتماعية ؟
ترددت كاميليا .. ثم همست بنبرة قوية:
– آا.. آنسة
سمعت صوت أنثوي خلفها بذهول:
– إيه ده ! كاميليا !!!
*******
التفتت كاميليا بتوتر لترى من صاحب الصوت الذي يعرفها !
فوجدت فتاة تعرفها جيدا .. صديقتها نسمة التي تعرفت عليها في بداية نزولها مصر.. منذ سنوات لم تراها فهي نقلت من جامعتها إلى جامعة أخرى ولم تراها منذ ذلك الوقت.. سلمت عليها بترحيب حار وعناق :
– وحشتيني يا نسمة
لترتسم على ملامحها السعادة:
– عاملة ايه يا كوكي .. ايه الاخبار ؟
– تمام أنتِ فينك اختفيتي كده فجأة ومعرفتش اوصلك تاني
زفرت نسمة بحزن :
– موبايلي باظ وقتها والارقام كلها ضاعت ومعرفتش اكلم كل صحابي
ابتسمت كاميليا برقة:
– مبسوطة بجد عشان شوفتك صدفة حلوة اوي
ثم اردفت بفضول:
– وانا اكتر .. انتي بتعملي ايه هنا ؟
كاميليا بتوتر:
– انا جاية اقدم على شغل .. وعندي مقابلة متحددة بس خايفة اوي متقبلش
نسمة بسعادة:
– بجد !! انا بشتغل في الفرع التاني للشركة بس بنزل هنا يومين في الاسبوع كده .. استني اعمل مكالمة لمستر وحيد ال HR بتاع الشركة
ثم أجرت مكالمة إلى وحيد زميلها وبعد انتهاءها .. نظرت لها كاميليا لتسألها بتوجس:
– تفتكري هيوافق ؟
– متقلقيش سيبيها عليا
تمنت كاميليا أن يوافقوا على تعيينها فهي لن تحصل على وظيفة مثلها ابداً خاصة أنها ببداية حياتها العملية، وهذه الشركة لها فرع بكندا فهي شركة multinational من أهم شركات المقاولات، تحتوي على معظم اقسام الهندسة
ولديهم فرع آخر من الشركة في مكان آخر
بعد دقائق في مكتب وحيد..
نظر لها قائلا بإعجاب و تقدير ممسكا بملفها الشخصي :